Grønlands Sprogsekretariat

Inuit Aqqinik Akuersisartut 2008 – 1 (gl)

IAA – 270308 (gl)

 INUIT AQQINIK AKUERSISARTUT ataatsimiinnerannit martsip 27-ianni 2008, nal. 10.00 imaqarniliaq

Peqataapput: Carl Chr. Olsen, Emma Balslev aamma Ellen J. Karlsen

Imaqarniliortoq: Nuka Møller

Oqaluuserisassat:

  1. Tikilluaqqusineq
  2. Aqqit akuereqqullugit qinnutigineqarsimasut:
    1. Naanngu
    2. Rulo
    3. Indalik
    4. Pipalu
  3. Atit isumaat pillugit akisassat:

Siuana, Nivineq, Avaruna, Aqattaq, Aqqinaatsiaq, Arnamaaq, Ukkana, Kalia

  1. Personnavneloven aamma IAA-p oqartussaaneranut apeqqut
  1. Atit akuerisat nalunaarsukkanut maannamut ilaanngitsut: Umaamii.
  1. Atit nittartakkamut ikkussugassat (Kalaallit aqqisa nalunaarsorsimaffiat 2007)
  1. Atit pillugit naqitatigut saqqummersussat tullinnguuttut:

CPR pillugit naqitatigut ukiuni kingullerni 50-ini kalaallit atii? Allat?

  1. Taasariaqartut allat

 

  1. Tikiluaqqusineq

CCO tikilluaqqusivoq ilisimatitsissutigalugulu maanna aalajangerneqarsimasoq Inuit Aqqinik Akuersisartut aamma Nunat Aqqinik Aalajangiisartut Oqaasileriffimmi sulisumit aalajangersimasumik sagsbehandleritut isumaginnittoqalermata. IAA-mut NM aamma NAA-mut LMK.

 

  1. Aqqit akuereqqullugit qinnutigineqarsimasut

a. Naanngu

Akuerineqarpoq – taamaattoq Tasiilami Palaseqarfimmut erseqqissaatigineqassasoq qinnuteqarnermi allaganngorlugu piffissaliunneqartortoq naapertorlugu qinnuteqartoqartassasoq.

b. Rulo

Akuerineqarpoq.

c. Indalik

Naak qinnuteqartut Henrik aallaavigalugu kalaallisoorpaluttunngorlugu Indalimmik atsiiniarlutik kissaateqarnerat ilalernartinneqaraluartoq, IAA-mi ilaasortat isumaqarput kalaallisut allattaatsit tunngavii naapertorlugit atsiisarnermut aalajangiussat tusarliunneqassasut tunaartarineqassasullu. Tassa ima allannilik akuerineqqassasoq: Intalik.

Aammattaaq siulittaasup erseqqissaatigaa aalajangiussaq tamanna atuutilersinnagu d-lerlugu atermik kuisittoqarsimappat soorunami tamanna attatiinnarneqassasoq.

  1. oktober 2007-imi KIIIP-imi oqaatsit pillugit attaveqartarfiusup Pia Lyngep biskopi oqaloqatigereerlugu saaffiginnissutigisimasaa IAA-llu akissutigisimasaa IAA-p siulittaasuata innersuussutigaa. Tassani PL aperivoq d-mik allattarnermut aammalu Tunumiusut Avanersuarmiutullu allattarnermut tunngasoq IAA-p allattaata tamanut ilisimatitsissutigissallugu pisussaaffiginnginneraa paaserusullugu.

 

IAA-p siulittaasua ulloq taanna akivoq d-mik allattarneq avataaniit sunnertissimanermit aallaaveqartoq maannalu atorneqarnissaa innersuussutigineqanngitsoq. Taamaattoq familieretimut tunngassuteqarmata IAA-mi nalornissutigineqartartoq unnerlugu. Tamanna pissutigalugu piffissaq aalajangersimasoq aallarnerfigalugu ilimasaarisoqarsinnaasoq allattaatsit atuuttut tunngavii malillugit allattalernissaq allassimasalissasut, tamannalu susassaqartut tamaasa siumut ilisimatereerlugit ukiunik pingasunik sisamanik sioqquullugu, tamatumalu kingorna sinnerisa atitik immikkoorutillit ataasiakkaarlutik attassinnaagaat.

Kirkebogit ingerlaasiat navnelovilu qanoq pisinnaatitsinersut apeqqutaatillugu d-p t-mik taarserneqarnissaa ilaqutariittullu inatsisitigut illersugaanerat qularnaassaaq.

 

Tassungattaaq atatillugu EB-p eqqaavaa biskopi ilisimatitsisimasoq kirkebogimi nalunaarsuisoqartillugu allaattaasitoqaq atorlugu nalunaarsuineq ingerlanneqarsinnaasoq, allattaasitaamik allassimanissaa kissaatigineqanngippat. Biskopip kaajallaasitatut allagaa taanna Mørchip Chemnitzilluunniit allassimagaa ilisimatitsissutigineqarpoq, allagarlu taanna aamma pissarsiarineqassasoq kissaatigineqarluni.

 

d. Pipalu

Akuerineqarpoq allatigut naalisaasarneq atorneqartarmat, s.i. Kaju, Kulu, Aviitsu Pualu il.il.

 

  1. Atit isumaat pillugit akisassat.

NM-ip ilisimatitsissutigaa kingullermi ataatsimiinnerup kingorna atit isumaat pillugit saaffiginnissutit suli akineqanngitsut makkuusut:

 

Siuana, Nivineq, Avaruna, Aqattaq, Aqqinaatsiaq, Arnamaaq, Ukkana, Kalia  aamma Qulliaq.

Taakku misissorneqarput isumaalu pillugit paasisaqassaguni saaffiginnittunut ingerlateqqikkumaarlugit unnerpoq.

 

  1. Personnavneloven aamma IAA-p oqartussaaneranut apeqqut.

NM-ip KIIIP-imi inatsisileritooq, Louise Amkær, saaffigisimavaa Qallunaat Nunaanni personnavneloven aamma IAA-p oqartussaaneranut tunngasunut pillugu Danmarkimi naalakkersuisoqarfinnut saaffiginnissutit qisuariarfigineqarsimanersut. LA-lu e-mailikkut allagaqarluni martsip 18-ani akivoq susoqarpiarsimanngitsoq suli, taamaattoq saaffginnissimalluni suliap sumut killinneranut tusarniaassummik.

 

  1. Atit akuerisat nalunaarsukkanut maannamut ilaanngitsut: Umaamii.

Siusinnerusukkut ujartorneqarmat “Kalaallit aqqisa nalunaarsorsimaffiat”  2007-imi saqqummersup kingorna IAA-mit aqqit akuerisat ilaanngitsut qassiunersut, ilisimatitsissutigineqarpoq ataasiinnaasoq, tassalu Umaamii.

 

  1. Atit nittartakkamut ikkiussugassat.

Ilisimatitsissutigineqarpoq atit nittartakkamiittut tassaasut “Kalaallit aqqisa akuerisat nalunaarsorneqarnerat 1999”-imeersut, sulilu 2007-imi saqqummersumi aqqit ilanngussuunneqarsimasut ikkusorneqarsimanngitsut. Tamanna pillugu misissorneqassaaq TITA A/S-imiit 2007-imeersut pdf fil-inngorlugu tiguneqarsinnaanersut nittartakkamullu ikkunneqarlutik.

 

  1. Atit pillugit naqitatigut saqqummersussat tullinnguuttut

 

  1. Taasariaqakkat allat.

 

Inussiarnersumik inuulluaqqusilluta

 

Carl Chr. Olsen                       Nuka Møller

Siulittaasoq                    Suliassanik isumaginnittoq