Grønlands Sprogsekretariat

Oqaasiliortut 2001 – 9 (gl)

OQAA – 031001 (gl)

Oqaasiliortut marlunngornermi oktobarip ulluisa pingajuanni
2001, nal. 09.00 ataatsimiinnerannit imaqarniliaq

 

Peqataasut: Carl Chr. Olsen, Nuka Møller, Alibak Steenholdt, Sofia Geisler, Kelly Berthelsen, allatsigalugu Kristine Olsvig.

Oqaluuserisat:

  1. Oqaluuserisassat qulequtaannik akuersineq.
  2. Aggustip ulluisa 24-anni ataatsimiinnerup imaqarniliornerata akuerisassanngorlugu saqqummiunnera.
  3. Ilisimatitsissutit.
  4. Sinerissamut Aqutsivik.
  5. Qulliarneq.
  6. Security-check.
  7. Maalaneq imaluunniit naammagittaanneq. Jakob Schultzip saaffiginnissutaa.
  8. Ilinniarnertuunngorniarfimmut isersinnaanermut piumasaqaat.
  9. Taasariaqartut allat.

– 1 pillugu –

Oqaluuserisassat arfineq pingajuattut, Ilinniarnertuunngorniarfimmut isersinnaanermut piumasaqaammut tunngasoq ilanngunneqareermat, oqaluuserisassat akuerineqarput.

– 2 pillugu –

Imaqarniliaq akuerineqarpoq.

– 3 pillugu –

CCO.: Oqaatsinut politikkeqalernissamut innersuussusiaq sapaatip akunnerata uuma tulliani Naalakkersuisumut tunniunneqassaaq, tamatumalu kingorna Inatsisartunut agguaanneqassalluni.

CCO.: Karl Asser Møllerip Atuagagdliutinut allagarisimasaa Naalakkersuisup isumaanik tusarniaareernerup kingorna CCO-imit akissusiorneqassaaq.

CCO.: Nunat Avannaamioqatigiit oqaatsit pillugit ataatsimeersuarnerannit taamatullu Sprogpolitisk referencegruppemødemit imaqarniliornerit Oqaasiliortunut ilisimatitsissutitut agguaanneqassapput.

CCO.: Mittarfeqarfinni oqaatsit atugaanerat pillugit CCO Mittarfeqarfiit sulisoqarnermut pisortaannut paasiniaanermigut paasitinneqarpoq isumannaallisaaneq eqqarsaatigalugu napasulianiit timmisartunut attaveqarnermi pinngitsoorani oqaatsit paaseqatigiissutigineqartussat atorneqarnissaat nalinginnaasoq, allatigulli sulisut kalaallisut oqalussinnaanerat killilersorneqanngitsoq. Taamaakkaluartoq Konstabel Pynt mittarfinnut allanut naleqqiullugu immikkooruteqarluinnarmat immikkut isigisariaqarnera pinerullugu qallunaatut oqaatsit pingaaruteqarluinnarnerat erseqqissaatigineqarpoq.

SG.: Radiukkut saqqummiunneqarnerani ima paasinarpoq, sulisut arlaata naammagittaalliutigigaa kaffisortarfimmiitillutilluunniit kalaallisut oqalutsillutik qallunaamik isertoqarpat pinngitsooratik qallunaatut oqalunnissaminnik piumaffigineqarsimasut. Kingorna Mittarfeqarfiit pisortaqarfiannit naammagittaalliutaasoq pinnagu napasuliamiit qallunaatuinnaq oqaluttarnissaq eqqartorpaat oqallinnerlu kipiinnakkatut killilerneqariasaarluni.

CCO.: Oqaasileriffiup nalinginnaasumik ingerlanneqarneranut aningaasatigut 10-15% missiliorlugit sippuinissaq naatsorsuutigineqarpoq. Tamanna aningaasaliissutaasartut ikippallaarneranik pissuteqarpoq. Taamaakkaluartoq ingerlatat allat soorlu oqaatsinut politikkiliornissamut suleqatigiissitamut aningaasaliissutit taamatullu leksikografisk projektimut aningaasaliissutit sinneqartoorfiupput. Naatsorsuutit Per Langgård peqatigalugu aaqqissuunneqassapput, pisariaqassappallu ikililerisoqartariaqassaaq.

NM.: Nunanut allanut allattoqarfik Nunavut-miit saaffigineqarsimavoq, tassani kalaallisut allagaatit assigiinngitsut pigineqartut piumasarineqarsimallutik. Nunavut-mi oqaatsinut tunngasunik suliaqartut kalaallisut allattaaseq aallaavigalugu allattaasissaminnik pilersitsiniarnerminnut atugassaminnik suleqatiserinnillutik kissaateqarput.

CCO.: Saaffiginnissut taanna ilisimavaa, isumaqarlunili Inuit Issittormiut Kattuffiata oqaatsinut tunngasumik ataatsimiititaliaa tusarniaaffigeqqaartariaqartoq. Tamatuma kingorna Nunavut-mi aammalu nunatsinni Oqaasiliortunut qanoq aaqqiisoqarsimaneranik tusarliunneqassaaq.

– 4 pillugu –

CCO.: Sulisussarsiornermik allagartaliussassamut kukkunersiuinermini nalaatsornerinnarmik naammattoorpaa pisaq “Sinerissami Aqutsisut”-tut taaguuserneqarsimasoq.

SG.: Pineqartoq erseqqissarneqartariaqarpoq. Sinerissami Aqutsivik-tut taaguuserneqarpat pinngitsoorani apeqquserneqassaaq sumut aqutsiviunersoq. Peqqinnissaqarfiup iluani sorpassuit ingerlanneqartarput soorlu, kigutileriffiit, utoqqarnik meeraaqqanillu takusaasartut, juumuut laborantit il.il.

AS.: Oqaaseq sinerissami taaguummi ilaasariaqanngilaq.

NM.: Qallunaatut taaguutaa kystledelsen aamma erseqqinngilaq.

KB.: Napparsimaveqarfiit paasinnittaaseq malillugu sorpassuarnik imaqartinneqartarpoq, taamaattumik siunnersuut taanna pisamut tulluarneruvoq.

Oqaasiliortut isumaqatigiillutik aalajangiuppaat pisaq Napparsimaveqarfinnik Aqutsivik-tut taaguuteqassasoq.

– 5 pillugu –

CCO.: Uumasut nakorsaanit allakkiaq najoqqutaralugu uumasut kukiffaat nappaammit attorneqarneq ajorput, taamaallaalli kukiffaasa akorni seerilersarput. Seerisoorneq uumasut timaannut nappaatitut ersiutitut tamanut atuummat, siunnersuutigaa qulliarneq-mut taarsiullugu nappaat seerisoorneq-mik taaguuserneqassasoq.

KB.: Seerinerunngilaq pullattoornerullunili. Nappaatip ersiutigisartagai tunngavigalugit qulliarneq nuffiorneq-lluunniit taaguutigitissallugit tulluutinngillat.

SG.: Seerinermit aallaavilimmik nappaatip taaguuserneqarnissaa ornigineruaa. Aamma seerisoornerup saniatigut ersiutit ilagaat uumasut qarnganit qappiorneq, seerisoornerli annertunerusumik nappaammi ersiutaanerpaavoq.

Oqaasiliortut isumaqatigiillutik aalajangerpaat uumasut nappaataat mund og klovsyge seerisoorneq-mik taaguuteqassasoq, taannalu aalajangerneq tusagassiutinut Otto Steenholdtimullu allakkatigut nalunaarutigineqassasoq, tassungalu ilanngullugu uumasut nakorsaata allagaata nuutsinneqarnera nassiunneqassalluni.

– 6 pillugu –

CCO.: Security-check Nuup Mittarfiani taamatullu Narsarsuup Mittarfiani nalinginnaasumik inuit ikiartoqquneqarneranni taaguutigineqarpoq. Kangerlussuulli Mittarfiani allagartaliussaq ima allassimalluni “Isumannaallisaavik”.

Oqaasiliortut isumaqatigiillutik aallajangerpaat security-check isumannaarsaavik-mik taaguuserneqassasoq, tassani inuit ilaasussat ulorianartorsiortitsisinnaanerannut isumannarunnaarlugit misissorneqartarmata.

– 7 pillugu –

SG.: Jakob Schultz allaffigineqassaaq oqaluttuunneqarlunilu 1999-imi maalaarneq pillugu Oqaasiliortut qanoq aalajangiisimanerannik ilisimatitsissummik. Ilanngullugu erseqqissaavigineqassaaq maalaartarfik tassaammat aalajangiiffigisassanik suliaqarfik naammagittaalliorneq-lli kimilluunniit sumiluunniit qaqugukkulluunniit inuit akunneranni atorneqartartoq. Oqaatsit taakku pillugit taamanikkut ataatsimiinnermit imaqarniliami tunngavilersuutaasut takuneqarsinnaapput.

– 8 pillugu –

CCO.: KIIIP-imit Gitte Hertling Inatsisartut peqqussutaanni, normu 2-mi, maajip 31-ianni 2001-imeersumi, paragrafip siulliup immikkoortuata aappaanni, normu 1-ip kalaallisut allassimanera erseqqinngimmat saaffiginnissutigisimavaa. Taanna tunngavigalugu CCO siunnersuusiorpoq “qinnuteqartut ilinniarnertuunngorniarfimmi atuarsimanissaat imaluunniit ilinniakkamik tassunga assingusumik ilinniarsimanissaat”-tut allassimanera imatut iluarsineqassasoq: “qinnuteqartoq ilinniarnertuunngorniarfimmi soraarummeerummik tassungaluunniit naapertuuttumik naammassinnissimassasoq”.

Siunnersuut Oqaasiliortunit tamanit taperserneqarpoq.

– 9 pillugu –

KB.: Oqaatsinut politikkeqalernissamut inassusiaq Inatsisartunit oqaluuserineqalerpat ilimanarluinnarpoq Oqaasiliortut kukkunersiuisutut aasiit paasineqarnissaat.

CCO.: Pilersaarutaavoq inassusiaq saqqummiunneqareerpat kultureqarnermut ilinniartitaanermullu ataatsimiititaliaq aggersarneqassasoq. Tamanna qaqugu pissanersoq sapaatip akunnerata tulliata ingerlanerani paasinarsissaaq.

SG.: Assigiinngitsorpassuit akulerunneqalernissaat pinaveersimatinniarlugit pissusissamisoorsoraa Inatsisartunut saqqummiunneqarnissaa sioqqullugu ataatsimiititaliap Oqaasiliortunit ataatsimeeqatigineqarnissaa.

AS.: Oqaasileriffik, Oqaasiliortut aammalu oqaatsinut politikkeqalernissamut suleqatigiissitat suliaasa assigiinngissutaat erseqqissarlugit immikkoortinneqarnissaat pingaaruteqarluinnarpoq.

CCO.: Immikkoortukkuutaat assigiinngissuteqaraluartut arlaatigut imminnut kalluarneqartuartarmata siulittaasutut pingaartippaa Oqaasiliortunut killiffiit assigiinngitsut ilisimatitsissutigiuarnissaat.

 

Carl Chr. Olsen Kristine Olsvig

Siulittaasoq Allatsi