Oqaasiliortut Ataatsimiinnerat pingasunngornermi oktobarip 27-anni 2010 Ilimmarfimmi Oqaasileriffiup ataatsimiittarfiani.
Peqataasut: Carl Chr. Olsen, Stephen Heilmann, Eva Møller Thomassen, Abia Abelsen aamma Ellen J.Karlsen
Allatsi: Katti Frederiksen
Oqaluuserisassatut siunnersuutit:
- Tikilluaqqusineq – siulittaasoq tikilluaqqusivoq.
- Kingullermik ataatsimiinnermit imaqarniliap akuerineqarnera – akuerineqarpoq.
- Silhouette kalaallisut (21.09.10)
Oqaasiliortut aalajangiuppaat taaguut silhoutte franskit atiannit pisuummat allanngortinnagu taamaatiinnarlugu oqaasersiatut atorneqassasoq, taamaattorli kalaallisut ima nassuiaaserlugu: tarratut taartoq. - Det Europæiske Union aamma Det Europæiske Fællesskab (22.09.10)
Oqaasiliortut kingullermik ataatsimiinnerannit akissusiarineqartoq atuutiinnassaaq, ilanngullugu CCO-p akissusiaa:”Union-ilu fælleskabilu tunngaviatigut assigiipput isumaqatigiissutit suut atuunnersut apeqqutaanerusoraara.(ataatsimoortut suleqatigiillu eqqarsaatersuutaasinnaagaluartut maannamut suleqatigiiffik naapertuunnerusinnaavoq ”qasungasumik” peqatigiinnerummat).
EU aaqqissugaanerani apeqqut pingaarluinnartoq tassa suverænitetsafgivelse, taanna suverænitet tamakkiisuutinnagu USA-kkutut naalagaaffeqatigiiusinnaanginnamik aamma naalagaaffiit peqatigiiusinnaannginnamik (confederationiunnginnamik), suli suleqatigiiffiusutut isikkoqarpoq.
Union-ip fællesskabillu pineqarnerat danskit sprognævniannut aamma paasiniarneqarsinnaavoq.”
- På tværs kalaallisut akimortumik?? (07.10.10)
Kalaallisut oqaatsip akimortumik imalt. akimoortumik qallunaatut oqaatsimut tværs-imut atorneqartartup ippigineqarluni saaffiginnissutigineqarnerani ilisimatitsissutigineqassaaq oqaaseq eqqortoq atugassaq tassaammat ’akimorlugu’, – tassani killeqarfiit pineqarlutik.Taamaattorli atuartitsinermi tværfaglig pineqaraangat kalaallisut taaguut tassaavoq ’atuartitsissutit kattullugit’.
- Ledende kalaallisut, ass. ledende socialrådgiver (13.10.10)
Oqaasiliortut siusinnerusukkut aalajangiunnikuuaat atorfiit suussusaat qanorlu suliassaqarneri tunngavigalugit kalaallisut taaguuserneqartarnissaat, taamaattumik matumani naleqquttuusorineqarpoq oqaaseq ’siuttoq’ ‘qullersaq’, ass. taamaattoqatigiinni siuttoq/qullersaq imalt. X-it siuttuat/qullersaat. - Forskningsprojekt kalaallisut (14.10.10) – ilisimatusaatigalugu suliaq.
- Anorrinut taaguutit (16.10.10)
Saaffiginnissut anorrit sakkortussusaannut aalajangersimasunut kalaallisut taaguutigitinneqartut pillugit arlalitsigut isumaqatiginartortaqartoq tusaatissatut tiguneqarnera ilisimatitsissutigineqassaaq, ilanngulluguli nalunaarutigineqassalluni ‘Anorrit natsimassusiisa taaguutaat naalagaaffiit akuerisaat’ Oqaasiliortunit 1991-imi suliarineqarlunilu akuerineqarsimasoq, aammalu kalaallisuumiit qallunaatuumut tuluttuumullu naapertuuttunngorlugit suliarineqarsimasut, atuutiinnassammata.Naatsumik oqaatigalugu: taaguutit isumaasa imarisaat ujartorneqartut sumiiffinniit sumiiffinnut assigiinngissinnaasarmata Oqaasiliortut akuerisaat tunngaviusumik atorneqaannarnissaat aalajangiusimaneqaannarpoq.
- Stabsdirektør kalaallisut (20.10.10) – pisortaqarfimmiut qullersaat
Stabsfunktion – pisortaqarfimmi suliffik
Stabschef – pisortaqarfimmiut siuttuat - Nunaqarfinni aqutsisut aamma kommunalbestyrelse kalaallisut/danskisut (21.10.10)
Ilisimatitsissutigineqassaaq inatsisitigut allanngortut tassatuaammata kalaallisut taaguutit Inatsisartut aamma Naalakkersuisut, danskisullu aamma taamatut taaneqartassallutik. Kommunalbestyrelse 1950-ikkunnili oqaasersiatut atulersoq suli ulloq manna tikillugu oqaasersiatut atorparput. - ‘Beskyttet boliger’ – Utoqqaat sapinnginnerusut najugaqarfiata atissaanik siunnersoqqusut (22.10.10)
Pineqartoq ‘Utoqqaat najugaqarfii’-nik taaneqaannartarnissaa siunnersuutigineqarpoq, tassunga immikkoortillugu Utoqqaat Illuat, danskisut alderdomshjemmiusoq. - Wellness Center kalaallisut (22.10.10) – Inuummarissarfik
- Ninngarut/nunngarut
Oqaasiliortut ilimagaat oqaaseq ninngarut kukkusumik tutsarliugaagunartoq imalt. eqqaamanerliugaasoq.Qallunaat nittartagaat arlalissuit kalaallisut oqaaseq ninngarut pillugu allataqartartut siumukkakka aallaavigalugit nassuiaataat ataanut ikkuppara:
- Ninngarut er en benring (samlepunkt). Den fordeler kraften mellem alle hundene foran slæden (via skindreb) til to kraftigere skindreb, til selve slædens fæstepunkter. (www.mandala.dk)
Uani pineqartoq tassaanerugunarpoq orseq, allunaasallu nigarneqartutut ittarput, soorluttaaq aamma uani nittartakkami takuneqarsinnaasoq: www.ninngarut.com
Qulaaniittut tunngavigalugit paasinarsivoq oqaatsimik paatsuuineq tunngavigalugu ninngarut pilersimagunartoq (aamma ‘qallunaat siutaanniit allataasoq’).
nigarpaa => avannaamiusut: ningarpaa*
nigarut => avannaamiusut: ningarut* => (‘qallunaap siutaaniit’): ninngarut*Tamanna tunngaviussappat oqaaseq ninngarut kalaallisut piunngitsoq atulersimavaat, – nunngarutaasinnaananilu taanna allatut isumaqarmat.
- Allat:
Allattaaseq pillugu nutaamik siunnersuuteqartoq ilisimatinneqassaaq allattaasitaap atuutilernerani allattaasitoqaq atorunnaarsinneqanngikkaluartoq (soorlu atini), taamaattoq killiffilersuutit assigiinngitsut allattaasitoqqami atuuttut, (soorlu sivitsuut atuinnarlugu), allattaatsip qanoq allannguuteqarsinnaanera pillugu Erik Holtved 1960-ikkunni isumaliutersornikuusoq.taimáitumigdlo = taamaattumillu = tâmãtumílu = tâmâttumillu
Tamanna ilisimatitsissutigereerlugu oqaatigineqassaaq allattaatsip allanngortinneqarnissaanik Oqaasiliortut pilersaarutiginngimmassuk, aammalu oqaatigineqassalluni allattaasitaaq atulermat nutarterneqarnissaanik neriorsuuteqartoqarnikuunngitsoq.
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi