Nunat Aqqinik Aalajangiisartut 2025-2 (gl)

NAA – 27.11.25

 

NUNAT AQQINIK AALAJANGIISARTUT ATAATSIMIINNERAT

Sisamanngorneq 27.11.2025, nal. 13-16, Oqaasileriffimmi

PEQATAASUT

Nunat Aqqinik Aalajangiisartut: Aviâja Rosing Jakobsen,  Josephine Munch, Frederik (Fuuja) Larsen,

Peqataanngitsut: Niels Lorentzen, Kelly Berthelsen

Oqaasileriffimmit: Beatrine Heilmann (pisortaq, allatsi), Malu Jessen Berthelsen (nunat aqqinik sulialik), Angerlartunnguaq Steenholdt (nunat aqqinik sulialik)

OQALUUSERISASSAT

1. Oqaluuserisassat akuerineqarnerat
2. Kingullermik ataatsimiinnermit (17.06.2025) imaqarniliap akuerineqarnera
3. Siulittaasumit Oqaasileriffimmillu ilisimatitsissutit
   1. Siulittaasumit ilisimatitsissutit
   2. Oqaasileriffimmit ilisimatitsissutit
4. Ilaasortanit siunnersuutinik suliaqarneq
5. Aalajangiiffigisassanik allanik suliaqarneq
   1. Arfersiorfik
   2. Præste Ø
   3. Nuutoqaq
   4. Qallussuaq
   5. Pikialasorsuaq
6. Suliat allat pillugit paasissutissiineq
   1. Aatsitassanut Aqutsisoqarfimmit tusarniaanerit
7. Tulliani ataatsimiinnissamik ulluliineq
8. Tamalaat

Ilaliussat:

• Ilaliussaq 1
• Ilaliussaq 2
• Ilaliussaq 3
• Ilaliussaq 4
• Ilaliussaq 5

IMAQARNILIAQ

1. Oqaluuserisassat akuerineqarnerat
   • Oqaluuserisassat allanngornagit akuerineqarpoq.
2. Kingullermik ataatsimiinnermit (17.06.2025) imaqarniliap akuerineqarnera
   • Kingullermik ataatsimiinnermit imaqarniliaq (17/06-2025) allanngornagu akuerineqarpoq.
3. Siulittaasumit Oqaasileriffimmillu ilisimatitsissutit
   1. Siulittaasumit ilisimatitsissutit
      • Siulittaasumit ilisimatitsissutinik soqanngilaq.
   2. Oqaasileriffimmit ilisimatitsissutit
      • Oqaasileriffimmit ilisimatitsissutit tusaatissatut tiguneqarput.
4. Ilaasortanit siunnersuutinik suliaqarneq
   • Ilaasortanit siunnersuutinik suliassaqanngikkallarpoq.
5. Aalajangiiffigisassanik allanik suliaqarneq
   1. Arfersiorfik
      • Ulloq 15. september 2025, Oqaasileriffimmut saaffiginnittoqarpoq aperaluni sooq Arfersiorfik nunataqqi.gl-imi ersikkunnaarsimanersoq. Tassani misissuineq aallartippoq.
      • → Toqqorsivimmi nunat assingini 1930-kkunneersuni aamma 1950-kkunneersuni Arfersiorfik nalunaarsugaavoq, nassuiaatitaqanngitsumilli allanngorarsimalluni.
      • Arfersiorfiup sumut killinneranik misissuinermi Arfersiorfimmik ilisimannittoq iserluni oqaluttuarpoq Arfersiorfiup oqaluttuassartaanik titartaallunilu killinganik. Inunnit pingasunit uppernarsarneqarpoq Arfersiorfiup sumut killinnera.
      • Allagaatitoqqani Niaqornaarsummeersup Arfersiorfimmik oqaluttuaa 1954-imeersoq, qulaani Arfersiorfiup sumiinneranik uppernarsaasunut naapertuuppoq.
      • Nunat Aqqinik Aalajangiisartut aalajangiinerat:
        • Misissuinerit malillugit Arfersiorfik tassaasimavoq arfermik malersuinermi ingerlaarfiusimasoq, tamannalu sumiiffimmik ilisimannittunik minnerpaamik pingasuusunit uppernarsarneqarluni, oqaluttuassartaa ilanngullugu. Taakku saniatigut Oqaasileriffimmi nunat aqqinik toqqortaatini nassuiaatit uppernarsaasut nassuiaataannut naapertuuppoq, taamaattumik Nunat Aqqinik Aalajangiisartut aalajangerput Arfersiorfik nalunaarsorneqassasoq immikkut ingerlaarfittut, ima suussusilerlugu: ANDET (alla), nunat aqqisa suussusiinit allaanerummat, titartarneqassallunilu uppernarsaasut pingasut nassuiaataat malillugu.
   2. Præste Ø
      • Præste Ø kalaallisut ateqartinneqarnersoq misissuisoqarnikuugaluarpoq. Nassaassaqanngiivimmat Sisimiuni Katersugaasivik suleqatigalugu kalaallisut atsernissaanut siunnersuusiortitsiniarneq ingerlanneqarnikuugaluarpoq, siunnersuusiortoqarsimanngiivillunili.
      • Nunat Aqqinik Aalajangiisartut aalajangiinerat:
        • Præste Ø kalaallisut ateqartinneqanngimmat allanngornagu qallunaatut aqqa pisortatigoortumik atuinnarneqassasoq Nunat Aqqinik Aalajangiisartut aalajangerput.
   3. Nuutoqaq
      • Nuutoqaq Atuagagdliutini atorneqaqqaarsimavoq 1956-imi, sulilu takussutissaqarluni ullumikkut Nuutoqaq taaguutitut atorneqartarnera.
      • Nunat Aqqinik Aalajangiisartut aalajangiinerat:
        • Nunat Aqqinik Aalajangiisartut aalajangerput Nuutoqaq pillugu aalajangernissaq kinguartinneqassasoq sumiiffiup killingata misissuinikkut inissereerneqarnissaanut.
   4. Qallussuaq
      • Oqaasileriffiup nittartagaani nunataqqi.gl-imi nutaannginnermi taseq Qallussuaq Nuup imeqarfianiittutut nalunaarsoqqavoq. Tamannalu kukkunerusoq uppernarsarneqarpoq. Toqqorsivimmi Nuup assingani 1950-kkunneersumi Qallussuarmik nalunaarsoqqasoqanngilaq.
      • Nunat Aqqinik Aalajangiisartut aalajangiinerat:
        • Nunat Aqqinik Aalajangiisartut aalajangerput Qallussuaq tassaasoq taseq Quassussuup tunuaniittoq. Taama aalajangerput minnerpaamik ilisimannittunik pingasunit tamanna uppernarsarneqarsinnaammat.
   5. Pikialasorsuaq
      • Kalaallit Nunaata avannaani immap sarfarnersaa pisortatigoortumik Pikialasorsuarmik ateqarnissaa ullormi 5. november 2014 Nunat Aqqinik Aalajangiisartunit aalajangiiffigineqarnikuuvoq. Aalajangiiffigineqareeraluartoq suli nalunaarsorneqanngilaq. 4. december 2024-imi webinarimi saqqummiinermi apeqquteqartoqarpoq nunat aqqinik suliaqarnermi Pikialasorsuaq eqqartorneqarnikuunersoq.
      • Nunat Aqqinik Aalajangiisartut aalajangiinerat:
        • Nunat Aqqinik Aalajangiisartut aalajangerput Pikialasorsuaq pillugu Isumalioqatigiissitat nittartagaanni Pikialasorsuup (Pikialasorsuaq) titartarneqarsimanera malillugu nunat aqqinik nalunaarsuiffimmi pisortatigoortumik killinga titartarneqassasoq.
6. Suliat allat pillugit paasissutissiineq
   1. Aatsitassanut Aqutsisoqarfimmit tusarniaanerit
      • Aatsitassanut Aqutsisoqarfimmit tusarniaanerit Oqaasileriffimmi suliarineqarsimasut Nunat Aqqinik Aalajangiisartunut ilisimatitsissutigineqarput.
7. Tulliani ataatsimiinnissamik ulluliineq
   • Nunat Aqqinik Aalajangiisartut ukiup 2025-p naanissaanut atuupput, taamaattumik tulliani ataatsimiinnissaq Nunat Aqqinik Aalajangiisartunngortussat aalajangerumaaraat ilaasortat aalajangerput.
8. Tamalaat
   • Soqanngilaq.

Nunat Aqqinik Aalajangiisartut

• Aviâja Rosing Jakobsen (siulittaasoq)
• Kelly Berthelsen (siulittaasup tullia)
• Niels Lorentzen (ilaasortaq)
• Josephine D. Munch (ilaasortaq)
• Frederik Larsen (ilaasortaq)

Ilaliussat:

• Ilaliussaq 1: Nuutoqaq
• Ilaliussaq 2: Qallussuaq (Cirkussøen) – nunataqqi.gl-imi nutaannginnermi kukkusumi inissisimavoq
• Ilaliussaq 3: Qallussuaq (Cirkussøen) nunataqqi.gl-imi nalunaarsoqqanngilaq
• Ilaliussaq 4: Atuagagdliutit nr. 87, 1. august 1990, s. 5 – Qallussuaq, Qinngorput
• Ilaliussaq 5: Pikialasorsuaq pillugu Isumalioqatigiissitanit Pikialasorsuup titartarneqarnera – pikialasorsuaq.org