Ujarlerit

Oqaasiliortut 2016 – 10

OQAA – 161216 (gl)

Oqaasiliortut ataatsimiinnerannit imaqarniliaq

Sumiiffik: Ilimmarfimmi ini nr. 7-imi
Ulloq: 16.12.2016
Nalunaaqutaq: 09:00-12:00
Oqaasiliortut peqataasut: Mariia Simonsen, Mette L. Lyberth, Juaaka Lyberth aamma Bolatta M. Vahl
Peqataanngitsoq Jens Danielsen
Allatsi: Minik Jeremiassen
Ataatsimiinnerup normua: 10
  • Oqaluuserisat
  1. Oqaluuserisassat akuerineqarnerat
  2. Kingullermik ataatsimiinnermit imaqarniliap akuerineqarnera
  3. Oqaasileriffimmiit ilisimatitsissutit
  4. Oqaasiliortunut saaffiginnissutit
    4.1. Ingerlatseqatigiiffiit taaguutaat
    4.2. Sanser
    4.3. Juridisk person
    4.4. Frysepunkt
    4.5. Selvstændighed
    4.6. Græv aamma jærv
    4.7. Atertut qinnutigineqartut Aviina aamma Pikeera
  5. 2017-imut pilersaarusioqatigiinnissamut missingersuut
    5.1. 2017-imut pilersaarusioqatigiinnissamut ulluliineq
  6. Taasariaqartut allat
    6.1. Ataatsimeeqqinnissamut ulluliineq
    6.2. Oqaasiliortut suliassaasa killiffiannik ilisimatitsineq

Imaqarniliaq

  1. Oqaluuserisassat akuerineqarnerat:
    Oqaluuserisassat akuerineqarput.
  2. Kingullermik ataatsimiinnermit imaqarniliap akuerineqarnera:
    Novembarip 24-anni 2016 ataatsimiinnermit imaqarniliaq akuerineqarpoq, kisianni naqqiutinnguaq ataaseq iluarsineqaqqaassaaq, tassa Ph.d.-gradimik angusiffiusinnaasumi ’pædagogikki’ ’pædagogikkimik’ taarserneqarpoq:
    Arktiske studier – pædagogik og uddannelsesvidenskab
    Issittumi ilisimatusarnerit – pædagogikkimik ilinniartitsinermillu ilisimatusarneq
  3. Oqaasileriffimmiit ilisimatitsissutit:
    Oqaasileriffimmiit paasissutissat Oqaasileriffiup ningiuata pisarnermisut ataatsimiinnissaq sioqqullugu Oqaasiliortunut nassiuppai. Paasissutissat makkuupput:3.1. Oqaasilerinermut tunngasuni saaffiginnissutit amerliartuinnarmata, aammalu KNR-imi tusagassiortut oqaasilerisalernissamik kissaataat tunngavigalugit aallarniutitut TV-kkut oqaasilerisitsisalernissaq misililerparput. Imarisaa Oqaasileriffiup aaqqissuullugulu akisussaaffigissavaa, siunertaavorlu upernaap ilarsua aallakaatinneqartassasoq.

    3.2. Oqaasileriffimmiit januaarimi marlunnik suleqatissarsiulissaagut; inuit aqqinik suliaqartussamik kiisalu taaguusersuuserinermik suliaqarlunilu ataqatigiissaarisussamik.

    3.3. Kalaallisuumiit tuluttuumut ordbogip piviusunngortinnissaanut aningaasartuutissat siulliit Naalakkersuisoqarfimmit akilerneqarput, taamaattumik 1.januar app-iliaralugulu nittartakkakkut atorneqarsinnaalernissaanut suliaq aallartissaaq.

    3.4. Marsip qaammataani Oqaasileriffik CBS suleqatigalugu inuusuttunik ilinniarnertuunngorniartunik sprogteknologii pillugu (app-iliornermik aammalu nipimik pilersitsisinnaanermik) pikkorissaassaaq. Siunertaavoq inuusuttut oqaatsitigut teknologiimik annerusumik soqutiginnilernissaat. Ilinniartitaanermut Naalakkersuisoqarfik aningaasaliisuuvoq.

    3.5. Killiffilersuutip suliarinerani kinguaattooqqalaaraluarluta ingerlavugut. Suleqatitta Beatrinep specialiliaminik tunniussinissaminut angumersiniarnera peqqutigalugu Killiffilersuutit aatsaat februaarimi inaarsarneqassaaq.

    3.6. Ordboogeeqqap saqqummersinneqaqqinnissaa Oqaasileriffiup isumagissallugu isumaliutigaa. Oqaasilerinermi tunngavissatut allattaatsillu malittarisassaanut tunngasuni imaqarmat suli atorluarsinnaasunik sulilu atorneqarluartarmat.

    Mariia: Nittartagaq oqaluuserisassaniinngikkaluarpoq, kisianni atuisut eqqarsaatigalugit iluarsipallanneqartariaqarpoq.

    Nittartakkamik suliaqarsinnaasumik piffissami aalajangersimasumi atorfinitsitsisoqarsinnaassaaq.

  1. Oqaasiliortunut saaffiginnissutit:
    4.1. Ingerlatseqatigiiffiit taaguutaat:
    Ingerlatseqatigiiffiit assigiinngitsut taaguutaat Inatsisartut Allattoqarfianniit nutarsaqquneqarlutik saaffiginnissutaasimasut Oqaasiliortuniit ima aalajangersaaffigineqarput:
Qallunaatut Kalaallisut Oqaaseqaatit
selskab ingerlatseqatigiiffik 2000-imi Oqaasiliortut ’ingerlatsivik’ akuerisimariarlugu 2009-mi ’forvaltning’ aamma ingerlatsivimmik taaguusersimavaat, taamaammat selskabimut taaguut sungiusimaneqareersoq ’ingerlatseqatigiiffik’ akuerisatut taaguutaassasoq aalajangiunneqarpoq
aktieselskab aktiaateqarluni ingerlatseqatigiiffik Oqaasiliortunit allanngortinneqanngilaq
anpartsselskab (ApS) piginneqataassuteqarluni ingerlatseqatigiiffik (ApS) Oqaasiliortunit allanngortinneqanngilaq.
andelsselskab piginneqatigiilluni ingerlatseqatigiiffik Oqaasiliortunit allanngortinneqanngilaq.
andelsforening piginneqatigiiffik Oqaasiliortunit allanngortinneqanngilaq.
holdingselskab piginnittutut ingerlatseqatigiiffik Oqaasiliortunit allanngortinneqanngilaq.
moderselskab piginneqatigiiffik pingaarnerusoq Oqaasiliortunit allanngortinneqanngilaq.
Siunnersuutaasimagaluarput ’ingerlatseqatigiiffik aqutsisoq’ aamma ’aqutsisutut ingerlatseqatigiiffik’, kisianni aqutsisutut taassallugu Oqaasiliortuniit naleqquttuusorineqanngilaq peqqutigalugu ingerlatseqatigiiffiutigisat (datterselskabit) imminnut aquttuummata, tassa immikkut siulersuisoqarlutik ingerlasarmata.
Taaguutaata allanngorneqarnissaanut peqqutaasinnaasumik Oqaasiliortut nassaassaqanngillat.
datterselskab ingerlatseqatigiiffiutigisaq Oqaasiliortuniit 2000-imi ’piginneqatigiiffik allamit aqutaq’ taaguutitut akuerineqarsimasoq allanngortinneqarpoq allamit aqutaannginnera peqqutigalugu, tassa ingerlatseqatigiiffiutigisat (datterseskabit) immikkut siulersuisoqarnermikkut imminnut aqullutik ingerlaaseqarput piginneqatigiiffimmiilli pingaarnerusumiit pigineqartarlutik.
koncern suliffeqarfissuaq immikkoortortalik ’Ingerlatseqatigiiffissuaq’ taaguutissatut siunnersuutigineqarsimagaluartoq taaguutigineqareersoq pineqartumut naapertuummat allanngortinnginnissaanik Oqaasiliortut aalajangerput
interessentselskab (I/S), interessentskab (I/S) peqatigiilluni ingerlatseqatigiiffik (I/S) ’soqutigisaqaqatigiilluni ingerlatseqatigiiffik’ taaguutissatut Inatsisartut Allattoqarfianniit siunnersuutigineqarsimagaluartoq Oqaasiliortuniit taaguutaareersimasoq Inatsisartullu inatsisaanni atorneqartareersoq atuinnartussanngortinneqarpoq.
iværksætterselskab aallarnisaasutut ingerlatseqatigiiffik Siornatigut Oqaasiliortut akuerisaannik taaguuserneqarsimanngitsoq Inatsisartut Allattoqarfianniit siunnersuutigineqarsimasoq atorneqartareersorlu Oqaasiliortuniit akuerineqarpoq.
andelsboligforening piginneqatigiilluni inissiaatillit peqatigiiffiat ’piginneqatigiilluni inissiaatileqatigiiffik’ Inatsisartut Allattoqarfiata siunnersuutaa akuerinagu Piginneqatigiilluni inissiat pillugit Inatsisartut peqqussutaat nr. 2, 16. maj 2008-imeersumi taaguutigitinneqarsimasoq ’piginneqatigiilluni inissiaatillit peqatigiiffiat’ akueraat.

4.2. Sanser:
Oqaluuserisassaq ataatsimeeqqinnissamut kinguartinneqarpoq.

4.3. Juridisk person:
Oqaluuserisassaq ataatsimeeqqinnissamut kinguartinneqarpoq.

4.4. Frysepunkt:
Oqaluuserisassaq ataatsimeeqqinnissamut kinguartinneqarpoq.

4.5. Selvstændighed:
Oqaluuserisassaq ataatsimeeqqinnissamut kinguartinneqarpoq.

4.6. Græv aamma jærv:
Oqaluuserisassaq ataatsimeeqqinnissamut kinguartinneqarpoq.

4.7. Atertut qinnutigineqartut Aviina aamma Pikeera:
Atertut qinnutigineqartut Aviina aamma Pikeera akuerineqarput.

  1. 2017-imut pilersaarusioqatigiinnissamut missingersuut:
    2017-imi Oqaasileriffiup anguniagassatut aalajangiussimasai tassaapput:5.1. Killiffilersuutit
    Naatsorsuutigineqarpoq februaarimi naammassineqassasoq.

    5.2. Kalaallisuumiit tuluttuumut ordbogi
    Ordbogissap nittartakkamiilernissaa app-inngorlugulu atorneqarsinnaasunngortinneqarnissaa Oqaasileriffimmiit anguniarneqarpoq.

    5.3. Nunat aqqisa nittartakkamiisinneqalernissaat.

    5.4. Corpusilerineq

    5.5. Taaguusersuuserinerlu

    5.6. KNR-TV-mi oqaasilerinermik aallakaatitsineq
    Oqaasileriffimmiit ilisimatitsissutini nr. 1-imi tamanna pillugu allassimasoqarpoq.

    Oqaasileriffiup anguniagaasa saniatigut Oqaasiliortuniit Oqaasileriffiup anguniagassaatut siunnersuutigineqartut tassaapput:

  1. Kalaallisut retskrivningsordbogimik pilersitsinissaq, aamma
  2. Oqaasileriffiup avammut nittarsaassisartumik/attaveqaammik atorfinitsitsinissaa.
    Atorfinittussammi ilaatigut isumagissavai Oqaasiliortuniit akuerisat inuiaqatigiinnut nalunaarutigisassallugit.Oqaasiliortut immikkut anguniagassaminnik kingusinnerusukkut isumasioqatigiillutik ataatsimiissapput, maannamullu aalajangiusimariigaat tassaavoq Oqaasileriffiup avammut nittarsaassisartumik/attaveqaammik atorfinitsitsinissaa. Tamatumunnga tunngatillugu Oqaasiliortut Informationsstrategimik/ Kommunikationsstrategimik ataatsimiissuteqassapput.

    5.2. 2017-imut pilersaarusioqatigiinnissamut ulluliineq:
    Oqaasiliortut aalajangiuppaat februaarimi sapaatip akunnerani siullermi 2017-imut pilersaarusioqatigiissallutik.

  3. Taasariaqartut allat
    6.1. Ataatsimeeqqinnissamut ulluliineq
    Ataatsimeeqqinnissaq februaarimi sapaatip akunnerani siullermi pissaaq. Periarfissaappat 2017-imut pilersaarusioqatigiinneq Oqaasiliortullu ataatsimiinnissaat nalinginnaasoq ataatsimoortinneqassapput.6.2. Oqaasiliortut suliassaasa killiffiannik ilisimatitsineq:
    Oqaasiliortut allattaata Oqaasiliortunut ataatsimiinnissaq sioqqullugu nassiuppaa.

 

Oqaasiliortut siulittaasuat                        Allatsi

Bolatta M. Vahl                   Minik Jeremiassen