Inuit Aqqinik Akuersisartut 2013 – 3 (gl)

IAA – 120913 (gl)

Inuit Aqqinik Akuersisartut 12/09-2013, nal. 13.00 Oqaasileriffimmi ataatsimiinnerannit imaqarniliaq

Peqataasut:      Sofie Petersen – siulittaasoq, Eva Møller Thomassen, Karl Møller.

Allatsi:             Nuka Møller

1. Tikilluaqqusineq ilisimatitsissutillu
   
   1. Siulittaasoq tikilluaqqusivoq immikkullu tikilluaqqullugu Inuit Aqqinik Akuersisartunut ilaasortartaaq Karl Møller, LMC-p kingoraartaatut Oqaasiliortunit toqqarneqartoq.
   2. Immik. 4-mi allassimasut tunaartaralugit ilisimatitsissutiginnittoqarpoq, excelimilu kingullermit ataatsimiinnermiit saaffiginnittartut pillugit nalunaarsukkat assilineqarneri takussutissatut agguaanneqarlutik. Kirkeministeriamiut aqqit akuereqqullugit Nunatsinnit saaffiginnittoqartillugu IAA-mut tusarniaasalernerat iluarisimaarnartutut oqaatigineqarpoq.

2. Kingullermik ataatsimiinnermit imaqarniliat akuerineqarneri

Maajip 21-anni ataatsimiinnermit imaqarniliatut missingersuusiaasimasut taamatut isikkoqartillugit akuerineqarput.

3. Atitut akuereqqullugit qinnutigisat:

1. 1. Ivaala (06/09) ♀
      Tunngavilersuutissamik pissarseqqaarlutik isummerfigissallugu ilaasortat nalunaarput.
   2. Inuuneq (21/08) ♀
      Siusinnerusukkut itigartitsissutiginninnertik attatiinnarpaat. Saaffiginnittorlu ilisimatinneqassasoq itigartitsissutigineqartoq suliassanngorteqqissinnaagaa Oqaasiliortunut ingerlateqqillugu.
   3. Nukaja (16/08) ♂
      Atsersuisarnermi innersuutini immik. 3-mi allassimasoq: ”Aterineqarsinnaasutut akuerineqarsinnaanngillat: … aqqit uiguutillu ittoorutaasussanngorsinnaasut atugarliuutitaqarsinnaasullu” tun-ngavigalugu akuerineqanngilaq. Siunnersuutigineqarpoq ersiutitaa qiterleq sivitsorlugu Nukaaja atsiunneqarsinnaasoq, imalt. atsiunniakkap kuissutaa atorlugu saniatigut taagutaa ulluinnarni taaguutitut attatiinnarlugu. Nukaja nukajasumut qanittutut isumaqarfigineqarmat.
   4. Qajuannguaq (26/07) ♂
      ’Qajua’ nagguigitillugu meeqqamut ittoorutaasinnaanissaa pissutigalugu akuerineqanngilaq, siunnersuutigeqquneqarpoq aqqini akuerisaneereersoq Qajorannguaq atitut atussallugu periarfissaasoq.
   5. Apu (20/07) ♂ (ulloq 22/07-13 akuerineqarpoq)
   6. Aneraarsu (28/06) ♂
      Eqqartugassanit peerneqarpoq akuereqqullugu qinnutigineqarnersoq saaffiginnittup allagarisimasaani ersarinngimmat (”Nalugaluarpara nalunngikkaluarlugu ilaatinngikkissi “Aneraarsu”. Inussiarnersumik inuulluaritsi” allamik ilaqanngimmat.)

4. Ilisimatitsissutit – Aqqit pillugit suliat ataatsimiinnerup avataatigut ingerlasut.

1. 1. Kingullermi 21/5 ataatsimiinnerup kingorna suliat (11/09 2013 killigalugu):
      Saaffiginnittut: 57
      Akuerisat:                    6: Tukka, Aatikataaraq, Inequtsiaq, Aniinngu, Arnatsiannguaq, Apu.
      (DK-mi:                        3: Makkorsiina, Menino, Nicu)
      Itigartitat:                   —
      Isumaa:                        9
      Akuerisaava?:           20
      Allat (adm.):              19
      Katillugit:                   57
   2. Aqqit pillugit atuakkiaq.
      Atuakkap immikkoortua kingulleq atuagaaqqap ‘Kalaallit aqqisa nalunaarsorsimaffiat’-a imarisaa tamakkiisoq 2007-imiit aqqinik akuerisanik tuluttuumik ilallugu paasissutissanillu allanik ilaartorsimasoq ilioqqaasumit ilioqqarneqareerluni kukkunersiugassiaq takutinneqarpoq. Paasissutissanik pilersuisut kingusissukkut paasissutissanik aatsaat pilersuisinnaallutik nalunaartarnerat, kukkunersiuinerullu kingusissukkut tiguneqarnera ilioqqaasullu maskiinaajarnera pissutigalugu kinguartooqqasoqaraluartoq suliaq ingerlavoq. Ilioqqakkat naqqissoriikkat siulliit piareerpata ilaasortanut tamanut tunniunneqassapput  isummerfissatut. Immik. siulliup assiliartassai piariikannerput kirkebogitoqqanit quppernerit assilineri marlussuit kisimik amigaataallutik. Aqqit isumaat pillugit allaatigisat eqikkakkat qallunaatuumut tuluttuumullu nutserneri ilanngullugit piariikannerput ilioqqaasullu atortorissaarutaa aaqqippat ilioqqartussaallutik. Immikkoortuata siulliup allannera ingerlavoq. Assiliartassa ujaasineq aamma ingerlavoq. Ilioqqareerlutik kukkunersiugassanngorpata ilaasortanut nassiunneqassapput.

5. Taasariaqartut allat

• 1. Ilisimatusarfimmi aallarterlaat ‘rusuge’qarmata Inuit Aqqinik Akuersisartut suliaat pillugit saqqummiisoqarpoq ukiumoortumik ataatsimiinnermi saqqummiussaasimasut atorlugit.
  2. Ilisimatitsissutigineqarpoq Iluliaq arlariinnik akuereqqullugu saaffiginnissutaasimasoq ilaasalu kissaatigisimagaat Oqaasiliortunut isummerfigeqqeqqullugu suliassanngortinneqassasoq. Ulloq 27/08 suliakkiuteqqinneqarsimanera Oqaasiliortut ataatsimiinissaannut eqqartugassanut ikkunneqassasoq eqqaasitsissutigineqarpoq.

Inussiarnersumik inuulluaritsi

Nuka Møller
allatsi