NUNAT AQQINIK AALAJANGIISARTUT ATAATSIMIINNERANNIT IMAQARNILIAQ
Sisamanngorneq 01/06-2023, nal. 13-15 Oqaasileriffimmi
PEQATAASUSSAT
Nunat Aqqinik Aalajangiisartunit: Aviâja Rosing Jakobsen, Kelly Berthelsen & Josephine D. Munch
Oqaasileriffimmit: Beatrine Heilmann (pisortaq), Arnaq B. Johansen (allatsi), Arnamineq Clasen (nunat aqqinik sulialik)
OQALUUSERISASSAT
- Oqaluuserisassat akuerineqarnerat
- Kingullermik ataatsimiinnermit (23.03.2023) imaqarniliap akuerineqarnera
- Siulittaasumit Oqaasileriffimmit ilisimatitsissutit
- Ilaasortanit siunnersuutinik suliaqarneq
- Aalajangiiffigisassanik allanik suliaqarneq
- Uummannap Kangerluani qaqqat ulorianartutut nalilerneqarnikut nalaanni nunat aqqinik misissuinermit paasisat
- Tunumi Scoresby Land, Jameson Land aamma Liverpool Landip nalaata kalaallisut ateqalersinneqarnissaanut siunnersuut
- Suliat allat pillugit paasissutissiineq
- Aatsitassanut Aqutsisoqarfimmit tusarniaaneq
- Thule Air Base-p Pituffik Space Base-mut allanngortinneqarsimanera pillugu saaffiginnissut
- Tulliani ataatsimiinnissamik ulluliineq
- Tamalaat
1. Oqaluuserisassat akuerineqarnerat
Oqaluuserisassat akuerineqarput.
2. Kingullermik ataatsimiinnermit (23.03.2023) imaqarniliap akuerineqarnera
Imaqarniliaq akuerineqarpoq.
3. Siulittaasumit Oqaasileriffimmit ilisimatitsissutit
Ilisimatitsissutit tusaatissatut tiguneqarput.
4. Ilaasortanit siunnersuutinik suliaqarneq
Soqanngilaq.
5. Aalajangiiffigisassanik allanik suliaqarneq
a. Uummannap Kangerluani qaqqat ulorianartutut nalilerneqarnikut nalaanni nunat aqqinik misissuinermit paasisat
Aatsitassanut Inatsisillu Atuutsinneqarnerannut Naalakkersuisoqarfimmi ujarassiuut saaffiginnipput kissaatigalugu Uummannap Kangerluani qaqqat ulorianartutut nakkaariaannartullu nalilerneqarnikut imalu taaguuteqartinneqartut “Karrat 1-2-3” aamma “Kigarsima” Nunat Aqqinik Aalajangiisartunit misissorneqassasut nunallu aqqi eqqortut atorneqarnersut misissorneqassasut nalilersorneqassasullu.
Misissuinermi Avannaata Kommuniani Uummannami immikkoortortaqarfik, Nunaqarfinni allaffeqarfiit arlallit aamma inuit sumiiffimmi angalallutillu nunat aqqinik atuisut attavigineqarput.
Nunat Aqqinik Aalajangiisartut eqqartuinerminni nalilersuinerminnilu taavaat tassaarsuartoqarnerani 2017-imi nunat aqqi pillugit paatsooqatigiittoqarsimasinnaasoq taamaammallu Karrat atorneqarsimasoq naak qaqqamit nakkaasut Umiammakku Nunaanit nakkaagaluartut.
Nunat Aqqinik Aalajangiisartut misissuineq pillugu eqqartuereerlutik tunngavilersukkamik aalajangerput maanna taaguutit atorneqartut atorneqaannassapput inunnit amerlasuunit sungiunneqareersimaneri pissutaalluni. Allanngortitsineq pissangaluarpat paattoorutaasinnaanera pinaveersaartinniarlugu taaguutinik allannguinninnermik aalajangerneq pivoq.
Aalajangernerminni upalungaarsimaniarnermik qaqqanillu ulorianaatilittut nalilerneqarnikunik suliallit erseqqissaavigineqarnissaat kissaatigaat. Erseqqissaanermi pineqarput qaqqanut ulorianaatilittut nalilerneqarnikunut taaguutit “Karrat 1-2-3” aamma “Kigarsima” nunat atiunngimmata kisiannili qaqqat ilaata nakkaariaannaap nalaata taaguutaa.
Siunissami qaqqanik nakkaariaannartut ulorianaatilittut nalilerneqartunik naammattuuisoqassappat erseqqissarneqartassaaq ulorianaatilittut nalilikkat nalaat taaguuserneqartassasut nunap aqqa aallaavigalugu. Kingorna sumiiffimmi tassani allamik nassaartoqarpat siulleq 1-mik nalunaaqutserneqartassaaq kingullerlu 2.
b. Tunumi Ittoqqortoormiit eqqaanniittut nunat aqqi Jameson Land, Liverpool Land aamma Scoresby Land kalaallisut ataatsimut ima atserneqarnissaannik siunnersuut: Kangerput imaluunniit Kangikajik
Siunnersuummik nassiussisoqarnikuuvoq Tunumi Ittoqqortoormiit eqqaaniittut nunat aqqi Jameson Land, Liverpool Land aamma Scoresby Land ataatsimut ima atserneqassasut: Kangerput imaluunniit Kangikajik. Siunnersuummik nassiussisoq itisiliilluni nassuiaavoq nunatsinni nunat aqqi nunaqavissunit atserneqassasut, taaguutaalu nunaqavissuneersoq takuneqarsinnaallunilu atuarneqarsinnaaniassammat.
Nunat Aqqinik Aalajangiisartut eqqartuinerminni aalajangerput Ittoqqortoormiini nunaqavissut namminneq aalajangissagaat nunat aqqi qanoq ateqassanersut itisilerlugulu nassuiaapput pingaartillugu nunaqavissut nunaminnik angallavimminnillu atuisut namminneq nunamik atsiisassasut. Siunnersuummik nassiussisoq Ittoqqortoormiini nunaqavissuunngimmat siunnersuut Kangerput imaluunniit Kangikajik itigartissutigineqarpoq.
Nunat Aqqinik Aalajangiisartut aalajangerpaat misissuineq ingerlateqqinneqassasoq Oqaasileriffimmit Ittoqqortoormiinut angalasoqalerpat innuttaasut qanimut tusarniaavigineqarumaartut. Ittoqqortoormiini nunaqavissut qanimut apersorneqarumaarput siunnersuuteqartinneqassallutillu qanoq ateqassanersut.
6. Suliat allat pillugit paasissutissiineq
a. Aatsitassanut Aqutsisoqarfimmit tusarniaaneq
Aatsitassanut Ikummatissanullu Aqutsisoqarfik Qeqertarsuarmi nunaminertat misissuiffissat sumiiffiit marluk taajuutissaanik qinnuteqarnikuupput. Sumiiffiit marluk M-355-mik taaneqartut ima taaguuserneqarput:
Immikkoortoq A:
Misissuiffik Majoqqaa
Efterforskningsområdet Majoqqaa
Exploration area Majoqqaa
Immikkoortoq B:
Misissuiffik Uiffaq
Efterforskningsområdet Uiffaq
Exploration area Uiffaq
b. Thule Air Base-p Pituffik Space Base-mut allanngortinneqarsimanera pillugu saaffiginnissut
Geodatastyrelsenimit saaffiginnissut Nunat Aqqinik Aalajangiisartunut ima ittoq ilisimatitsissutigineqarpoq:
Geodatastyrelsenimit Den Grønlandske Havnelodsimi Thule Air Base-p Pituffik Space Base-nngortinniarlugu Oqaasileriffimmit arlaatigut maluginiagassartaqassanersoq paasiniaapput.
Sakkutooqarfiup aqqa allanngortinneqarpoq nunalli aqqa allanngortinneqarani, taamaattumik atermik allannguineq Nunat Aqqinik Aalajangiisartut akisussaaffiginngilaat. Taamaakkaluartoq nunat aqqisa allattorsimaffianni ateq Thule Air Base peerlugu Pituffik Space Basenngortinneqarpoq. Ulloq pisortatigoortumik akuerineqarfia 6. april 2023 allanneqarpoq tassungalu toqqammaviuvoq nutaarsiassap Forsvaret aqqutigalugu siammarterneqarnerani matumani allassimasoq: https://www.forsvaret.dk/da/nyheder/2023/thule-air-base-har-skiftet-navn-til-pituffik-space-base/ (aaneqarpoq 29. maj 2023).
Qulaani allassimasoq Geodatastyrelsenimut ilisimatitsissutigineqassaaq.
7. Tulliani ataatsimiinnissamik ulluliineq
Saaffiginnissutinik aalajangiiffigisassartalinnik takkuttoqarpat ulluliisoqarumaarpoq.
8. Tamalaat
Savaatillit nunat aqqinik atuinerat misissuiffigalugu aallartinneqarnikuuvoq. Ukioq manna savaatillit festival julimi pisartoq sioqqullugu Savaatillit Peqatigiiffiit Suleqatigiissut-ni ilaasortat attavigineqarumaarput.
Savaatillit ataatsimoornerini nunap assinganik mailikkut imaluuniit pappilissanik immersugassaannik nassinneqarumaarput. Ajornassappat savaateqarfiit immikkut nassiussuiffigineqarumaarput.
Nunat Aqqinik Aalajangiisartut
- Aviâja Rosing Jakobsen (siulittaasoq)
- Kelly Berthelsen (siulittaasup tullia)
- Niels Lorentzen (ilaasortaq)
- Josephine Munch (ilaasortaq)
- Emma Kristensen (ilaasortaq)