Ordbogitut saqqummiussaq pisortatigoortuunngilaq

TUSAGASSIORFINNUT NALUNAARUT

Nuummi, maajip aappaanni 2016

Ordbogitut saqqummiussaq pisortatigoortuunngilaq

Sermitsiaq-ag-p apriilip 27-anni nutaarsiassatigut saqqummiuppaa uranimut tunngasunik taaguutinik ordbogiliortoqarsimasoq. Ordbogiunngilarli, taaguutillu saqqummiunneqartut pisortatigoortumik akuerisaanngillat.
Sermitsiap saqqummiussai tassaapput Dansk Institut for Internationale Studier DIIS-ip Naalakkersuisullu suliaat, tassanilu oqaatsit 20-t pineqartut Oqaasiliortukkoortinneqarsimanngillat, taamaattumillu akuerisatut isigineqarsinnaanatik.

Oqaasiliortut tassaapput Kalaallit Nunaanni oqaatsinik taaguutinillu nutaanik pisortatigut atortuulersitsisartut, taakkualu suleriusaat malillugu taaguutit, oqaatsit, oqariartaatsillu nutaat, taakkununnga naalisakkat oqaasersiallu ilanngullugit, akuerineqartigatik paasisimasallit suleqatigalugit misissorluarneqaqqaartussaapput. Matumanilu saqqummiunneqartumi tamanna pisimanngilaq.

Oqaasiliortut maanna aatsitassarsiornermut, uuliasiornermut, ujarassiornermut assigisaanullu tunngasut oqaatsit taaguutillu katersorsimalerpaat, ilaat Greenland Oil Industry Association suleqatigalugu akuerineqareersimallutik, taamaattumik taakkuninnga oqaatsit allattorsimaffiannik saqqummiussisut pingaartumillu Naalakkersuisoqarfik kaammattussavarput taaguutit nutaat pineqartillugit Oqaasileriffik suleqatigalugu suleriutsit pitsaasut atorlugit ingerlattaqqullugit, taamaalilluta taaguutinik assigiissumik atuineq ataqatigiissakkamik ingerlanneqarsinnaassammat.

Oqaasiliortut pillugit inatsit malillugu Oqaasiliortut akuerisaat allanut tunniunneqarlutik suliassanngortinneqarsinnaanngillat.

Taamak nalunaaruteqarluta Oqaasiliortut sinnerlugit
Bolatta Vahl, Oqaasiliortuni siulittaasoq