Oqaasiliortut Ataatsimiinnissaat ataasinngorneq marsip 23-anni aamma 25-anni 2009 nal. 10.00 Ilimmarfimmi Oqaasileriffiup ataatsimiittarfiani.
Peqataasussat: Ellen J.Karlsen, Abia Abelsen, Eva Møller Thomassen aamma Carl Chr. Olsen
Allatsi: Katti Frederiksen, Stephen Heilmann napparsimanini pillugu ataatsimiinnerni marlunni peqataanngilaq.
Oqaluuserisassatut siunnersuutit:
- Tikilluaqqusineq
- Kingullermik ataatsimiinnermi marsip aappaanni imaqarniliap akuerineqarnera
- Saaffiginnissutit suliassartallit
a) Nunatta Atuagaateqarfianit
b) oplevelseserhverv kalaallisut
c) oqaaseq sanavaa atuakkiamut tunngatillugu atorneqarsinnaava?
d) Kultur, fritid og forebyggelses forvaltning
e) UNESCO Site Manager aamma Park Ranger
f) anniaammik naalagiarneq
g) vitamin, mineral aamma tranebær
h) funktionsoverenskomst
i) Sluk lyset Sermersooq - Allat
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi
1 pillugu:
Siulittaasup tikilluaqqusereernermini nalunaarutigaa Oqaasileriffimmiit nalunaarut ukiumoortoq saqqummersimasoq, taamaattorli kukkunersioqattaareerneqaraluarluni naqinneqarnermini kukkuneqarnera ajuusaarutigalugu Oqaasiliortut kaammattorpai kukkunerit nalunaarummi maluginiakkatik Oqaasileriffimmut nalunaarutigilaaqqullugit. Taamaaliortoqareerneqatigut nalunaarut sineriammut susassaqartunut siammarterneqarluni nassiussorneqarsinnaalissammat.
Kalaallisut qallunaatullu atuartitsinermi taaguusersuutit Inerisaaviup suliarisimasaa Oqaasiliortunullu ingerlateqqitaq pillugu oqallinneqarpoq. Standardimik atuiartuaarnerup tamanit atuleriartuaarneqarnissaa siunertaralugu suliap pingaaruteqarnera ilaatigut erseqqissaassutigineqarluni. Suliamilli ingerlatsisuusuni taakkunani pingasut Oqaasiliortunut ilaasortaammata aalajangiunneqarpoq Oqaasiliortut suliamik ingerlatsisimasunik peqateqaratik misissuataaqqaarallassagaat, kingornatigullu tamakkiillutik suliaq naapeqatigiissutigissallugu, tamannali angalanerit peqqutigalugit poorskip kingorna aatsaat suliarineqarsinnaanissaa nalunaarutigineqarpoq.
2 pillugu:
Kingullermik ataatsimiinnermi marsip aappaanni imaqarniliap akuerineqannginnerani naqqiissut aaqqinneqartoq tassatuaavoq quppernerit aappaanni det gyldne snitip kalaallisut oqaasertassaata aalajangiutivinnera, taaguut tassaassalluni tangertaq. Ilanngulluguli apeqqutigineqarpoq indianer kalaallisut allaqqanera quppernerit pingajuanniittoq assigiinngitsumik allanneqarsimammat sorliup eqqortuunera. Kukkuniiaallu malillugu ataasiinnarmik a-qassaaq, allaqqassallunilu ima: indianerit.
3a pillugu:
Nunatta Atuagaateqarfianit oqaatsit ataasiakkaarlugit nalilersorneqartut naammassineqarput, imaqarniliap matuma bilagiatut ilaliullugit ilanngunneqarput. Tassani immikkut maluginiarneqarlutillu pisortatigoortumik taaguusersorneqartut makkuupput:
Antarktis – Sikuiuitsoq Kujalleq
Antarktiske Øer – Sikuiuitsoq Kujallermi qeqertat
Arktis – Issittoq
Arktiske folk – Issittormiut
Arktisk forkning – Issittumi ilisimatusarneq
Arktiske Øer – Qeqertat Issittumiittut
Ishavet – Issittup Imaa
Polarforskning – Issittut pillugit ilisimatusarneq
Polarlandene – Sikuiuitsoq Avannarleq Kujallerlu
Nordpolen – Qalasersuaq
Sydpolarlandene – Sikuiuitsoq Kujallermi nunat
Sydpolen – Sikuiuitsoq Kujalleq
3b pillugu:
oplevelseserhverv, imatut nassuiaaserneqartoq”Oplevelseserhvervet er en samlet betegnelse for enkeltpersoner og virksomheder, der med et kreativt udgangspunkt beskæftiger sig med at skabe og/ eller levere oplevelser og koncepter baseret udviklingen af oplevelser.” kalaallisut imatut taaguuserneqarpoq:
misigisassianik nioqquteqarneq
3c pillugu:
Oqaaseq sanavaa atuakkiamut tunngatillugu atorneqarsinnaava?
Uani oqaatsimik atuakkialerinermut tunngatillugu sanavaamik atuisimaneq paatsoornikkut oqqarliornikkulluunniit pisimassasoq Oqaasiliortut unnerpaat. Oqaaseq atorneqartussaq tassaassagunaraluarmat suliariviuk.
3d pillugu:
Kultur, fritid og forebyggelses forvaltning kalaallisut taaguutaa tassaavoq
Kultureqarnermut, Sunngiffimmut Pitsaaliuinermullu Ingerlatsivik
3e pillugu:
UNESCO Site Manager aamma Park Ranger kalaallisut taaguutissai pillugit saaffiginnittoqarmat saaffiginnittup suliat atorfiillu suussusiinik nassuiaanera malillugu taaguusiisoqarpoq.
UNESCO Site Manager – UNESCO sinnerlugu aqutsisoq
Park Ranger – [eriagisamik] nakkutilliisoq
3f pillugu:
Anniaammik naalagiartoqassaneranik radiukkut oqartoqarsimanera isoralugu saaffiginnittoq nassuiaanneqassaaq taggerliornerusimanngikkuni kukkunerusoq, tassami anniarsiorfimmik oqartoqartarmat.
3g pillugu:
Vitamin, mineral aamma tranebær kalaallisut qanoq taaguuteqarnerinik aperisoqarmat, oqaatigineqassaaq qangaaniilli vitamin aamma mineral oqaasersiatut atuinnarneqarnikuusut, taamaattorli eqqarsaatigeqqinneqartussatut isumaliutissanngortinneqarput, tassami siunissaq qanittoq eqqarsaatigalugu nerisassanut timigissarnermullu tunngasut taaguutit arlalissuit aamma kalaallisut taaguuserneqartussaassammata, soorlu tassunga ilaassalluni forbrænding.
Paarnaq tranebær Kalaallit Nunaanni naaneq ajormat immikkut taaguuteqartinneqanngilaq, naggueqatittali oqallittarfiatigut apeqqutilliinikkut paasinarsivoq tranebær kimmernamik taagoraat, naak uagut tyttebær kalaallisut kimmernamik taagoripput. Taamaalilluni erserpoq uagut kalaallit naggueqatittalu taaguut kimmernaq paarnanut assigiinngitsunut taaguutigitikkaat, taamaattumik tranebær kalaallisut qanoq taaguuteqassanera suli isumaliutigineqaqqittussanngorpoq.
3h pillugu:
Siusinnerusukkut Oqaasiliortut funktionær kalaallisut ima taaguuserpaat atorfilik imalt. atorfilittut suliaqartoq, taamaattumik funktionsoverenskomst kalaallisut taaguuteqalerpoq atorfilittut suliaqarnermut isumaqatigiissut.
3i pillugu:
Sluk lyset Sermersooq kalaallisut qanoq taaguuserneqassanersoq Oqaasileriffik saaffigineqarami siunnersuusiaa assilipajaarlugu atorneqalereersimammat immikkut oqaluuserinngikkaluarlugu ilisimatitsissutigineqaannarpoq ima taaneqarsimasoq: Sermersuumi Qaminngaalaarneq.
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi
Ulluni ataatsimiiffinni oqaatsit aalajangiunneqarlutillu akuerineqartut::
Det gyldne snit – tangertaq
Antarktis – Sikuiuitsoq Kujalleq
Antarktiske Øer – Sikuiuitsoq Kujallermi qeqertat
Arktis – Issittoq
Arktiske folk – Issittormiut
Arktisk forkning – Issittumi ilisimatusarneq
Arktiske Øer – Qeqertat Issittumiittut
Ishavet – Issittup Imaa
Polarforskning – Issittut pillugit ilisimatusarneq
Polarlandene – Sikuiuitsoq Avannarleq Kujallerlu
Nordpolen – Qalasersuaq
Sydpolarlandene – Sikuiuitsoq Kujallermi nunat
Sydpolen – Sikuiuitsoq Kujalleq
Oplevelsesindustri – misigisassianik nioqquteqarneq
Kultur, fritid og forebyggelses forvaltning – Kultureqarnermut, Sunngiffimmut Pitsaaliuinermullu Ingerlatsivik
UNESCO Site Manager – UNESCO sinnerlugu aqutsisoq
Park Ranger – [eriagisamik] nakkutilliisoq
funktionsoverenskomst – atorfilittut suliaqarnermut isumaqatigiissut.