Ujarlerit

Kalaallisut allagaatit oqaasertaat misissuiffigineqarsinnaalerput

Oqaasileriffiup Allagaatinik katersuivik tamanut atugassianngorlugu saqqummersippaa

https://oqaasileriffik.gl/oqaaserpassualerineq/allagaatinik-katersuivik/

Oqaasileriffiup allagaatinik katersuivia kalaallisut oqaatsinik 18 millioninit ikinnerunngitsunik imaqartoq maanna ujarlerfigineqarsinnaalerpoq.

Allagaatinik katersuiviup imarisai ilaatigut tassaapput atuakkiat, taalliat, aviisit, atuagassiat, nittartakkat inatsisillu oqaasertaat.

Allagaatinik katersuivik pingaarnertut kalaallisut oqaatsinik misissuinermut atugassanngorlugu suliaavoq. Oqaatsit, oqaaseqatigiit, nagguiit, uiguutit, naanerit oqaasilerinermulluunniit tunngasut allat ujarneqarsinnaapput misissuiffigineqarsinnaallutillu.

Allagaatinik katersuivimmi ujarliutip nanisaani ujagaq qiterliulluni inissisimasassaaq, oqaatsillu siuliiniittut kinguliiniittullu amerlanngitsuinnaat aamma nuisinneqartassapput.

Allagaatinik katersuivipput kalaallisut oqaatsinik misissuerusuttunit tamanit, soorlu oqaasilerisunit, ilinniartitsisunit, tusagassiortunit soqutiginnittunillu allanit tamanit atorneqarsinnaavoq.

Oqaasileriffimmi allagaatinik katersuinerup oqaluttuassartaa naatsumik:

Oqaasileriffik 2014-imi aviisitoqqanik pdf-iusunik Timarit.is-imit pissarsivoq. 2015-ilu naajartulersoq allagaatinik katersuineq aalajangersimasumik akisussaasoqartinneqarluni aallarnerneqarsimavoq.

Timarit.is-imit pissarsiarineqartut ilaat katersuinermi aallarniutigineqarsimapput, ukiunilu siullerni marlunni Atuagagdliutit 1952-ip 1955-illu akornanni saqqummersartut oqaasertaat Oqaasileriffiup allattaasitaamut nuutsissutaa atorlugu katersorneqarsimapput. Tamatuma kingornagut atuakkiat, taalliat, aviisit, atuagassiat, nittartakkat inatsisillu oqaasertaat katersorneqarput.

Assersuutit:

Misissoruk oqaatsit ”kalaallisut” aamma ”oqaatsivut” sanileriissillugit qanoq amerlatigisunik allanneqartarsimanersut

Misissoruk oqaatsit “kalaaleq”-mik aamma “oqaaseq”-mik nagguillit sanileriit qanoq allanneqartarsimasarnersut

Misissoruk atuakkiani kalaallisut allagaasimasuni, tassa kalaallit atuakkiaanni kalaallisullu nutsikkani “aalianger-” qasseriarluni atorneqarsimanersoq

Misissoruk atuakkiani kalaallisut allagaasimasuni, tassa kalaallit atuakkiaanni kalaallisullu nutsikkani “aalajanger-” qasseriarluni atorneqarsimanersoq

Misissukkit oqaatsini sorlerni marlorsiut atorneqarsimanersoq

Misissukkit oqaatsit sorliit “nikuu”-mik uiguuteqarnersut

Misissuinissamut periarfissat amerlaqaat, taamaakkaluartoq nunani allani allagaatinik katersuivinnut sanilliullugu oqaatsit katersorsimasavut 18 millioniusut amerlasoorsuunngimmata suli katersuisoqassaaq ujarliutitaalu pitsanngorsarneqartuassalluni.

Allagaatinik katersuivik pillugu paasisaqarnerorusukkussi Oqaasileriffimmi allagaatinik katersuinermi akisussaasoq Minik Jeremiassen attavigisinnaavarsi:

Email: minik@oqaasileriffik.gl

Oqarasuaat: +299 384067