Ujarlerit

Oqaasiliortut 1 – 2017

OQAA – 170217(gl)

Oqaasiliortut ataatsimiinnerannit imaqarniliaq

Sumiiffik: Ilimmarfik ini nr. 7
Ulloq: 17.02.2017
Nalunaaqutaq: 10:30-12:30
Oqaasiliortuni peqataasut: Mariia Simonsen, Mette L. Lyberth aamma Bolatta M. Vahl
Peqataanngitsut: Jens Danielsen aamma Juaaka Lyberth
Allatsi: Minik Jeremiassen
Ataatsimiinnerup normua: 1
  • Oqaluuserisat
  1. Oqaluuserisassat akuerineqarnerat
  2. Kingullermik imaqarniliap akuerineqarnera
  3. Oqaasileriffimmiit ilisimatitsissutit
  4. Oqaasiliortunut saaffiginnissutit:
    4.1. Sans, lugtesans, følesans, synssans, høresans aamma smagssans
    4.2. Juridisk person
    4.3. Frysepunkt
    4.4. Selvstændighed (politikkimut tunngatillugu)
    4.5. Grævling aamma jærv
    4.6. Afdeling for samfundsvidenskabelige og økonomiske studier
    4.7. Kompetence aamma færdighed
    4.8. Atorfiit taaguutaat RAL-imut tulluarsarneqarneqartariaqartut
    4.9. Eqqartuussivimmi taaguutit
    4.10. Atertut qinnutigineqartoq Joora
  5. Taasariaqartut allat
    5.1. Ataatsimeeqqinnissamut ulluliineq
    5.2. Oqaasiliortut suliassaasa killiffiannik ilisimatitsineq
    5.3. Imaqarnilianik torersaaneq
    5.4. Ilaasortanit taasariaqartut allat

Imaqarniliaq

  1. Oqaluuserisassat akuerineqarnerat:
    Atertut qinnutigineqartoq Joora oqaluuserisassatut siunnersuutini 4.j-imut ilanngunneqareermat oqaluuserisassat akuerineqarput.
  2. Kingullermik ataatsimiinnermit imaqarniliap akuerineqarnera:
    Imaqarniliaq akuerineqarpoq.
  3. Oqaasileriffimmiit ilisimatitsissutit:
    Pisarneq malillugu Oqaasileriffiup pisortaata Katti Frederiksenip ilisimatitsissutit ataatsimiinnissaq sioqqullugu Oqaasiliortunut nassiuppai. Ilisimatitsissutitut nassiunneqarsimasoq bilaginngorlugu quppernermut kingullermut ilanngunneqarpoq.

    Oqaasileriffiup pisortaa peqataasussaagaluarluni naammassineqartariaqartunik suliaqarnini peqqutigalugu peqataanngitsoorpoq.

    Ilisimatitsissutinut Oqaasiliortut isummerneri imaapput:

    Imm. 1
    – KNR-TV-mi aallakaatitassiaq ‘Oqaasilerisa’ pillugu:
    – Oqaasiliortut isumaqarput aallakaatitassiaq pillugu sukumiinerusumik ilisimatinneqartariaqarlutik. Suliniutip taassuma allaatigineqarneranik (projektbeskrivelsemik) Oqaasiliortut takusaqarusupput.

    – Oqaasiliortut isumaqarput aallakaatitassiami isiginnaartunut oqaasilerinerup tungaatigut inorsiisoqartoq. Kasusip modusillu aallakaatitassiami atorneqarsimanerat assersuutigaat, tassa isumaqarput oqaasilerinermik ilisimasaqanngitsunut taaguutit taakku kalaallisut paasinarsarneqarsimasariaqaraluartut.

    – Aallakaatitassiaq pillugu Oqaasiliortut isummaminnik Oqaasileriffimmut nassiussinnginnerminni aallakaatitassiap imarisaanik misissuilluaqqaassapput.

    Imm. 4
    Apriilip 20-anni Islandimi Center for Verdenssprogip ammarnersiorneqarnissaa pillugu:

    – Kikkut angalanermut aningaasaliisuussanersut paasiniaqqaarlugu Oqaasiliortuniit peqataasoqassanersoq aalajangerneqarumaarpoq.

    Ilisimatitsissutinut ilaanngitsut pillugit:
    – Oqaasileriffiup KNR-imi kalaallisut pikkorissaasalernissaa Oqaasiliortuniit sumut killinnersoq qanorlu ingerlanniarneqalersaarnersoq paaserusunneqarpoq.

    – Oqaasileriffiup nittartagaa pillugu:
    Oqaasiliortuniit Oqaasileriffiup nittartagaata iluarsaanneqarnissaa piumasarineqarpoq. Oqaasileriffiup nittartagaata ajortumik inissisimanerata Oqaasiliortut suliarisarsimasaasa takuneqariaannaannginnerinik ilaatigut malitseqarpoq. Ataatsimiinnermilu tullermi Oqaasileriffiup nittartagaata iluarsaanneqarnissaa Oqaasileriffiup ningiua peqatigalugu immikkut oqallisigineqassaaq.

    – Oqaasiliortut piumasaqaataat pillugit Oqaasileriffik naapeqatigineqartariaqartoq Oqaasiliortut isummerput. Tamatuma qaqugu pisinnaaneranik erseqqinnerusumik oqallittoqanngimmat ulluliisoqanngikkallarpoq.

  1. Oqaasiliortunut saaffiginnissutit:
    4.1. Sans, lugtesans, følesans, synssans, høresans aamma smagssans:
    Pineqartut kalaallisut assigiinngitsunik ukiut ingerlanerini ordbogini, taaguusersuutini atuakkanilu assigiinngitsuni assigiinngitsunik taagorneqartarsimapput.

    Ilinniusiorfiup saaffiginninneratigut taaguutit Oqaasiliortuniit ataatsimiinnermi matumani aalajangersarneqarput.

    Taaguusiussaasarsimasuni naanerit assigiinngitsut marluk atorneqartarsimammata siulliullugu eqqartorneqarpoq naaneq sorleq taaguutini atorneqassanersoq:

    -ssut imaluunniit -ssuseq.

    Sanser tassaapput inuup timaani malugissutitut atorneqartartut, taamaattumillu naaneq -ssut atorneqassasoq aalajangiunneqarpoq.

    -ssuseq tassaavoq annertussusiliinermut (gradiliinermut) tunngasoq, taamaattumillu inuup malugissutitut atortuinut atugassatut tulluarsorineqanngilaq.

    Meddelser om Grønland-imi 1983-imeersumi Michael Fortescuep allaatigisaa “A comparative manual of affixes for the Inuit dialects of Greenland, Canada, and Alaska” matumani najoqqutarineqarpoq. Pineqartut Fortescuep ima nassuiarsimavai:

    – ssusiq (quality of)
    Reduced to ss in Maniitsoq for exclamations. Plural = ssutsit (and cf. utsit from usiq).

    – (ss)ut (means/instrument/cause)
    Also (q)utaq and (q)qut. ssut esp. for ‘reason’.

    Oqaasiliortut taaguutissatut aalajangiussaat imaapput:
    sans, malugissut*
    de fem sanser, malugissutit tallimat
    lugtesans, naamassut
    følesans, malugissut**
    synssans, isigissut
    høresans, tusaassut
    smagssans, susunnimut malugissut

    * & **: Malugissut assigiinngitsunik marlunnik isumaqarpoq.

    Ataatsimeeqqinnissaq nallertinnagu inunnut aalajangersimasunut taaguutissatut aalajangiunneqarsimasut tusarniaassutigineqassapput. Tassa ataatsimeeqqinnissamut allannguutissanik siunnersuuteqartoqarsimanngippat ataatsimiinnermi matumani aalajangiunneqartut atorneqassapput.

    4.2. Juridisk person:
    Oqaasileriffiup saqqummersitaani “Taaguusersuutit – pinerluttulerinermut, eqqartuussisarnermut, aningaaserivinnut, timillu pisataanut tunngasuni” 2000-imeersumi juridisk personimut “inatsisitigut pisinnaatitaasoq pisussaatitaasorlu” Oqaasiliortuniit akuerisaasutut allassimagaluartoq Inatsisartut Allattoqarfianiit Oqaasileriffimmut nalunaarutigineqarpoq pineqartoq assigiinngitsorpaalunnik kalaallisut taagorneqartarsimasoq.

    Oqaasiliortut taaguutip allanngortinneqarnissaanik patsisissaqarsorinnginnamik taaguutaareersoq atorneqaannassasoq aalajangiuppaat.

    Inatsisartut Allattoqarfianiit taaguutissatut siunnersuutigineqaraluartoq tassaavoq “inatsisilerinermi immikkoortut inuttut isigineqarsinnaasut”, taanna Kapisilinniarneq pillugu Namminersorlutik Oqartussat nalunaarutaanni nr. 20-mi, 9. oktober 2015-imeersumi atorneqarsimavoq.

    4.3. Frysepunkt:
    2011-mi oktoberip 21-anni Oqaasiliortut ataatsimiinnerannit imaqarniliami ima allassimasoqarpoq:

    Oqaaseq Qerinnarpoq:

    Oqaasiliortut aalajangerput frysepunkt aamma 0 grader pineqartillugit oqaaseq una atorneqartassasoq: qerinnarfik, s.i. issisiut qerinnarfiup nalaaniippoq. Ilaasortat ilisimavaat sumiorpaluutini ippigineqartaraluartoq atorlugu sungiunneqarsinnaasoq.

    Taaguut qerinnarfik taamani Oqaasiliortut ilaasortaasa ilimagisaattut ippigineqartarsimavoq Oqaasileriffillu KNR-imiit ilisimatinneqartareerpoq taaguut taanna KNR-imut ippigalugu saaffiginnittoqartarsimasoq.

    Taaguut ‘qerinnarfik’ atorneqaannassaaq, TV-kkulli radiukkullu silassamik ilimasaarinermi 0-gradimut/frysepunktimut ‘kiaganilu issi[ssa]nngilaq’ atorneqartassaaq.

    Assersuutigineqarpoq iganermik ilitsersuusiornermut tunngatissagaanni 0-gradimut imaluunniit frysepunktimut ‘qerinnarfik’ atorneqarpat paatsoorneqartussaanngilaq erngup qerilersarfiata killigimmagu.

    4.4. Selvstændighed:
    Ataatsimeeqqinnissamut kinguartinneqarpoq.

    4.5. Grævling aamma jærv
    Ataatsimeeqqinnissamut kinguartinneqarpoq.

    4.6. Afdeling for samfundsvidenskabelige og økonomiske studier:
    Oqaasiliortut decembarip 16-anni 2016-imi taaguutissamik aalajangiussereersullu Ilisimatusarfimmiit ilisimatitsissutigineqarpoq qallunaatut taaguutaani oqaatsinik marlunnik paarlaasoqarsimasoq, tassa oqaatsit “økonomiske” aamma “samfundsvidenskabelig” paarlaanneqarsimapput.

    Una atorunnaarpoq:
    Afdeling for økonomiske og samfundsvidenskabelige studier Aningaasaqarnermik Inuiaqatigiilerinermillu Ilisimatusarnernut Immikkoortortaq

    Allannguut atuutilersoq imaappoq:
    Afdeling for samfundsvidenskabelige og økonomiske studier
    Inuiaqatigiilerinermik Aningaasaqarnermillu Ilisimatusarnernut Immikkoortortaq

    4.7. Kompetence aamma færdighed:
    Ataatsimeeqqinnissamut kinguartinneqarpoq.

    4.8. Atorfiit taaguutaat RAL-mut tulluarsarneqarsimasut:
    Ataatsimeeqqinnissamut kinguartinneqarpoq.

    4.9. Eqqartuussivinni taaguutit:
    Ataatsimiinnermi oqaluuserineqanngillat.

    4.10. Atertut qinnutigineqartoq Joora:
    Atertut qinnutigineqartoq Angajooqqamiit naalisarlugu Jooranngortinneqarsimasoq nukappiaqqat niviarsiaqqallu aqqattut akuerineqarpoq.

  1. Taasariaqartut allat:
    5.1. Ataatsimeeqqinnissamut ulluliineq:
    Ataatsimeeqqinnissaq pissaaq 15.-17. marts 2017.

    5.2. Oqaasiliortut suliassaasa killiffiannik ilisimatitsineq:
    Oqaasiliortut suliassaasa killiffiat pappialanngorlugu Oqaasiliortunut ataatsimiinnissaq sioqqullugu emailikkut nassiunneqarpoq.

    5.3. Imaqarnilianik torersaaneq:
    2016-imi januaarimiit ullumimut imaqarniliaasarsimasuni oqaluuserisassat suuneri quppernermut siullermut takusassiaralugit allanneqassapput, taamaalilluni atuartussamit ajornannginnerusumik suut oqaluuserineqarsimanersut takuneqarsinnaalissaaq. Tassa imaqarnilioriaatsip ilusaa allannguuteqalaassaaq, tassungalu ilutigitillugu ataatsimiinnerup normua imaqarniliami ilanngunneqartalissaaq.

    5.4. Ilaasortaniit taasariaqartut allat:
    Oqaaseqartoqanngilaq.

 

Oqaasiliortut siulittaasuat                      Allatsi

Bolatta M. Vahl                  Minik Jeremiassen