Grønlands Sprogsekretariat

Oqaasiliortut 2003 – 3 (gl)

OQAA – 311003 (gl)

Oqaasiliortut oktoberip 31.-anni 2003, nal. 10.00 Oqaasileriffimmi ataatsimiinnerannit imaqarniliaq.

 

Peqataasut: Carl Chr. Olsen, Stephen Heilmann, Nuka Møller, Ellen Jensen

Allatsigalugu: Pia N. Knudsen.

 

Oqaluuserisassat:

  1. Ilisimatitsissutit
    1. Sprogteknologi pillugu ataatsimiinneq (EJ)
    2. Ole Gresenip oqaatsinik miniparløriliaa
  2. Kingullermik ataatsimiinnermit imaqarniliap akuerisassanngorlugu saqqummiunnera
  3. Inuit Aqqinik Akuersisartut ingerlatilernissaannut piareersaatit
  4. Allagartalersuineq pillugu ataatsimiititsinissaq – januar 2004?
  5. Oqaatsit isummerfigisassat:
    1. Fortrydelsespille
    2. –allat?
  6. KIIIP-imeersut ataatsimeeqatiginissaat
  7. Taasariaqartut allat

-1 pillugu-

1. EJ: EJ sprogteknologi pillugu ataatsimiinnermi peqataanermini paasisimavaa sprogteknologi ulluinnarni atugaasorujussuusoq.

Nunani avannarlerni allaniittut teknikkikkut siuarsimanerunerat takusinnaallugu EJ oqarpoq.

Nunani avannarlerni Oqaasiliortut tamarmik immikkut programminik assigiinngitsunik atugaqarlutik (oqaatsinik katersinermi) sulimmata suleqatigiinniarneq ajornakusoortartoq EJ-p oqaatigaa.

Per Langgårdip Oqaasileriffimmi atorfillip EJ nassuiaassimavaa januarimi 2004-mi Oqaasileriffiup Windows atorunnaarlugu Linux Corpus oqaatsinik katersinermi atulissagaa.

CCO: Programmi Oqaasileriffimmi sulisup Lisathe Møllerip ilinniariartorlugu maannakkorpiaq Finlandimiipoq novembarillu arfernanni maanga utissaaq.

2. CCO: Ole Greisen mappersakkamik qallunaatuumiit kalaallisuunngortitsilluni siutinut qinngamullu tunngasumik suliaqarsimavoq. Mappersagaq nakorsanut tamakkuninnga sulialinnut tunnganerusoq Ole Greisen CCO-p oqaloqatiginerani nassiuiaanikuuvoq.

CCO-p Ole Greisen oqaatsinik tapertariinnissaq anguniarlugu suleqatiserigaluarpaa iluatsinngutsumilli. Ole Greisenip mappersakkap naqiterneqarnissaa akornusersorusunnagu suliarinikuusani allanngortikkusunngikkai CCO oqarpoq.

CCO-p Maibrit Andersen mappersagaliornissaq pillugu Oqaasileriffimmut saaffiginnimmat saaffiginnissutaanut akissummik allaffiginikuuaa.

-2 pillugu-

NM: Quppernermi siullermi ”ilaasortanngorqqinneranut” naqinnerliugaq naqqippaa. –Iluarsineqarpoq.

SH: Quppernermi kingullermi ”udenrigsministeriet” udenrigskontoriusoq oqaatigaa.- Iluarsineqarpoq.

Imaqarniliaq akuerineqarpoq.

-3 pillugu-

CCO: Inuit Aqqinik Akuersisartut Oqaasileriffimmut nuunneqarnissaa 1. november 2003 siunertarineqarpoq.

Allagaatit tamarmik Oqaasileriffimmut nuunneqarnissaat siunertaavoq. Allakkallu aqqinut tunngasut Oqaasileriffimmut ingerlasalereerput.

Inuit Aqqinik Akuersisartut Oqaasileriffimmi ataatsimiittalissapput oqarasuaataannakkut akuersisarneq atorunnaarluni.

Morten Selejer KIIIP-mi inatsisilerituup ankeinstanseqalernissaq anguniarlugu suliaq ingerlappaa.

Oqaasileriffimmit pilersaarutaavoq inuit aqqinik nalunaarsuiffimmik suliaqarnissaq aqqinik akuerisanik, akuerisaanngitsunik aammalu qinnuteqaatigineqarnikunik imalimmik. Inuit Aqqinik Akuersisartut takussutissamik tigoriaannarmik peqalernissaat tassani siunertarineqarpoq.

Pilersaarutit:

  1. Nalunaarsuutit
  2. Europamiut aqqi
  3. Europamiut aqqi kalaalerpaluttut

Kirkeministeriamit bekendtgørelsit pisalernissaat, aamma pioreersut pineqarnissaat

CCO: Europamiut aqqi isummerfigiuminaatsut utaqqiisaasumik aalajangersaaffigineqarnikuupput, tassa Palasinit akuerineqarsinnaallutik.

-4 pillugu-

CCO: Allagartalersuineq pillugu ataatsimiititsinissaq januarip naalernerani 2004-mi pisinnaappat ajussanngikkaluartoq CCO-p oqaatigaa.

Ingerlanneqartussaq Isumattoqatigiinneq-mik taallugu ingerlanneqassasoq Oqaasiliortunit aalajangerneqapoq.

Isumattoqatigiinnermi pinngaarnertut sammineqassapput allagartalersuinermi allattaatsit, qanoq ililluni kikkunnit tamanit paasineqarsinnaasunik allassinnaanermik siunnersoqatigiinneq il.il.

Isumattoqatigiinnermi suliffeqarfiit inunnik kikkunnilluunniit sullissisut peqataatitaqarnissaat siunertarineqarpoq.

Peqataatitaqartussatut allaffigisassat:

RAL, Nukissiorfiit, Namminersornerullutik Oqartussat,RG,Tele, Napparsimaviit, Tusagassiorfiit, Aningaaseriviit, Air Greenland, AULK, KANUKOKA, Nutserisoqarfik, Statsministerip nutserisui, NO…

Suliffeqarfinnut allagaqarnissaq sapaatip akunnerata tulliani pissasoq CCO-p oqaatigaa.

Isumattoqatigiinnermi ullut pingasut atorneqarnissaat Nuummiinnissaalu naatsorsuutigineqarpoq.

Oqaasiliortut Isumattoqatigiinnissaq januarip naalernerani sapaatip akunnera kingulleq pissasoq aalajangerpaat.

Inersuarnik attartorneqarsinnaasunik Oqaasileriffik ujarlissasoq aalajangerneqarportaaq.

-5 pillugu-

Taaguutit kalaallisut taaguuteqartinneqanngitsut eqqartornerat:

  1. Fortrydelsespille: CCO-p siunnersuutigaa Naartulerasugaluni iisartagaq.
  2. Allat:

SH: Lykke piller kalaallisut qanoq taaneqartassanersut aperivoq, Nanertisimanaveersaatit CCO-p siunnersuutigaa.

-Tørt vejr: Isugutaqanngitsoq SH-p siunnersuutigaa, panernartoq arlaannut attuumassuteqarluni atorneqartarmat Isugutaqanngitsoq-p atorneqarnissaa tulluuttoq SH oqarpoq.

NM: Padægogisk center: CCO-p siunnersuutigaa Perorsaanermut ilisimatusarfik.

-Paretetisk nævn: Amerlaqatigiiaanik inuttaligaq Oqaasiliortut siunnersuutigaat.

-Selvmordstruet: Imminoqqajaasoq siunnersuutigineqarpoq.

-Opsøgning: Orniguttarneq Oqaasiliortunit siunnersuutigineqarpoq.

CCO: Administrerende direktør: Pisortaaneq siunnersuutigineqarpoq.

– Kontorchef: Taaguut atorneqartussaq tulliani ataatsimiinnermi siunnersuutigineqassaaq.

CCO: Oqaasililiortut ataatsimiinnerini Oqaatsit isummerfigisassat oqaluuserisassanut ilanngunneqartalissasut CCO-p siunnersuutigaa ilaasortallu tamarmik akuersaarpaat.

-6 pillugu-

CCO: Jakob Møller Lyberth tikippat Autorisationsnævn pillugu KIIIP ataatsimeeqatiserineqassaaq.

-7 pillugu-

NM: Microsoft programminik kalaallisut nutserneqarnissaanut aningaasaliinissaminillu pilersaartoq NM oqarpoq.

Oqaasileriffik moderatoreralugu suliarineqarsinnaanera NM-p eqqarsaatigeqquaa.

CCO: Oqaasileriffiup Microsoft tamanna pillugu allaffiginikugaa sulili akissutisimanatik ilisimatsitsissutigaa.

Ataatsimiinnissaq tulleq qaqugu pissanersoq kingusinnerusukkut nalunaarutigineqassaaq.

 

Carl Chr. Olsen Pia N. Knudsen

Siulittaasoq Allatsi