Oqaasiliortut 2018 – 4

OQAA.20.06.18

Oqaasiliortut ataatsimiinnerat 20.06.18, nal.10-12, Ilimmarfik

Peqataasut:

Oqaasiliortunit: Juaaka Lyberth, Mariia Simonsen, Mette Larsen Lyberth, Knud Møller
Oqaasileriffimmit: Camilla Kleemann-Andersen, Tikaajaat Kristensen

 

1. Oqaluuserisassat akuerineqarnerat
Oqaaluuserisassat akuerineqarput.

2. Imaqarniliap akuerineqarnera
Ataatsimiinnermit kingullermit (18/4-2018) imaqarniliaq akuerineqarpoq.

3. Oqaasileriffimmit Oqaasiliortullu siulittaasuannit ilisimatitsissutit

a. Oqaasileriffimmit ilisimatitsissutit
Oqaasileriffimmit ilisimatitsissutit Oqaasileriffimmi pisortaagallartumit Beatrine Heilmannimit allaganngorlugit nassiunneqarput.

b. 2019-imut missingersuutit
2019-mut missingersuutit Oqaasileriffimmit Oqaasiliortunut nassiunneqarput.

c. Oqaasiliortut akissarsiaat pillugit ilisimatitsineq
Oqaasiliortut siulittaasuata Oqaasiliortut ataatsimiinnermusiaat pillugit ilisimatitsinermini oqaatigaa inatsisit malillugit ataatsimiinnermusiat aalajangersimammata qaffanneqarnissaat ajornartoq, taamaattoq ataatsimiinnermusiat ataatsimiinnerit tamaasa aalajangersarneqartarsinnaasut ataatsimiinnermusiat marloriaatinngorlugit ataatsimiinnertut marluttut nalilerlugit, ataatsimiinnissamut piareersarnerup annertussusaa apeqqutaalluni. Oqaasiliortut tamanna akueraat aalajangiullugulu.

d. Oqaasiliortut siulittaasuannit ilisimatitsissutit
Oqaasiliortuni ilaasortaajunnaartup taartissaa Naalakkersuisunit suli toqqarneqanngilaq.

4. Suleriaasissaq

– § 6 pillugu allannguutissaq: Biskoppip tusarniartarnissaa piissaaq, inatsimmi biskoppip aalajangiisarnissaa eqqaaneqanngimmat.
– § 7 pillugu allannguutissaq: Aternik akuersisoqarniartillugu e-mailikkut aalajangiisinnaasarnissaq ammaateqquneqarpoq.
– Suleriaasissaq Naalakkersuisoqarfimmut ilisimatitsissutitut nassiunneqassaaq, inatsit nutaaq malillugu Oqaasiliortut namminneq suleriaasissartik aalajangertussaammassuk.
– Suleriaasissaq taamaalilluni naammassisutut aalajangerneqarpoq.

5. Ilaasortanit siunnersuutit
Ilaasortanit siunnersuuteqartoqanngilaq.

6. Aqqit qinnutigineqartut
Aternik aalajangiiffigisassaqanngilaq

7. Suliat allat ilisimatitsissutigineqartussat

a. Periusissiornermi pilersaarutit saqqummiunneqarnerat
– periusissiorneq ukiup naanissaanut ingerlanneqassaaq, ukioq 2018 naatinnagu naammassiumaneqarluni.
– 1. november 2018 missingiut siulleq piareerneqassaaq, tassungalu atatillugu naalakkersuisoq aggersarneqassaaq ilaatigut aningaasatigut kingunissai eqqarsaatigalugit.
b. Killiffilersuutit pillugit
Killiffilersuutit suliarinerat suli naammasseqqajanngilaq aaqqissugassat amerlammata, sulilu nalunarpoq qaqugorpiaq naammassineqassanersoq.
c. Nutserusiorneq pillugu
Nutserusiorneq pillugu saqqummiisussaq pisinnaanngimmat allakkatigut ilisimatitsissutigineqassasoq isumaqatigiissutigineqarpoq.
d. Tusagassiuutinik kiffartuussineq
Oqaasileriffimmit tusagassiuutinik kiffartuussinermik suliaqartoq Tikaajaat Kristensen suliaqarfini pillugu saqqummiussaqarpoq.
– Suliassat: Kalaallisut oqaatsit tusagassiuutini atorneqarnerat nakkutigalugu malinnaaffigalugulu, nutaanillu naammattuuinermi Oqaasiliortunut ingerlateqqinneqartassapput. Tusagassiorfiit paasiniaaffigineqarput suut pisariaqartinneraat.
– Stillingsbeskrivelse stillingsopslagilu Oqaasiliortunut nassiunneqassapput.
– Tusagassiortunik ilitsersuineq.

Tusagassiortunik kiffartuussinertulli nutserinermik suliaqartut kiffartuunneqarnissaannik pisariaqartitsisoqassappat pisortatigoortumik aqqutit atorneqarnissaat Oqaasiliortut innersuussutigaat, taamaattoq arlaatigut Oqaasiliortut aqqutissiueqataasinnaapput.

8. Ataatsimiinnissap tulliata ullulerneqarnera
Ulloq 27. august 2018, nal 10-15 ataatsimiiffissatut aalajangiunneqarpoq.

9. Tamalaat
Aqqit pillugit aalajangigassat tunngavissaqarnerusumik inassutitalimmillu nassiunneqartarnissaat kissaatigineqarpoq.

 

Oqaasiliortut

Mette Larsen Lyberth

Knud Møller

Mariia Simonsen

Juaaka Lyberth