Nunat Aqqinik Aalajangiisartut 2005 – 2

NAA – 030605

 

Nunat Aqqinik Aalajangiisartut ataatsimiinnerannit tallimanngornermi juunip 3-anni, 2005, nal. 10.00 Oqaasileriffiup ataatsimiittarfiani

Peqataapput: Carl Chr. Olsen, Karl Elias Olsen, Stephen Heilmann, Nuka Møller aamma Ane Marie B. Pedersen.

Oqaluuserisat:

  1. Ilisimatitsissutit.
  2. NAA kingullermik ataatsimiinnerannit imaqarniliaq.
  3. FN-ip nunat aqqi pillugit suleqatigiissitaata ataatsimiigiaqqusissutaanut akissut.
  4. Nuup Kangerluani aqqit Tikilluarit a/s-imit suliassiissutit paasissutissartaat.
  5. Kalaallit Nunaata assingi digitaliusut.
  6. Kort & Matrikelstyrelsenimik suleqateqarniarneq.
  7. Taasariaqartut allat.

– 1 pillugu –

Nunavumit tikeraat Nunavumi Nunat Aqqinik Aalajangiisartut sisamanik ilaasortallit Oqaasileriffimmi atorfilinnit saqqummiivigineqarsimanerat ataatsimeeqatigineqarsimanerallu NAAnut ilaasortanut ataatsimeeqatigiinnermut peqataasinnaasimanngitsunut ilisimatitsissutigineqarpoq. Oqaasileriffimmi atorfilinnit Oqaasileriffiup iluani suliarineqartartut saqqummiunneqarput Nunat Aqqinik Aalajangiisartut suliassaat pingaarnerutillugit.

Nunavumi Nunat Aqqinik Aalajangiisartut Kalaallit Nunaatalu Nunat Aqqinik Aalajangiisartut pisariaqartitsineq naapertorlugu suleqatigiinnissamik neriuuteqarput.

– 2 pillugu –

Kingullermik ataatsimiinnermit imaqarniliaq KEOmit ilassutissaqartinneqarpoq, naqqiissutissat Sisimiut eqqaanni nunat aqqinik nalunaarsuisoq Âlibak Augustussen imaqarniliami ilanngunneqaqquneqarpoq. Taassuma saniatigut anguniagassatut siunniunneqarsimasut NAAnut ilaasortat qinigaaffianni matumani ersarissumik allassimanissaat, saniatigullu qinigaaffiit siuliini anguniagassatut siunniunneqarsimasut naammassisat naammassinngisallu misissorneqarnissaat piumasarineqarluni.

– 3 pillugu –

FN-ip immikkoortortamigut UNCSWGN –kkut (FN-imi nunat aqqisa akuerisat atuutsinneri pillugit ataatsimiittarnerit, United Nations Conference on the Standardization of Geographical Names) qaaqqusissutaanut NAAnut siulittaasuata CCOp akissuteqarsimanini ilisimatitsissutigaa.

Avannaamioqatigiit Immikkoortuanni ataatsimiinneq tulleq Oslomi oktobarip 20-anniit 22-annut pissasoq pilersaarutigineqarpoq. NAAnit peqataatitatut aallartitassaq suli aalajangiunneqanngitsoq ilisimatitsissutigineqarpoq.

– 4 pillugu –

Tikilluarit a/s-ip NAAnut suliassiissutai Nuup iluani kangerlunni (sumiiffiit: allorniusaq sanimukartoq: 64, 29,0. allorniusaq tukimukartoq: 50, 48,0 aamma allorniusaq sanimukartoq: 64, 08,0. allorniusaq tukimukartoq: 50, 41,0 aamma allorniusaq sanimukartoq: 64, 25,0. allorniusaq tukimukartoq: 49, 35,0 aamma allorniusaq sanimukartoq : 64, 09,0. allorniusaq tukimukartoq: 49, 45,0 iluanni) nunat aqqi allattaatsimik nutaanngitsumik allassimasut allaasitaamut nuunneri, naqqiutissaqarpat naqqiissutissartai kiisalu sumiissutsit nalunaarsorneqarneri pillugit allatsimit NAAnut saqqummiunneqarput. Oqaasileriffiup Stednavneregister-programmiutaa atorlugu suliassiissutit misissorneqarsimapput. Stednavneregisteri Kort og Matrikelstyrelsenimit saqqummersinneqarsimasoq nunat aqqini kukkunernik peqartoq ilisimatitsissutigineqarpoq, sumiiffiit nalunaarsorneqarneri kukkusuunngikkaluarlutik aqqit allattorsimaneri kukkuneqartitertut malugineqarsimammat.

– 5 pillugu –

Siunnersuut NAAnut ilaasortat tamakkerlutik programminik Kort og Matrikelstyrelsenimit saqqummersinneqarsimasunik Stednavneregisterimik aamma nunat assingisa digitalinngorlugit nuuteranngortinnerinik piniunneqassasut isumaqatigiissutigineqarpoq.

– 6 pillugu –

Kort og Matrikelstyrelsenimik suleqateqarnerup unittooqqanera iluarsiiviginiarlugu anguniarniarneqarpoq qaninnerusumik suleqatigeqqilernissaanut aqqutissiuussinissaq.

S.H.mit siunnersuutigineqarpoq Asiaq qaninnerusumik suleqatiginiarneqarsinnaasoq, Asiap Kalaallit Nunaanni angerlarsimaffeqarnera qaninneralu iluatinnartillugit.

Kort og Matrikelstyrelsenimik GEUS-imillu atassuteqaqatigiinneq kingullermik pisimavoq Tunup Avannaani inoqarfiunngitsumi nunap assiliortoqarnerata nalaani aamma Niaqunngunap nunap assiliorneqarnerata nalaani.

CCOmit siunnersuutigineqarpoq nunat assiliornermut tunngatillugu Kort og Matrikelstyrelsenip suleqatiginera annertusartariaqartoq. Ilaatigut siunnersuutigineqarluni nunatta Folketingimut ilaasortaatitai aqqutigalugit nunat assiliortartut Folketingimiit aningaasaliiffigineqartartut annertunerusumik nunatsinnut sullissinissaanut aqqutissiusussamik.

Folketingimut ilaasortaatitat aqqutigalugit iluatsinngippat qulliunerusunut ingerlatitseqqinnissaq pingaartinneqartoq NAAnut ilaasortanit ersersinneqarpoq. Ilaatigut Naalakkersuisunut Siulittaasup Naalagaaffigeqatigiit akornanni Danmarkimi Statsministerip Savalimmiunilu Lagmandip ataatsimeeqatiginninnissaanut oqaluuserineqartussanut ilanngussassatut siunnersuutigineqarsinnaasoq aamma periarfissatut eqqaaneqarluni.

– 7 pillugu –

Kingullermik ataatsimiinnermi Nunat Aqqinik Aalajangiisartut qinigaaffimminni siullermeerlutik ataatsimiinnerminni siulittaasussamik siulittaasullu tullianik qinersinermi Nuka Møller peqataasimannginnini mamiasuutigalugu erseqqissaavigaa. Naalakkersuisumit Henriette Rasmussenimit toqqakkat Ane M. B. Pedersen, Karl Elias Olsen aamma Carl Chr. Olsen aamma Oqaasiliortunit toqqakkat Stephen Heilmann aamma Nuka Møller iluminni Siulittaasussamik qinersineranni tamakkeqqannginneq mamiasuutigisimagini oqaatigalugu. Siulittaasumit oqaatigineqarpoq inissitsiternissamut ataatsimiigiaqqusat tamarmik aggerniarlutik nalunaarsimanerat aamma suliassat ingerlaqqinnissaat pingaartillugu inissitsiterneq pisimasoq, napparsimasimanerli pissutigalugu Nuka Møllerip naammagitaalliornera NAAnit tusaatissatut tiguneqarpoq.

KEOmit ataatsimiittarnissani naliliineq imaqarniap tullerisassagaa siunnersuutigineqarpoq. NAAni anguniakkat erseqqissarneqartarnissaat pingaartinneqartunut ilaammata.

SHmit ilisimatitsissutigineqarpoq Aappilattoq pillugu piffissami siusinnerusumi immiussarisimasani Aappilattup aqqata oqaluttuassartaanik imalik NAAnut tunniunniarlugu taamaalilluni Oqaasileriffiup oqaluttuassaq piginiassammagu.

Carl Chr. Olsen Johanne B. Tobiassen

Siulittaasoq Allatsi