Ujarlerit

Nunat Aqqinik Aalajangiisartut 2010 – 2

Nunat Aqqinik Aalajangiisartut pingasunngornermi marsip 17-anni 2010-mi Oqaasileriffimmi ataatsimiinnerat

Peqataasut.: Carl Christian Olsen, Stephen Heilmann aamma Karl Elias Olsen.
Peqataanngitsut: Tukummeq Qaavigaq, aallaqqanini pissutigalugu aatsimeeqataanngilaq. Abia Abelsenilu piffissaqannginnini pissutigalugu peqatanngilaq.
Allatsi: Lisathe Møller Kruse.

  1. Tikilluaqqusineq
  2. Imaqarniliap akuerinera (februaarip 5-anni ataatsimiinnermit imaqarniliaq)
  3. Aatsitassanut Ikummatissanullu Pisortaqarfimmiit suliakkiissut
    • a. Frederik Lynge 44 Inglefield Land
    • b. Frederik Lynge 27 Tikiusaaq
    • c. Frederik Lynge 26 Qaamasoq
    • d. Frederik Lynge 29 Sermilik
  4. Sirkka Paikkalap nunatarujussuit atiinut tunngatillugu saaffiginnissutaa
  5. Anker Weidickip saaffiginnissutaa sermit taaguutaannut tunngasoq
  6. Zulian Marcip saaffiginnissutaa 938-mut tunngasoq
  7. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Februaarip 5-anni 2009-mi ataatsimiinnermit imaqarniliaq Nunat Aqqinik Aalajangiisartunit akuerineqarpoq.

3. pillugu

Aatsitassanut Ikummatissanullu Pisortaqarfimmiit suliakkiissutit Nunat Aqqinik Aalajangiisartunit eqqartorneqareerlutik ima taaguuteqartussatut aalajangiunneqarput:

Fil: BMP kort over 2010_44 Inglefield Land.pdf Aunnartoq

Fil: BMP kort over 2010_27 Tikiusaaq.pdf Pingorsuaq

Fil: BMP kort over 2010_26 Qaamasoq.pdf Taserujutaq

Fil: BMP kort over 2010_29 Sermilik.pdf Nuukullak

4. pillugu

Sirkka Paikkala saaffiginnippoq Kalaallit Nunaata nunatarujussuisa atii qallunaatoortut kalaallisut atii paaserusullunigit. Nunat aqqi apeqqutigisai aajuku ataaniipput saamerliullutik, Nunallu Aqqinik Aalajangiisartut pisortatigoortumik atissatut aalajangiussaat talerpiatungaaniipput.

1. Kronprins Christian Land → Nuna Kunngi Christian

2. Kong Christian IX’s Land → Nuna Kunngi Christian IX

3. Kong Christian X’s Land → Nuna Kunngi Christian X

4. Kong Frederik den IX’s Land → Nuna Kunngi Frederik IX

5. Kong Frederik den VI’s Kyst → Sineriak Kunngi Frederik VI

6.Kong Frederik den VIII’s Land → Nuna Kunngi Frederik VIII

7. Kong Oscar Fjord → Kangerluk Kong Oscar

8. Dronning Louise Land → Nuna Dronning Louise

10. Danmarksstraedet → Danmark Stræde

11. Arktis → Issittoq

12. Grönlandshavet → Grønladshavet

13. Ishavet → Issittup Imaa

9. Norden (This is not place name, but in greenlandic means Avannaamioqatigiit)

5. pillugu

Sermersiooq Anker Weidick Oqaasileriffimmut saaffiginnippoq sermit assigiinngitsut taaguutai eqqortut paaserusullunigit. Taaguutinut tunngammata suliassaq Oqaasiliortunut suliakkiussassatut aalajangiunneqarpoq.

6. pillugu

Zulian Marcip saaffiginnissutaa 938-mut tunngasoq Nunat Aqqinik Aalajangiisartut sammitsiarpaat. Annertunerusumik eqqartullatsiarneqarpoq Zulian Marcip uteriilluni ermup puilasup sumiiffia tassa nunataa 938-mik ateqartikkusukkaluarlugu siunnersuutigalugu uteriiseraluarnera. Zulian Marcip kingusinnerusukkut paasinnilluni utoqqatserlunilu allagaqarsimanera aamma ataatsimeeqataasunut tusarliunneqarpoq. Nunallu aqqa pisortatigoortumik akuerisaq Uunartuarsuk allanngortinneqanngilaq.

7. pillugu

Nunat Aqqinik Aalajangiisartunut ilaasortap Karl Elias Olsenip oqaatigivaa Nunatta Katersugaasivianit saaffigineqarsimalluni nunat aqqi akuerisat pissarsiariuminaanneri pillugit.

Tassunga tunngatillugu Oqaasileriffimmi atorfillip Lisathe Møller Krusep suliap nittartakkamut tunngasup ingerlanneqalerluni piviusunngortinniarneqarnera nassuiaatigivaa. Nittartakkamik sullissisuusut Dot.gl-ikkormiut suliaq ingerlakkaat nassuiaatigalugu, suliarlu naammassineqariarpat Oqaasileriffiup nittartagaani www.oqaasileriffik.gl -imi nunat aqqi akuerisat nunap assitalerlugit listinngorlugillu misissuataarneqarsinnaanngussasut erseqqissaatigalugu.

—————————–

Carl Chr. Olsen Lisathe M. Kruse

Siulittaasoq Allatsi