Ujarlerit

Nunat Aqqinik Aalajangiisartut 2002 – 1

NAA – 200202 (gl)

Nunat Aqqinik Aalajangiisartut toqqagaarlaat februaarip ulluisa 20-anni nal. 15.00 siullermeerlutik ataatsimiinnerannit imaqarniliaq.

Peqataasut: Carl Chr. Olsen, Stephen Heilmann, Karl Elias Olsen, Kelly Berthelsen, allatsigalugu Kristine Olsvig. Mariane Petersen peqquteqarluni takkussinnaanani nalunaarpoq.

Oqaluuserisat:

  1. Nassuiaatit.
  2. Siulittaasussamik qinersineq.
  3. Ataatsimiittarnissat.
  4. Taasariaqartut allat.

Carl Chr. Olsen Oqaasileriffik sinnerlugu taamatullu Nunat Aqqinik Aalajangiisartunut ilaasortatut ilaasortaaqatiminut ataatsimiinnermut tikilluaqqusivoq.

Ilisimatitsissutigineqarpoq Mariane Petersen peqquteqarluni takkussinnaanani nalunaarsimasoq, taamatullu nalunaarutigisimallugu nammineq piffissaasuasarnini pissutigalugu siulittaasussatut sassarniarani. Marianep akornutissaqartinnginnerarpaa nammineq peqataanngikkaluarluni siulittaasussamik toqqaasoqarpat.

– 1 pillugu –

Nunat Aqqinik Aalajangiisartut piginnaasaat pillugit inatsisit erseqqissarnerullugit CCO-mit nassuiaatigineqarput. Ileqquuvoq Nunat Aqqinik Aalajangiisartunut ilaasortassatut naalakkersuisunit toqqarneqartut arlaat siulittaasunngortinneqartarluni, tamannali inatsisitigut piumasaqaataanngilaq. Naalakkersuisunit Carl Chr. Olsen, Mariane Petersen Karl Elias Olsenilu toqqarneqarput. Oqaasiliortunit Stephen Heilmann Kelly Berthelsenilu ilaasortassatut toqqagaapput. Toqqagaaffik ukiunik sisamanik sivisussuseqartarpoq. Maanna toqqagaasut 2006-ip tungaanut atuutissapput.

Ataatsimiinnersiutit Oqaasileriffimmut aningaasaliissutit ilaanniit isumagineqartarput. Taakku saniatigut Nunat Aqqinik Aalajangiisartunut atugassanik immikkut aningaasaliissuteqanngilaq. Nunap assingisa naqiternissaat Kort & Matrikelstyrelsip akisussaaffigai. Nunat Aqqinik Aalajangiisartut pisussaaffigaat aqqit atortuulersussat pisortanut nalunaarutiginissaat.

Nunat Aqqinik Aalajangiisartut Oqaasiliortut qanimut suleqatigisarpaat, pingaartumik nunat aqqisa allannissaannut tunngasuni.

Illoqarfiit nunaqarfiillu iluini aqqit kommuneqarfinnit oqartussaaffigineqarput. Taakku

avataaniittut Nunat Aqqinik Aalajangiisartut aalajangiiffigisinnaavaat. Nunat Aqqinik Aalajangiisartut allannguutissanik nunamut tamarmut atuuttussamik aalajangiisimatillutik allannguutaasut atortinneqalernissaat ukiunik sisamanik sioqqullugu avammut kalerriutigisarpaat. Kalerriutigineraniit ukiut sisamat qaangiukkaangata uparuarneqaratillu, allannguutit atortussanngortinneqartarput.

Kort & Matrikelstyrelse Asiaq-llu siorna decembarimi ataatsimeeqatigineqarput eqaannerusumik suleqatigiissinnaanerunissaq ujartuiffigineqarluni, suliffeqarfinniillu taakkunannga misissuinerit assigiinngitsut maannamut ingerlanneqarput.

Nunap aqqi oqaluttuarisaanermut tunngassutillit, assersuutigalugu Hollandimiusut aqqit, eriagisassatut nalunaarsukkani atatiinnarneqartarput, nutaatut aalajangiussat imaluunniit atitoqqat atortuulersinneqartut nunap assinginut naqeqqitanut allanneqartarlutik. Taakkununnga aamma pissutaaqataavoq timmisartortartut imarsiortullu akornutaanngitsumik atortariaqakkaminnik aternik peqarmata. Taakku Nunat Aqqinik Aalajangiisartunit immikkut isigineqarlutik innimigineqarput.

Oqaasileriffiup nittartagassaani cd-rom ikkunneqartussaavoq nunap assinginik immikkoortunik 26.000-inik imalik.

Nunat aqqinut tunngasunik soqutiginninneq annertusiartorpoq. Akuttunngitsunik nunatta avataaniit aamma saaffiginittoqartarpoq. Tamakku aalajangersakkat malillugit sullinneqartarput.

Oqaasileriffimmit siunissamut siunertanut ilaavoq aternut tunngasunik sullissisussamik atorfinitsitsinissaq. Atorfinikkumaartussap nunap aqqi taamatullu inuit aqqi immikkut ittumik suliassaqarfigissavai, ataatsimiititaliat taakkununnga attuumassutillit sullillugit suliassartaallu ataqatiissaarlugit. Aningaasaliissutilli amerlineqarpata aatsaat tamanna piviusunngorsinnaavoq.

Allagaatitoqqat nunat aqqinut tunngasut tamarmik Danmarkimit maanga tunniunneqarnikuupput. Taakku paasissutissarpassuarnik imaqarput misissuataarneqarsinnaallutik.

Suliat ilaat pisariusinnaasarput sivisuumillu ingerlanneqartarlutik. Ilaqarput aamma, pingaartumik kommunit killeqarfiisa nalaani, arlariinnik ateqartinneqartunik. Nunatta aqqa aamma assersuutissaalluarpoq, imaluunniit tunumiortatta “tunumiut”-nik taaneqartarnerminnik ippiginninnerat. Kangerlussuarmi Amerikamiut allagartalersorlugit atsiussuussisimaneranniit kalaallisut atitoqaannut iluarseqqinnissaat aamma assersuutissaalluarpoq. Taamaattumik nunat aqqinut tunngasut annertoorujussuarmik suliassartaqarput.

– 2 pillugu –

Nunat Aqqinik Aalajangiisartuni ilaasortanit tamanit Carl Chr. Olsen siulittaasussatut toqqarneqarpoq. Siulittaasup tullissaatut toqqarneqarpoq Karl Elias Olsen.

– 3 pillugu –

CCO.: Suleriaasissaq eqqarsaatigalugu pingaaruteqarpoq qaleriiaattumik suliassersunnginnissaq aammalu aalajangiilersigani sukumiisumik misissuinissaq. Kingusinnerusukkut siammarterineq inunnillu oqallitsitsineq pisariaqartinneqareeqisoq aaqqissuunniarneqarsinnaavoq.

KEO.: Toqqagaarlaatut nunat aqqinut tunngasut iserfiginiarnissaat pisariulaassaaq piffissartornassallunilu. Suleriaasissaq eqqarsaatigalugu atortorissaarutinik atorluaanissaq pisariaqassaaq aammalu immikkut aningaasaliiffigineqarnissaq pisariaqartinneqassalluni.

SH.: Assersuutigalugu Nuup Kangerluanik kukkusumik taaguilernerit eqqarsaatigalugit, aternik katersipallanniarnissaq sulissutigipallattariaqassaaq, utoqqaat tamakkuninnga ilisimasallit peerutsinnagit iliuuseqarnikkut.

KB.: Suliassanut pingaarnernut salliutinneqartussat ilagissavaat kommuneqarfiit piumaffigineqarnissaat innuttaasut suleqatigalugit aternik iluarsisarialinnik naqqiissuteqaqqullugit, pingaartumik utoqqaat angalajunnaarnerit peerutinnginneranni. Maannamummi utoqqaat taakku aalajangersimasut ikittuinnannguanngorpoq, inuusunnerillu sukkasuuliaannarnik angallateqartillutik ornigartik kisiat atortorissaarutit atorlugit nakkuttarpaat.

Nunat Aqqinik Aalajangiisartut ullut uku ataatsimiiffiusussatut aalajangiuppaat:

Pingasunngorneq, 13. marts, nal. 14.00

Pingasunngorneq, 17. april, nal. 10.00

Pingasunngorneq, 8. maj, nal. 10.00 kiisalu

Pingasunngorneq, 5. juni, nal. 10.00

– 4 pillugu –

CCO.: Tullianik ataatsimiinnissamut suliassanik pingaarnersiuinissaq siunniussinnaasallu erseqqinnerusumik eqqartuiffigineqassapput, ilaatigut tassani eqqarsaatigineqarput suliat toqqakkat 1999-2001-imeersut suliarisimasaasa kingulliit naammassineqanngitsut nanginneqarnissaat.

          Carl Chr. Olsen              Kristine Olsvig

             Siulittaasoq                       Allatsi