Oqaasiliortut Ataatsimiinnissaat tallimanngornermi aggustip 20-anni 2010 Ilimmarfimmi Oqaasileriffiup ataatsimiittarfiani.
Peqataasussat: Carl Chr. Olsen, Stephen Heilmann, Eva Møller Thomassen,. aamma Ellen J.Karlsen
Abia Abelsen peqataasinnaanani nalunaarpoq.
Allatsi: Katti Frederiksen
Oqaluuserisassatut siunnersuutit:
- Tikilluaqqusineq
- Kingullermik imaqarniliap akuerineqarnera – taamaatillugu akuerineqarpoq.
- cement, beton aamma elevator (15.juni 2010)
Oqaasiliortut taamatut kalaallisut taaguutinik siunnersuuteqartoqarluni saaffiginnittoqarneranut qujapput, taamaattorli tamanut atuuttussanik taaguutinik Sanaartornermi Ilinniarfimmi ilinniartitsisut ilinniartullu ulluinnarni taaguutinik atuisut peqatigalugit suliarineqarnissaat soqutigalugu saaffiginnissutip imarisaaniittut taaguutit ilanngullugit suliassaminnut ilannguppaat aallartitsissutigineqarsinnaalluarmata.Suliassami matumani pingaartinneqarpoq suliassanik paasisimasalinnik suleqateqarluni ingerlatsinissaq, nikingasumillu atuineq pinaveersaarniarlugu, ‘torrutiinnakkanik’ oqaasertaliiniaannarluniluunniit pisoqannginnissaa tassani siunertarineqarpoq. Oqaasileriffimmiillu sukumiisumik passunneqarnissaat, ilaatigut sanasutoqqat aamma suleqatiseralugit, Oqaasileriffimmiit suliassaq ataqatigiissarneqarumaarpoq.
- Qajaq aamma qajariaq (30.juni 2010)
Oqaasiliortutisumaqarput qajariaq tassaanerusoq qajaq, qaamigut ameqanngitsoq, paaqanngitsoq, aammali paateqarani anguutaannalik, taannalu aamma kano-sinnaavoq, kisianni taakkua qaannat plastikkiusut tassaatippaat qallunaat qajaat, taamatullu taagorneqartussatut Oqaasiliortunit siunniunneqarluni.Taamaattumik naatsumik oqaatigalugu qaannanut plastikkiusunut taaguummik qajarissamik atuineq qallunaat qajaannik taarserneqartussanngussalluni.
Ilanngullugit eqqartorneqartut makkuupput:
Umiaq – amermik amilik
Umiariaq – ungasissumut angallatissiaanngitsoq anguutilik, ass. umiarluk. - Det Grønlandske Kriminalpræventive Råd (19.juli 2010)
Oqaasiliortut aalajangiuppaat qulaaniittoq taaguut kalaallisut ima taaguuteqassasoq:
[Kalaallit Nunaanni] Pinerlutsaaliuinermut Siunnersuisoqatigiit.
Kalaallisut allaqqareermat pisariaqartinneqanngilaq Kalaallit Nunaanni immikkut taaguummi allassimanissaa, taamaattumillu ungaluutini kipparissuniinnaq allaqqalluni. - Superbruger, database aamma webmail (21.juli 2010)
Database katersanik ilaatigut taagorneqartartoq atuuffia/imarisaa apeqqutaatillugu aamma matumani atorneqarsinnaanissaa siunnersuutigineqassaaq. Webmail e-mailimik aammali ulluinnarni atuineq malillugu mailimik taaneqartarsinnaasoq Oqaasiliortut akuerereernikuuaat. Superbrugerimulli tunngatillugu saaffiginnittoq aperineqassaaq taassuma sorpiaat imarineraat. - fællesmøde (22.juli 2010) – ataatsimeeqatigiinneq
- komfur (28.juli 2010) – kissarsuut
Ilanngullugit aamma eqqaaneqarput kogeplade tassaasoq uunnaavik, kiisalu mikrobølgeovn kalaallisut ima taaneqartartoq: kissaagasuartitsivik - Sanaartornermi taaguutit – takuuk oqaluuserisami nr.3.
- Allat
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi