Ujarlerit

Oqaasiliortut 2005 – 6

OQAA – 241105(gl)

Oqaasiliortut ataatsimiinnerat sisamanngornermi novembarip 24-anni, 2005 nal. 10.00 Oqaasileriffimmi

 

Peqataapput: Carl Chr. Olsen, Stephen Heilmann, Ellen Jensen, Nuka Møller.

Liisi Egede Hegelund peqataanngilaq.

Aamma najuupput: Oqaatsinik misissuisoq Bolatta Vahl, allatsi Møller.

 

Oqaluuserisassatut siunnersuutit:

  1. Oqaluuserisassat akuerisassanngorlugit saqqummiunnerat
  2. Kingullermik ataatsimiinnermit imaqarniliap akuerisassanngorlugu saqqummiunnera
  3. Sullivinni tarnikkut atukkat pillugit taaguusersuutit
  4. Kukkuniiaat (Per L.-ip suliakkiissutaa)
  5. Oqaatsit isummerfigisassat:
    Kristian Poulsenimit siunnersuutigineqartut
    Menu-punkt
    Rullende fortov
    ildsjæle
  6. Apeqquteqaatit akissuteqarfigisimasat
  7. Taasariaqartut allat

– 1 pillugu –

Oqaasiliortut siulittaasuat Carl Chr. Olsen (puju) ataatsimiigiartunik tikilluaqqusivoq. Kinguninngua aperivoq ataatsimiinnermi oqaluuserisassat akuerineqarnersut. Nuka Møller ilassutissaqarnerarpoq kingullermik ataatsimiinnermit oqaatsimut akuerisamut tunngatillugu, tassa kutsiorti pillugu. Kutsiorti-lu oqaluuserisassanut immikkoortoq 5-imiittunut inissinneqarpoq oqaluuserisassat ilagilerlugu. Oqaluuserisassanut immikkoortoq 5-imiittunut ilanngunneqarportaaq integrerede institutioner-i kalaallisut qanoq akuerisaasumik taaguuteqalissanersoq.

– 2 pillugu –

Kingullermik ataatsimiinnermit imaqarniliamut tunngatillugu Nuka Møller naqqiissuteqarpoq immikkoortoq 4 pillugu, tassa Inuit aqqinik nalunaarsuutinut tunngasumik nassuiaanermut tunngatillugu. Oqaaseqatigiit uku; “Oqaatigaa kalaallit aqqi akuerisat kingullermik 1999-imi taassumalu siuliani 1985-imi nalunaarsorneqarsimasut ima allassimasussaasoq oqaatigaa; “Oqaatigaa kalaallit aqqi akuerisat kingullermik 1999-imi taassumalu siuliani 1985-imi saqqummersinneqarsimasut. Oqaaseqatigiit naqqitat aappaat imaassapput: “Taamatut nalunaarsuinermini atuakkiortut atuakkiaat ukua nalunaarsuinermini atorsimallugit oqaatigaa. Naqqiissutit aaqqinneqareermata kingullermik ataatsimiinnermit imaqarniliaq akuerineqarpoq.

– 3 pillugu –

Oqaasiliortut aalajangerput Sullivinni tarnikkut atukkat pillugit taaguusersuutit angerlaallugit misissoqqissaassallugit, sapaatillu akunnerata tulliani decembarip aallaqqaataani 2005-imi nalunaaqutaq qulinut taakkuinnaat eqqartorlugit Oqaasiliortut ataatsimiissasut.

– 4 pillugu –

Per Langgårdip Oqaasiliortunut suliakkiissutigaa kalaallit oqaasiinik suliaqarnermi præskription imaluunniit deskription malillugu ingerlasoqassanersoq. Oqaasiliortut oqallisingaatsiarput. Suliakkiinermini aallaaviuvoq kukkuniiaat –ip qanoq ingerlateqqeriarnissaanik apeqqut.  Annermik Oqaasiliortunit sammineqarpoq sprognormi maleqqissaarneqassanersoq imaluunniit ullutsinni oqaatsit atugaasut sprognormimut malinninngitsut aamma kukkuniiaammi ilaatinneqassanersut.

Aalajangiunneqarpoq sprognormi malinneqassasoq, aammali sprognormimut malinninngitsut ullutsinnili atugaasut immikut akuerisat atorneqarsinnaasut. Oqaasiliortut siulittaasullu isumaqatigiissutigaat siulittaasoq apeqqummut akissutissiussasoq.

Siunniunneqarpoq Oqaasiliortut aaqqissugaannik kalaallit oqaasiinik suliaqartut isumasioqatigiissinneqassasut kalaallit oqaasiinik suliaqarneq qanoq tunngaviligaassanersoq qulequtaralugu. Isumasioqatigiinnissaq qaqugu piumaarnersoq suli aalajangerneqanngilaq.

– 5 pillugu –

5a. Kristian Poulsenip siunnersuutigaa oqaasersiaq borgmesteri kalaallisut taaguuteqalissasoq ima: Angutaappat kommunip ittua, arnaappallu kommunip ningiua. Siunnersuutaata aapparaa kommunaldirektøri kalaallisut ima taaguuteqalissasoq: Kommunip pisortaanera imaluunniit Kommunimi pisortaaneq. Kristiaap siunnersuutaasa pingajoraat Kommunalbestyrelse-p Kommunimi aqutsisut-tut taaguuteqalernissaa. Siunnersuutigaattaaq byrådet kalaallisut ima  taaguuteqalissasoq siunnersuutigaattaaq: Kommunimi aqutsisut, aamma byrådssalen ima: kommunimi aqutsisut ataatsimiittarfiat.

Oqaasiliortut aalajangerpaat Kristian Poulsenip siunnersuutai kommuninut tusarniaassutigineqassasut.

Kristian Poulsenip siunnersuutaa kingulleq nunap aqqinik allanngortitsinissamik imaqarpoq, tassa Nordostrundingenip ima ateqartinnissaanik siunnersuuteqarami: Kangersuaq. Siunnersuut taanna Nunat Aqqinik Aalajangiisartunut ingerlateqqinneqassaaq.

5b. Nuup kommuniani nutserisup Niels Poulsenip apeqqutigaa oqaaseq  menu-punkt kalaallisut qanoq taaguuteqarnersoq. Stephen Heilmannip siunnersuutigaa TELE A/S-imi teknologimut tunngasunik taaguutinik suliaqartunut apeqqutigineqassasoq, taakkuninnga suliaqartut tamakkuninnga suliaqartuummata.

5c. “Rullende fortov” Oqaasiliortunit akuerineqarluni kalaallisut ima taaguuserneqarpoq: pisuffik ingerlasoq.

5d. “Ildsjæle” Oqaasiliortunit akuerineqarluni kalaallisut ima taaguuserneqarpoq: ilungersuussilluartoq.

5e. Kingullermik Oqaasiliortut ataatsimiinnerata imaqarniliornerani allassimagaluarpoq  fuldmægtig kalaallisut ima taaguuteqalissasoq:  kutsiorti.

Imaqarniliami aalajangiussinerunani misissugassanngortitsineq mininneqarsimasoq uparuarneqarpoq.

Nuka Møllerip kutsiortip isumaanik nalunaarsuinerata takutippaa kutsiorti fuldmægtigimut taaguutigitissallugu naapertuutinngitsoq, – isumaliutigeqqitasanngortinneqarpoq.

5f. Nuka Kleemannip Perorsaanermik Ilinniarfik sinnerlugu Oqaasiliortunut qallunaat oqaasiat integrerede institutioner kalaallisut akuerisamik taaguuteqalernissaa saaffiginnissutigaa. Oqaasiliortut aalajangerput ima taaguuteqalissasoq: minnernut annernullu meeqqerivik.

– 6 pillugu –

Apeqquteqaatit akissuteqarfigisimasanik soqanngimmat immikkoortumi tassani oqallittoqanngilaq.

– 7 pillugu –

Taasariaqartunut tunngatillugu Stephen Heilmannip oqaatigaa sullivimminni assortuussutigineqarsimasoq oqaaseq Inuit qallunaatut ataasersiutinngortillugu qasseersiutinngortillugulu qanoq taaneqartarnersoq. Ilaatigut oqaatigineqarsimalluni qallunaatut Inuit ataasersiutaasoq, Inuitter-ilu qasseersiutaalluni. Isumaqataanngitsullu oqaatigisimavaat Inuit qasseersiutaasoq. Siulittaasup nassuiaateqareerneratigut innersuussuteqarneratigullu  oqaatsip danskisut atugaanera nassuiaatinngorlugu Dansk Sprognævnimut saffiginnissutigineqassasoq aalajangiunneqarpoq.

 

Carl Chr. Olsen                                          Lisathe M. Kruse

Siulittaasoq                                                                Allatsi