Oqaasiliortut 2010 – 5 (gl)

OQAA – 260510(gl)

Oqaasiliortut Ataatsimiinnerat pingasunngornermi maajip 26-anni 2010 Ilimmarfimmi Oqaasileriffiup ataatsimiittarfiani.

Peqataasut: Abia Abelsen, Stephen Heilmann, Eva Møller Thomassen aamma Carl Chr. Olsen kiisalu oqaluuserisassami 7-imi Peter Fr.Rosing.
Peqataanngitsoq: Ellen J.Karlsen
Allatsi: Katti Frederiksen

Oqaluuserisassatut siunnersuutit:

1. Tikilluaqqusineq – Siulittaasoq CCO tikilluaqqusivoq, ataatsimiinnermilu oqaluuserisassat akuerineqarlutik.
2. Kingullermik imaqarniliap akuerineqarnera – naqinnerliukkat aaqqitassat eqqaassanngikkaanni imaqarniliaq taamaatillugu akuerineqarpoq.
3. Ilisimatitsissutit – Peter Frederik Rosingimik ataatsimeeqateqarnissaq, ilanngullugu kingullermik imaqarniliami nr.21 PFR peqatigalugu eqqartorneqarlutillu aalajangiivigineqarnissaat ilisimatitsissutigineqarpoq.

   Ukiumoortumik nalunaarut piareerpoq, SH-ip naqqiissutissani allatsimut annguppai, taakkualu aaqqinneqareerpata nittartakkamut ikkunneqariaannanngussalluni.

   Ilanngullugu Oqaasileriffiup nittartagaata nutarterneqarnerani isikkussaata nutaap aalajangiunneqarsimanera nalunaarutigineqarpoq.

4. Pædagogisk udviklingskonsulent (26.04.10)
   Kalaallisut ima taaguuserneqarpoq – Perorsaariaatsinut Siunnersorti
   Soorunami atorfiup imarisaa aamma atorfiliup sunik suliaqarnera apeqqutaalluni taaguusernissaa pisariaqarmat danskisuumiit nutseriinnarnissaq pinngitsoorniarlugu apeqqutilliisoq aperineqarpoq naapertuuttumik taaguusiisoqarsimanersoq.
5. Nalunaaquttamut taaguutit (11.05.10)
   Nalunaaquttamut atatillugu taaguutit kisitsisit tassaapput:

   Nalunaaqutaq ataaseq – ataatsimut – ataatsimiit – ataatsip qeqqa
   Nalunaaqutaq marluk – marlunut – marluniit – marluk qeqqa
   Nalunaaqutaq pingasut – pingasunut – pingasuniit – pingasut qeqqa
   Nalunaaqutaq sisamat – sisamanut – sisamaniit – sisamat qeqqa
   Nalunaaqutaq tallimat – tallimanut – tallimaniit – tallimat qeqqa
   Nalunaaqutaq arfineq – arfinermut – arfinermiit – arfernup qeqqa
   Nalunaaqutaq arfineq-marluk – arfineq-marlunut – arfineq-marluniit – arfineq-marluk qeqqa
   Nalunaaqutaq arfineq-pingasut – arfineq-pingasuniit – arfineq-pingasuniit – arfineq-pingasut qeqqa
   Nalunaaqutaq qulingiluat/arfineq-sisamat – qulingiluanut/arfineq-sisamanut – qulingiluaniit/arfineq-sisamaniit – qulingiluat qeqqa/arfineq-sisamat qeqqa
   Nalunaaqutaq qulit – qulinut – quliniit – qulit qeqqa
   Nalunaaqutaq aqqaneq/isikkaneq – aqqanermut/isikkanermut – aqqanermiit/isikkanermiit – aqqarnup qeqqa/isikkarnup qeqqa
   Nalunaaqutaq ullup-qeqqa/unnuap-qeqqa – ullup-qeqqanut/unnuap qeqqanut – ullup-qeqqaniit/unnuap-qeqqaniit – ullup-qeqqata qeqqa/unnuap-qeqqata qeqqa

   Malugalugu ataaseq, arfineq aamma aqqaneq taakkua ataasersiutaammata immikkullu aamma taaguutaat pissuseqarlutik, tassa tikiffilerutip atorneqarnerani
   -mut atugaalluni, sinnerini –nut atorneqartoq.

   Aamma maluginiagassaq alla tassaavoq ass. nal. 14.30 imalt. 02.30 pingasut qeqqanik taaguuteqarmat piginnittorsiutitaqarani (*pingasup qeqqa), tassani nalunaaquttamut taaguutit oqaatsisut katitatut pissusilinnik allanit allaanerussutigaat.

   Piginnittorsiut kisimi ukunani atugaasinnaavoq: ullup-qeqqa aamma unnuap-qeqqa aamma ilanngullugit ataasersiutitut pissusillit ataatsip-, arfernup– aamma aqqarnup-qeqqa.

6. Pisortaqarfinni atorfiit taaguutaat – Ilaliussaq 1 takuuk.
   Atorfiit taaguutaasa suliarineqarneri iluatsillugit sektion aamma kalaallisut taaguuserneqarpoq: suliaqarfik

7. Peter Fr.Rosingimik ataatsimeeqateqarneq – eqqartorneqartut pingaarnersaat tassaavoq ataatsimeeriaatsit assigiinngitsut kalaallisut pisortatigoortumik tamanut atuuttussianik akuerisanik taaguusiineq.

   Makkua isumaqatigiissutaallutik taaguusiunneqarput:
   Konference – Isummersoqatigiinneq
   Generalforsamling/Kongres – Ataatsimeersuarneq
   Seminar – Isumasioqatigiinneq
   Symposium – Isumattorsaqatigiinneq

8. Allat – WHO’s anti-tobaksdag kalaallisut qanoq taaguuteqarneranut Oqaasiliortunut apeqquteqartumut tunngatillugu taaguutit assigiinngitsut marluk atugaareersut arlaat atorneqaannarsinnaanerat Oqaasiliortut ilisimatitsissutigaat:
   1. Nunarsuatsinni pujortartarneq akiorniarlugu WHO-p ullorititaa
   2. Naalagaaffiit Peqatigiit nunarsuatsinni tupamik akiuiniarluni ullorititaa

Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi