Oqaasiliortut ataatsimiinnerat 07.02.2019 nal. 10.00-13.00
Ilimmarfiup atuagaateqarfiata ataatsimiittarfiani
Peqataasut
Oqaasiliortunit: Mariia Simonsen, Juaaka Lyberth.
Oqaasileriffimmit: Lisathe Møller, Katti Frederiksen.
Peqataanngitsoq
Oqaasiliortunit: Knud Møller.
1. Oqaluuserisassat akuerineqarnerat
Oqaasiliortunut ilaasortat marluinnaat ataatsimeeqataanerat pissutigalugu ataatsimiin-nermi oqaluuserisassat allannguuteqartinneqarput:
1. Oqaluuserisassat akuerineqarnerat.
2. Imaqarniliap akuerineqarnera.
3. Siulittaasumit Oqaasileriffimmillu ilisimatitsissutit.
a. Oqaasiliortut periusissiornissaannut tunngasumik suliaqartut killiffimminnik paasissutissiinerat
b. Oqaasileriffimmit paasissutissat
4. Aternik akuersineq
a. Daania/Dania
b. Juusut
5. Aalajangiiffissat allat:
a. Internet – toornivik
b. Blåfinnet tun – tun tungujortunik avaleraasalik
6. Ataatsimiinnissap tulliata ullulerneqarnera.
7. Tamalaat.
2. Imaqarniliap akuerineqarnera
28/11- 2018 ataatsimiinnermit imaqarniliap akuersissutigineqarnissaa ataatsimeeqataasut marluinnaanerat pissutigalugu tulliani ataatsimiinnissamut kinguartinneqarpoq.
3. Siulittaasumit Oqaasileriffimmillu ilisimatitsissutit
a) Oqaasiliortut periusissiornissaannut tunngasumik suliaqarnermi killiffik siulittaasup ilisimatitsissutigaa. Oqaasiliortut inatsit naapertorlugu pisussaaffii Oqaasileriffimmi qanoq suliarineqartarnersut qulaajarneqarpoq, qulaajaanerlu ataatsimiinnermi tullermi itisilerlugu sammineqassaaq.
b) Oqaasileriffimmit ilisimatitsissutit:
1. Oqaasileriffik Namminersorlutik Oqartussat illorsuannut 4.salimut nuuppoq.
2. 2018-imi aningaasat atunngitsuugamernit taaguusersuuserinermik ineriartortitsinissamut programmimik I-termik pisinermut atorneqarput. I-term
Danmarkimi taaguutinik ineriartortitsinermut programmiliortartup DANTERM-ip pilersitaraa. Pisinermi ilanngunneqarput programmimik i-termimik atuisinnaanissamut pikkorissaaneq. Taaguusersuutinik sulialik Lisathe Møller I-termimik Danmarkimut pikkorissarialerpoq.
3. 2019-imi Aningaasanut Inatsisissamut 1.januar 2019 aallarnerfigalugu Oqaasileriffik marlunnik atorfinitsitsissamut aningaasartuutissanik ikkussigaluarpoq, aningaasalli Naalakkersuisunit sipaarutissatut peerneqarput, saniatigullu Oqaasileriffimmut aningaasaliissutit 100.000 kroninik ilanngarneqarlutik.
4. Allagaatinik katersiviup tamanit atorneqarsinnaalerluni ujaasiffigineqarsinnaasunngortinneqarnissaa sulissutigineqassaaq. Tassani programmøri interfaceliornissaq pillugu saaffigineqareerpoq.
5. Naalagaaffiit Peqatigiit ukioq manna nunat inoqqaavisa oqaasiinut ukiorititaraa, tamannalu qanoq Oqaasileriffimmi malunnartinneqassanersoq januaarimi aatsaat aalajangiiffigineqassaaq. Taamatuttaaq Oqaasileriffiup ukiunik 20-nngortorsiornera qanoq akeqanngitsumik malunnartinneqarsinnaanersoq eqqartorneqarlunilu aalajangiiffigineqarumaarpoq.
6. Kultureqarnermut Naalakkersuisoqarfiup ilisimatippaatigut ataatsimeeqatigalutalu aningaasanik qinnuteqaammik EU-mut nassiussilluta misiliisinnaasugut. Tassani inatsisilerinermi taaguutinik ineriartortitsinissap, Inatsisartut aalajangiussimasaasa timitalerneqarnissaa, eqqarsaatigineqarpoq. EU-p aningaasaliinera taamaallaat 2019-2020-mut atuutissaaq.
7. Arctic Fundersimi siunnersuisoqatigiit decembarimi Oqaasileriffimmiipput ilisimatillutalu 2019-imi oqaatsinik suliniutinut pitsaasunut aningaasanik qinnuteqarsinnaasugut. Arctic Fundersikkormiut nunatsinnit qinnuteqarsimasunut 400.000 kr. agguaattussaavaat. AF-ip aningaasaliinera taamaallaat 2019-imut atuutissaaq.
8. Nunat inoqqaavisa oqaasiinut ukiorititami immikkut saqqummiisoqarani aaqqissuisoqassangilaq, allatigut tamanna malunnartinneqassammat.
9. Ilitsoqqussaralugu Oqaatsit Ulluanni immikkut ittumik Oqaasileriffik Nuuk Centerimi aaqqissuiniarpoq kalaallit oqaasiinut tunngasunik nivinngaassuinikkut kalaallit oqaasii malunnartinneqassallutik.
4. Aternik akuersineq
a. Daania nukappiaqqat atiattut qinnutigineqarpoq . Daania qallunaat atiannit Danielimeersuuvoq, kalaalinngorsarlugulu akuerisassanngorlugu Oqaasiliortunut qinnutigineqarluni. E-mailikkut taasissutigineqarnerani taasinerit amerlaqatigiimmata aalajangiisoqanngilaq, maannali taamani akerliusoq isumaqataalermat ateq Daania nukappiaqqat atiattut akuerineqarpoq.
b. Juusut niviarsiaqqat atiattut akuerisassanngorlugu qinnutigineqarpoq. Qinnuteqartup aanakassagigalua Justinemik ateqartoq Juusut-mik taaneqartarsimavoq. E-mailikkut taasissutigineqarnerani amerlanerussuteqartut itigartereeraluaraat akerliusup isummaminik allanngortitsinera tunngavigalugu niviarsiaqqat aqqattut akuersissutigineqarpoq.
Ataatsimiinnerup siulianiit 7/2-2019-ip tungaanut inuit aqqi e-mailikkut aalajangiiffigi-neqartut:
• Killiaq 5/12-2018.
• Aaninngu 14/12-2018.
• Tivi 9/1-2019.
• Atinnguaq 10/1-2019.
• Ivvii 29/1-2019.
• Múte 29/1-2019.
5. Aalajangiiffigisassat allat
a. Taaguutip internettip kalaallisut taaguutissaanik siunnersuuteqartoqarpoq. Siunnersuuteqartup internettip taaguutissaatut siunnersuutigaa “toornivik”. Internetti toornivillu isummamikkut imminnut ungasippallaarmata Oqaasiliortut najuuttut siunnersuutip akuerineqarnissaa inassutiginngilaat, ataatsimiinnermullu tullermut aalajangigassanngortillugu.
b. Aalisagaq qallunaatut blåfinnet tunimik taaguuteqartoq kalaallisut taaguuseqqullugu saaffiginnissutigineqarpoq. KNAPK-mit avataasiorlutillu aalisartunit tun tungujortunik avaleraasalik taaguutissatut piukkunneqarpoq. Paasissutissat suli amerlanerusut Oqaasiliortunit paasiniaqquneqarput, soorlu sumi uumasuunera, ilisarnaatai, tuninit allanit suna allaassutigineraa ass.
6. Ataatsimiinnissap tulliata ullulerneqarnera
Ulluliisoqanngilaq.
7. Tamalaat
Eqqartugassani nr. 7-mi suliat allat pillugit ilisimatitsisarnermi taaguusersuutinik suliaqarnermut tunngasunik paasissutissiisoqartalernissaa aalajangiunneqarpoq.
Ataatsimiinnermi peqataasut:
Mariia Simonsen, siulittaasoq
Juaaka Lyberth, ilaasortaq
Imaqarniliaq atuarpara:
Knud Møller