Ujarlerit

Oqaasiliortut 2002 – 4

OQAA – 240402(gl)

Oqaasiliortut apriilip ulluisa 24-ianni 2002, nal. 10.00 Oqaasileriffimmi ataatsimiinnerannit imaqarniliaq.

 

Peqataasut: Carl Chr. Olsen, Stephen Heilmann, Ella Skifte, Nuka Møller, Kelly Berthelsen.

Allatsigalugu Pia N. Knudsen

 

Oqaluuserisassat:

  1. Oqaluuserisassat akuerisassanngorlugit saqqummiunnerat
  2. Kingullermik ataatsimiinnermit imaqarniliamik akuersineq
  3. Ilisimatitsissutit
  4. Forbrugerrådet
  5. Kystledelsen
  6. Atortorissaarutilerisoq
  7. Naqissuserpaa
  8. Taaguusersuutinik suliat oqallisiginerat
    1. peqqinnermut tunngasut
    2. perorsaaneq
    3. biibilimi aqqit
    4. inuit aqqi
  9. Taasariaqartut allat

-1 pillugu-

Oqaluuserisassat akuerineqarput

-2 pillugu-

Kingullermik ataatsimiinnermit imaqarniliami qupperneq 4-miittoq allassimasoq “upperpalaarnerusutut” upperpalaarnermut tulluarneruvoq-mik taarserneqarpoq.

Imaqarniliaq akuerineqarpoq.

-3 pillugu-

CCO: Kingullermik ataatsimiinnermi Sprogpolitisk referencegruppep marsimi ataatsimiinnerani eqqartorneqartut pingaarnerit CCO-p eqqaaqqippai. Oqaatsit atuuffiisa allanngoriartornerisa kingunerisaannik nunani avannarlerni ilinniartut tuluttuinnaq oqaloqatigiittarnerat ernumassutigineqartoq oqaatigaattaaq.

Kalaallit ilinniagartuut allamiut oqaatsii ilikkakkatik kalaallisut nutsertarmatigik iluatigineqartoq CCO-p oqaatigaa.

ES: Peqqinnissaqarfinni  kalaallisut taaguutit atorneqarpianngitsut arriitsumilli atorneqaleriartortut ES-p oqaatigaa. Tassunga peqqutaanerarpaa Peqqissanermik Ilinniarfimmi ilinniartitsisut amerlanerit qallunaatut oqaluttuunerat, taakkulu qallunaatut taagutinik atuisuunerat.

Ilinniartitsisut qallunaatut oqaluttut kalaallisut taaguutinik atuilernerisigut kalaallisut taaguutit atorneqalersinnaaneri ES-p qularutiginngilaa.

CCO: ICC aasamut ataatsimeersualerpat ataatsimut allattaaseqalernissap misissorneqarnera saqqummiunneqassaaq.

-4 pillugu-

CCO: Atuisartut pisisartullu inuiaqatigiinnit assigiimmik atorneqasssanersut CCO-p Oqaasiliortoqatiminut apeqqutigaa. Atuisartut pisiassanuinnaq tunngatillugu atuineq ajormata Atuisartutut taaguuteqarnissaa CCO-p siunnersuutigaa.

Oqaasiliortut tamarmik atuisartut atorneqarpat naammagaat.

SH: Klagenævnet-p maalaartarfimmik taaneqartarnera SH-p isumaqatigivallaanngilaa, maalaartoq nipitalerlugu atorneqartarmat unnerluffimmik taaneqartalernissaa tulluarnerusutut nipeqartoq oqaatigaa.

NM: NM-p SH-p oqaasiinut ilassutigaa Unnerluussivik atuutilissappat pineqartumut qaninnerusoq, tullianimullu misissornissaa siunnersuutigalugu.

-5 pillugu-

CCO: CCO-p Oqaasiliortunut kystledelsen tuluttut qanoq taaneqartarsinnaanersoq eqqarsaatissiissutigaa.

Oqaasiliortut tamarmiullutik Rural Health Management tuluttut atorneqassasoq isumaqatigiissutigaat.

-6 pillugu-

SH: Atortorissaarutilerisoq assigiinngitsorpassuarnut atorneqarsinnaasoq tusagassiortut radiukkuinnaq TV-kkuinnarlu atorneqartartutut nipeqalersillugu atortalersimammassuk SH-p eqqarsarnartoqartippaa.

Tekniker nunarsuarmioqatigiinnit atorneqarmat kalaallinittaaq allanngortinnagu atorneqarnissaa SH-p  siunnersuutigaa.

CCO: Europamiut oqaasii kalaallinit eqarineerunnikuummata, oqaatsit allamiut oqaasiinit aallaaveqartut kalaallisuumullu nutserneqarsinnaanngitsut allanngortinnagit kalaallinit atorneqassappata CCO-p isornartoqartinngilaa.

Tekniker kalaallisut assigiinngitsunik taagorniarunikku nassuiaaserlugu atortarnissaat CCO-p siunnersuutigaa.

-7 pillugu-

SH: Naqissuserpaa-p tusagassiuutitigut eqqunngitsumik atorneqalernera SH-p eqqarsarnartoqartippaa. Naqissuserpaa isumavimminik atorneqassappat tigussaasoq atorlugu naqitsinermik isumaqartoq SH-p oqaatigaa.

SH-p ilimagaa tusagassiortut oqaaseq erseqqissarpaa kukkuluttornermikkut naqissuserpaamik taasaraat.

CCO: Oqaatsip naqissuserpaa-p atorneqassatillugu pinngitsoorani sumut tunngatillugu atorneqarnersoq erseqqissaavigineqartariaqartoq CCO-p oqaatigaa.

-8 pillugu-

  1. CCO: Taaguutit peqqinnermut tunngasut upernaaq manna naammassissasut massakkullu Perip Jakobillu computeriinut immiuttut CCO-p oqaatigaa.
  2. Taaguutit persorsaanermut tunngasut qeqqa tikillugu Kunuunnguaq Fleischer, Kelly Berthelsen-ip Carl Chr. Olsenillu suliarisimavaat.
  3. Teologi Hollandimioq Paula Bekooy oqaatsit upperisamut tunngasut kalaallisuunngorlugit nutserneqartarneri pillugit saaffiginneqqippoq, CCO-llu neriorsorsimavaa Oqaasiliortut ataatsimiinneranni takkuteqqissimanera saqqummiunniarlugu.
  4. CCO: Inuit Aqqinik Aalajangiisartut siunissami Oqaasileriffimmi ataatsimiittalernissaat, aammalu allagaatinik toqqorsiveqalernissaat CCO-p siunnersuutigaa.

NM: Inuit Aqqinik Aalajangiisartut atsiisarneq pillugu atuagaaqqiornissartik siunertaraat, tassani siunertarineqarpoq angajoqqaanngortussat atsiisarneq inuillu aqqi akuerisat pillugit paasissutissiiffiginissaat.

-9 pillugu-

Oqaasiliortut 2002-p upernaakkut ataatsimiiffissatik imatut allannguuteqartippaat:

Majip arfernanni Oqaasileriffimmi nal. 10.00

Junip arfineq aappaani Oqaasileriffimmi nal. 10.00

Ataatsimiinnissaq tulleq pissaaq ataasinngornermi majip arfermanni nal. 10.00, Oqaasilerifimmi.

 

Carl Chr. Olsen                                          Pia N. Knudsen

Siulittaasoq                                               Allatsi