Ordbogit app-inngorlugit

Oqaasileriffik Ilinniusiorfik aamma University of Chicago suleqatigalugit oqarasuaatini angallattakkani app-imik ordboginik, ilaatigut atorneqarsinnaareersunik imalimmik, saqqummersitsivoq

App-imi ataatsimi ordbogit assigiinngitsut

Ordbogit assigiinngitsut ataatsikkut app-imi ataatsimi saqqummersinneqarput nutaartaraallu Oqaasersiorfik 2008-mi atuakkatut saqqummertoq.

App-ip taassuma imaraa:

• Kalaallisuumit qallunaatuumut ordbogi, Ilinniusiorfik suleqatigalugu suliaasimasoq aaqqissoqqillugu app-imi saqqummersinneqaqqittoq.
• Kalaallisuumiit tuluttuumut ordbogi, University of Chicago suleqatigalugu piviusunngortinneqartoq.
• Oqaasersiorfik, kalaallisut oqaatsit isumaat aamma allanneqarnissaat takuneqarsinnaapput, taakkulu oqaatsit 17.361-iullutik, suli amerliartortussat. Ilinniusiorfik, maanna Ilinniartitaanermik Aqutsisoqarfiusoq, suleqatigalugu aaqqissugaq.

Qallunaatuumiit kalaallisuumut ordbogip saqqummersinneqarnissaa aamma maanna sulissutigineqarpoq.

Ordbogit assigiinngitsut aaneqarsinnaapput:

• App Storekkut – oqaaseq ujartugassaq “Ordbogi”.
• Play Storekkut – oqaaseq ujartugassaq “Ordbogi”.
• tamatumalu saniatigut Oqaasileriffiup nittartagaa aqqutigalugu atorneqarsinnaassalluni internetimut attaveqartilluni.

Atuisussanut ilitsersuut periarfissallu

• Ordbogimi oqaatsimik aalajangersimasumik ujarlersinnaavutit, oqaaserlu iserfigisinnaallugu.
• Oqaaseq qanoq nutserneqarsimanersoq qanorlu isumaqarnersoq takusinnaavat.
• Ulloriaq toorlugu oqaatsit nuannarisatit eqqaamarusutatilluunniit immikkoorsillugit katersorsinnaavatit, katersukkatit immikkut quppernermut toqqortassapput qaqugukkulluunniillu nassaareqqipallanneqarsinnaallutik.
• Oqaatsit ataasiakkaat aamma linkinngorlugit siammartersinnaavatit, assersuutigalugu Facebookimut imaluunniit nalunngisavit emailianut nassiullugu.
• Oqaatsimik kukkunertalimmik siumugaqassagaluaruit naqqiissutissaanik aamma siunnersuisinnaavutit.