Suliassat
Nunat Aqqinik Aalajangiisartut suliassaraat Kalaallit Nunaanni nunat aqqinik katersineq, nalunaarsuineq atortussanngortitsinerlu, tamatumanili ilaanngillat aqquserngit sumiiffiilluunniit aqqi.
Aammattaaq suliassaraat pisortanik innuttaasunillu Kalaallit Nunaanniittunik nunat aqqi pillugit siunnersuisarnissaq.
Kiisalu ataatsimiititaliap suliassaanut ilaavoq suliffeqarfinnik inunnillu ataasiakkaanik, taaguutinik atortussanngortinneqarsimasunik nassitsisunik imaluunniit nunat aqqinik kalaallisuunik inassuteqartunik, suleqateqassalluni.
Nunat aqqinik atortussanngortitsinermi tunngavissat
- Aqqit kalaallisut qangali aterititat akuerineqassapput.
- Nunat aqqi kinguaariinni nutaanik taarserneqarsimagaangata tamanit atorneqalersimaneri tunngavigalugit atortussanngortinneqartassapput.
- Atissatut siunnersuutit kalaallisuujunngitsut tunngaveqarluarpata aatsaat atsiunneqartassapput.
- Inuit suli inuusut immikkut pissutissaqarluni aatsaat atsiunneqartassapput.
- Suliffeqarfiit immikkut pissutissaqarluni aatsaat atsiunneqarsinnaapput.
- Nunat aqqi kommuneqarfiit iluini atugaasut aalajangiinissami tunngaviussapput.
Atissatut siunnersuutit uku tunngavigalugit akuerineqarsinnaassanngillat
- allanut paarlaanneqarsinnaagunik
- sumiissusiat erseqqissumik nalunaarsimanngippat,
- Kalaallit Nunaannut attuumassuteqanngippata. Taamaattoq piumasaqaatit naammassineqarpata akuerineqarsinnaassapput,
- atsiinermi sumiorpaluutinut tunngasuni Oqaasiliortut aalajangigaat malinneqassapput.
MALUGIUK: Illoqarfiit iluini inuit suliaannut atsersuutit atugaasut kommunalbestyrelsit oqartussaaffigaat.
Ilaasortat
- Aviaaja Rosing Jakobsen (siulittaasoq)
- Niels Lorentzen (siulittaasup tullia)
- Johannes Rosing
- Eva Mätzler
- Ono Fleischer
Nunat Aqqinik Aalajangiisartut tallimanik ilaasortaqarput ukiuni sisamani atuuttussatut toqqarneqartartunik.