Oqaasiliortut 2015 – 7 (gl)

OQAA – 140815 (gl)

Oqaasiliortut ataatsimiinnerat tallimanngorneq, aggustip 14-ianni 2015, nal. 9.30
Oqaasileriffiup ataatsimiittarfiani.

Peqataasut: Carl Chr. Olsen, Stephen Heilmann, Eva Møller Thomassen aamma Karl Møller

Allatsi: Katti Frederiksen

Oqaluuserisat:

1. Naalakkersuisup Nivi Olsenip ataatsimeeqatiginissaanut piareersaatit saqqummiussassarlu pillugit ataatsimiittoqarpoq. Tassani Oqaasiliortunut allattaagallartup Oqaasiliortut sinnerlugit piareersarsimasaa isummerfigineqarpoq ilaatigut naqqissuutissat iluarsineqarlutik.Tassunga tunngatillugu oqallinneq pivoq. Siulittaasup oqaatigaa Oqaasiliortut inatsisaanni malitassap oqaasertaasa ilaat ‘katersussallugit nalunaarsussallugit akuerissallugillu’ immaqa nalilersussallugu pisariaqartoq, tassami nutserisoqarfiit massakkut namminneq suliassaq tamanna namminersuutigisalernikuummassuk.

   Nutserisut isumasioqatigiinnissaaq eqqarsaatigalugu pisariaqarpoq tamatuma erseqqissaaviginissaa, tassunga aamma ilanngullugit taaguusersuutit ordlistit assigisaallu Oqaasileriffik aqqutigalugu Oqaasiliortukkoortinneqartanngitsut, taakkuami kikkut tamarmik atugassaannik akuersisartuusussaammata.

   Ullumikkut Ilinniusiorfik ordboginik suliaqartarpoq kikkut tamarmik atorsinnaasaannik. Tamanna aamma paasinarpoq, taamaattoq oqaatsinik akuerisat atornissaat, allattaatsip atuuttup malittarisassaata atortinniarneqarnerat, assigiimmillu atuisitsinissaq eqqarsaatigalugit pisariaqarpoq erseqqissassallugu Oqaasiliortut taakkununnga akisussaasuusussaammata, naak nalunngikkaluarlugu Ilinniusiorfik aamma ilinniusiortussaasoq. Taamaattumik suleqatigiinnissaq pisariaqarpoq, Oqaasileriffiullu Ilinniusiorfik ataatsimeeqatigileruniuk tamakkua aamma oqaluuserisassanut qitiujumaartut KF-ip ilisimatitsissutigaa.
   Assersuutigalugu ullumikkut piginnaatitaaffiit atorneqartarpoq naak pisinnaatitaaffik pineqartoq. Ordbogimi allassimanera malillugu kukkusumik inuit atuilerput, tassa siunissami tamanna pinngitsoorniagassaq ordbogit nutartertuartarnerisigut.

   Kalaallit oqaasiiisa inissisimanerat eqqarsaatigalugu makku aamma eqqaasariaqarput nipangiunnaveersaarneqassallutillu: allagartalersuisarneq aamma tusagassiutini oqaatsitta atorneqarnerat. Oqaasiliortut isumaqarput tusagassiortut oqaatsinik atuinerat, aamma tusagassiortunngorniat kalaallisut piginnaasaasa qaffassarneqartarnissaat immikkut qanoq iliuuseqarfigineqartariaqartut.

2. Allat
   Ataatsimiinneq iluatsillugu saaffiginnissuti tmakkua eqqartorneqarput:
   a) Talent pillugu saaffiginnissut
   Saaffiginnissut akineqareerpoq oqaaseq ‘kakkaffigaajuk’ atorneqarluni.
   b) Sikkerchat.gl-ip kalaallisoortassaa
   Oqaasiliortut siunnersuutissaqassagunik allattaagallartumut nalunaaqquneqarput
   c) Psykologisk Klinik Psykologeqarfimmik taaneqaannarsinnaanissaa
   Psykolog oqaasersiatut atoreermat taamatut taaneqarnissaa isoriniagassartaqartinngilaat.

Inussiarnersumik inuulluaqqusilluta

Carl Chr. Olsen Katti Frederiksen

Siulittaasoq Allatsi