Grønlands Sprogsekretariat

Nunat Aqqinik Aalajangiisartut 2001 – 1 (gl)

NAA – 110901 (gl)

Nunat Aqqinik Aalajangiisartut marlunngornermi septembarip ulluisa aqqarnanni 2001, nal. 09.00 ataatsimiinerannit imaqarniliaq

Peqataasut: Miilu Lars Lund, Mariane Petersen, Alibak Steenholdt, Carl Chr. Olsen, allatsigalugu Kristine Olsvig. Emanuel Rosing peqataanngilaq.

Oqaluuserisat:

  1. Oqaluuserisassat qulequtaannik akuersineq.

  2. Kingullermik ataatsimiinerup imaqarniliornerata akuerisassanngorlugu saqqummiunnera.

  3. Kap Windstedt (nangitaq).
  4. Nunatsinni illoqarfiit nunaqarfiillu aqqisa nalunaarsorneqarnerat (nangitaq).
  5. Nunap immikkoortui.
  6. Kangerlussuarmi nunat aqqi aamma aqqusinernik allagartalersuineq.
  7. Taasariaqartut allat.

– 1 pillugu –

Oqaluuserisassat qulequtaat akuerineqarput.

– 2 pillugu –

Imaqarniliaq akuerineqarpoq.

– 3 pillugu –

MLL.: Katersugaasivimmit siunnersuutigineqartoq Kap Windstedt itigartitsissutigisariaqarpoq, nunap pineqartup atitoqaa atortittariaqarmat.

CCO.: Katersugaasivimmiut nalunaarfigineqartariaqarput atitoqqat ataqqillugit atussagaat.

MP.: Siunnersuuteqartut nalunaarfigineqarsinnaapput suliartik kisiat Kap Windstedt-imik atsissagaat.

MLL.: Nunap Aqqi Ammaartalik Pullassuaq-llu erseqqissaavigalugit aalajangiunnerat allakkiarineqassaaq.

Qupp. 2

– 4 pillugu –

MLL.: Nunatsinni illoqarfiit nunaqarfiillu aqqisa nalunaarsorneqarnerata nutarterneqarnera KNR-imi sulisunut nalunaarutigineqassaaq.

CCO.: Danmarkimi pisortat ilanngullugit nalunaarfigineqartariaqarput pisortatigoortumik “Ittoqqortoormiit”-mik taasisarneq kukkunerusoq, eqqortumillu taaguutaa ilisimatitsissutigalugu.

Kommuneqarfiit pillugit taaseriaatsit eqqarsaatigalugit siunnersuutigaa taaguut kommuneqarfik illoqarfiit aqqinut siullinngorlugu inissinneqassasoq, taamaalilluni illoqarfiit aqqi erseqqissumik uiguuserneqaratillu taaneqartalissammata. Maannamut taaseriaaseq, assersuutigalugu: Nuup Kommunia, nunani allamiut paasiuminaatsittarpaat Nuuk-mik imaluunniit Nuup-mik illoqarfik ateqarnersoq. Tamanna paatsuungassut qaangerneqarsinnaavoq taaguut kommuneqarfik siullinngortinneqarpat, assersuutigalugu: Kommuneqarfik Nuuk. Siunnersuut akuerineqarpat atortussanngortinneqarnissaa ukiunik marlunnik sioqqutsilluni pisortanut inuiaqatigiinnullu ilisimatitsissutaareersinnaavoq.

MLL.: Atitoqqat ataqqineqartussaapput, atissatut siunnersuutit nutaat isumaqatigiinniutaasussaapput. Sungiussiinnarsimaneq tunngavigalugu atortussanngortitsisarneq tunngavissaananilu akuersaagassaanngilaq.

AS.: Ukiulluunniit arlallit qaangiussimagaluarpata, kukkusumik aternik atuisut uppernarsarneqarsinnaasut uparuarneqartariaqarput.

– 5 pillugu –

MLL.: Tunumiut “tunumiutut” taaneqartarnerminnut assuarinninnerat Nunat Aqqinik Aalajangiisartunit qanoq iliuuseqarfigineqassava?

MP.: Ataatsimiinnerni Nunat Aqqinik Aalajangiisartut arlaleriarlutik tamanna eqqartortarpaat unalu aalajangiussimallugu, qangarsuarli nunap immikkoortua Tunu-mik taaneqartartoq, taamaattumillu inui Tunumiut-nik taaneqartartut.

Qupp. 3

CCO.: Tunumiut pisortaat aperineqartariaqarput tumumiunik taaneqartarnertik namminneq qanoq isumaqarfigineraat. Tamatuma kingorna Nunat Aqqinik Aalajangiisartut taaguut naliliiffigiumaarpaat.

AS.: Tunumiutut taaneqartarnertik ajuallannartutut isumaqarfigissappassuk tupinnarpoq. Taaguut qangarsuarli atuuppoq. Ajuallatsitsiniutitut pinnani nunap aggorneranut taaguutaavoq.

MP.: Eqqaamasat malillugit siornatigut kommunalbestyrelse naammagittaalliummik Nunat Aqqinik Aalajangiisartunut apuussaqarpoq. Kingornali ima pisoqaqqinngimmat pitsaanerutippaa pisoq nipangiutiinnaraanni.

CCO.: Taaguummut assuarinnittut ilumoorullugu assuarinnikkunik allakkatigut tunngavilersorluakkamik saaffiginnittariaqarput.

– 6 pillugu –

CCO.: Kangerlussuaq sakkutooqarfiujunnaarmat amerikamiut taaguusersuutaat atorunnaarlugit qanga aqqit uterteqqinneqarsinnaanerat atortinniarlugu Sisimiut kommunianut allakkatigut siunnersuumi siunertarineqarpoq. Atitoqqat atortilernissaat piinnarnagu aamma aqqusinerni allagartat Kangerlussuarmi kalaallisoortaqanngivissormata, tamakku pissutsit iluarsisariaqarput.

MP.: Sisimiut kommunianut saaffiginnissuteqarnissaq ilalersorpaa.

AS.: Nunat Aqqinik Aalajangiisartut malittarisassaanni allassimavoq: “-aqqusernit illoqannginnersallu kisiisa pinnagit” aternik aalajangersaasinnaasut. Taamaattumik Kangerlussuup iluani pissutsit Nunat Aqqinik Aalajangiisartut akuliuffigisinnaanngilaat. Malittarisassami aamma allassimavoq: “-pisortat nunat aqqi pillugit ilitsersortassallugit”. Taanna tunngavigalugu Nunaqarfimmi Aqutsisut eqqartukkamut aalajangiisussatut siunnersussallugit qaninnerpaapput. Kristoffer Heilmanniugaluup suliai aamma matumani utaqqeqqaartariaqarsorai.

Siunnersuutitut allakkiami oqaatsit atorneqartut pisortaqarfimmut saqqummiutissallugit sualuppallaaqaat. Allakkat taakku akuerineqarlutik nassiunneqassappata oqaasertaasa ilaat allangorteqqaartariaqarput.

Qupp. 4

CCO.: Malittarisassami illoqannginnersat aqqusernillu pineqarmata, siunnersuusiaq Sisimiut Kommunianut allagaavoq. Kangerlussuaq sakkutooqarfiujunnaareeraluartoq atitoqqat ataqqinngivillugit maannamut amerikamiut atsiussaat atorneqarput. Nunat Aqqinik Aalajangiisartut malittarisassaat § 1 erseqqissarlugu allakkamut ilanngunneqassaaq, nuutsinneralu Kangerlussuarmi Nunaqarfimmi Aqutsisunut ingerlatinneqassalluni. Toqqaannartumik Kangerlussuarmi Nunaqarfimmi Aqutsisunut siunnersuutip nassiunneqannginnissaa peqquteqarpoq aamma takornariaqarnermik sullissisut matumani ilisimatinneqarnissaat eqqarsaatigineqarmat, taamaattumik saaffiginnissut Sisimiut kommunianut ingerlaqqaartariaqarpoq.

Kristoffer Heilmanniugaluup suliaanut tunngatillugu ilisimavaa suliat taakku Sisimiut kommunianut oqqunneqarsimasut, tamatumali kingorna ilisimaneqanngilaq suliat taakku suneqassanersut.

MP.: Siunnersuut suleqatiginnikkusussusermik nipilimmik “assammik isaassinertullusooq” isigalugu naleqquppoq. Taamaallaat oqaasertaasa ilaat AS-ip CCO-illu peqatigiillutik aaqqissuutissavaat, kingornalu siunnersuut nassiunneqassaaq.

MLL.: Nuuk illoqarfittut sanaartorfigineqarnerata tiffarteraluttuinnarnera eqqarsaatigalugu Nuup kommunia aamma taamak ittumik siunnersuummik saaffigissallugu piukkunnarpoq, assersuutigalugu atitoqqanik nalunaarsuinikkut kommunimit najoqqutarineqarsinnaasumik.

MP.: Nuup kommunianut siunnersuutissaq immikkut eqqartugassaassaaq, taamaattumik siunnersuutigaa tullianik ataatsimiinnissamut immikkut eqqartugassatut qulequtassanut ilanngunneqassasoq.

Ataatsimiinnissaq tulleq qaqugu piumaarnersoq erseqqinnerusumik kingusinnerusukkut nalunaarutigineqassaaq.

Miilu Lars Lund Kristine Olsvig

Siulittaasoq Allatsi