Oqaasiliortut tallimanngornermi juulip ulluisa 27-ianni
2001, nal. 14.00 ataatsimiinnerannit imaqarniliaq
Peqataasut: Carl Chr. Olsen, Alibak Steenholdt, allatsigalugu Kristine Olsvig. Nuka Møller angalavoq, Sofia Geisler peqataasinnaanani nalunaarpoq, Kelly Berthelsenip aasaanerani sulinngiffeqarnera peqqutigalugu pissarsiarineqanngilaq.
Oqaluuserisaq:
- Nunat Avannaamioqatigiit oqaatsit pillugit Sverigemi ataatsimeersuarnissaannut Oqaasiliortut peqataasinnaanerannut apeqqut.
CCO.: Nunat Avannaamioqatigiit oqaatsit pillugit ataatsimeersuarnissaat Sverigemi aggustip 31-ianiit septembarip ulluisa aappaat ilanngullugu ingerlanneqartussaavoq. Oqaasiliortut piumagunik peqataatitsisinnaapput, tamannalu piviusunngussappat angalanerup ilaani Dansk Sprognævnimut paasisassarsiorluni pulaanissaq siunertanut ilaavoq. Taassuma saniatigut pulaarneqarsinnaasutut eqqarsaataapput Institut for navneforskning aamma Kort & Matrikelstyrelsen.
CCO-ip angalanissaa Nordisk Sprogrådimit aningaasartuutaasussaavoq. Sofia Geisler Oqaasileriffimmut nalunaarpoq, angalanissaq piviusunngussappat nammineq peqataasinnaanani. Ukioq naalakkersuisoq Lise Skifte Lennert Oqaasiliortut ataatsimeersuarnissamut peqataasinnaanerannut apeqqummut ataatsimeeqatigineqarpoq. Naalakkersuisup isuma tapersersornartippaa, erseqqissaatigaluguli Oqaasileriffimmut aningaasaliissutaasimasut iluanni angalanissamut aningaasartuutissat kontonik nikisiterinikkut matussuserneqartariaqartut.
Taamaammat Oqaasileriffiup aningaasaqarniarnera eqqarsaatigalugu angalanissamut aningaasartuutissat matussuserniarnissaat kisimi apeqqutaalerpoq, imaammat aningaasat kontomit allamit nuunneqarsinnaasut naatsorsuutigisamit ikinnerulersimammata.
Periarfissap aapparaa angalanissaq aalajangiusimaannarlugu taamaallaalli piffissaa aappaagumut nuullugu, 2002-mut Oqaasileriffimmut aningaasaliissutit ilaat immikkoortereerlugit. Angalanissaq kinguartinneqassappat pilersaarusiorluagaasumik aaqqissuunneqarsinnaassaaq, ilaatigut suliffeqarfiit amerlanerusut pulaaneqarsinnaassallutik, taamatullu Oqaasiliortut tamarmiullutik peqataanissaat orniginarnerulluni. Taassuma saniatigut aamma piviusorsiornerussaaq Oqaasiliortut 2002-miit ilaasortaat angalatinneqassappata. Taakku siunissami suleriaasissamik ujartuiniarnerminni Dansk Sprognævn paasisassarsiorfigisinnaassammassuk, paasisatillu piffissami toqqagaaffimminni atorluarsinnaassammatigik. AS.: Angalatinneqarnissamut Oqaasiliortut tamarmik peqataasinnaassanersut apeqqutaavoq. CCO-ip angalanissaanut aningaasartuutissat qulakkeeriigaapput taakkulu Oqaasileriffiup aningaasaqarniarneranut kalluaataanavianngillat. Sofia Geisler peqataasinnaanani nalunaareerpoq, taamaalilluni angalanissamut inuit amerlanerpaamik pingasut naatsorsuutigineqarsinnaalerput.
Angalanissaq una Oqaasiliortunit marloqiusamik pissarsiffiusussaavoq, tassa Dansk Sprognævnimit aammalu Nunat Avannaamioqatigiit oqaatsit pillugit ataatsimeersuarnerannit. AS-ip angalanissaq aalajangiusimavaa aammalu peqataanissaminut akuersilluni.
KO.: Maannamut aningaasatigut naatsorsuutit tunngavigalugit angalanissaq piviusunngussappat Oqaasileriffiup ukiup sinneranut aningaasaqarniarnera najummassimanartorsiorfiusinnaavoq. Angalanissamut ullut amerlassusissai aallaavigigaanni, angalanermut aningaasartuutit, unnuisarfinni unnuinerit, ataatsimeersuarnermi peqataanermut tapit ullormusiallu eqqarsaatigalugit minnerpaamik aningaasartuutaasussaapput 100.000,00 koruunit.
CCO.: Aalajanginnginnermi Nuka Møllerip Kelly Berthelsenillu angalanissamut qanoq isummernersut tusarniarneqaqqaassaaq. Taassuma saniatigut Oqaasileriffiup aningaasatigut inissisimanera naliliiffigineqaqqaassaaq, angalanissarlu aningaasatigut Oqaasileriffimmut artukkiutaassagaluarpat piviusut tunngavigalugit angalanissaq 2002-mi pisussanngorlugu kinguartittariaqassaaq.
Carl Chr. Olsen Kristine Olsvig
Siulittaasoq Allatsi