Ujarlerit

Oqaasiliortut 4 – 2016

OQAA – 030516(gl)

Oqaasiliortut ataatsimiinnerannit imaqarniliaq

Sumiiffik: Ilimmarfimmi ini nr. 4
Ulloq: 03.05.2016
Nalunaaqutaq: 14:00
Oqaasiliortut peqataasut: Mariia Simonsen, Bolatta M. Vahl aamma Juaaka Lyberth
Peqataanngitsoq: Jens Danielsen
Oqaasileriffimmiit peqataasoq: Katti Frederiksen
Allatsi: Minik Jeremiassen
Ataatsimiinnerup normua: 4

 

  • Oqaluuserisat
  1. Oqaluuserisassat akuerineqarnerat
  2. Kingullermik ataatsimiinnermit imaqarniliap akuerineqarnera
  3. Oqaasileriffimmiit
    3.1. Oqaasiliortut pillugit inatsisip allannguutaa pillugu
    3.2. Oqaasiliortut suleriaasissaannik malittarisassiaq (forretningsorden) pillugu
    3.3. Oqaasileriffimmi Oqaasileriffillu suleqatigalugu suliat ingerlanneqartut
  4. Oqaasileriffiup aningaasaqarnera ukioq 2016
  5. Suliassanik pingaarnersiuineq (Oqaasiliortut suliassaminnik pingaarnersiuinerat)
  6. Beaufortip anorimut uuttuutaata isikkuata akuerineqarnera
  7. MIO-miit taaguutit
  8. GOIA-miit taaguutit
  1. Taasariaqartut allat
    Ataatsimeeqqinnissamut ulluliineq

 

Imaqarniliaq

  1. Oqaluuserisassat akuerineqarnerat:
    Oqaluuserisassat akuerineqarput.

    Mariiap kissaatigaa Oqaasileriffimmiit paasissutissanik saqqummiineq oqaluuserisassanut ilanngunneqartassasoq. Pissutigisaa tassaavoq Oqaasiliortut Oqaasileriffimmi pisunik malinnaatittuarneqartariaqarmata, tamannalu Oqaasiliortut tamarmiullutik akueraat.

  2. Kingullermik ataatsimiinnermi imaqarniliap akuerineqarnera:
    Ataatsimiinnermi kingullermi imaqarniliaq akuerineqarpoq, naqinnerlutalli iluarsineqariarpata nittartakkamut ilineqannginnerani Oqaasiliortunut takuteqqaarneqassaaq.
  3. Oqaasileriffimmiit:
    3.1. Oqaasiliortut pillugit inatsisip allannguutaa pillugu:
    Oqaasiliortut pillugit inatsisitut allannguutissaq pillugu Oqaasileriffiup pisortaa Katti saqqummiivoq. Maannakkut Naalakkersuisoqarfimmiit aalajangertoqarsimavoq Inuit Aqqinik Akuersisartut suliassaat Oqaasiliortunut suliassanngortinneqassasut naak tamanna Oqaasileriffiup Oqaasiliortullu kissaatiginngikkaluaraat. Inatsisissarli pillugu tusarniaasoqalerpat Oqaasiliortut Oqaasileriffiit aggersarneqarumaartut Kattip ilisimatitsissutigaa.

    Ulluinnarni inuit aqqi pillugit Oqaasileriffimmut saaffiginnissutit arlalissuusartut ukiumut nalunaarutini takuneqarsinnaavoq. Saaffiginnissutit ilaat aternik qinnuteqaataasarput ilaali aqqup isumaanik paasiniaanerusarlutik, ulluinnarnilu Oqaasiliortut inuit aqqinik akuersisalerpata suliassat taakku Oqaasiliortut suliassaanni inituumik inissisimalissapput. Oqaasiliortut ataatsimiinnerminni oqaluuserisassatik arlalissuusarmata ilaanni tamaasa angumerineq ajorpaat, taakkulu Inuit Aqqinik Akuersisartut suliarisarsimasaannik ilaneqarpata ukiumut ataatsimiittarnerit amerlineqarnissaat allaqqunneqarsinnaassanngilaq.

    3.2. Oqaasiliortut suleriaasissaannik malittarisassiaq (forretningsorden) pillugu:
    Oqaasiliortut suleriaasissaannik malittarisassiaq inatsisilerituunit misissoqqissaarneqareermat inatsisilerituut Oqaasiliortunik ataatsimeeqateqartussaassapput, ataatsimeeqateqarnissamilli utaqqineq sivitsormat naapinnissamut utaqqiinnarneq unitsillugu suleriaasissamik malittarisassiarisimasap atorneqalernissaa Oqaasiliortunit siunniunneqarpoq.

    Inuit Aqqinik Akuersisartut suliassaat Oqaasiliortut suliassaannut ilanngunneqarpata suleriaasissamik malittarisassioqqittoqarumaartoq Oqaasiliortunit aalajangerneqarpoq.

    3.3. Oqaasileriffimmi Oqaasileriffillu suleqatigalugu suliat ingerlanneqartut:
    Oqaasileriffiup pisortaata Kattip ilisimatitsissutitut oqaatigaa Oqaasileriffimmiit nalunaarut ukiumoortoq 2014 naammassingajalersoq aammalu nalunaarut ukiumoortoq 2015 suliaralugu aallartinneqalersoq.

    Pinngortitaleriffik suleqatigalugu pinngortitamut uumasunullu taaguutit suliarineqarput.

    Corpus aamma ingerlanneqaleruttorpoq, maannakkullu Atuagagdliutit ukioq 1952-imeersut oqaasertaat siulliullugit studentermedhjælperinit allaasitaanngortillugit suliarineqaleruttorput. Corpusip siunissami naqitanik amerlanerusunik immerneqarnissaa anguniarlugu piginnittussaatitaanermut tunngasut (Copyright) misissorneqarput.

    Oqaasileriffiup nittartagaa Oqaasileriffimmi sulisup Beatrine Heilmannip suliaralugu aallartippaa Oqaasileriffimmiillu naatsorsuutigineqarpoq piffissami ungasippallaanngitsumi nittartakkap ilusaa iluarsiumaartoq.

    GOIA suleqatigalugu aatsitassarsiornermi uuliasiornermilu taaguutit suliarineqarput. Tamanna GOIA-p nammineq aningaasartuutigaa.

    Oqaasileriffik kalaallisuumiit qallunaatuumut qallunaatuumiillu kalaallisuumut nutserummik suliaqarnissamut qinnuteqarpoq. Qinnuteqaat iluatsissappat ukiuni tulliuttuni tallimani suliap ingerlanneqarnissaa naatsorsuutigineqarpoq.

    Nittartakkami www.ilinniusiorfik.gl/oqaatsit/daka-mi Oqaasileriffiup nutarterisinnaanngornissaa anguniarneqassasoq Oqaasileriffik siunniussaqarsimavoq, taamaattumillu Ilinniusiorfimmut paasiniarneqassaaq Oqaasileriffiup ordbogimik nutarterineq isumagisarilersinnaaneraa.

  4. Oqaasileriffiup aningaasaqarnera ukioq 2016:
    Oqaasileriffiup 2016-imi aningaasartuutissai pillugit Katti saqqummiivoq.

    Oqaasiliortut suliaqartitsinissaat peqqutaalluni 2016-imi ukiumut aningaasartuutissatut missingersuummi nikingasoqalaarsinnaassaaq.

    Suliakkiutaasinnaasut Oqaasileriffimmiit siunniunneqarsimasut tassaapput killiffilersuutit pillugit atuagaaqqamik saqqummersitsinissaq aammalu retskrivningsordbogimik pilersitsinissaq.

    Oqaasiliortut siunnersuutigaat ukioq 2016-imi quppersagaarannguamik (håndbogimik) allannermik ilitsersuummik suliaqartoqartariaqartoq.

  5. Suliassanik pingaarnersiuineq (Oqaasiliortut suliassaminnik pingaarnersiuinerat):
    Immikkoortumi uani Oqaasiliortut suliassaminnik pingaarnersiuinissartik eqqartorpaat Oqaasileriffiullu retskrivningsordbogimik killiffilersuutinillu suliaqassallutik siunniussimasaat taperserlugu, kisianni pingaarnertut quppersagaarannguaq (håndbog) allannermik ilitsersuut siulliullugu suliarineqassasoq siunniuppaat.

    Pingaarnersiuineq:
    1. Allannermik ilitsersuut ukioq 2016 naatinnagu naammassissasoq siunniunneqarpoq.

    Allannermik ilitsersuut quppersagaarannguussasoq aalajangiunneqarpoq, kisianni aamma tekniki nutaaq atorlugu saqqummersitsinissaq isumaliutigineqarpoq. Allannermik ilitsersuutip nittartakkamiinnissaa, aviisiniinnissaa imaluunniit oqarasuaatini angallattakkani app-inngortinnissaa isumaliutigineqarpoq.

    2. Killiffilersuutit ukioq 2016 naatinnagu naammassineqassasoq siunniunneqarpoq.

    Killiffilersuutit pillugit suliaq Oqaasileriffimmiit ingerlanneqareernikuusoq maanna nangeqqinneqaannariaasoq Kattip ilisimatitsissutigaa, sukumiinerusumillu suliassaq tassaanerarlugu uniffik (komma).

    3. Retskrivningsordbogi ukioq 2017-imi suliarineqassasoq aalajangiuppaat, taamaattumillu Oqaasileriffiup 2017-imi aningaasanut missingersuutaanut retskrivningsordbogiliortoqarnissaa ilanngunneqassasoq aalajangiunneqarluni.

    Ordbogilerineq eqqartorneqaleriarmat Kattip eqqaavaa ordbogilerineq arlaannaatigulluunniit inatsisitsigut tunngaveqanngitsoq, tamannalu allanngortinneqartariaqarnerarpaa siunissami pitsaanerusumik ordboginik suliaqartarneq anguneqassappat.

    Pingaarnersiuinermi siunniunneqartut allat:

    1. Oqaasiliortut isumaqarput 2017-imi Oqaasileriffimmi avammut paasissutissiisartumik atorfinitsitsisoqartariaqartoq, tamannalu 2017-imi aningaasartuutissatut missingersuutinut ilanngunneqartariaqartoq. Avammut paasissutissiisartup suliassarissavaa Oqaasileriffimmiit oqaatsitsinnik atuisunik kiffartuussineq. Tassalu Oqaasileriffiup inuiaqatigiinnut qaninnerusumik inissisimalernissaa aammalu avammut saqqumilaarnerulernissaa atorfinittussap qulakkeerniassavaa.

    2. Oqaatsit qanga atorneqalerfiinik nalunaarsuinermik suliaqartoqassasoq Oqaasiliortuniit aamma kissaatigineqarpoq. Oqaasileriffimmilu maanna corpusimik suliaqarneq aallaavigineqarsinnaasoq Oqaasileriffimmiit ilisimatitsissutigineqarpoq, corpusilerinerlu maanna suliaralugu ingerlanneqarmat siunissami katersat amerlanerulerpata oqaatsit ataasiakkaat qanga allagaatitigut atorneqalersimaneranut nalunaarsuineq ajornaannerulersinnaassaaq.

    3. Oqaasiliortut suliassatut siunniussaat alla tassaavoq meeqqat atuarfianni oqaasilerinermik ilinniartitsineq misissorneqassasoq. Misissuinissaq Oqaasiliortut suliaqartitsisinnaanertik tunngavigalugu akisussaaffittut tigorusuppaat, taamaakkaluartorli Naalakkersuisut aningaasaliisinnaanerat anguneqarusuppoq.

    Pingaarnersiuinermi naggasiineq:

    Allannermik ilitsersuusiornissami sullinniakkat kikkuunissaat (målgruppe) isumaliutigineqartariaqarmat aammalu Oqaasiliortut siunniussaat immikkut sukumiisumik pilersaarusiorneqarniassammat iliuusissanik pilersaarusioqatigiinnissaq ataatsimiinnermi tullermi ullulerneqassaaq.

    Oqaasileriffimmi atorfinnik amerlanerusunik peqalernissaa aamma anguniarneqassasoq Oqaasiliortunit kissaatigineqarpoq. Ataatsimiinnerup ingerlanerani eqqaaneqareersoq avammut paasissutissiisartumik pilersitsinissaq assersuutissaavoq, taamaattoqarneratalu qulakkiissavaa Oqaasileriffimmi pitsaasumik qaffasissumillu suliaqartarneq. Tamannalu Oqaasiliortut kissaatigimmassuk Naalakkersuisoqarfimmut anngunneqartariaqartoq Oqaasiliortut tamarmiullutik isumaqarput.

  6. Beaufortip anorimut uuttuutaata isikkuata akuerineqarnera:
    Beaufortip anorimut uuttuutaata isikkua akuerineqarnerpoq tusagassiorfinnullu nalunaarutigineqariaannanngorluni.
  7. MIO-miit taaguutit:
    Immikkoortut arfineq-aappaat ataatsimiinnermut tullermut kinguartinneqarpoq.

    Tullianilu naapinnissamut taaguutit qanoq nassuiaateqarnersut Oqaasileriffimmiit paasiniarneqassaaq.

  8. GOIA-miit taaguutit:
    ‘sidelænssøgende flyradar’ kalaallisut ima taaguuserneqassasoq aalajangiunneqarpoq ‘radari sanimoortoq’, kisianni nassuiaatitaqassaaq radarip qanoq ittuuneranik ilisimatitsissummik.

    ‘bekæmpelse’ ataatsimiinnermi kingullermi ‘mingutsitsinermik akiuineq’-mik taaguuserneqaraluartoq ima iluarsineqarpoq ‘akiuineq’, tassalu oqaaseq ‘mingutsitsinermik’ peerneqarluni.

  9. Taasariaqartut allat:
    a. Ataatsimeeqqinnissamut ulluliineq
    Juunip 16-ata 28-atalu akornanni Oqaasiliortut ataatsimeeqqissapput.

 

Oqaasiliortut siulittaasuat              Allatsi

Bolatta M. Vahl          Minik Jeremiassen