Ujarlerit

Oqaasiliortut 2002 – 6

OQAA – 070602(gl)

Oqaasiliortut juunip 7-anni 2002, nal. 10.00 Oqaasileriffimmi ataatsimiinnerannit imaqarniliaq.

 

Peqataasut: Carl Chr. Olsen, Stephen Heilmann, Sofia Geisler.

Ella Skfte aamma Nuka Møller peqquteqarlutik peqataanngillat.

Allatsigalugu: Pia N. Knudsen.

 

Oqaluuserisassat:

  1. Oqaluuserisassat akuerisassanngorlugit saqqummiunnerat.
  2. Kingullermik ataatsimiinnerup imaqarniliornerata akuerisassanngorlugu saqqummiunnera.
  3. Ilisimatitsissutit.
  4. ”Oqaatsit pillugit sapaatip akunnera”, qanoq takorloorparput? (KIIIP-imiit Nuka Kleemannip allagaa).
  5. Videncenter om børn og unge, kalaallisut.
  6. Silap qanoq pissusianik taaguisarnerit, aallarniutaasumik (Stephen Heilmann).
  7. Taasariaqartut allat.

-1 pillugu-

Oqaluuserisassat akuerineqarput.

-2 pillugu-

Kingullermik ataatsimiinnermit imaqarniliaq akuerineqarpoq.

-3 pillugu-

CCO: Uani sapaatip akunnerani Ilisimatusarfimmi Ph.D-nngorniat seminareqarnerat CCO-p ilisimatitsissutigaa. Oqalugiartoqareernerisigut oqallittarnerit pisarsimasut aamma kalaallisut oqaatsitta inissisimanerata nunanit allamiunit alapernaanneqarnera eqqaavaattaaq.

Atuagassiami Inuit Studiesimi aaqqisuisut Ph.D-nngorniat seminareqarneranni peqataasut, kiisalu atuakkap temanngorluni saqqummertarnermigut malinnaaffigiuminarnera CCO-p eqqaavaa.

Inuit Studiesimi aaqqissuisut ilaat aaqqissuisoqarfimmiit tunuarniartoq, aggustimi Inuit Studiesimi aaqqissuisut ataatsimiissasut CCO-p ilisimatitsissutigaattaaq.

CCO: Timmissat atii pillugit atuakkamik saqqummersitseqqinnissamut atatillugu Oqaasileriffimmi misissuineq ingerlanneqartoq CCO-p ilisimatitsissutigaa.

CCO: Sapaatip akunnerani 23-miit qallunaatuumiit kalaallisuumut ordbogip kukkunersiorneqarnera suliarineqassaaq, ordbogillu ukiaru saqqummersinneqarnissaa naatsorsuutigineqartoq CCO-p ilisimatitsissutigaa.

CCO: Inuit Aqqinik Akuersisartunut nutaamik ilaasortaqalernera aamma siunissami Oqaasileriffimmi ataatsimiittalernissaq pillugu Nunatta Biskopinut Sofie Petersen CCO-p sianerfigisimavaa.

Inuit Aqqinik Akuersisartut Carl Chr. Olsen peqatigalugu juunip 20-anni 2002, nal. 10.00 Oqaasileriffimmi ataatsimiissapput.

-4 pillugu-

Oqaasiliortut Oqaatsinut politikkimik nassuiaasiornerminni suliniutitut siunnersuutigisimasaat “Oqaatsit pillugit sapaatip akunnera” pillugu Oqaasiliortut Nuka Kleemannimit ataatsimeeqatiserineqarput.

Ataatsimeeqatigiinnissamut eqqartugassanik siunnersuusiornermi ataani taaneqartut ilanngussassatut aalajangerneqarput:

  1. Sumiorpalussuseq (Standardgrønlandsk)
  2. Allagartalersuineq
  3. Oqaasilerineq (Grammatik)
  4. Marluinnik oqaaseqarneq

SH: Tusagassiutitigut oqalunermi sumiorpalussuseq atorneqassanersoq imaluunniit Rigsgrønlandsk atorneqassanersoq Oqaatsit pillugit sapaatip akunneranut oqallisissatut SH-p siunnersuutigaa.

CCO: Allakkat allagarsiussallu suliffeqarfinnit inuiaqatigiinnut ingerlasussat qanoq ittuusinnaaneri qanorlu isikkoqassanersut Oqaatsit pillugit sapaatip akunneranut oqallisissatut CCO-p siunnersuutigai.

Allattaaseq oqaasilerinerlu pillugit oqallinnissaq CCO-p siunnersuutigaattaaq.

Marluinnik oqaaseqarneq taakkulu inuiaqatigiinnut sunniutaat sapaatip akunneranut CCO-p oqallisissatut siunnersuutaanut ilaavoq.

Nuka Kleemannimik ataatsimeeqateqarnissaq juunip 24-anni 2002, nal 10.00 Oqaasileriffimmi pissasoq CCO-lu Nuka Kleemennimut allagaqassasoq Oqaasiliortut isumaqatigiissutigaat.

-5 pillugu-

Mette Lundimit (Isumaginninnermut Suliffeqarnermullu Pisortaqarfik) allakkatigut Videncenter om børn og unge) kalaallisuunngorlugu qanoq taaneqassanersoq apeqqutigineqarmat, Oqaasiliortut videncenter kalaallisut paasisanik siammarteriffik-mik taaguuserpaat. Oqaaseq paasisanik siammarteriffik sumut atorneqarnersoq tunngavigalugu oqaatsinik allanik ilassuserneqarsinnaanera Oqaasiliortunit ammaffigineqarpoq.

Peter Aagaard Petersenip “Kursuscenter for kirkelige grund- og videreuddannelser” kalaallisut taaguuteqalernissaanik qinnuteqaataata eqqartorneqarnissaa tulliani ataatsimiinnissamut kinguartinneqarpoq.

-6 pillugu-

SH: Silassamik atuaasartut silap qanoq issusianik taaguutinik aalajangersimasunik taaguisalernissaq siunertaralugu malittarisassanik atorneqarsinnaasunik piumammata SH-p nalunaarutigaa allattukkanik taaguuserniakkanik tunniussaqarsimanngitsut. Taaguutit ataasiakkaatut suliarineqartarsinnaanissaat periarfissaqartinniarneqarpoq.

-7 pillugu-

CCO: Tusilartunut Siunnersiusarfik tusilartunut ussersuutinik “Kalaallisut Ussersuutit“-nik taallugu CD-romimik atuagartalimmik saqqummersitsisimanerat CCO-p eqqaavaa. Tusilartunut ussersuutit kalaallinut naleqqussagaaneri nutaajummata tusagassiutitigut saqqummiunneqarnissai Oqaasiliortut siunnersuutigaat.

Ataatsimiinnissaq tulleq pissaaq juunip 24-anni 2002, nal. 10.00 Oqaasileriffimmi.

 

Carl Chr. Olsen                                          Pia N. Knudsen

Siulersuisoq                                               Allatsi