Ujarlerit

Oqaasiliortut 2015 – 1

OQAA – 120115 (gl)

Oqaasiliortut ataatsimiinnerat tallimanngorneq, januaarip 12-ianni 2015, nal. 10.00 Oqaasileriffimmi

 

Peqataasut: Carl Chr. Olsen, Karl Møller

Peqquteqarlutik pisinnaanatik nalunaartut: Stephen Heilmann aamma Eva Møller Thomassen

Peqataanngikkaluarluni ataatsimiinnermi oqaluuserisassanut tamakkiisumik isummersuutiminik emailikkut nassiussaqartoq: Stephen Heilmann

Erninermut atatillugu sulinngiffeqartoq: Katti Frederiksen

Allatsi: Judithe Denbæk

 

Oqaluuserisassat:

    1. Siulittaasoq tikilluaqqusivoq nalunaarutigalugulu CCO-p Oqaasileriffimmi pisortatut soraarninngorneraniit (januaarip aallaqqaataaniit 2015) nutaamik pisortartaarnissap tungaanut Beatrine Heilmann pisortaagallartoq. SH-p peqataanngikkaluarluni emailikkut ullormut oqaluuserisassat tamakkiisumik isummerfigimmagit ataatsimiinnissaq ilaasortanik marluinnarnik najuuttoqaraluartoq pisinnaasoq nalilerneqarpoq, SH-p isummersuutasa atuutsinnerisigut.
    2. Ataatsimiinnermi kingullermit imaqarniliaq taamaatsillugu akuerineqarpoq.
    3. a) Tusarniaanermut akissuteqaat. Inatsisartut inatsisissatut siunnersuutaat UPA2015/xx: Uunga siunnersuut: Tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaat nr. xx, xx 2014-imeersoq pillugu tusarniaanermut Oqaasiliortut akissuteqaasiorput, ulloq januaarip 15-iat 2015 sioqqullugu akissuteqarfiusussaq. Inatsisissatut siunnersuutip oqaasertaanut naqqiissutissanut allanguutissanullu siunnersuutit akissuteqaammut ilanngunneqartussat eqqartorneqarput, ilanngullugulu Oqaasiliortunit siunnersuutigineqarluni isumaliutigeqquneqassasoq suliffeqarfinni sulisitsisut tuniniaanissamik nittarsaassinissaminnik ikiorneqarnissaminnik siunnersorneqarnissaminnillu pisariaqartitsisut Oqaasileriffiup Oqaasiliortunut tunngasunik sullissisuannit ikiorserneqarsinnaanissaat, kalaallisut nittarsaassisarneq taakkununnga ajornaqutissaajunnaaqqullugu. Akissuteqaat ulloq taanna nassiunneqarfissaanut nassiunneqarpoq.
      b) Ateq atsiissutiginiarlugu qinnutigineqarsimasoq, Ulaayu, Inuit Aqqinik Akuersisartunit itigartitsissutaasimasoq qinnuteqartup isumaqataanani Oqaasiliortunut suliareqqitassanngorlugu ingerlateqqissimavaa. Oqaasiliortut Inuit Aqqinik Akuersisartut taperserlugit itigartitseqqipput. Tunngavilersuutigineqarpoq kalaallit inuit aqqi kalaallisut allattaatsit tunngavii malillugit allanneqartassammata, taamaammallu qinnuteqaraluartumut siunnersuutigineqarluni ateq Ulaajuk. Qinnuteqaraluartoq ulloq taanna akissutisivoq.
    4. Taasariaqartut allat. Allamik taasassaqartoqanngilaq.

 

Carl Chr.Olsen                                           Judithe Denbæk

Oqaasiliortunut Siulittaasoq                       Oqaasiliortunut allatsi