Oqaasiliortut 2010 – 11

OQAA – 261110(gl)

Oqaasiliortut Ataatsimiinnerat tallimanngornermi novembarip 26-anni 2010, nal. 10.00 Ilimmarfimmi Oqaasileriffiup ataatsimiittarfiani.

 

Peqataasut: Carl Chr. Olsen, Stephen Heilmann, aamma Abia Abelsen

Peqquteqarlutik peqataanngitsut: Eva Møller Thomassen, Ellen J.Karlsen.

Allatsimut taartaagallartoq: Nuka Møller

 

Oqaluuserisassatut siunnersuutit:

  1. Tikilluaqqusineq – siulittaasoq tikilluaqqusivoq.
  2. Imaqarniliat – Kingullermik ataatsimiinnermit imaqarniliap akuerineqarnera – Ataasiakkaannguit siulittaasup naqqiissutitut allatsimut nassiutereernikuusai ilanngunneqareersut ilanngullugit akuerineqarpoq.
  3. Ilisimatitsissutit – Siulittaasup ilisimatitsissutigaa decembarip aallaqqaatani Nordisk Sprogrådimi ekspergruppemut ataatsimiigiassalluni. Annerusumik sammineqassapput qinnuteqaateqartunut aningaasanik agguaassineq. Novembarip 30-anni Nordisk Sprogkoordinationsmødeqartunut peqataassaaq . Tassani siorna kulturministeriap agguagassiissutai pillugit Savalimmiuni ataatsimiittoqarmat aningaasaliisutut ilaasortaqartitsinissani piumasaqaatigisimavaa.  Pia Lynge KIIIN-imeersoq Nunarput sinnerlugu ilaasortaavoq. Piumasaqaateqarnerup kingorna kikkut Qallunaat Naalagaaffiat sinnerlugu ilaasortaassanersoq paatsuungassutigineqalermat CCO tamanna pillugu apeqquteqaateqassamaarluni unnerpoq.
  4. Perlemor – kalaallisut. Josef Tuusi Motzfedlt apeqquteqarsimavoq perlemor kalaallisut qanoq taaguuteqarnersoq. Ordbogini misissuereernerup kingorna Oqaasiliortut aalajangerput ima taaguuteqalissasoq: Uillup qillaalanera.
  5. Kosttilskud – kalaallisut. Nerisassanut tapiunngimmata Oqaasiliortut aalajangerput ima taaguuteqalissasut: Nerisanut akut.

  6. Forskningsprojekt – kalaallisut. Kingullermi ataatsimiinnermi Oqaasiliortut aalajangerput ima kalaallisut taaneqartassasoq Ilisimatusaatigalugu Saaffiginnittup kingorna qisuariaateqarnera tunngavigalugu Oqaasiliortut isumaqarput tamanna aalajangiusimaneqaannassasoq, taamaattoq projekt eqqarsaatigalugu ima immikkoortitsisoqassasoq:
    Aallartinneqarsimanngikkuni: Suliniut
    Aallartinneqarsimaguni: Suliaq

  7. Stabsdirektør – kalaallisut. Ataatsimiinnermi kingullermi aalajangikkamut saaffiginnittoq qisuariaateqarpoq, taamaattoq Oqaasiliortut aalajangerput Pisortaqarfimmiut qullersaat

  8. Lydbog aamma e-bog – kalaallisut. Inerisaavimmiut lydbogimut taaguut “atuagaq immiussaq” paatsuungassutigalugu nutaamik siunnersuuteqarlutik saaffiginnipput. Oqaasiliortut aalajangerput lydbog ima kalaallisut taaguuteqassasoq: atuagaq naalaagassiaq. Taamatuttaaq Oqaasiliortut aalajangerput e-bog ima kalaallisut taaguuteqassasoq: Atuagaq qarasaasiarmiu.

  9. Retshandel – kalaallisut. Naalagaaffiup Sinniisoqarfianit nutserisut ningiuat saaffiginnippoq juridisk ordbogimi oqaaseq retshandel Nalunaarutini kalaallisut taaguutaa ‘neriorsueqatigiinnerit inatsisitigut pisussaaffiliisut’ pisortatigoortumik atortuulersikkusukkaluarlugu. Oqaasiliortut aalajangerput oqaaseq retshandel pillugu ima taaguuteqalissasoq: Eqqartuussivikkut aalajangiineq.

  10. Eriagaa aamma asanninneq. – Lotte Holm saaffiginnippoq oqaatsit taakku marluk sumit aallaaveqarnersut paaserusullugit. Isumaqarnerarpoq oqaatsit erligaa aamma eriagaa Tunumiusut immikkoortinneqarsinnaanngitsut ataatsimulli kattullugit taaneqartartut CCO-p akissusiornermini isumaqarpoq immikkoorpata pissusissamisoornerussasoq. Taannalu Oqaasiliortunit tangeqartinneqarpoq.
    Oqaaseq asanninneq pillugu Michael Fortescuep Tidsskriftet Grønland nr. 4, 2001-imeersumi allaatigisamini Kærlighedens gåde-mi ilaatigut nagguissiuilluni isumaliutersuutai innersuussutigineqarmata saaffiginnittup naammagisimaarlugit nalunaaruteqarpoq Oqaasiliortullu tamanna tusaatissatut tiguaat.
    Kalaalllisut nagguiit asa(vaa)- aamma asattuu(ppaa) imminnut qanittut saniatigut assa(ppaa)miki nagguillit naggueqataasinnaanerat eqqarsarnartoqarpoq, allaaatigisaq soqutiginartoq taanna taamaattumik taamaasinnasorisanik ilaqartoq malugineqarpoq.
  11. Allat. Oqaaseq Mavedans pillugu saaffiginnissutaasimasumi Oqaasiliortut marsi qaammat oqaasersiatut atuinnarneqarsinnaasoq aalajangersimaneranik innersuussuteqartoq Oqaasiliortut tusaatissatut tiguaat. Taamaattoq Vaigatimi nipilersortartut nuna Hawai’i pillugu taalliaanni oqaaseq atorneqartoq SH-p tulliani ataatsimiinnissamut misissuiffigissallugu neriorsuivoq.
    AA ilisimatitsivoq ordbogit arlallit Jens Erlandsen suleqatigalugu elektroniskinngortussanngorlugit pdf filinngortussanngorlugillu piareersarneqalersimasut Oqaasileriffiup Ilinniusiorfiullu suleqatigiinneratigut. Taakkunani siunertarineqarmat OQAATSIT naqeqqikkallariarlugu pissuseqatingajaa siunissami ordbogiliassanut aaqqissuinikkut tunngavissaq aallaqqaatigineqassammat, taannaassallunilu allattarnermi tunngavissanik nalunaarsisussaq, Kalaallit oqaasii aallaavigalugit ilusilersugaq. Taanna aallaqqaammut meeqqat atuarfiannit anisut piginnaasassaannut naapertuuttutut suliarineqariarluni kingorna annertusarneqarlunilu oqaatsinut allanut nuulertorneqarsinnaasussaliarineqassaaq.

 

Tulliani ataatsimiinnissaq pissaaq ukiortaap kingorna.

 

Inussiarnersumik inuulluaqqusilluta
Carl Chr. Olsen                                          Nuka Møller
Siulittaasoq                                               Allatsimut taartaagallartoq