Ujarlerit

Oqaasiliortut 2 – 2016

OQAA – 260216(gl)

Oqaasiliortut ataatsimiinnerannit imaqarniliaq

Sumiiffik: Ilimmarfik
Ulloq: 26.02.2016
Nalunaaqutaq: 13:00
Oqaasiliortut peqataasut: Mariia Simonsen, Judithe Denbæk, Jens Danielsen, Bolatta M. Vahl aamma Juaaka Lyberth
Oqaasileriffimmiit peqataasoq: Katti Frederiksen
Allatsi: Minik Jeremiassen
Ataatsimiinnerup normua: 2

 

  • Oqaluuserisat
  1. Tikilluaqqusineq
  1. Kingullermik ataatsimiinnermit imaqarniliap akuerineqarnera
  2. Suleriaasissamut siunnersuut pillugu
  3. Oqaluuserisassat akuerineqartarnissaannut Oqaasileriffiullu pisortaata peqataasarnissaannut tunngasoq
  1. Oqaasiliortunut saaffiginnissutit
    nationalstadion
    b. immisorsiveqanngitsoq
    c. anorit taaguutaat
  2. Taasariaqartut allat
    Ilaasortanit taasariaqartut allat
    b. Ataatsimeeqqinnissamut ulluliineq

 

Imaqarniliaq

1) Tikilluaqqusineq:
Bolatta Vahl Danmarkimiit oqarasuaatikkut ataatsimiinnermut peqataasoq ataatsimiinnermi tikilluaqqusivoq Mariia Simonsenilu ataatsimiinnermik aqutsisuussasoq aalajangerlugu.

 

2) Kingullermik ataatsimiinnermit imaqarniliaq akuerineqarnera:
Kingullermik ataatsimiinnermit imaqarniliaq akuerineqanngilaq. Oqaasileriffiup pisortaata ataatsimiinnermi peqataasannginnissaminik nalunaaruteqarnera allanneqassaaq. Immikkoortut sisamaanni oqaatsit ataasiakkaat listillu pillugit suleriaasissaq erseqqinnerusumik allassimassaaq. Iluarseqquneqartut iluarsineqareerpata ataatsimiinnermi tullermi imaqarniliaq akuerisassanngortinneqassaaq.

Imaqarniliortarneq eqqartorneqarpoq:

Imaqarniliami inerniliussat erseqqissumik allanneqartassapput. Imaqarniliaq allatsimit naammassineqarpat Oqaasiliortunut tamanut wordinngorlugu nassiunneqartassaaq iluarsineqareerpallu aappassaanik nassiunnerani pdf-inngorlugu nassiunneqartassalluni.

 

3) Suleriaasissamut siunnersuut pillugu:
Suleriaasissamut siunnersuut pillugu Naalakkersuisoqarfimmi inatsisilerituup Oqaasiliortut ataatsimeeqatiserisimavai. Tamanna sumik siunertaqarnersoq ilisimanngikkaluarlugu Oqaasiliortut akuersaarpaat.

 

4) Oqaluuserisassat akuerineqartarnissaannut Oqaasileriffiullu pisortaata peqataasarnissaannut tunngasoq:
Oqaluuserisassat akuerineqarnissaat oqaluuserisassani ilanngunneqarsimanngilaq, tamatumalu ilanngunneqartarnissaa kissaatigineqarpoq. Oqaluuserisassani allassimanngikkaluartoq Oqaasileriffiup pisortaata Oqaasiliortut ataatsimiinneranni peqataasarnissaa eqqartugassanngortinneqarpoq, Oqaasiliortullu isumaqarput Oqaasileriffiup pisortaa ataatsimiinnermi tamatigut peqataasariaqartoq immikkoortumi pisortaagami suliallu assigiinngitsut naammassineqarnissaannut akisussaasuugami.

 

5) Oqaatsit Oqaasileriffimmut saaffiginnissutit:

a) nationalstadion:

Oqaasiliortut isumaqarput nationalstadionissamik pilersaarutigineqartut piviusunngortinnagit atermik siunnersuuteqartoqartariaqanngitsoq. Taggilli ‘nationalstadion’ kalaallisut taaguuserneqarsinnaavoq, tamannalu ataatsimiinnermut tullermut siunnersuusiorneqassasoq aalajangiunneqarpoq.

b) immisorsiveqanngitsoq:

Immisorsiveqanngitsoq Oqaasiliortunit itinerusumik eqqartorneqanngikkallassaaq isumaanut takussutissat amerlanngimmata, suliarli Oqaasileriffimmit ingerlanneqassaaq oqaatsimillu taassuminnga atuisut paasiniaavigineqareerpata Oqaasiliortunut ingerlateqqinneqassalluni.

c) anorit taaguutaat

Anorinut uuttuutit nunani tamalaani akuerisaallutik atorneqartut, Beauforts vindskala, kalaallisut ima taaguuserneqarput: Beaufortip uuttuutai najoqqutaralugit anorip natsimassusiisa taaguutaat.

Skala nutartigaq kingulleq naapertorlugu taaguut ataaseq, stormende kuling, ima taaguuserneqarpoq: natsimaneq anorersuannguuttartoq.

 

Beaufort vindskala kalaallisut danskisut tuluttut natsimassusia (m/sec)
0 qatsunganeq stille calm 0,0 – 0,2
1 suialaannguaq næsten stille light air 0,3 – 1,5
2 anorsaannguaq svag vind light breeze 1,6 – 3,3
3 anorsaaq let vind gentle breeze 3,4 – 5,4
4 nakkisaaq jævn vind moderate breeze 5,5 – 7,9
5 suffarik frisk vind fresh breeze 8,0 – 10,7
6 anorsarik hård vind strong breeze 10,8 – 13,8
7 natsimaasarneq stiv kuling near gale 13,9 – 17,1
8 natsimaneq hård kuling gale 17,2 – 20,7
9 natsimaneq anorersuannguuttartoq stormende kuling strong gale 20,8 – 24,4
10 anorersuaq storm storm 24,5 – 28,4
11 anorersuarujussuaq stærk storm violent storm 28,5 – 32,6
12 ulussaarsuaq orkan hurricane 32,6 sinnerlugu

 

KNR ilisimatinneqassaaq silassamik atuaasut tamarmik ilisimatinneqassasut anorip taaguutaasa nutarterneqarnerinik, kiisalu inanneqassasoq oqaatsit assigiiaat TV-mi radiomilu atorneqartassasut sumiorpaluutit atornagit.

Suliffeqarfiittaaq allat, soorlu Asiaq, ilisimatinneqassapput Oqaasiliortut akuerisaannik.

 

6) Taasariaqartut allat:
a) Ilaasortanit taasariaqartut allat:

Taasariaqartuni allani ataatsimeeqqinnissaq eqqartorneqarpoq, tassa Oqaasileriffiup pisortaata ataatsimiinnermi peqataasarnissaa aammalu Inuit Aqqinik Akuersisartut atorunnaarsinniarneqarnerat, Kattip ataatsimiinnermit ingerlasariaqarnera pissutaalluni eqqartorneqanngitsoormata, eqqartorneqartussanngortinneqarput.

b) Ataatsimeeqqinnissamut ulluliineq:
IAA-mut tunngasoq nukinginnarmat ataatsimiinneq tulleq pingasunngornermut marsip aappaannut nal. 13:00 ullulerneqarpoq. Taanna sioqqullugu Oqaasiliortut siulittaasuat Oqaasileriffiullu pisortaa naapeqquneqarput, ataatsimiinnissamilu pingaarnertut Inuit Aqqinik Akuersisartut atorunnaarsinniarnerat sammillugu.

Oqaasiliortut siulittaasuat                               Allatsi

Bolatta M. Vahl                           Minik Jeremiassen