Oqaasiliortut 2014 – 12

OQAA – 211114(gl)

Oqaasiliortut ataatsimiinnerat tallimanngorneq, novembarip 21-anni 2014, nal.10.00
Oqaasileriffimmi.

Peqataasut: Carl Chr. Olsen, Karl Møller aamma Stephen Heilmann.
Peqataasinnaanani nalunaartoq: Eva Møller Thomassen

Erninermut atatillugu sulinngiffeqartoq: Katti Frederiksen

Allatsi: Judithe Denbæk

Oqaluuserisassatut siunnersuutit:

1)  Tikilluaqqusineq aamma ilisimatitsissutit.

Siulittaasoq tikilluaqqusivoq, ilisimatitsillunilu Katti Frederiksen 2015-imi maajip naanerata tungaanut erninermut atatillugu sulinngiffeqassammat Judithe Denbæk allatsitut paarlattaagallassasoq. Nutserisut oqaatsinik atorneqartunik paatsoortarsimanerat peqqutaalluni gymnasiebekendtgørelsip kalaallisuuata uteqattaassutaalaarnera eqqaaneqarpoq, taamaammallu Oqaasileriffik kukkunersiuinerup tungaatigut ikiorsiunneqarsimasoq aamma eqqaaneqarluni. Inatsisitaa piareeriarpat CCO-p Judithemut. 2015-imi januaarip aallaqqaataanit CCO soraarninngussaaq, atorfimmullu qinnuteqarsimasut ikippallaaqimmata decembarimi atorfik allagartaliunneqaqqissalluni.

2)  Kingullermi ataatsimiinnermit imaqarniliaq akuerineqarpoq.

3)  Saaffiginnissutit.

a) Aasianni aqqusernup atserneqarnera Oqaasiliortunit akuerineqarsinnaanersoq saaffiginnissutigineqarpoq imalu isummerfigineqarpoq, kommunit ataanni aqqusinernik atsersuinerit kommuninit namminneq aalajangiiffigineqartartut Oqaasiliortunit pinnatik, aqqusinermulli ateritikkumasaat saaffiginnissutaasoq kalaallisut ajunngitsumik allanneqartoq.

b) Kalaallit Nunaata nunap immikkoortuinut kommunimullu immikkoortiterneqarnera pillugu saaffiginnissut eqqartorneqarpoq, tassanilu inerniliunneqarluni nunap immikkoortiterneqarnera kommunillu immikkoortiterneqarneri immikkut isiginiarneqassasut, nunallu immikkoortiterneqarnerani atorneqassasoq ukuninnga immikkoortitsineq: Avannaarsua Kitaa aammalu Tunu. Saaffiginnissutigineqartumi qallunaatut taaguutit Nordøstgrønland, Sydøstgrønland, Sydvestgrønland, aammalu Nordvestgrønland pinnatik.

c) Nunat aqqisa suussusiisa nalunaarsuutaasa kalaallisut taaguutaat pillugit Nunat aqqinik akuersisartut saaffiginnissutaat. Suliaq Nunat aqqinik akuersisartunit naammassineqareerpat aatsaat Oqaasiliortunut ingerlateqqinneqassasoq aalajangerneqarpoq.

 

4)  Taasariaqartut allat

a) Kingullermi ataatsimiinnermi (oktobarip 23-anni) oqaluuserisat ilaannut Inuit aqqi pillugit atuakkiamut tunngatillugu Nuka Møller aggersarneqarpoq suliap sumut killinnera pillugu ilisimatitsissuteqartinneqarluni. Inatsit Inuit Aqqinik Akuersisartunut attuumassutillip inatsisartunit akuerineqarnissaa atuakkiap naqiterneqarnissaanut kinguarsaataasoq taakkartorpaa. Juullip nalaani naqiteriviit ulapittarnerat NM-ip ilisimatitsissutigaa siusinnerpaamillu ilimagineqartoq 2015-imi februarip missaani atuakkap naqiterneqarsinnaanissaa, naqitertitassanngorlugulu nassiunneranit sapaatip akunneri tallimat utaqqinertaqarnissaa ilimasaarutigineqarsimasoq NM ilisimatitsivoq. Naqitertitat amerlassusissaat pillugu NM-ip eqqaavaa siullermik kissaatigineqarsimasoq 4.000-iussasut, ullutsinnili digitalimik ingerlaneruleriartorneq eqqarsaatigalugu naammassorineqarput taamaallaat 1.200-t 2.000-illu akornanni naqitertinneqarpat, saniatigullu CCO-p siunnersuutigalugu naqitertinnginnerani digitalinngorlugu saqqummiunneqarnissaa. Isumaqatigiissutip nutaap ilanngunneqarnissaa eqqarsaatigalugu nutaamik aallaqqaasioriarlugu naqitertitassanngornissaanut piareernissaa ilimasuutigineqarpoq.

b) CCO-p eqqaassutigaa maanna Oqaasiliortuni ilaasortat qinigaaffiat naalermat, taamaammat Nunat aqqisa suussusiisa nalunaarsuutaasa kalaallisut taaguutissaasa ataatsimiinnissami tulliuttumi NAA-mi naammassineqareeriarpat Oqaasiliortuni naammassineqarnissaa siunniukkusullugu.

c) Aamma Tusagassiornermik Ilinniarfimmi aaqqissuussineqartussaasoq tusaamaneqarpoq. KNR-ip nutaamik inatsisiliorfigineqarnissaani Oqaasiliortut oqaaseqartinneqarnissaat pingaartinneqarpoq. Tamassumunnga atatillugu kissaatigineqaraluarpoq Oqaasiliortut tusarniarneqarnissaannut ammaanneqassasut. Tassunga tunngatillugu CCO Pia Lyngemut paasiniaassalluni nalunaarpoq.

 

Inussiarnersumik inuulluaqqusilluta
Carl Chr. Olsen                                      Judithe Denbæk
Siulittaasoq                                          Allatsi