Oqaasiliortut ataatsimiinnerat pingasunngorneq, novembarip 21-ianni 2012, nal. 10.00 Oqaasileriffimmi.
Peqataasut: Carl Chr. Olsen, Stephen Heilmann, Karl Møller aamma Katti Frederiksen.
Napparsimalluni peqataanngilaq: Lotte Holm
Eva M.Thomassen angalammat sinniisoq peqataavoq.
Allatsi: Katti Frederiksen
Oqaluuserisat:
- Tikilluaqqusineq aamma ilisimatitsissutit
Oqaluuserisassat taamaatillugit akuerineqarput, ilassutigaluguli eqqartuussivimmi nutserisuunerup Rosa Reimarip ataatsimeeqatigisimaneranit ilisimatitsissutissat eqqartugassallu. Taakkua oqaluuserisassatut kingullertut inissinneqarput.Siulittaasoq tikilluaqqusisoqarpoq, ilisimatitsissutigalugulu ORDBOGEN nutaamik kalaallisut ateqalerluni saqqummilermat, tassalu OQAASERSIUUT. Naqeqqinneqalernerani Oqaasiliortut oqaatsit akuerisaat ilanngunneqarsimasut aamma oqaatigaa.
- Kingullermik ataatsimiinnermit imaqarniliap akuerineqarnera
Taamaatillugu akuerineqarpoq. - Saaffiginnissutit:
a) bekymringsbarometer kalaallisut taaguuserneqarpoq
ernumanassutsimut uuttuut
b) e-bogip taaguutaanut qisuariaat.
Taaguutaata akuerisap allanngortinneqarani atuinnarneqarnissaa aalajangiusimaneqaannarpoq: atuagaq qarasaasiarmiu. Aniatinneqassappat tassaaliinnassaaq atuagaq qarasaasiameersoq, kisianni e-bogip isumaanut, tassalu sukkulluunniit aaneqarsinnaasuuneranut naapertuuttumik taaguuteqarnera naqissuserneqaannarpoq, soorluttaarmi aamma atuakkiamik oqartartugut naak immaqa suli atuaganngortinneqarluni naqinneqanngikkaluartoq. E-bogip tamanna pissuseqatigiinnaraa Oqaasiliortut isumaqatigiissutigaat.c) ‘stævning’ kalaallisut suliassanngortitsissut imalt. aqqeqqusissut?
Taaguut stævning eqqartuussisoqassatillugu aggeqqusisoqartarneranut, aammali inatsisitigut suliassanngortitsisoqarneranut tunngassuteqarpoq. Oqaasiliortut isumaqarput eqqartuussisarneq pillugu aammalu pinerluttulerinermut inatsit pillugit nalilersuisoqalernerani taaguut matumani pineqartoq aamma ilanngunneqarumaartoq.
Eqqartuussiveqarnermut tunngasut taaguutit pillugit oqaluuserisassat immikkoortoq 4-mi qupp.3-mi tikinneqaqqipput.d) sundhedsforsikring kalaallisut taaguutigilerpaa
nakorsarneqarsinnaanissamut sillimmasiineq
e) App-simut qisuariaat.
Oqaasiliortut kingullermik ataatsimiinnerannit aalajangiunneqarpoq app/apps kalaallisut aaneqarsinnaasunik taaneqassasut. Tamanna taaguut pillugu qisuariartoqarpoq app/appsit suusinnaanerinik aamma nassuiaalluni, taaguullu tamakkiisuunnginnerarlugu. Taamatut qisuariaat paasillugu, aammali app/appsit maanna allanngortinnagu amerlasuunit atugaalereernera pillugu internationaliusumik taaguinnarnissaa aalajangiunneqarpoq, imaattussanngorlugu: app, qasseersiutinngorlugu app-it.f) legat kalaallisut taperneqaat. Taakkua suusinnaappulluunniit; aningaasat, najugaqarnermut/nerisaqarnermut/angalanermut taperneqaatit il.il.
g) fotosyntese kalaallisut oqaasersiatut atorneqarsinnaavoq ima nassuiaaserlugu: qaamanikkut pilersoqarneq
h) ualimut/ualeru, unnummut/unnugu
isumaasa assigiinnginnerat pillugu Oqaasiliortut siunnersuipput KNR-ikkut aallakaatitassanik nassuiaalluni ilisimatitsinikkulluunniit ualeru atorneqartassasoq, assersuutigalugu: ualeru nalunaaqutaq pingasunut aallakaatinneqassaaq: X.X.
Taamatut nalunaaquttamik aalajangersimasumik taasaqarnermi piffissami killiligaasumi aallakaatitsisoqarnissaanik ilisimatitsinermi ualeru imaluunniit unnugu atorneqassapput, assersuutigalugu unnugu radioaviseqareerpat aallakaatinneqassaaq x.x.Ilanngullugu saaffiginnittumut nassiunneqassaaq ullumi/ullumikkut pillugit Oqaasileriffimmit akissusiaq.
i) droner kalaallisut timmisartoq inuttaqanngitsoq.
j) qusii oqaaseq tunumiusoortuuvoq Villads Villadsenip tunumi inuusuttuullunilu najugaqarnikup taalliamini ilaatillugu allataa. Tassani taalliortutut kiffaanngissutsi atorlugu sumiorpaluummik ilanngussisimavoq, kitaamiusut isumaqartoq naaja.
k) ersarissoq – ersagissoq
Oqaatsit assiigiinngitsuupput marluk. Siulleq ersarissoq tassaavoq paasiuminartoq, erseqqissoq silamut tunngatillugu atorneqaraangami silap isiginiarnerani akornutissartaqanngitsutut paasineqartarpoq. Ersagissoq taakkununnga attuumassuteqanngilaq kiinnami ulussat ataatungaannut kigutit inissisimaffiisa nalaannut taaguutaammat.l) katitarpoq oqaasiunngilaq immikkut isumalik.
m) æggeur, teæg aamma planet kalaallisut ima taaguuserneqarput:
æggeur – minutsilersuut
teæg – misutsissut
planet – planetn) heldagsskole kalaallisut ulloq isukkaarlugu atuarfik.
o) simultan tosprogethed il.il.
Oqaasilerisunit siunnersuusiorfigineqassapput, taakkununnga assingusut Oqaatsinut politikkissamut nassuiaammiittut ilanngunneqarumaarput, ilaatigut makkuusut:
individuel tosproget – marlunnik oqaasilik (inuk ataaseq)
balanceret tosproget – oqimaaqatigiissumik marlunnik oqaasilik
domineret tosproget – illuinnarmik marlunnik oqaasilik
naturligt tosproget – pissusissamisut marlunnik oqaasilikp) halvkonserves – asiunaveersakkat matoqqittakkat
- Eqqartuussiveqarnermi taaguutit
Oqaasileriffik eqqartuussivimmi nutserisuuneq peqatigalugu ataatsimeeqateqareerneranni Oqaasiliortut suleqatiserineqarput ataatsimiititaliornissamik. Tassani eqqartuussisarnermi pinerluttulerinermilu inatsisit misissoqqissaarneqarlutik kalaallisut allassimaneri taaguutillu atugaasut nalilersoqqissaarneqassapput. Suleqatigiissitaq Oqaasiliortunit Oqaasileriffimmilu atorfilinnit (CCO aamma KF), eqqartuussivimmi nutserisunik, inatsisilerituumit pisariaqarpallu aamma eqqartuussisumik illersuisumilluunniit ilaqarluni suliarineqassaaq. Tamatumunnga Rigsombud saaffigineqassaaq, aningaasatigullu tapeeqataasinnaanissaanik tusarniaaffigalugu.
Suliassaq manna aalajangiunneqartoq siulittaasup Naalakkersuisumik Mimi Karlsenimik ataatsimeeqateqaleruni eqqaassallugu neriorsuivoq. - Allat
Hovedordklassinut taaguutit aammalu marluinnik oqaasillit pillugit taaguutit assigiinngitsut oqaasilerisunit eqqartorneqariarlutik taaguuserneqassasut Oqaasiliortut isumaqatigiipput, piareerpatalu akuerineqartussatut Oqaasiliortunut ingerlateqqiinnarlugit.
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi