Ujarlerit

Oqaasiliortut 2008 – 5

OQAA – 300408(gl) 

Oqaasiliortut Ataatsimiinnerat pingasunngorneq apriilip 30-anni 2008 nal. 10.00 Ilimmarfimmi Oqaasileriffiup ataatsimiittarfiani.

 

Peqataasut: Eva Møller Thomassen, Ellen J.Karlsen, Stephen Heilmann Abia Abelsen aamma Carl Chr. Olsen

Allatsi: Nuka Møller

 

Oqaluuserisassatut siunnersuutit:

  1. Tikilluaqqusineq
  2. Kingullermik ataatsimiinnermit imaqarniliap akuerineqarnera
    – taaguusiinermi qisuariaat (ilaliussalik)
  3. Taaguusersuinermi taaguutit akuerineqartussat (ilaliussalik)
  4. Kalaallit Nunaata allanneqartarnissaanut malittarisassat
  5. Saaffiginnissutit suliassartallit
    – stylist (ilaliussartalik)
    – ’meeqqat tapisissapput’ (ilaliussartalik)
    – inuit aqqini allaqqasut han/hun, suiaassusertallit (ilaliussalik)
    – ateq Angitivik akuerineqassava?
    – krone/koruuni? Millioner kroner kalaallisut (ilaliussalik)
    – teknisk afdeling allallu taaguutit (ilaliussalik)
    – oqaaseq ’qanilaassuseq’ (ilaliussalik)
    – bussinut tunngasut (ilaliussalik)
    – Nordisk social sikringsportal
    – aaviaatit
    – advokatfuldmægtig kalaallisut
    – sundhedsledelse kalaallisut
    – qarasaasiap isaa aamma qarasaasiap aquutaa?
    – Inuit Nunaat akuereqqullugu (telefonikkut) saaffiginnissut.
    – fuck dig dansker kalaallisut qanoq nutserneqassava?
    – højt forædlede produkter kalaallisut (ilaliussalik)
    – januaarimili taaguusertinniakkat: Vægforskalling, Detail støbning vægge,  Detail dækforskalling, Væg og dækforskalling, Støbning af dæk, Kraftig ”anhugger”
    – Vivi Lynge Petrussenip saaffiginnissutaa
  6. Allat

Inussiarnersumik inuulluaqqusilluta

 

Carl Chr. Olsen                                          Katti Frederiksen

Siulittaasoq                                               Allatsi

 

– 1. aamma 2. pillugit –

Siulittaasoq tikilluaqqusivoq. Kingullermik ataatsimiinnermi imaqarniliat pillugit 4.d-mi allattoqarfimmik allasimasoq aaqqinneqassaaq allatseqarfinngorlugu. Helene Møllerip allakkamini eqqaasitsissutigisai eqqartorneqarput, taannalu tunuliaqutaralugu Oqaasiliortut aalajangerpaat maannamiit allatseqarfik atorneqalissasoq siusinnerusukkullu aalajangiinerigaluit tamarmik atorunnaassasut naqqissorneqassapput taassuminngalu taarserneqarlutik. Oqaasiliortut kissaatigaat Helene Møller erseqqissaalluni allaqagarnera pillugu qutsavigalugu allaffigineqassasoq.

Oqaasiliortut aalajangerpaat makku ima taaguuteqassasut

Departement – Naalakkersuisoqarfik

Direktorat – Pisortaqarfik

Administration – Allaffeqarfik

Sekretariat – Allatseqarfik

Styrelse – Aqutsisoqarfik

Afdeling – Immikkoortortaqarfik

Ledelse –  (taanna qanoq taaguuserneqassanersoq isumaliutigeqqeqquneqarpoq)

Taamatuttaaq kingulleqqiutit –mik-imik allanneqaqqaaraluartut tamarmik taarserneqassapput –mut-imik.

Kingullermi imaqarniliami Økonomi- og planlægningsafdelingenimik allassimasut aappaat planlægningsafdelingitaa planlægningschefimik taarserneqarssaaq taanna pineqarmat.

Naqqiissutit taakku pereermata imaqarniliaq akuerineqarpoq.

– 3. pillugu –

Taaguusersuinermi taaguutit akuerineqartussat:

Kingusinnerusukkut Oqaasiliortunit sammineqassasoq aalajangerneqarpoq.

– 4. pillugu –

Kalaallit Nunaat, Nunarput, allanneqartarnissaanut malittarisassat:

Kingullermi ataatsimiinnermi imm. 6-imi eqqaaneqarpoq Kalaallit Nunaat aamma nunarput qanoq allanneqartarnissaannut ullumikkut aalajangiisoqassasoq.

Siulittaasup eqqaavaa Kalaallit Nunaat taamatut allallugu qularnanngereersoq. Taamaattoq nunarput naqinnermik angisuumik aallaqqaaserlugu allanneqassappat ullumikkut malittarisassat malillugit kukkunertut isigineqartaraluartoq. Oqaasiliortut aalajangerput ataqqinninneq XXX  XXX-llu apeqqutaatillugu inuit ataasiakkaat aalajangissagaat angisuumik mikisumilluunniit allanneqassanersoq, soorlu aamma Guuti imalt. guuti, Anersaaq Iluartoq imalt. anersaaq iluartoq manna tikillugu periarfissaasut.

Tamanna siunissami ordbogiliassani nalunaarsorneqassasoq aamma aalajangerneqarpoq.

– 5. pillugu –

Stylist (tassunga ilanngullugu piorsarsimassuseq, kultur, atugartuussuseq)

Kalaallisut stylistip taaguutissaatut Oqaasiliortunut ilaasortap Stephen Heilmannip e-mailikkut nassuiaataa ‘piorsarpoq’ pitsaasutut isigineqarpoq. Tamannalu pillugu Oqaasiliortut aalajangerpaat oqaaseq una atorneqassasoq: piorsaasoq, kusanarsaasoq.

Eqqaaneqarportaaq Kleinschmidtip 1871-imi ordbogiliamini tamanna taamatut isumaqartillugu allaqqaarsimagaa.

Ulluni kingullerni oqaaseq ‘piorsarsimassuseq’ oqallisigineqarmat oqaatsimut tassunga ilanngullugu Oqaasiliortut aalajangerput oqaaseq kultur taaguutitut attatiinnarneqassasoq qularnaannerummat nunallu tamalaat akornanni atugaammat.

Oqaaserlu atugartuussuseq oqaatsimut civilisationimut atorneqassasoq.

‘Meeqqat tapisissapput’

Oqaasiliortut erseqqissaatigaat nalinginnaasumik tamanna oqqarliuutaasartoq eqqortorlu tassaasoq:  Meeqqanut tapiissutit aamma meeqqat tapiissutisissapput.

Oqaatsit taakku peqqussutini atugaareermata.

Inuit aqqini allaqqasut han / hun, suiaassusertallit

Apeqqummut tassunga tunngatillugu Oqaasiliortut erseqqissaatigaat oqaatsip nagguiata immini nalunaanngikkaangagu suiaassuseq atorneqarneq ajortoq.

Taamaammat Katersani allattukkani suiaassuseq atorlugu allassimasoqarpat tamanna allanngortittariaqassasoq ordbogini siunissami naqitassani aaqqinniassammat.

Angitivik

Oqaasiliortunut ilaasortat erseqqissaatigaat oqaaseq angut kujataamiut namminneq i-lernagu atortorigaluaraat aatsaallu ikasarnermi angiteq oqaatigineqartaraluarluni. Taamaattoq Oqaasiliortuni ilaasortat isumaqarput angiteq oqaasinngortitaq tunngavigalugu atsiisoqarsimassappat tamanna ajornartissanagu.

Krone / koruuni? Millioner kroner kalaallisut

Siulittaasup ilisimatitsissutigaa apeqqut taanna akineqareersoq. Imatullu akineqarpoq:

100 millioner koruunit

100 mio.kr.-t

imalt.

koruunit 100 millionit

kr.-t 100 mio.-t.

Teknisk afdeling taaguutillu allat

Peqqinnissaqarfimmiit visikortinut atugassanut taaguuseqqusat makku Oqaasiliortut aalajangerpaat kalaallisut ima taaguuteqassasut:

Teknisk afdeling – Teknikimut immikkoortortaqarfik

Teknisk chef – Teknikimut aqutsisoq.

Arbejdsleder – Suliamik aqutsisoq

Aut. Elinstallatør – Akuerisatut innaallagisserisoq

Driftschef – Ingerlatsinermut pisortaq

Driftsafdeling – Ingerlatsiveqarfik

Oqaaseq qanilaassuseq

Suso Heinrich 13. april e-mailikkut oqaaseq ‘qanilaassuseq’ kukkusumik atorneqartartoq uparuaatigalugu allappoq.

Oqaasiliortunit eqqaaneqarpoq tamanna aatsaat sammineqalinngitsoq. SH-lu isumaqatigaat oqaaseq saamasoq, kamajaatsoq ilakkuminartorlu oqaatsip qanilaassutsip isumaqqaarigaluaraa. Qallunaatullu oqaatsit makku tassunga qanittuusut aamma: fordragelighed, ydmyghed.

Oqaasiliortuni ilaasortat isumaqarput kukkusumik atuineq susinnaanagu, kisianni eqqortumik atorneqarnera erseqqissaassutigisariaqartoq.

Bussinut tunngasut

Anso Grødemip 16. april saafiginnissutaa tunngavigalugu Oqaasiliortut aalajangerput businik ingerlatsinermi taaguutit makku kalaallisuut atuutissasut:

Pensionistrabat – Billeti akikitsoq pensionilinnoortoq

Månedsrabat – Billeti akikitsoq qaammammoortoq

Klippekort – Billeti qiortagaq

Køreplan – Piffissat aallartarfiit

Charterpriser – Attartuinermi akit

Bykort – Nuup assinga

Skolebus – Atuartunut

Nordisk social sikringsportal

Kirsten Olesenip Ilaqutariinnermut Peqqissutsimullu Naalakkersuisoqarfimmit 3. april saaffiginnissutaa pillugu Oqaasiliortut aalajangerput Nordisk social sikringsportal kalaallisut ima taaguuteqassasoq:

Ammaassivik Avannaamioqatigiinni Isumaginninnermi Isumannaallisaanermut tunngasoq

Aaviaatit

Radiokkut Aperiinnariarimmi aallakaatitsinerup nalaani Oqaasiliortut ilaqutariissutsimut taaguutit pillugit misissuisariaqaraluarnerannik oqaasiinnartigut kaammattuut Oqaasileriffimmi sulisut ilaannit ilisimatitsissutaammat Oqaasiliortunit tusaatissatut tiguneqarpoq.

Advokatfuldmægtig kalaallisut

Oqaasiliortut aalajangerput atorfiit allaffimmi atorneqartut tamaasa Oqaasiliortut allattaannut katersorteriarlugit Oqaasiliortunit sukumiisumik sammineqassasut.

Sundhedsledelse kalaallisut

Oqaasiliortut siusinnerusukkut taaguusereernikuugaluarpaat. Oqaasiliortut aalajangerput Naalakkersuisut Allatseqarfiannit tamakkununnga taaguutit atorneqartut tamaasa pissarsiareriarlugit tullissaanut tamakkiisumik sammineqassasut.

Qarasaasiap isaa aamma qarasaasiap aqqutaa?

Oqaasiliortut aalajangerput tamatuma isummerfiginissaa kinguartikkallassasoq.

Inuit Nunaat akuereqqullugu saaffiginnissut

Oqaasiliortut aalajangerput akuereqqusissut taanna oqaaseqarfigisinnaanagu saaffiginnittorlu tamatuminnga ilisimatinneqassasoq. Taamaattoq tamakku pillugit oqallinnermi Oqaasiliortut malinnaapput.

Fuck dig dansker kalaallisut nutsernera

Oqaasiliortut tamanna pillugu oqaasissaqaratik unnerput.

Højt forædlede produkter

Sofia Geislerip 28. april saaffiginnissutaanut tunngatillugu Oqaasiliortut aalajangerput højt forædlede produkter kalaallisut ima taaguuserneqassasut:

Tunisassiat piariikka

Vægtforskalling, Detail støbning vægge il.il.

Oqaasiliortut aalajangerput ataatsimiigiaqqusissummi saaffiginnissutit taakku ilaliussatut ilanngunneqarsimanngimmata torrutiinnarlugu isummerfiginissaat ajornakusuussasoq, taamaammat tulliani ataatsimiinnissamut ilanngullugit nassiuteriarpata isummerfigineqarsinnaassasut.

Vivi Lynge Petrussenip saaffiginnissutaa

Vivi Lynge Petrussenip atuakkiaminut aaqqissuisussamik noqqaalluni e-mailikkut saaffiginnissutaa Oqaasiliortut namminneq isummerfigisinnaanagu aalajangerput.

6 allat:

Banner

Oqaasiliortunut ilaasortap Stephen Heilmannip taaguummut tassunga kalaallisut suna tulluunnerunersoq ujartormagu Oqaasiliortut aalajangerput oqaaseq una atorneqassasoq:

Ilisarnaat nivinngartagaq.

Uge 18-imi akerliussutsimik takutitsineq (demonstration)

Akerliussutsimik takutitsinerunngimmat Oqaasiliortut aalajangerpaat oqaaseq una kalaallisut atorneqassasoq:

Isummamik nittarsaaneq

Oqaasiliortunut e-mailikkut kopeeraluni nassiussisarneq

Oqaasiliortunut ilaasortat sap. ak. ingerlanerani Oqaasileriffimmit sulisunit amerlasooriarlutik ilisimatitsissutinik nassinneqartarnertik annertugikannerlugu siunnersuutigaat allatsi ataatsimut katerseriarluni sap. ak. iluani ullormi aalajangersimasumi ataatsimoortillugit nassiussinnaannginnerai. Tamanna allatsimut ingerlateqqinneqassaaq.

Tulliani ataatsimiinnissaq:

 

Inussiarnersumik inuulluaqqusilluta

 

Carl Chr. Olsen                                          Nuka Møller

Siulittaasoq                                               Allatsimut kingoraartaasoq