Oqaasiliortut 2015 – 6

OQAA – 120615 (gl)

Oqaasiliortut ataatsimiinnerat sisamanngorneq, juunip 12-anni 2015, nal. 10.00
Oqaasileriffimmi.

 

Peqataasut: Carl Chr. Olsen, Stephen Heilmann, Eva Møller Thomassen

Peqataasinnaanani nalunaartoq: Karl Møller

Ilaasortaanerminit tunuartoq, ataatsimiinnerulli aallaqqaataani ilisimatitsissutinik apuussissalluni peqataasoq: Katti Frederiksen

Allatsi: Judithe Denbæk

 

  1. Siulittaasoq tikilluaqqusivoq ilisimatitsissutigalugulu Katti Frederiksen Oqaasileriffimmi pisortanngornerminut atatillugu Oqaasiliortunit tunuarmat, taamaasillutillu Oqaasiliortut sisamaannanngortut sinniisoqanngimmat. KF ataatsimiinnerup aallaqqaatani peqataavoq, ilisimatitsissutit Oqaasileriffimmullu attuumassutillit 3a aammalu 4a peqataaffigalugit. KFip ilisimatitsissutigaa juunip aallaqqaataanit Oqaasileriffimmi pisortanngorluni, sulisuniillu tigulluarneqarluni. Ilisimatitsissutit allat: Oqaasileriffimmi aningaasaqarnermik aqutsineq IRISikkut ingerlalerpoq, ukiumullu matumunnga Naalakkersuisoqarfimmit sipaarniuteqarfigineqalersoq 175.000,00 kruuninik taamaasilluni Oqaasileriffik katillugit 500.000,00 kruunit (14%-it) pallillugit atuivallaartussanngorluni. Studentermedhjælperit atorpallaarunnaarnissaat Per Lanngårdillu angalasarnerisa ikilinissaat eqqaassanngikkaanni sipaarniarfissaqarpallaanngitsoq. Aggustimi sapaatip akunnerani 34-mi Roskildemi Nordisk Sprogmøde netværksmødeqartitsissaaq qulequtserlugu nordisk sprogforståelse, Nordisk Sprogmødep akiligaanik angalanertalimmik Oqaasileriffimminngaanniit dagpengeqartinneqarluni, tassunga peqataasussatut taaneqarput Judithe Denbæk Oqaasiliortut allattaattut, Katti Frederiksenilu Oqaasileriffiup pisortaatut. Sapaatip akunnerani 35-mi Iqalunni ataatsimik allattaaseqalernissamut konferenceqartitsinissaq pissaaq, tassunga immikkut qaaqqusaavoq Nuka Møller, CCO-llu nalunaarutigaa nammineq ilisimasaqarfigilluaramiuk angalarusussinnaalluni KF-illu tamanna taperserpaa. Sapaatip akunnerani 36-mi KANUKOKAp aaqqissuussaanik nutserisartunik seminareqartitsisoqassaaq, tassani Oqaasiliortut sinnerlugit JD peqataassalluni saqqummiinertalimmik, assigiimmik atuilernissaq pillugu (one door principle), taassumalu ataani Oqaasiliortut oqaatsinik akuersisartutut kisiartaallutillu allannguisinnaasutut inissisimanerat pillugu saqqummiissaluni. CCO-p tassunga atatillugu piukkuppaa eqqartuussinermi inatsit programmimut ilanngutissallugu, aammattaaq Tusagassiornermut Ilinniarfimmit KNR-imiillu peqataaffigineqarnissaat pisariaqartoq. Ilisimatitsissutitut naggasiullugu KFip kissaatiginartippaa Oqaasiliortut taamak pissaaneqartigitillugit sullinneqarnerat annerulissasoq, assersuutigalugu oqaatsinik ikiuutinik projekteqarnikkut, suliniutinillu kissaatigisaannik piviusunngortitsinikkut.
  2. Kingullermik ataatsimiinnermit imaqarniliaq maajip 18-ianni 2015-imeersoq naqinnerlutat naqqiissutissaat taakkartoreerlugit taamaatsillugu akuerineqarpoq.
  3. Oqaasiliortunut saaffiginnissutit
    a) (KF peqataavoq) Robert Petersenip ORDBOGENip naqiteqqinneqarneranit allannguutinut atuagassiaq Kalaalermi maalaarutaa, tassungalu atatillugu Oqaasileriffimmi sulisut utoqqatsissusiornialersaarnerat. KFip ilisimatitsissutigaa RP atuagassiaq Kalaalermi tusagiasaarisimasoq ORBOGENip naqiteqqinneqalernerani allannguutaasimasut mamiagalugit toqqaannartumillu Oqaasileriffimmut aaqqissuisunulluunniit (Ilinniusiorfimmut) maalaaruteqarsimanngitsoq. KFip erseqqissaatigaa Oqaasileriffik suleqataagaluarluni akisussaaffik aaqqissuussisuniimmat (Ilinniusiorfik) Oqaasileriffiullu suleqataanera tassaanerummat oqaatsit Oqaasiliortunit akuerisat ilanngutissallugit. CCOp ilisimatitsissutigaa ordboginik suliaqarnermi Oqaasiliortut avaqqullugit oqaatsinik ikkussuisoqarsinnaanngitsoq, Oqaasiliortut kalaallit oqaasiinut ordbogiliorneq akisussaaffigimmassuk mandateqarfigalugulu, taamaammat Oqaasersiuummi Robert Petersenip Kirsten Gade Jonesillu akisussaasutut allaqqanerata peerneqarnissaa aqqutissaasinnaasoq. Suliaq inerneqarpoq utoqqatsertoqassappat naqitertitsinermi akisussaasut pisussaasut, toqqaannartumilli maalaarummik tigusisoqarsimanngimmat suliaq naammassisutut nalilerneqarpoq Oqaasileriffimmullu KFimit nalunaarutigineqassalluni.
    b) Inatsisinik nutserisoqarfiit Oqaasiliortut taaguummik allannguisimaneranik suliassanngortitseqqiisut/isummersoqqeqqusisut: lovbekendtgørelse aamma bekendtgørelse af lov. CCO-p naammagittaalliuut paasinngilaa, assigiinngissutaat erseqqissaatigisariaqarmat. Taaguutissatut aalajangiutaareersut Oqaasiliortut ataatsimiinnerannit 04.02.2015-imeersut allanngortinneqanngillat. Issuarnera: “Lovbekendtgørelse nassuiaatitaa atorlugu imak taaguusissallugu Oqaasiliortunit akuerineqarpoq: Inatsisaareersut allannguutaanik eqikkarlugit nalunaarut, Bekendtgørelse af lov kalaallisut imak taaneqartassasoq akuerineqarluni: Inatsimmik (nutaamik) nalunaarutiginninneq.”
    c) Aalisakkat taaguutaat ‘aapapaqutsuk’ kingullermi ataatsimiinnermi aalajangigaq, 2013-imi Oqaasiliortut taaguusereersimasaat imak ‘siutaasalik’. Oqaasiliortut aalajangiinerminnut tunngavigisaat naapertuummata aapapaqutsuk grønlandsk ringbugimut taaguutaassasoq aalajangiusimaannarneqassasoq, siutaasalillu taaguutitut atorunnaassasoq Oqaasiliortut aalajangerput.
    d) Ilinniusiorfimmit saaffiginnissutit – uumassusilinnut taaguutit (qallunaatut: havalger, mos, svampe, lav). Oqaasiliortut isummerfigaat siunnersuutit akuerisinnaallugit, taamaallaat Nunatta Naasuini allaqqareersut taaguutaat allanngortinneqassanngitsut, tassaammata taaguutaareersut botanikerip inuit akornannit ilisimaneqareersut katersorsimasai.
  4. Taasariaqartut allat. Kalaallit tusagassiorfii pillugit Nuummi ataatsimoorussamik oqallinnissamut ulloq 15. juni 2015, Oqaasiliortut ilanngussassaqarnersut tusarusunneqarpoq. Oqaasileriffimmit Beatrine Heilmann peqataassaaq. SH-p erseqqissaatigaa Oqaasiliortut oqaatsinik atuinernik uparuartuisussaatitaanngimmata, namminerli tusagassiortutut peqataassamaarluni nalunaarpoq, tassanilu nammineq isummersuutini apuussamaarlugit. Isummersuutit eqqartorneqartut tassaapput KNR pisussaammat kalaallit oqaasiisa tusagassiuutini eqqortumik atorneqarnissaat nakkutigissallugu, ajornartorsiutaammat assersuutigalugu atuagassani oqaatsit allassimaqqaarneri amerlasuutigut qallunaatuujusut atuarumaneruneqartarmata, nutseriinnarnerlu ajornartorsiutaalluni. Tassungattaaq atatillugu kissaatiginartutut eqqaavaa KNR-imi oqaatsinik nakkutilliisoqalernissaa kukkusumik atuineq annikillisarneqassappat. Tassunga atatillugu CCO-p ilanngullugu eqqaavaa Tusagassiortnermik Ilinniarfik qanoq iliuuseqarniarnersoq tusarusunnartillugu, tassaammat akisussaaqataasoq tusagassiuutini kalaallit oqaasiisa atorneqarnerulernissaannut.

 

Inussiarnersumik inuulluaqqusilluta

Carl Chr. Olsen                                          Judithe Denbæk

Siulittaasoq                                               Allatsi