Ujarlerit

Nunat Aqqinik Aalajangiisartut 2011 – 7

Nunat Aqqinik Aalajangiisartut Sisamanngorneq septembarip 15-anni 2011-mi Oqaasileriffimmi ataatsimiinnerat

Peqataasut.: Carl Christian Olsen, Stephen Heilmann, Tukummeq Qaavigaq aamma Lotte Holm.
Peqataanngilaq: Abia Abelsen, Nuummiinnginnini feeriarninilu pissutigalugit.
Allatsi: Lisathe Møller Kruse.

Oqaluuserineqartut makkuupput:

  1. Tikilluaqqusineq
  2. Imaqarniliat akuerinera (aggustip 30-anni 2011-mi ataatsimiinnermit imaqarniliaq)
  3. Aatsitassanut Ikummatissanullu Pisortaqarfimmiit saaffiginnissut
  4. Atammiup eqqaanni nunat aqqi nalunaarsoqqammisat, kingullermillu ataatsimiinnermit akuerineqanngikkallartut akuerinissaat
  5. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Aatsitassanut Ikummatissanullu Pisortaqarfimmiit saaffiginnissut Nunat Aqqinik Aalajangiisartunit eqqartorneqareerluni una akuerisaasumik taaguutaasussatut aalajangerpaat:

  1. Fil: Høringsbrev Grønlands Stednavnenævn.pdf Kuhn (Tunup avannaaniittoq)

3. pillugu

Atammiup eqqaanni nunat aqqi nalunaarsoqqammisat, kingullermilu ataatsimiinnermit akuerineqanngikkallaartut Nunat Aqqinik Aalajangiisartunit eqqartorneqarlutillu akuerineqarput. Nunat aqqi nalunaarsoqqammisat Nunat Aqqinik Aalajangiisartunit akuerineqarlaat 41–upput, naqqiissutillu pingasuullutik. Taakku saniatigut nunap aqqa ataaseq 2008-mi nalunaarsoqqaarsimasoq “Toornaarsoqajuitsoq” ilumut taamatut ateqarnersoq nunat aqqinik ilisimasalimmut apeqqutigineqarpoq. Ataatsimiinnermi paasissutissat aallaavigalugit nunap aqqa “Toornaarsoqajuitsoq” allanngortinneqarani akuerineqarpoq.

2011-mi upernaakkut ataatsimiinnermi Nunat Aqqinik Aalajangiisartunit qeqertat aqqi marluk Sisimiut eqqaanniittut akuerineqanngikkallarput.

Nunaqarfiusimasup Uummannaarsuup kujataaniittoq qeqertaq assigiinngitsunik pingasunik atserneqarsimavoq, ima ateqartutut nalunaarutigineqarsimagami; Ivissuartoq (Akisooq Olsen, Ulrik Lennert, Seth Berthelsen), Ivissuartut (Tobias Olsen), Ivissuartuut (siornatigut nalunaarsuinermeersoq). Nunat aqqinik ilisimasalinnut paasiniarneqarpoq qeqertaq taanna sooq taamatut ateqarnersoq, paasiniaareernermilu paasinarsivoq qeqertaq ivigaqarnera pillugu taamatut atsigaasimasinnaalluartoq. Tamanna pillugu qeqertaq nunaqarfiusimasup Uummannaarsuup kujataaniittoq Nunat Aqqinik Aalajangiisartut “Ivissuartoq”-mik pisortatigoortumik ateqassasoq aalajangerpaat, “Ivissuartuut”-mik atsernagu. Nunat Aqqinik Aalajangiisartut taamatut aalajangiinerminni tunngavigivaat Nuup, Maniitsup Sisimiullu eqqaanni qeqertat taaneqarnerisa naaneri sivitsuusernagit ateqartutut nalunaarsugaatit arlaliuneri atugaanerilu.

2011-mi upernaakkut ataatsimiinnermi nunap aqqata akuerineqanngikkallartup aappaa Itillip avannaaniippoq, imatut ateqartutut nalunaarutigineqarsimasoq; Ivissuartuunnguaq (siornatigut nalunaarsuinermeersoq), Ivissuartuunnguit (David Johansen), Ivissuartunnguaq (Geertheeraq Dahl). Nunat aqqinik ilisimasalinnut paasiniarneqarpoq nunap aqqa taanna sooq taamatut ateqarnersoq, paasiniaaffigisama tamarmik erseqqissarpaat sumiiffik pineqartoq ivigaqarluartoq, taamaattumillu taanna taamatut ateqarneranut tunngaviulluarsinnaalluartoq. Nunat aqqinik ilisimasallip David Johansenip nunap aqqa qasseersiutinngortillugu ateqartutut nalunaarutigimmagu, qeqertarlu ataasiinnaanngitsoq pineqaratarsinnaammat nunat aqqinik ilisimasalinnut paasiniarneqaqqaassasoq Nunat Aqqinik Aalajangiisartut aalajangerpaat.

Nunat aqqi Nunat Aqqinik Aalajangiisartunit akuerineqartut, akuerineqanngikkallartullu tamarmiullutik fil-imi ima atilimmiipput: Atammiup eqqaani nalunaarsoqqammisat NAA-nit akuerineqartut, naqqiissutit ilanngullugit.doc.

4. pillugu

Oqaasileriffiup ittua Nunallu Aqqinik Aalajangiisartunut siulittaasoq Carl Christian Olsen ilisimatitsivoq suleqatini Nuka Møller peqatigalugu Barcelonamiissimalluni. Nunat Aqqinik Aalajangiisartoqatiminut erseqqissaavoq uku ataatsimeeqatigisimallugit: Botolv Helleland (norgemiu Nordic Division af UNGEGN-imi siulittaasoq), Helen Keerfoot (Canadamiu UNGEGN-ip siulittaasua), kiisalu Peder Gammeltoft (qallunaaq Nordic Divisionimi ingerlatsisoq Kort- og Matrikelstyrelsimilu sulisuusoq). Carl Christian Olsenip nalunaarutigaa maajimi Wienimi UNGEGN-imi naapinnerminni kissaatigineqartoq nunatsinni nunat aqqisa nalunaarsuutaasa Nunat Aqqinik Aalajangiisartunit suliarineqartut killiffiata aappaagu New Yorkimi ataatsimeersuarnermi saqqummiunnissaa anguniarneqassasoq isumaqatigiissimallutik.

Nunat Aqqinik Aalajangiisartunut allatsi ilisimatitsivoq ukiumoortumik naapeqatigiittarnermut Farvandsvæsenetip aaqqissugarisartagaanut “Brugermøde”-mut peqataasimalluni. Najuuttunut ima erseqqissaasimalluni NAA-mi ilaasortanut nalunaaruteqarpoq: “Kalaallit Nunaanni nunat aqqi nalunaarsorneqarlutillu katersorneqartut piusut katersorpavut, qangarsuaaniillimi piupput inuinillu atorneqarlutik. Kulturitsinnut atalluinnarput innuttaasunit pingaartinneqartut”. Taamatut LMK najuuttunut nassuiaasariaqarsimavoq Kort- og Matrikelstyrelsimit saqqummiisoq nassuiaasimammat Kalaallit Nunaanni nunat aqqi kalaallisuunngortinneqartut.

—————————–

Carl Chr. Olsen Lisathe M. Kruse

Siulittaasoq Allatsi