Oqaasiliortut 2022 – 7 (gl)

OQAA – 080622

OQAASILIORTUT ATAATSIMIINNERAT

– pingasunngorneq 08/06-2022, nal. 13-16, Oqaasileriffimmi

PEQATAASUT

Oqaasiliortunit

• Mariia Simonsen (siulittaasoq), Karen Ramsøe (siulittaasup tullia), Dorthe Kielsen, Ono Fleischer aamma Abia Abelsen

Oqaasileriffimmit

• Beatrine Heilmann (allatsi)

Immikkut qaaqqusaq

• Tikaajaat Kristensen (inuit aqqi pillugit suliaqarnermi allattaatsimut tunngatillugu immikkut suliaqarfimmik ilisimasalik)

OQALUUSERISASSAT

1. Oqaluuserisassat akuerineqarnerat
2. Kingullermik ataatsimiinnermit (27/04-2022) imaqarniliap akuerineqarnera
3. Suliat aalajangiiffigisassat suliarineqarnerat
4. Siulittaasumit Oqaasileriffimmillu ilisimatitsissutit
   
   1. Oqaasileriffimmit ilisimatitsissutit
5. Kalaallit aqqinik siulequtaasunik akuereqquneqartunik suliaqarneq
6. Ilaasortanit siunnersuutinik suliaqarneq
   
   1. Naqinnerit kalaallisut allattaatsimiinngitsut allannermi ataasiakkaanit ilanngunneqartarnerisa qanoq iliuuseqarfigisinnaanerat pillugu oqallinneq
   2. Kalaallisut oqaatsitta killiffiat pillugu oqallinneq
7. Suliat allat pillugit ilisimatitsineq
   
   1. Inuit aqqi pillugit saaffiginnissutit
8. Ataatsimiinnissap tulliata ullulerneqarnera
9. Tamalaat

IMAQARNILIAQ

1. Oqaluuserisassat akuerineqarnerat

Oqaluuserisassani immikkoortut 5 aamma 6 paarlaanneqarput sinnerilu allanngornagit akuerineqarlutik.

2. Kingullermik ataatsimiinnermit (27/04-2022) imaqarniliap akuerineqarnera

Kingullermik ataatsimiinnermit imaqarniliamit naqqiissutit (sumiorpaluutsit -> sumiorpaluutit aamma kalaallit -> kalaallisut) iluarsineqareermata imaqarniliaq akuerineqarpoq.

3. Suliat aalajangiiffigisassat suliarineqarnerat

Sulianik aalajangiiffigisassanik soqanngilaq.

4. Siulittaasumit Oqaasileriffimmillu ilisimatitsissutit
   
   1. Oqaasileriffimmit ilisimatitsissutit

Oqaasileriffimmit ilisimatitsissutit tusaatissatut tiguneqarput.

b. Siulittaasumit ilisimatitsissutit

KNR-ip nittartagaani nutaarsiassani ilanngutassiamut (07.06.2022) atatillugu apersorneqarsimanini pillugu ilisimatitsivoq, ima qulequtalimmi: Oqaasiliortut: Kalaallit oqaasiisa salliunnissaannik siunertaq angussaavoq, sulisulli aningaasallu amigaataapput.

5. Ilaasortanit siunnersuutinik suliaqarneq
   
   1. Naqinnerit kalaallisut allattaatsimiinngitsut allannermi ataasiakkaanit ilanngunneqartarnerisa qanoq iliuuseqarfigisinnaanerat pillugu oqallinneq

Pilersuisup nallukattanik sanatitsinermini naqinnerit kalaallisut allattaatsimi ilaanngitsut kalaallisut allassimasuni pisortatigoortumillu saqqummiunneqartuni ilanngussimasaat pillugu Oqaasiliortut oqallipput. Pilersuisup nallukattanik sanatitsinermini Tunumiusut sumiorpaluutit ilanngullugit nittarsaassinermini naqinneq d kalaallisut allattaatsimi ilaanngitsoq allassimatippaa, ima: “naddugadda”.

Oqaasiliortut inatsisaat malillugu pisortatigoortumik kalaallisut allattaaseq, taarsiullugu oqaasiliat nutaat aammalu Oqaasiliortut suliassaqarfinni taaguusersuutit akuerisaat malinneqassapput atorneqassallutillu pisortatigut ingerlatsivinnit, Inatsisartunit aamma oqartussaaffinnit Inatsisartunut eqqartuussiveqarfinnullu attuumassuteqartunit tamanit. Tamanna aamma atuuppoq ingerlatseqatigiiffinnut, suliffeqarfinnut il.il. pisortatigut ingerlatsivittut naatsorsuunneqanngitsunut, taakkua suliaannut aningaasartuutit annertunerusut Namminersorlutik Oqartussanit imaluunniit kommunit ilaannit matussuserneqartartuuppata, imaluunniit ima annertutigisumik taakku inatsit naapertorlugu piginnaatinneqarpata Namminersorlutik Oqartussat imaluunniit kommunit ilaat sinnerlugu aalajangersaasinnaallutik.

Oqaasiliortut allattaaseq pillugu aalajangersagaat pisortatigoortumik saqqummiussani malinneqartussaammata Oqaasiliortut aalajangerput Oqaasileriffik Pilersuisumut allagaqassasoq ilitsersuullugillu naqitereqqilerunik naqinnerit kalaallisut allattaatsimiinngitsut atornagit naqitereqqinnertik allattaatsimut naapertuuttumik pisinnaagaat, ima allallugu: nattugatta.

b. Kalaallisut oqaatsitta killiffiat pillugu oqallinneq

Oqaasiliortut kalaallisut oqaatsit ullutsinni atorneqarnerat pillugu nalilersuillutillu isummersornissartik kissaatigaat, tamatumalu saniatigut oqaatsit siuarsarniarlugit qanoq iliortoqarsinnaanera ilanngullugu eqqartorusullugu.

Oqaasiliortut oqaatsit killiffiat pillugu isummersornerminni allannissami malittarisassat sanioqqullugit allattarneq, taaguusersuutinik amigaateqarneq, kalaallisut oqalunnerit nutseriinnarnermik tunngaveqartarnerat aamma oqaatsit atuuffissarinngisaannut atuisarnerit ilaatigut eqqartorpaat, oqaatsilli pillugit naqqissuisussatut pisussaaffeqannginnamik annermik siunnersuinissamik, ilitsersuinissamik qaammarsaanissamillu pisussaaffitsik Oqaasileriffiup sinnerlutik isumagisassarigaa erseqqissaatigalugu.

Oqaasiliortunit siunnersuutit ilagaat Oqaasileriffimmit Oqaasiliortut suliaannik paasissutissiinermi Oqaasiliortut suliaasa killiffiinik nassuiaateqartarnerit ilanngunneqarnissaat.

Oqaasiliortunut ilaasortat ilaannit maluginiarneqarsimavoq piffissami kingullermi inuiaqatigiinnit amerlanernit kalaallisut oqaatsit atorneqartarnerat tappiffigineqaleriartortoq, aamma inuusuttunit. Ilaasortat ilaannittaaq ilanngullugu eqqaaneqarpoq inuusuttunit inuusuttuaqqanillu ikerinnakkut piffissaq tikinneqarsimagaluartoq kalaallisut oqaatsinik atuivallaarunnaarfiusoq, maannali kalaallisut oqaatsit atorneqarneruleriartoqqittutut taaneqartariaqartut radiukkullu atorneqarnerat pitsanngoriartoqqilersoq malunnartoq. Tamatumunngattaaq ilanngullugu erseqqissaatigineqarpoq oqaatsinik atuineq eqqarsaatigalugu inuit ataasiakkaat sunniuteqarsinnaanerat apeqqutaaqataasorujussuusoq maligassiuisutullu inissisimasut sunniuteqarsinnaasorujussuusut. Ilanngullugu eqqaaneqarpoq oqaatsit ingerlaarnerat paasiuminaatsorujussuusinnaasartoq oqaatsillu sammineqartillugit eqqartugassat siammasissorujussuusinnaasartut siunnerfileruminaassinnaallutillu, ataaserli qularnaarlugu ilisimaneqartoq, tassa ullutsinni inuusuttortavut pingasunik oqaaseqartuusut: kalaallisut, qallunaatut tuluttullu, tamannalu oqaatsit tungaasigut siuariarujussuarsimanertut taaneqartariaqartoq, nammineq oqaatsitta saniatigut nunami allamiut oqaasii marluk atorsinnaanngoratsigit.

Ilaasortat ilaannit oqaatigineqarpoq oqaatsit pillugit oqallinnerni aalajangersimasumik sammisaqarani imungarsuaq oqallittoqarsinnaasoq, taamaattorli oqaatsinik kivitsiniarnerit kajumissaarutitut siunertallit aqqutigalugit oqaatsinik siuarsaaniarnerit ingerlanneqarsinnaasut.

Oqaasileriffiup Oqaasiliortut sinnerlugit siunnersuinissamik, ilitsersuinissamik, qaammarsaanissamik malittarinninnissamillu allatseqarfittut pisussaaffeqarnera ilanngullugu erseqqissaatigineqarpoq, Oqaasiliortullu aalajangigaannik timitaliilluni paasisitsiniaasussaatitaasoq Oqaasiliortullu immikkut iliuuseqartariaqanngitsut allatseqarfiup isumagissassarimmagit, taamaattorli Oqaasiliortut isummersornissaat pingaaruteqartuusoq.

Oqaasileriffimmit nassuiaatigineqarpoq siunnersuinissamik, ilitsersuinissamik qaammarsaanissamillu pisussaaffeqarnermut atatillugu siunissami pilersaarutaasoq attaveqaqatigiinnermut siunnersortip Oqaasileriffiup atortorissaarutaataanik assigiinngitsunik pikkorissartitsisalernissaa. Pikkorissartitsisarnissami siunertaavoq paasisitsiniaasaarnissaq suliffeqarfinnut, pisortaqarfinnut, atuarfeqarfinnut atuarfeqarfinnullu Oqaasileriffiup paasissutissaatai atortorissaarutaatalu pioreersut pillugit, taamaalillutik inuit ataasiakkaat namminneerlutik ilisimalerniassammassuk qanoq namminneerlutik annertunerusumik kalaallisut oqaatsit pillugit misissuisinnaanerlutik.

Oqaasiliortunit kissaatigineqartut ilagaat Oqaasileriffiup naggueqatitsinnik annertunerusumik suleqateqartarnissaa avitseqateqartarnissaalu. Tamanna Oqaasiliortut Oqaasileriffik peqatigalugu periusissatut iliuusissatullu pilersaarutaannik nutartereqqinnissami ilanngutassaqqissutut Oqaasiliortunit nalilerneqarpoq.

6. Kalaallit aqqinik siulequtaasunik akuereqquneqartunik suliaqarneq

Aqqit akuerineqartut:

• Niviarsiaqqanut atertut akuerineqartut:
  • Nuunuja (05.05.22), Avaluuna (17.05.22), Natseqqortooq (30.05.22), Aannguaq (02.06.22) aamma Ajaara (02.06.22).
• Nukappiaqqanut atertut akuerineqartoq:
  • Dikkattaat (08.06.22) – ilaasortat pingasut akuersipput marlullu itigartitsillutik.
• Niviarsiaqqanut nukappiaqanullu atertut akuerineqartoq:
  • Pukusuk (30.05.22)

7. Suliat allat pillugit ilisimatitsineq
   1. Inuit aqqi pillugit saaffiginnissutit

Inuit aqqi pillugit saaffiginnissutinik ilisimatitsissutit tusaatissatut tiguneqarput.

8. Ataatsimiinnissap tulliata ullulerneqarnera

Tallimanngorneq 24/06-2022 nal. 13-16 tulliani ataatsimiiffiussaaq Oqaasileriffimmi pisussaq.

9. Tamalaat

Oqaasiliortunut ilaasortamit kissaatigineqarpoq tulliani ataatsimiinnermi alajangiiffigisassanngortinneqassasoq aternik akuersisarnermi kalaallisut allattaatsimi aalajangersakkat malittarisassallu malinneqarnissaat, tamatumunnga ilanngullugit naqinnerit kalaallisut oqaatsini atorneqartut.

Oqaasiliortut Oqaasileriffiullu suliassat pillugit isumaqatigiissutaat tulliani ataatsimiinnissamut ilanngunneqassaaq.

Ataatsimiinnermi peqataasut:

Mariia Simonsen (siulittaasoq)

Karen Ramsøe (siulittaasup tullia)

Dorthe Kielsen (ilaasortaq)

Abia Abelsen (ilaasortaq)

Ono Fleischer (ilaasortaq)