Oqaasiliortut 2014 – 11

OQAA – 231014(gl)

Oqaasiliortut ataatsimiinnerat sisamanngorneq, oktobarip 23-anni 2014, nal.11.00
Oqaasileriffimmi.

Peqataasut: Carl Chr. Olsen, Stephen Heilmann aamma Katti Frederiksen.
Allatsi: Katti Frederiksen

Oqaluuserisassatut siunnersuutit:

  1. Tikilluaqqusineq aamma ilisimatitsissutit.

    Siulittaasoq tikilluaqqusivoq, ataatsimiinnissallu siunertaa tunngavialu nassuiaatigalugit; tassalu matumani IAA-mi ilaasortat peqataatinnagit taakkua suliaannut tunngasumik ataatsimiissuteqartussaaneq pineqarmat Oqaasiliortuni ilaasortat pingasuinnaallutik ataatsimiissasut nalunaarutigaa.

  2. Inuit Aqqinik Akuersisartut akuerinngisaannik suliareqqitassannngortitsineq.

    Viisu atertut akuereqqusap IAA-mili itigartitsissutigineqartup Oqaasiliortunut ingerlateqqinneqarnera.
    Oqaasiliortunut suliassanngortinneqarsimasoq atertut itigartitsissutigineqarsimasorlu Viisu ataatsimiinnermi siullertut sammineqarpoq. Oqaasiliortut isumaqarput Viso Europamiunit nukappiaqqat atiattut atigineqareersuummat kalaallisut taasarnera najoqqutaralugu taamaatillugu (VIISU) akuerineqarsinnaasoq, soorluttaaq aamma siornatigut Keanu Kiaanunngorlugu akuerineqarsinnaasimasoq. Taamaalillugu Viisu nukappiaqqat atiattut nalunaarsuiffimmut Europamiut aqqinut kalaallisuunngorsakkanut ilanngunneqassasoq qinnuteqartumut IAA-kkunnullu nalunaarutigineqarnissaa isumaqatigiissutigineqarpoq.

  3. Inuit aqqi pillugit atuakkiaq.

    IAA-kkut atuakkiamut tunngasumik CCO-mut allagaqarsimanerat tunngavigalugu Oqaasiliortut allakkiamut akissuteqassallutik isumaqatigiipput, taamaattumik ataatsimiinnermi matumani aqqit pillugit atuakkiap siunertaa killiffialu naatsumik nassuiaatigineqarput.

    Ataatsimiinnermi oqaatigineqarpoq Oqaasiliortut pillugit nalunaarutissaq januaarip aallaqqaataani atuutsilersussaagaluaq naalakkersuinikkut pissutsit peqqutigalugit unikkallartinneqarsimasoq, aappaattullu aamma IAA-kkut sulineranni inatsisit akisussaaffiillu nunatsinnut nuunneqarnissaannut tunngasoq qanoq inerneqarumaassanersoq qaqugulu pissanersoq suli naatsorsoruminaatsoq aamma ilisimatitsissutigineqarluni. Taamaammat tamakkua pissutsit tunngavigalugit Oqaasiliortut oqaatigaat isumaqarlutik aqqit pillugit atuakkiap inatsit utaqqisariaqanngikkai, taakkuami qaqugu piariissanersulluunniit ilisimaneqanngikkallarmat. Taamaammat suliaq uninngatiinnarnagu aaqqiissutissarsiorlunili qanoq iliuuseqarluni saqqummersinneqarsinnaanissaa aqqutissiuunneqassasoq innersuussutigaat.

    Siunertaraa aqqit nalunaarsukkat akuerisat isumaallu saqqummersinneqarnissaat, tassa navneleksikonimut assersuunneqarsinnaasutut ilusilikkatut, taannami inunnit atuisussanit pingaarnerupaajullunilu qitiusussaammat. Taassuma saqqummernissaanut malitsitut ilanngunneqartussaapput inatsisit akuersiniarnermilu periaatsit tunngaviusut, tassungalu ilanngullugit Inuit Aqqinik Akuersisatut sulinerminni tunngavigisaat.

    Oqaasiliortut isumaqarput ukiut amerlangaatsiartut inatsit atuussimasut nikerartutullu ilaatigut saqqummiunneqarniartartut aporfiginagit IAA-kkut, Oqaasiliortut Oqaasileriffillu ulloq manna tikillugu sulereersimasut, taamaattumillu maanna pissutsit taamaannerasut isikkoqartillugit sulilu inatsisitigut qanoq inissittoqarnissaa nalorninartillugu atuakkap saqqummernissaanut kinguarsaataasunik aporfiusinnaasunillu unittooruteqartoqartariaqanngitsoq. Atuakkap piffissaligaanngitsumik uninngatikkallarneqarnissaa Oqaasiliortut tungaanniit orniginartinneqanngilaq, sulialli annertuup qitia isiginiarlugu anillariarfissamik, tassalu atuakkiami nassuiaataasumik immikkoortortaliinikkut atuakkiap saqqummersinneqarnissaa anguniarneqassasoq Oqaasiliortut isumaqarput.

    Atuakkiami qitiunngilaq aqqit pillugit inatsisiliorneq imalt.maleruagassat suut atuunnerinik erseqqissaateqarneq, taamaattumik aqqit isumaasalu allattorsimaffiat qitiutillugu atuakkiaq aporfeqanngitsumik saqqummersinneqarsinnaasoq Oqaasiliortut isumaqarput, tassungalu bind 2-tut ilanngullugu inatsit, akuersisarnermi tunngaviit, kiisalu massakkut inuit aqqinik suliaqarnermi inatsisitigut suliat killiffii erseqqissarneqarsinnaapput. Oqaasiliortut isumaqarput taamatut immikkoortuliinikkut inatsisitigullu sulianik erseqqissaassuteqarnermi qanoq allanngortoqariataarsinnaaneranik nassuiaammik ilanngussisoqarsinnaanera periarfissaasoq.

  4. Taasariaqartut allat
    Oqaasersianik allattarneq ukiorpassuarni kinguneqartinneqanngitsumik oqallisigineqartartoq eqqartullatsiarneqarpoq, tamannali kingumut kingusinnerusukkut uterfigineqaqqikkumaartoq oqaatigineqarpoq.

 

Inussiarnersumik inuulluaqqusilluta
Carl Chr. Olsen                                      Katti Frederiksen
Siulittaasoq                                          Allatsi