Ujarlerit

Oqaasiliortut 2008 – 1

OQAA – 270208(gl)

Oqaasiliortut Ataatsimiinnerat pingasunngorneq februaarip 27-anni, 2008 nal. 13.00 Ilimmarfimmi Oqaasileriffiup ataatsimiittarfiani.

 

Peqataasut.:Abia Abelsen, Eva Møller Thomassen, Stephen Heilmann, Carl Chr. Olsen aamma Katti Frederiksen

 

Oqaluuserisassatut siunnersuutigineqartut:

  1. Tikilluaqqusineq (ilisarititsineq)
  2. Imaqarniliap akuerineqarnera
  3. Allakkat suliassartallit oqaatsillu isummerfigisassat (vilkår, Det centrale Personregister, narkohæler, Entrepenør- og bjerværksskole, voldtægt, kilisaatini taaguusersuutit, GA’s standardforbehold, vesikler).
  4. Allat

Ataatsimiinnermi imaqarniliaq

Ukioq manna aatsaat siullermeerutaasumik Oqaasiliortut ataatsimiipput, ullormi oqaluuserisassat assigiinngitsunut sisamanut immikkoortortaqarlutik.

  1. Tikilluaqqusineq ilisarititsinerlu pereermata ilisimatitsissutissat assigiinngitsut Pujup saqqummiuppai:

–   Pujup ilisaritippaa Oqaasileriffimmi Oqaasiliortut suliassaataannut akademisk sagsbehandlerisut atorfinittoq Katti Frederiksen februaarip aallaqqaataaniit atorfinittoq

–   Ilitsoqqussaralugu Oqaatsit Ulluannut aaqqissuussinerup iluatsilluarnera.

–   Pujup januaarimi Permanent Forumimut peqataasimanerani nalunaarusiaq apriilimi saqqummiunneqartussaassaaq.

  • KIIIP Oqaasileriffiullu Oqaatsitigut akuunerulersitsinissamut suliaq ukiamut inatsisartunut saqqummiunneqarnissaanut piareersaasiussapput.
  • KIIIP-ip ataatsimeeqatigereerneraniit aalajangiunneqarpoq Nordisksprogkonventionip qanoq suliniutiginissaa/neqitalernissaa Oqaasileriffimmit aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit (KIIIN) iliuusissanik pilersaarusiuunneqassaaq.
  1. Ataatsimiinnermit kingullermit imaqarniliap akuerineqarnera.
    – naqinnerliukkat oqaatsillu apeqqutilerneqarsimasut suliassiissutigeqqinneqarput.
  2. Allakkat suliassartallit oqaatsillu isummerfigisassat (vilkår, Det centrale Personregister, narkohæler, Entrepenør- og bjerværksskole, voldtægt, kilisaatini taaguusersuutit, GA’s standardforbehold, vesikler).
    – VILKÅR kalaallisut tassa ‘piumasaqaatit’, tassani malugeqquneqarpoq vilkår aamma suliaqarfinni allani allatat atugaasarmat isumaqartillugu “atukkat”
    – NARKOHÆLER kalaallisut ‘ikiaroornartumik tuniniaassisoq’
    – DET CENTRALE PERSONREGISTER tassa ‘Aternik qitiusumik nalunaarsuiffik.’
    –  ENTREPENØR- OG BJERVÆRKSSKOLE tassaassaaq ‘Sanaartornermut Ujaqqerinermullu atuarfik.’
    – ENTREPENØR- OG MINEUDDANNELSE tassaassaaq ‘Sanaartornermik Aatsitassalerinermillu ilinniarneq.’
    – OVERFALDSVOLDTÆGT tassaavoq ‘Aatsaat naapitamik nakuuserluni atoqateqarneq’
    – KONTAKTVOLDTÆGT tassaavoq ‘Nalunngisamik pinngitsaaliilluni atoqateqarneq’
    – PARVOLDTÆGT tassaavoq ‘Inooqatigisamik inooqatigisimasamilluunniit pinngitsaaliilluni atoqateqarneq’
    – Kilisaatini taaguusersuinissamik siunnersuuteqartoq annertunerusumik tusarniaavigineqassaaq sorpiaat taaguusersoqqunerai..
    GA’s standardforbehold er gældende for tilbuddet tassaassaaq ‘Neqerooruteqarnermi Sulisitsisut pissutsit allanngornerini maleruagassiaat tamanoortut atuupput’.
    – VESIKLER kalaallisut pullaqinerit.
  3. FN-ip Oqaatsinut Ukiorititaani Oqaasileriffik, ilaatigut allanik peqateqarnermigut oqaatsitsinnik malunnartitsiniarluni ukiup ingerlanerani aaqqissuisarniarpoq. Tassani Oqaasiliortuniit siunnersuutit ilaat maaniipput:
    – Aaqqissuussinerni Oqaasiliortut peqataatinneqarnissaat
    – Tusagassiutit suleqatigalugit oqaatsivut pillugit aallakaatitassiorneq
    – Unnussiuaartitsinerit, taallanik, naatsulianik saqqummiussisarnerit, Kalaallit Atuakkiortut suleqatigineqarsinnaapput.

Inussiarnersumik inuulluaqqusilluta

Carl Chr. Olsen                                             Katti Frederiksen

Siulittaasoq                                                 Allatsi