Oqaasiliortut ataatsimiinnerannit tallimanngornermi februaarip 25-anni, 2005, nal. 10.00 Oqaasileriffimmi.
Peqataapput:
Carl Chr. Olsen (Puju), Nuka Møller, Stephen Heilmann, Ellen Jensen aamma Liisi Egede Hegelund.
Bolatta Vahl Oqaasileriffimmi atorfilik.
Johanne B.-Tobiassen allatsigalugu.
- Oqaluuserisassat akuerisassanngorlugit saqqummiunnerat
- Ilisimatitsissutit
- Retskrivningsordbog
Ilinniusiorfimmit najuuttoqassaaq
Ebbe Mortensen, Abia Abelsen - Oqaatsit suliassiissutigineqartartut (Bolatta Vahl)
- Tele post – imit taaguutit nalunaarsukkat, Stephen Heilmann
- Taasariaqartut allat
– 1 pillugu –
Oqaluuserisassat akuerineqarput.
– 2 pillugu –
a) Ilitsoqqussaralugu oqaatsit ulluat februaarip 21-anni malunnartinneqartoq pillugu sap.ak. Oqaasileriffimmi atorfilinnit malunnartinniarneqarluni ingerlanneqartoq suliffeqarfinnut oqalugiariartortarnikkut iluatsilluartoq oqaatigineqarpoq unnukkullu Katuap Byorkestersaliani ingerlanneqartoq aamma ingerlalluarsimalluni iluatsittumik. Suliffeqarfinnut ornigunnermi qallunaatut kalaallisullu ingerlanneqartumik oqalugiartoqarpoq immikkoortinnerisigut oqalugiarnerit. Qallunaatut Per Langgårdimit ingerlanneqarput kalaallisullu ingerlanneqarlutik Carl Chr. Olsenimit, Nuka Møllerimit Bolatta Vahlimillu. Februaarip 21-anni 2005 unnukkut ingerlanneqartumi saqqummiipput Carl Chr. Olsen: Oqaatsit kalaallit tamarmik atugassaat, Olga Csonka, Siberien: Meeqqanut taallat erinarsuutillu Chuckchisut, Per Langgård: Qarasaasiami kukkunmiiaat kittoraasersuullu, Magssannguaq Qujaukitsoq: Inughuartut taallat marluk, Nuka Møller: Piusiuttakkat, SMS aamma chat kalaallisut, Victoria Simigaq: Inuktitut oqaatsit allattaaserlu, Ruth Montgomery Andersen: Tyrkerit taalliaat tuluttut atuarlugit, Efraim & Ado Kristiansen: Tunumiusut erinarsorput nipilersorlutillu, Alona Tcherkasina, Jakutsk : Russisut taalliat, Francoise (Fafou) Papis Hansen: Franskisut taalliaq.
Siunissami ilitsoqqussaralugu oqaatsit ulluanni nalliussiniarnermut tunngatillugu siunnertarineqartoq sinerissamut sunniuteqarnerusumik suliniuteqarnissaq oqaatigineqarpoq. Maanna radiukkut tv-kkullu sulianik nittarsaassineq annikinnerusimasoq annertusarniarneqarpoq atorluaanikkut kalaallit tamakkiinerusumik anguniarlugit oqaatsit sammineqarnerisigut.
b) Taaguusersuineq oqaasilerinermut atuakkialerinermut misilitsinnermilu taaguutinik aalajangersimasunut tunngatillugu suleqatigiit tallimanik ilaasortallit ilaatigut Ilinniarfissuarmit, G.U.-mit, Atuarfitsialammit Ilinniusiorfimmillu suliniuteqalersimasut Ellen Jensenimit ilisimatitsissutigineqarpoq. Assigiiaarnerusumik taaguusersuinerup iluaqutigissassai meeqqat mikinerminniilli sungiusimasatik ilinniarfinnut qaffasinnerusunut ingerlaqqinnerminni taaguutinik sungiusimasaminnik ingerlatitsitseqqissinnaaneri iluatiginartinneqartoq erseqqissarneqarpoq.
c) Per Langgårdimit suliaq kukkuniaammut tunngasoq aallartittoq ilisimatitsissutigineqarpoq. Tamanna manna tikillugu unittoorsimagaluartoq ingerlaqqilersoq CCOmit nassuiaatigineqarpoq, siunertaasoq kukkuniiaammik inuiaqatigiit tamat qarasaasiakkut allannermut iluaqutissaat saqqummersinneqarumaartoq ilisimatitsissutigineqarpoq.
d) Nunat Aqqinik Aalajangiisartut ilaasortassaannik Naalakkersuisunit toqqakkamik ilasussat suli ilaneqarsimanngitsut CCOmit ilisimatitsissutigineqarpoq.
e) Nuka Møllerimit ilisimatitsissutigineqarpoq Ilitsoqqussaralugu oqaatsit ulluannut tunngatillugu sap.ak. ingerlanneqartumi oqalugiarnermi Nutserisoqarfiup oqalugiarfigineragut qanimut suleqateqarnerulernissaq Oqaasileriffimmi atorfilinnit Nutserisoqarfimmiunillu ornigineqarlualersimasoq ilisimatitsissutigineqarpoq, tassunga tunngatillugu taaguutinik nutaanik atuilernermi Nutserisoqarfiup Oqaasileriffimmi atorfilinnut ilisimatitsisussaatitaanerminik aamma nassuiaaffigineqarsimanini paasilluarsimagaa ilisimatitsissutigineqarluni. Tamanna pisussaatitaaffik Inatsisartunit Oqaatsinut politiki akuersissutigineqarneragut kikkulluunniit nutaanik taaguusiortut pisussaaffiligaasimasut Oqaasileriffimmik ilisimatitsinissamut erseqqissaatigineqarluni.
Oqaasileriffimmi atorfillit siunissami qaninnerusumi Atuagagdliutitigut oqaatsinut tunngatillugu paasissutissaaqqanik saqqummersitsisalernissaq siunniunneqartoq ilisimatsissutigineqarpoq, taamak ililluni oqaatsinut attuumassutilinnut sunulluunniit atorluarneqarsinnaammat paasissutissiineq quppernerpassuit atunngikkaluarlugit.
f) Radiomi tusagassiortut isumaqatiginerigisigut qaammammulluunniit ataasiarluni sinerissami tusarnaartartut oqarasuaatikkut ilaatinnerisigut taaguutinik aalajangersimasunik sammisaqartarnikkut suliniuteqalernissaq aqqutissiuunneqarsimasoq ilisimatitsissutigineqarpoq.
– 3 pillugu –
Siullermik Ilinniusiorfimmit ilisimatitsissutigineqarpoq Retskrivningsordbogimik kalaallisuumiit kalaallisuumut meeqqat atuarfiat amigaateqartoq. Ordbogeeqqap saqqummersinneqarnerata kingorna annerusumik saqqummersitsisoqarsimannginnera pissutaalluni meeqqat atuarfeqarfinni amigaateqarnerat nassuiaatigineqarpoq Abia Abelsenimit. Siusinnerusoq piffissaq eqqarsaatigalugu Oqaasileriffiup Ilinniusiorfiullu naapeqatigiittarneragut suleqatigiinnissamut isuma aallartisarneqarsimasoq CCOmit ilisimatitsissutigineqarpoq. Suliassamut Retskrivningsordbogiliornissamut tunngatillugu Oqaasiliortunut ilaasortat ilisimatinneqarput suliaq taamaattoq Oqaasiliortunit taamaallaat akuersissutigineqarpat sulisoqarlersinnaasoq.
Oqaasiliortunut ilaasortanit tamanit suliassap piviusunngorlugu ingerlanneqalernissaanut isummerneq ersersinneqarpoq.
Ilinniusiorfimmit ilisimatitsissutigineqarpoq Miilu Lars Lundip aamma Karl-Elias Olsenip suleqatigineragut suliassaq saqqummersitsinissamut aallarnisaataasoq ingerlanneqarsimasoq. Suliat aallarnisaanermut tunngatillugu takussutissat Oqaasileriffimmi atorfillit kiisalu Oqaasiliortunut ilaasortanit maanna takuneqarsimalereersut tunngavigalugit suleriaasissamut pitsaanerusumut ilusilersuiniarneq aallartisarneqalersoq nassuiaatigineqarpoq.
CCOmit nassuiaatigineqarpoq Oqaasileriffimmi atorfillit ilisimatusarnikkut pisussaaffigimmassuk orbogisut ilusilimmik saqqummersitsinissamut piumasaqaatit kisimik pitsaassutsimik qaffasissumik tunuliaqutaqarnikkut suliaqartussaatitaasut taamaak ililluni oqaatsit Retskrivningsordbogimi ilanngunneqartussat pitsaassutsimik qaffasissumik tunngaveqarluni sulinissamut tunngatillugu MLLimik KEOmillu suleqateqarnissaq killilimmik atorneqassasoq Ilinniusiorfimmit Oqaasiliortunut ilaasortanit Oqaasileriffimmilu atorfilinnit isumaqatigiiissutigineqartumik aalajangertoqarpoq.
Taaguusersuinermut ilisimasallit Oqaasileriffimmi atorfillit pitsaassuseq suliamikkut tunniussinnaasaat Oqaasiliortut aamma akisussaaffigeqataaffigigaat nassuiaatigineqarpoq CCOmit. Oqaatsinillu pisoqaavallaanik oqaatsinillu nutaanik ilanngunneqartussaanngitsunik ilanngunneqartussanillu Oqaasiliortunut ilaasortat aalajangiisussaaffeqartut ilisimatinneqarput.
Oqaasiliortunut ilaasortamit LEHimit apeqqutigineqarpoq suliniarneq qanoq ingerlateqqinneqassanersoq.
Tamanna CCOmit nassuiaatigineqarpoq Oqaasileriffimmi atorfillit piareersimasut suliniutip aallartinnissaanut.
BOVAmit nassuiaatigineqarpoq taaguutinik suliaqarluni suleriaatsip ingerlasarneranik, tassani atorneqartoq immersugaq paasissutissanik uninngasuusivik (database) immersorneqarnerani killeqanngiusartumik periarfissalik qanoq atorneqarsinnaaneranik. Taaguutinik katersinermi oqaatsit ataasiakkaat kalaallisut nassuiaataat, danskisut nassuiaataat, grammatikkimut nassuiaataat, morfologimut nassuiaataat allallu nassuiaatigitinniakkat pisariaqartinneqartut immersuiffigineqarsinaasut nassuiaatigineqarpoq. Tamakku paasissutissat taagorneqartut taassaasariaqanngitsoq saqqummersussami tamavissuarmik ilanngunneqartussat. Saqqummersitassap siunertaa aallaavigalugu oqaatsit ilanngukkusunneqartut ilanngunneqassasut nassuiaatigineqarpoq. Tamakku paasissutissat sinneri saqqummersinneqanngitsut paasissutissanik uninngasuusivimmi qaqugumut atajuassasut ilanngullugu erseqqissaatigineqarpoq, taamak ililluni qaquguluunniit sulianut allaanerusunut tunngatillugu paasissutissat ilanngunneqariaannannngorlugit pisariaqartitsineq aallaavigalugu.
CCOmit nassuiaatigineqarpoq Retskrivningsordbogiliornermut tunngatillugu oqaatsit atorneqartussat killilerneqarumaartut, tamakkulu oqaatsit aalajangiussat Oqaasiliortut akuerisaannik taamaallaat pisinnaasoq erseqqissaatigigalugu.
Retskrivningsordbogiliornermi atuisussatut siunniussat qanoq aalajangersimatiginersut Ellen Jensenimit apeqqutigineqarmat nassuiaatigineqarpoq una:
- Retskrivningsordbogiliornissaq Atuafitsialak siullermik atuisussatut salliutinneqarluni amigaatigineqarnera annertoqimmat.
- Kikkut kalaallisut allannermut tunngatillugu ordbogi tigoriaannaq sukkasuumik sulinermut iluaqutaasinnaassusilik siunniunneqarpoq meeqqat atuarfiata pissaata saniatigut.
Saqqummersitsinissamut suliniarnermut tunngatillugu isumaqatigiissutigineqarpoq Ilinniusiorfiup aningaasaliisussanik katersuiniarneq tamakkerlugu tigummissagaa Oqaasileriffiullu oqaatsinik suliaqarnerup pitsaassutsimillu sanarfineq akisussaaffigissallugu, tassunga tunngatillugu nassuiaatigineqarpoq MLLip KEOllu sulisinneqarnerat kipitittariaqanngitsoq kisiannili Oqaasileriffimmi atorfillit oqaatsit pineqartut ataasiakkaarlugit misissoqqissaaqqaarlugit paasissutissanik uninngasuusivimmut toqqorterneqassasut aalajangiunneqarluni.
Retskrivningsordbogiliornermut Atuarfitsialammut atugassanngortitassamut tunngatillugu ilinniartitsisooqatigiit oqaatsinik taaguutinik ilanngukkusutaminnik aamma periarfissaqassasut isumaqatigiissutigineqarpoq.
Ilinniusiorfiup Retskrivningsordbogimik pitsaasumik pitsaassusilimmik saqqummersitsinissamut suliniuteqarnermik sulisitassamik apeqquteqarnera tigulluarneqarpoq. Oqaasileriffimmilu atorfilimmit siunnersuutigineqarluni suleqatigiisitaliaaqqamik pilersitsisoqassasoq taassumalu suliat ataavartumik ingerlatissallugit oqaatsit ataasiakkaat pineqartut immikkoorsiternerini. Oqaasiliortunut ilaasortamit NMimit eqqaaneqarpoq oqaatsit ilaatigut maangaannaq tigusatut ittut ingalassimaniarneqartariaqartut. Tamanna tassa suleqatigiissitaliap suliassaata ilaa, immikkoorsiterineq atorsinnaasut atorsinnaanngitsullu nalunaarsorlugit akuerisassanngorlugit Oqaasiliortunut ingerlateqqinnginnerini. CCOmit nassuiaatigineqarpoq maannamut suliamut aallartisaatitut takussutissani naapitassaasut ilaatigut oqaatsit isumaqataat (synonymer) ilanngussuunneqarsimasut isumaat pinnagit, tamannaasorlu sapinngisamik isumaqataat pinnagit kisiannili isumaat pillugit paasissutissiineq tunaartarineqassasoq meeqqap paasissammagu oqaaseq qanoq isumaqarnersoq kiisalu paasissutissanik allanik pisariaqarpat paasissutissinneqarluni.
Oqaasileriffimmi atorfilinnit Ilinniusiorfimmiunillu isumaqatigiissutigineqarpoq uuma qaammatip aallartilersup naalernerani naapeqatigiittoqaqqissasoq sulianik sumut killinernik paasissutiisseeqatigiinnissamut sulinerullu sanarfinissaanut tunngatillugu.
– 4 pillugu –
Oqaatsit suliassiissutigineqarsimasut Oqaasileriffimmi atorfilimmit Bolatta Vahlimit saqqummiunneqarput tassaasut: Korsbånd, Fugleinfluenza, Håndfonem aamma Fonologisk.
Oqaasiliortunut ilaasortanit ima aalajangiunneqarput akuerineqartutut:
Korsbånd: (seeqqumi) ujalorsuit najummisut.
Fugleinfluenza: nualluut timmissaneersoq.
Håndfonem: naqinneq ussersuut
Fonologisk: oqaatsit nipaannut tunngasut. (Fonologi tassaalluni oqaatsit nipitaannik misissuineq).
– 5 pillugu-
TelePostimit oqaatsit suliassiissutigineqarsimasut Stephen Heilmann saqqummiussaqarpoq. Oqaatsit suliassiissutigineqartut naqissuserlugu ilisimatitsissutigineqarissaaq oqaatsit suliffeeqarfiup TelePost iluinnaani atugassatut akuerineqarmata ilaatigut oqaatsit pineqartut suliffeqarfiup avataani allaanerusumik isumqartillugit atorneqartarmata.
Infoskærme: (igalaasat) paasissutissiiviit. (Nassuiaat: Paasissutissiiviit)
Profiltøj: Sullisit ilisarnaatillit. (Nassuiaat: Atisat suliffeqarfiup sulinermi atugassiai.)
Support: Ikiorsiivik. (Nassuiaat: Ikiorneqarumalluni saaffissaq.)
Voksenspær: Killiliineq. (Nassuiaat: Internetimik atuinermi killiliineq.)
Spærring: Killiliineq. (Nassuiaat: Telefonimik atuinermi killiliineq.)
Home: Aallartiffik. (Nassuiaat: Internetikkut nittartakkami aallartiffik.)
Service activation: Kiffartuussinermik aallartitsineq. (Nassuiaat: Nammineq iml. soorlu Tele saaffigalugu kiffartuussinermik aallartitsineq.)
Distribution: Siammarterineq iml. Nassiussuineq. (Nassuiaat: Attaveqaatinuuppat siammartiterineq – poortukkanuuppat nassiussuineq.)
Kraftcenter: Pissassarfik. (Nassuiaat: Piginnaaneqareersunut pissassarfik.)
Værdier: Pingaartitat. (Nassuiaat: Soorlu suliffeqarfiup pingaartitai.)
Vision: Takorluukkat.
Mission: Suliassat.
Strategi: Iliuusissat.
Liberalisering: Iliuuseq kisermaassiunnaarneq.
Samarbejde, partnerskaber og strategiske alliancer: Suleqatigiinneq, piginneqateqarneq iliuuseqaqatigiinneq.
Frontpersonale: Kiffartuussisut.
Omverdensstrategi: Avammut tunngatillugu pilersaarutit.
Image, synlighed, kommunikation: Kiinnertarneq, saqqumilaarneq, attaveqatigiinneq.
Fjernarbejdspladser: Avalequtit.
Fastholdelse af medarbedere: Sulisut pigiinnarniarnerat.
Flaskehalse: Paamaaqut.
Bredbånd: Attaveqaat sukkasooq. (Nassuiaat: Internetikkut attavik sukkasooq.)
Downloade: Aallerneq. (Nassuiaat: Internetikkut aallerneq.)
Fast kobling til internettet: Internetimut aalajangersumik attaveqaat.
Data: Paasissutissat.
Netværkskort: Attaveqaasersuut. (Nassuiaat: qarasaasiamut.)
Surfe: Internetikkut kaassalisaarneq.
Volumentaksering: Atuineq malillugu akilersuineq.
Net Terminering Punkt: Attaveqaatit katersuuffiat.
Ringetoner: Siarnertaatsit.
Logo: Ilisarnaat.
Underholdning: Aliikkutat.
Billedbeskeder: Nalunaarutit assitallit.
SMS spil: SMS-imi pinnguaatit.
Carl Chr. Olsen Johanne B. Tobiassen
Oqaasiliortunut siulittaasoq Allatsi