Oqaasiliortut 2011 – 10

OQAA – 210911(gl)

Oqaasiliortut ataatsimiinnerat pingasunng. septembarip 21-anni 2011, nal. 13.30 Ilimmarfimmi / Oqaasileriffimmi.

 

Peqataasut: Carl Chr. Olsen, Stephen Heilmann, Lotte Holm, Karl Møller.

Peqataanngitsut: Johannes Jeremiassen, Eva Møller-Thomassen (pissuteqarluni)

 

Ataatsimiinnerup aallaqqaataani najuuttut:

William Kriegel aamma Flavia Lyberth, Kommuneqarfik Sermersooq

 

Oqaluuserisat:

  1. Tikilluaqqusineq aamma ilisimatitsissutit

    Siulittaasoq tikilluaqqusivoq ilisimatitsissutigalugulu Kommuneqarfik Sermersuumi atorfillit William Kriegel aamma Flavia Lyberth oqaaseq pisortaq pillugu paatsuungassuteqarlutik saaffiginnissimammata ataatsimiinnerup aallartinneranut aggersarsimallugit. Aggersut pappiaqqamik agguaassipput nassuiaatigalugulu siusinnerusukkut atorfinnut taaguutitut Oqaasiliortut suleqatigalugit suliarineqarsimasut saniatigut suli taaguusersuinissamut akunnattooruteqarlutik. Assersuutigalugu Afdelingsleder taaneqartarpoq Immikkoortortaqarfimmi aqutsisoq. Taamaattoq Daginstitutionsleder Oqaasiliortut suleqatigalugit taaguuserneqarsimalluni Meeqqeriviup pisortaa. Pisortaq direktørimut taaguutaariarluni Fagchef taaguuserneqarsimavoq Ingerlatsisoq.  Taaguutip pisortap assigiinngitsunik atorneqarnera pissutigalugu nalornisoornarsilersimavoq Områdeleder/dagtilbudsleder kalaallisut qanoq taaguuteqassanersoq taamatuttaaq Pædagogisk leder.
    Oqaasiliortut siulittaasuannit ilisimatitsissutigineqarpoq taaguutit sammineqarneranni qullersaqarneq allersaqarnermillu eqqarsartarneq pinnagit suliaaqqaarsimasut (hierakiskimik).
    Siulittaasup tulliata tamanna isumaqatigigaluarlugu paatsuungasoqarnera paasisinnaanerarpaa, ilaatigullu aalajangikkat paasissutissanik naammattunik pilersorneqaqqaarsimanani  aalajangiiffigineqartarneri eqqarsarnartoqartut unnerlugit. Tamatumunnga LHO isumaqataavoq.

    Aalajangertoqarpoq taaguutinut paatsuungassutaasut saqqummiunneqartut eqqartorneqaqqissasut isummerfigineqassallutillu tulliani ataatsimiinnissami.

    Siulittaasup ilisimatitsissutigaa immik. 7-imi taasariaqartuni allani Inuit Aqqinik Akuersisartut suleriaasiannik allanngortiterisinnaanermut isumaliuutini Oqaasiliortunut isummerfissanngortillugit  saqqummiutissamaarlugit.

  2. Kingullermik ataatsimiinnermit imaqarniliap akuerineqarnera

    Naqqiissutit ilanngullugit akuerineqarpoq. Siulittaasumit ilisimatitsisutigineqarpoq allattaasitaami aalajangersakkat naapertorlugit nunanut taaguutinut –miu uiggiunneqarsimatillugu naqinneq angisooq atorneqartassasoq, s.i. Amerikamiu, Nunavumiu, taamaattoq norskeq il.il. naqinnermik mikisumik allanneqartassasut.

    SH apeqquteqarpoq imaqarniliani naapertorlugit ataatsimeeqateqatigissallugit aalajangikkat pisimanersut. Tamatumunnga siulittaasoq naaggaarpoq. Tassunga ilanngullugu SH 70-iliinerminnni Oqaasiliortunit tunissutisisimanini qujassutigaa.

  3. Seniorbruger kalaallisut (09.09.2011)

    Oqaasiliortunut ilaasortat saaffiginnissutigineqartoq naammattumik paasissutissanik aallerfigineqaqqaarani apuunneqarsimammat isummerfigisinnaanagu unnerput, sumullu atuisuunersoq paasisaqarfigeqqaarlugu isummerfigisinnaagamikku tulliani ataatsimiinnissamut sammisaq kinguarteqquaat.

  4. Ilerasuutigaakka – Ernumagakka – Uisanguserneq (09.09.2011)

    Steen Egedep oqaatsit ilerasuutigaakka aamma ernumagaakka pillugit saaffiginnissutaa eqqartorneqartillugu Oqaasiliortunut ilaasortat isumaqataapput ilerasuut aamma ernumaneq assersuutitut atugaani isummamikkut paarlangasumik atorneqartut. SH-p oqaatsinik taamatut atuineq oqaatsit isumaannit ilisimasaqanngissusermit pissuteqarnerarpaa, assersuutigalugu ukiuni kingullerni qanilaassuseq atorneqarnermigut isumaviata atorneqarnera nikikkiartulersimasoq. Qanga inuk nipaarloq, maniguuttoq qanilaartumik taaneqartaraluartoq maanna pallimasumut, qanittumut isumaqartinneqalersimavoq. Ilerasuttoq tassaavoq nalunngeqatiginnissutsikkut ajornartoortoq nammineq iliuuseqarsimanini qanigisamiluunniit iliuuserisimasaa pissutigalugu uffa ernumasoq tassaasoq annilaangasoq/sioorasoq.

    Oqaaseq uisanguserneq stressimut assersuutigalugu saaffiginnittup atugaa pillugu erseqqissaasoqarpoq Oqaasiliortut stress kalaallisut ima taaguuteqassasoq qangalili aalajangersimagaat uippakajaarneq. SH-p maluginiaqquaa uisakajaarneq allaammat. Maluginiarneqarportaaq uisaruserneq ilaatigut sumiorpaluutiniusimagunartoq atorneqartartoq.

    Oqaasiliortut aalajangerput saaffiginnittumut missingersuusiamik Oqaasiliortut ilaasortaannut qimerluugassamik akissusiortoqassasoq.

  5. Pisortanit attaveqarmut attavinnik kiffartuussissutinillu elektroniskiusunik nioqquteqarnermut akuersissummik peqartunut naatsorsuusiornernut malittarisassat pillugit nalunaarutip kalaallisuua

    5b. Telemi naammagittaalliortoqarnerani aalajangiisartut suleriaasiat pillugu Nalunaarutip kalaallisuua

    Eqqartugassiatut ingerlateqqinneqarsimasut taakku pillugit Oqaasiliortut akornanimmi oqallisingaatsiarput. Aperisoqarpoq Oqaasiliortut kukkunersiuineq nutserinerlu suliassarineraat. Siulittaasoq akimmat ingammik inatsisissat nutsernerisa pitsaassusii qulakkeerneqarniassammata Oqaasiliortunut suliassanngortinneqarsimasut, siulittaasup tullia ilaasortallu isumaqarput aqqutissaq pitsaanerpaaq tassaassasoq nutserisarnermik kukkunersiuisarnermillu pisinnaasallit akilerlugilluunniit suliassamik suliarinnitseqqaarlugit, aatsaat sapernartortaat tunngaviusumillu isummerfissartaat Oqaasiliortunut ingerlateqqinneqartassasut.

    Tamanna tunngavigalugu Oqaasiliortut isummerput aqqutissaq taanna atoreerpat suliakkiussat tunngaviatigut isummerfissaajumaagassat Oqaasiliortunut suliakkiunneqassasut. Taamaattoq kukkunersiukkat ilaasortat ilaasa suliarisimasaat suliarereersimammatigik nutsikkamut tassunga naqqiutitut ilanngunneqassasut.

  6. UV stråler – qinngornerit ersinngitsut (20.09.2011)

    Siulittaasup ippassaammat tusagassiortoq Judith Hard Peilmann sianersimanerarpaa ukioq manna paarnat iluamik naasimannginnerat qinngornerit UV-nik taaneqartartut (ultraviolette stråler) pissutaanersut pillugu aallakaatitassiulernerminni isumasiorsimagaani. Tusagassiortumut siunnersuutigisimavaa qinngornerit ersinngitsut. Oqaasiliortut UV stråler ima taaguuteqassasut aalajangerput: seqernup qinngorneri ersinngitsut.

  7. Taasariaqartut allat

    Naak Inuit Aqqinik Akuersisartut sulinerat ajunngitsumik ingerlagaluartoq naapitsinniarnerat aalajangiiniartarnerallu Oqaasileriffimmit sullissisunut ajornakusoortarpoq. Allaat manna tikillugu suli siulittaasussamik qinersisinnaasimanngillat ukioq aallarteriitsiartorli ivertinneqaramik suli tamakkerlutik ataatsimiissinnaasimannginnamik. Tamanna pissutigalugu Oqaasiliortut siulittaasuat tunngaviusumik isummertoqassatillugu siulittaasugallartutut inissisimasariaqartarpoq. Siulittaasup Oqaasiliortunut ilaasortanut isumaliutigeqquaa qanoq issanersoq ilaasortaat pingasuusut marlunnik ilaqqinneqarpata. LHO-p siunnersuutigaa qaammammi ulloq aalajangersimasoq toqqarneqarsinnaasoq ilaasortat pilersaarusiornerminnut eqqumaffigisinnaasaat.

    Oqaasiliortut aalajangerput tulliani ataatsimiinnissamut eqqartugassanut isumalioqqusissut tamanna ikkunneqassasoq.

    Kommuneqarfik Sermersuup Tunumi oqaatsit kulturillu pillugu aaqqissuussinera. LHO ilisimatitsivoq taamatut aqqissuisoqarsimasoq namminerlu Tunumiut oqaasii pillugit saqqummeeqqusaasimalluni. Piffissalerneqarnini ilimagisaminit sivisunerusimagaluartoq saqqummiineq pitsaasumik ingerlasimasutut nalilerneqarpoq. Neriunnerarpoq tulliani taammaattoqassappat aaqqissuussineq pitsaanerujumaartoq.

    SH ilisimatitsivoq e-mailimik tigusaqarsimalluni novembari qaammat Nunani Avannarlerni aaqqissuussamik ataatsimiisitsisoqassamaartoq “Synlig politik – usynlig sprog”-imik qulequtalimmik. Aperaaq allat tamatuminnga ilisimasaqarnersut. Siulittaasoq akivoq ataatsimiinnissaq tamanna Nordisk Sprogrådimit, maanna Nordisk Sprogkoordinationimik taaguuteqalertumit aaqqissuussaasoq. Taamatuttaaq ilisimatitsivoq qinersivimmi maani nammineq Ane Marie Sakariassenilu IKIIN-imeersoq toqqagaasimallutik. SH oqarpoq nammineq ataatsimiinnermut najuunnissamut aamma soqutiginnissinnaalluni.

    Tulliani ataatsimiinnissaq
    Aalajangerneqarpoq pissasoq oktobarip 13-ianni nal. 10.00 Oqaasiliortut ataatsimiittarfianni.

Inussiarnersumik inuulluaqqusilluta

Carl Chr. Olsen                                          Nuka Møller
Siulittaasoq                                               Allatsi