Ujarlerit

Nunat Inoqqaavisa Oqaasiisa Ukiuat 2019

Naalagaaffiit Peqatigiit nunat inoqqaavisa oqaasii pillugit ukiorititaat 2019

Naalagaaffiit Peqatigiit decembarip 19-ianni 2016-imi ataatsimeersuarnerminni ukioq 2019 nunat inoqqaavisa oqaasiisa ukiorissagaat aalajangiuppaat, Nunat Inoqqaavisa Atugaat pillugit Isummersoqatigiiffimmit (United Nations Permanent Forum on Indigenous Issues) innersuussinerit malillugit.

Naalagaaffiit Peqatigiit ukiorititaqartarnerat pillugu

Naalagaaffiit Peqatigiit nunarsuaq tamakkerlugu ukiut tamaasa sammisamut aalajangersimasumut tunngatillugu ukiorititaqartarpoq.

Sammisamut aalajangersimasumut ukiorititaq nunarsuarmi tamanut tunngassuteqarsinnaavoq arlaatigulluunniit tamanut soqutiginaateqarluni, taamaasilluni sammineqartumut attuumassutillit soqutigisallilluunniit sammisaq pillugu assigiinngitsutigut ikioqatigiinnissaminnut iliuuseqarnissaminnullu ataatsimoorfeqarsinnaaqqullugit.

Nunat inoqqaavisa oqaasiinut ukiorititamut tunuliaqutaasut

Nunat Inoqqaavisa Atugaat pillugit Isummersoqatigiiffiup ukioq 2019 nunat inoqqaavisa oqaasiisa ukiorinissaannik innersuussinermini tunngavilersuutigisimavaa nunarsuarmi oqaatsinit 6.700 missaanniittunit 40%-iisa missaat nungutaanissaminnut ulorianartorsiortutut inissisimanerat, oqaatsillu nungutaanissaminnut ulorianartorsiortutut inissisimasut amerlanerpaartaat nunat inoqqaavisa oqaaserigaat, taamaalillutillu aamma pineqartut kulturiat ilisimasaallu oqaatsitik ilutigalugit navianartorsiortutut inissisimasut.

Tamakku saniatigut nunat inoqqaavi nunani inuuffigisaminni immikkoorajuttarput, politikkikkut aaqqissuussaanikkut inoqatinullu attaveqatigiittarnikkut, inuiaqatiikkuutaat nunap immikkoortuini immikoortitaarajuttarlutik, kiisalu oqaluttuarisaanikkut, kulturikkut, oqaatsitigut ileqqulersuutitigullu immikkuullarissutillit aamma immikkoortitaarajuttarlutik.

Nunat inoqqaavi avatangiitsiminnik illersuisutut siuuttuuinnanngillat, taakkuli oqaasii ersiutaapput ilisimasanik attaveqatigeeriaatsinillu katiterneqaatimikkut aaqqissuussaalluartunik peqartut, taamaattumillu ineriartortitsinermut, eqqisseqatigiinnissamut saammaateqatigiinnissamullu naalagaaffimmi pisuussutitut pingaarutilittut akuersaarneqartariaqarlutik.

Nunat inoqqaavittaaq piffimmi kulturinik, ileqqunik naleqartitanillu immikkuullarissusilinnik pinngorartitsisuupput siuarsaasuullutillu ukiuni tusintilippassuarni piusimasunik. Nunat inoqqaavisa oqaasii nunarsuarmi pisuussutinut kulturikkut assigiinngissitaarnermik imalimmut ilusilersueqataapput, taakkoqanngikkaluarpallu nunarsuaq piitsuunerussagaluarluni.

Nunat Inoqqaavisa Oqaasiisa Ukiuat 2019-imik nalliusseqataaneq nunat inoqqaavisa oqaasiinik siuarsaaqataanerussaaq illersueqataanerullunilu, taakkuninngalu oqaasillit inuunerannik pitsaanerulersitsissalluni. Nunat Inoqqaavisa Pisinnaatitaaffii Pillugit Naalagaaffiit Peqatigiit Nalunaarutaanni aamma Nungusaataanngitsumik Ineriartortitsineq pillugu Naalagaaffiit Peqatigiit Anguniagaat 2030-mi anguniakkatut siunniussanik anguniagaqarnermut ilapittuutaassaaq.

Naalagaaffiit Peqatigiit ukiortititaannik nallissineq aamma oqaatsinik siuarsaanissamut illersuinissamullu suliniutit nunarsuarmi inuiaqatigiinnit malinneqartussatut aalajangiunneqarsimasorpassuarnik sakkortusaataassangatinneqarpoq.