Nunat Aqqinik Aalajangiisartut 2023 – 1 (gl)

NAA – 23.03.23

 

 

NUNAT AQQINIK AALAJANGIISARTUT ATAATSIMIINNERAT

Sisamanngorneq 23.03.2023, nal. 13-15 Oqaasileriffimmi

 

PEQATAASUT

Nunat Aqqinik Aalajangiisartunit: Josephine D. Munch

Digitalikkut peqataasut: Niels Lorentzen & Kelly Berthelsen

Oqaasileriffimmit: Beatrine Heilmann (pisortaq), Arnaq B. Johansen (allatsi), Arnamineq Abelsen (nunat aqqilerisoq), Louisa Høyer (nunat aqqilerisoq Ilisimatusarfimmit suliffimmik misiliisoq)

 

OQALUUSERISASSAT

1. Ilisaritinneq
2. Oqaluuserisassat akuerineqarnerat
3. Kingullermik ataatsimiinnermit (24.11.2022) imaqarniliap akuerineqarnera
4. Siulittaasumit Oqaasileriffimmit ilisimatitsissutit
5. Ilaasortanit siunnersuutinik suliaqarneq
6. Aalajangiiffigisassanik allanik suliaqarneq
   1. Ukiumoortumik nalunaarut 2022-mut
   2. *Præste Ø (Nipisat, Sisimiut)
   3. Kangerluarsunnguami qaqqaq sermilik nunallu aqqi sumiiffiup eqqaaniittut (Nuuk)
   4. *Sarluartalik (Qaqortoq)
7. Suliat allat pillugit paasissutissiineq
   1. Aatsitassanut Aqutsisoqarfimmit saaffiginnissutit
8. Tulliani ataatsimiinnissamik ulluliineq
9. Tamalaat

Ilaliussaq 1

Ilaliussaq 2

 

 

1. Ilisaritinneq

Ataatsimiinnermi peqataasut naatsumik imminnut ilisaritipput.

 

2. Oqaluuserisassat akuerineqarnerat

Oqaluuserisassat akuerineqarput.

 

3. Kingullermik ataatsimiinnermit (23.03.2023) imaqarniliap akuerineqarnera

Imaqarniliaq akuerineqarpoq.

 

4. Oqaasileriffimmit ilisimatitsissutit

Oqaasileriffimmit ilisimatitsissutit

Ilisimatitsissutit tusaatissatut tiguneqarput.

 

5. Ilaasortanit siunnersuutinik suliaqarneq

Soqanngilaq.

 

6. Aalajangiiffigisassanik allanik suliaqarneq

a. Ukiumoortumik nalunaarut 2022-mut

Ukiumoortumik nalunaarut 2022-mut akuerineqarpoq.

 

b. *Præste Ø (Nipisat, Sisimiut)

Kingullermik ataatsimiinnermit (24.11.2022) Nunat Aqqinik Aalajangiisartut kissaataat malillugu Oqaasileriffimmit misissuineq ingerlanneqaqqinnikuuvoq, misissuinermillu paasisat matumani ataatsimiinnermi saqqumiiunneqarlutik.

Saqqummiunneqartut aallaavigalugit Nunat Aqqinik Aalajangiisartut eqqartuereerlutik toqqammavilersukkamik ima aalajangiipput:

Qeqertap atserneqarusunnera paasinarpoq, aamma sumiiffiup nalaaneersunit ilisimaneeruttumik ateqarsimanissaa ilimanaateqaraluarpoq. Taamaattumik Oqaasileriffimmit Sisimiuni Kangerlussuarmilu Katersugaasiviit immikkoortortaqarfiat Sisimiuniittoq attavigineqassaaq siunnersuusiorfigineqassallunilu ima:

*Præste Ø-mi assaasimanerit pillugit saqqummersitsinerminni Præste Ø atussavaat, saqqummersitsinermilu qeqertap qanoq ateqarnissaa pillugu inuit qinersinikkut taasitinneqassallutik. Taamaalioreerunik Nunat Aqqinik Aalajangiisartunut akuerisassanngortillugu saaffiginnissutigissavaat.

 

c. Kangerluarsunnguami qaqqaq sermilik nunallu aqqi sumiiffiup qanitaaniittut (Nuuk)

GEUS-ip Nuummi immikkoortortaqarfianit saaffiginnissutigineqartoq tassaasoq Kangerluarsunnguami qaqqap sermia qanoq ateqarnersoq apeqqutigineqarsimasoq eqqartorneqarpoq.

Sumiiffiup nalaaniittunik nunat aqqinik misissuisimaneq Oqaasileriffimmit saqqummiunneqareermat Nunat Aqqinik Aalajangiisartut ima toqqammavilersukkanik aalajangerput:

 

• Qaqqaq saaffiginnissutigineqartup nalaaniittoq pisortatigoortumik ima ateqassaaq: Qassinnguit.
  • Taama aalajangernermi maanna sumiiffia suussusaanullu nalunaarsuutaa atorunnaarsinneqarput. Sumiiffia suussutsimullu nalunaarsuutigisimasaa tassaasoq sissaq atorunnaarsinneqartut ilaliussaq 1-imi takuneqarsinnaapput.
  • Sumiiffiata nutarterneqarnera suussutsimullu nalunaarsuutaata allannguutaa ilaliussaq 2-imi takuneqarsinnaavoq.
• Qaqqap Qassinnguit ilummut tullia qaqqaq pisortatigoortumik ima ateqassaaq: Qassi.
  • Siornatigut ateqarsimaneranik takussutissartaqanngilaq. Sumiiffia ilaliussaq 2-imi takuneqarsinnaavoq.
• Qassinnguit qaavaniittoq sermeq pisortatigoortumik ima ateqassaaq: Qassinnguit Sermiat.
  • Siornatigut ateqarsimaneranik takussutissartaqanngilaq. Sumiiffia ilaliussaq 2-imi takuneqarsinnaavoq.

 

Siullernut marlunnut toqqammavilersuutitut atorneqartoq tassaavoq inuit ilisimannittut minnerpaamik pingasut tamarmik assigiimmik taasisimanerat.

Pingajuat pillugu Nunat Aqqinik Aalajangiisartut sumiiffiup nalaani nunat aqqi pioreersut malillugit pisortatigoortumik atuuttussanngortillugu namminneq aalajangerpaat. Assersuutitut nassuiaatigineqarpoq “uuma sermia” imaluunniit “uuma kuua” atsersuisarnerni takussutissaasut.

Ilanngullugu Nunat Aqqinik Aalajangiisartut kissaatigaat nunat aqqi sumiiffiup nalaaniittut allat misissorneqassasut.

 

d. *Sarluartalik (Qaqortoq)

Qaqortup eqqaaniittoq qeqertaq nunat aqqisa nalunaarsuiffianni digitaliusumi ima nalunaarsoqqasoq Oqaasileriffimmit misissorneqarpoq: “Sarluartalik???”.

Oqaasileriffimmit misissuisimaneq naapertorlugu inunnillu aperineqartunit pingasut tamarmik assigiimmik qeqertaq Sarluartalimmik ateqarnerarmassuk Nunat Aqqinik Aalajangiisartut qeqertaq ima ateqartussatut pisortatigoortumi akueraat: Sarluartalik.

 

7. Suliat allat pillugit paasissutissiineq

a. Aatsitassanut Aqutsisoqarfimmit saaffiginnissutit

Misissuiffissatut qinnutigineqarsimasut sivittorneqarnissaat pillugit qinnuteqaatit Oqaasileriffimmut tusarniaassutigineqartut marluupput:

Efterforskningstilladelse 2016/14 aamma efterforskningstilladelse 2008/01.

Sivittuinissamut qinnuteqaateqartoqartillugu Oqaasileriffimmut tusarniaasarnissaq pisariaqanngitsoq Aatsitassanut Aqutsisoqarfimmit ilisimatitsissutigineqarnikuuvoq, tamannalu Nunat Aqqinik Aalajangiisartunit tusaatissatut tiguneqarpoq.

 

8. Tulliani ataatsimiinnissamik ulluliineq

Saaffiginnissutinik aalajangiiffigisassanik takkuttoqarnikuunngimmat ataatsimiinnissap tullia ullulerneqanngilaq.

 

9. Tamalaat

a. Savaateqarfiit inuisalu nunat aqqinik taaguisarnerannik misissuinissaq Nunat Aqqinik Aalajangiisartuni ilaasortat ilaata suliarinikuusaat maanna Oqaasileriffimmit nangillugu suliaq ingerlateqqinneqassaaq. Siunnersuutigineqarpoq nunap assinginik allattuiffigineqarsinnaasunik savaatilinnut illoqarfinnulluunniit qanitaannut nassiussisoqarsinnaasoq.

 

Nunat Aqqinik Aalajangiisartut

• Aviâja Rosing Jakobsen (siulittaasoq)
• Kelly Berthelsen (siulittaasup tullia)
• Niels Lorentzen (ilaasortaq)
• Josephine Munch (ilaasortaq)
• Emma Kristensen (ilaasortaq)

–

Ilaliussaq 1

Qassinnguit sumiiffigisimasaata suussutsimullu nalunaarsuutigisimasaanut takussutissaq.

 

Ilaliussaq 2

Nunat aqqisa imaqarniliami attuumassutillit nutarterneqartut nutaallu ukuusut takussutissartaat:

Qassinnguit (FJELD), Qassinnguit Sermiat (ISA) kiisalu Qassi (FJELD)