Ujarlerit

Nunat Aqqinik Aalajangiisartut 2012 – 4

Nunat Aqqinik Aalajangiisartut sisamannngorneq maajip 3-anni 2012-mi Oqaasileriffimmi ataatsimiinnerat

Peqataasut.: Carl Christian Olsen, Stephen Heilmann, Tukummeq Qaavigaq
Peqataanngitsut: Abia Abelsen suliffimmini ataatsimiinnermi peqataasariaqarnini pissutigalugu, Lotte Holmilu Danmarkimut nakorsiarnini pissutigalugu.
Allatsi: Lisathe Møller Kruse.

Oqaluuserineqartut makkuupput:

  1. Tikilluaqqusineq
  2. Ilisimatitsissutit
  3. Imaqarniliap akuerisassatut saqqummiunnera (aprilip 12-anni 2012-mi ataatsimiinnermit imaqarniliaq)
  4. Adolf Kristiansenip Tasiilameersup saaffiginnissutaa
  5. Tunumi nunat aqqi nalunaarsukkat suliaralugit aallartinnissaat
  6. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Nunat Aqqinik Aalajangiisartunut ilaasortaq Tukummeq Qaavigaq allattaatsimut tunngasunik aalajangersagaareersunik isummersuuteqarlunilu apeqquteqarpoq.

Tukummip apeqqutigisaasa ilagivaa naqinneq d atussanngiivinnersoq. Tamanna pillugu Nunat Aqqinik Aalajangiisartunut siulittaasoq Carl Christian Olsen nassuiaateqarpoq allattaaseq fonemit aallaavigalugit suliaasoq, taamaattumillu naqinneq t nipinut assigiinngitsunut atugassiatut suliaasoq. Naqinneq t nipinut ukununnga attuumatinneqartarami /t/, /c/ aamma t . Naqinneq t nipinut pineqartunut attuumassutai ima ipput: (/t/ > _a (soorlu: Tasiilaq)), /c/ > _u (soorlu: Tukingaleq) aamma /th/ > _i (soorlu: TV))

Tukummeq Qaavigaq kingorna aperivoq allattaatsimut inatsit allanngortariaqalinnginnersoq, sumiorpaluutit naqitaasut atiusullu eqqortumik taaneqartarnissaat pissutigalugu.

Tukummip apeqqutigisaasa ilagivaat nipi /rng/ qanoq ililluta tamakkuninnga ilisimanninngitsunut paasissutissiissutigissaneripput, namminermi nipit /rng/ aamma /rnng/ qaqugukkut atorneqartarnissaat nalunnissutigamiuk, allanut aamma tunumiusut ilisimanninngitsunut nalornisoorutaasartussaammata.

Oqaasiliortunut siulittaasoq Carl Christian Olsen tamanna pillugu akissuteqarpoq Oqaasiliortut pilersinneqarmata inatsisit naapertorlugit suliaat allanut suliakkiissutigineqarsinnaanngitsut, soorlu Inatsisartunut ilaasortanut suliakkiissutigineqarsinnaanatik.

Allatsip Lisathe Møller Krusep Nunat Aqqinik Aalajangiisartunut ilaasortanut ilisimatitsissutigivaa naartulluni, taamaattoq naartunini iluatsikkumaarnersoq naartulernermit sapaatip akunnerit aqqaneq marluk qaangiutereerpata aatsaat paasinarsiumaartoq oqaatigalugu.

3. pillugu

Aprilip 12-anni 2012-mi ataatsimiinnermit imaqarniliaq akuerineqarpoq.

4. pillugu

Tasiilameersoq Adolf Kristiansenip Oqaasileriffimmut saaffiginnissutaa Nunat Aqqinik Aalajangiisartunit eqqartorneqarpoq. Adolfip tunumi nunat aqqisa pisortatigoortumik akuerineqannginneranni iluameertumik nunat aqqisa suliarineqarnissaat kissaatigaluniuk allappoq, tunumiuunngitsut nunat aqqinik taasinerluttuartarnerat pissutigalugu iluameertumik suliarineqarnissaat piumasaralugu.

Nunat Aqqinik Aalajangiisartut saaffiginnissut eqqartoreerlugu aalajangerpaat Adolf Oqaasiliortut allattaatsimut tunngasunik suliaannik nassuiaatitalinnik nassinneqarumaartoq. Tassani eqqarsaatineqarpoq tunumiorpaluutit allattaaseq tunngaviusoq inatsimmik tunngaveqartoq malillugu allanneqartarnissaat.

5. pillugu

Tunumi nunat aqqi nalunaarsukkat suliaralugit aallartisarneqarput. Nunat aqqi ataasiakkaarlugit aalajangiivigisaqattaannginneranni tunngavissanik arlalinnik Nunat Aqqinik Aalajangiisartut aalajangiipput. Nunat Aqqinik Aalajangiisartut ima aalajangiipput:

  • Tunumiutut naqinneq kingulleq k ilaanngippat ilanngunneqartassaaq, soorlu Kangikaji imaalineqassalluni Kangikajik.
  • Tunumiutut naqinneq kingulleq r-iutinneqarsimappat q-nngortinneqassaaq, soorlu Apulileer “Apulileeq”-nngortinneqassalluni.
  • Uiguut {kajik} tunumiorpaluttunngorsarlugu {gajik}-nngortinneqarsinnaanera siunnersuutigineqarpoq. Nunalli Aqqinik Aalajangiisartunut ilaasortaq tunumiu Lotte Holm isumasiorneqaqqaassammat aalajangiivigineqanngikkallarpoq.

6. pillugu

Ataatsimiinnissaq tulleq maajip 22-aniunissaa siunnersuutigineqarpoq, tamannali aatsaat aalajangiunneqassaaq Nunat Aqqinik Aalajangiisartut ilaasortat uani ataatsimiinnermi peqataanngitsut Lotte Holm Abia Abelsenilu isumasioreernerigut. Ulloq taanna pisinnaassappata Nunat Aqqinik Aalajangiisartut maajip 22-anni nalunaaqutaq qulinut ataatsimiittussaassapput.

—————————–

Carl Chr. Olsen Lisathe M. Kruse

Siulittaasoq Allatsi