Grønlands Sprogsekretariat

Nunat Aqqinik Aalajangiisartut 2009 – 6 (gl)

NAA.02.12.09 (gl)

Nunat Aqqinik Aalajangiisartut decembarip 2-anni 2009-mi Oqaasileriffimmi ataatsimiinnerat

Peqataasut.: Carl Christian Olsen, Stephen Heilmann, Karl Elias Olsen. Peqataanngitsut: Abia Abelsen, allamik pisassaqarnini pissutigalugu, aamma Tukummeq Qaavigaq, pissarsiarinngitsoornera pissutigalugu. Allatsi: Lisathe Møller Kruse.

Oqaluuserineqartut makkuupput:

  1. Tikilluaqqusineq
  2. Imaqarniliap akuerinera (oktobarip 21-anni ataatsimiinnermit imaqarniliaq)
  3. Paamiut eqqaani, Nanortallip eqqaani, Qaqortup eqqaani, Aasiaat eqqaani, kiisalu Niaqornaarsuup eqqaani nunat aqqinik nalunaarsuinermi akuerinngikkallarnikuusat akuerinissaat.
  4. Immap assingani 1650-p iluaniittut nunat aqqi nalunaarsornikuusat akuerineqarnikuunngitsut akuerinissaat, tassa Upernaviup, Nuussuup, Kangersuatsiap, Uummannap, kiisalu Maamoriliup eqqaaniittut.
  5. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Oktobarip 21-anni2009-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.

3. pillugu

Paamiut eqqaanni, Nanortallip eqqaanni, Qaqortup eqqaanni, Aasiaat eqqaanni, kiisalu Niaqornaarsuup eqqaanni nunat aqqinik nalunaarsuinermi akuerinngikkallarnikuusat Nunat Aqqinik Aalajangiisartunit akuerineqarput.

Nanortallip eqqaanni nunat aqqi Nunat Aqqinik Aalajangiisartunit siornatigut akuerineqanngikkallarnikuusut ataatsimiinnermili uani akuerineqartut ukuupput:

1) Nalunaarsugaataareersuni ”Naaliguttoq”-mik ateqartinneqartoq Louis Elisassenimit Peter Poulsenimiillu “Naaliguttut”-nik ateqarnerarneqaraluartoq, “Naaliguttoq”-mik ateqaannartussatut aalajangiunneqarpoq nunat aqqinik ilisimasallit namminneq naqqeeqqinnerannit aallaaveqartumik.

2) Nalunaarsugaataareersuni “Tilliit”-nik ateqartinneqartoq, Louis Elisassenimit Peter Poulsenimiillu “Siggiit”-nik ateqartinneqartoq, “Siggiit”-nik ateqartussatut aalajangiunneqarpoq.

3) Nalunaarsugaataareersuni “Qunnersuaarsuk”-mik ateqartinneqartoq, Louis Elisassenimit Peter Poulsenimiillu “Qunnertuarsuk”-mik ateqartinneqartoq, “Qunnertuarsuk”-mik ateqartussatut aalajangiunneqarpoq.

4) Tasiusap akianiittoq nuuttannguaq aggustimi 2009-mi Nanortalimmiittoqarnerani nunat aqqinik ilisimasallit “Iatituaq”-mik ateqarneragaat qanoq isumaqarnersoq sunalu tunngavigineraa apeqqutigineqarmat paasineqarpoq Iatsuatsiaq-mik ateqartinneqartoq, qangaanerusoq sumiiffimmi tassani uilortortut ajornersaat arnaq toqusortartik atsiussimagamikku. Taamaattumik nunap aqqa nuuttannguaq “Iatsuatsiaq”-mik ateqartussatut aalajangiunneqarpoq.

5) Nalunaarsugaataareersuni “Nunngarut”-mik ateqartinneqartoq Kasper Ludvigsenimiillu “Nunngaritseq”-mik ateqartinneqartoq, quppaasatut isikkulik ujarak immikkoortoq avannamut kujammullu ingerlasoq naasoqarnerlu ajortoq, “Nunngaritseq”-mik ateqartussatut aalajangiunneqarpoq.

6) “Inugap Nuua” qanoq isumaqarnersoq sunalu tunngavigineraa Hans Joseniusimut apeqqutigineqarmat paasineqarpoq eqqaaniittoq illukoqarfik Inugaq-mik ateqartinneqarneranit nuuttaa “Inugap Nuua”-nik taaneqartartoq, taamaattumik nuuk pineqartoq “Inugap Nuua”-nik ateqartinneqartussatut aalajangiunneqarpoq.

7) Nalunaarsugaataareersuni “Sivinganerup Nuua”-nik ateqartinneqartoq Hans Levisenimilli “Ilillit Nuuat”-nik ateqartinneqartoq sooq taamatut ateqartinneqarnera pillugu Hans Levisenimut apeqqutigineqarmat nassuiaatigineqarpoq sumiiffik pineqartoq ilullineqartutut ittuusoq qooruusaalluni. Ataataata piniartullu aamma taamatut taasarsimagaat nassuiaatigivaattaaq. Taamaattumik sumiiffik pineqartoq “Ilullit Nuua”-nik ateqartinneqartussatut aalajangiunneqarpoq.

8) Nalunaarsugaataareersuni “Marngit”-nik ateqartinneqartoq, Hans Joseniusimilli “Marnerit”-nik ateqartinneqartoq apeqqutigineqarmat nassuiaavoq immaqagooq marnilisoqarsimasoq marnermullu tunngasimassasoq. Qangarsuarligooq taamatut taaneqartarpoq. Taamaattumik sumiiffik pineqartoq “Marnerit”-nik ateqartinneqartussatut aalajangiunneqarpoq.

Qaqortup eqqaanni nunap aqqa Nunat Aqqinik Aalajangiisartunit siornatigut akuerineqanngikkallarnikuusoq ataatsimiinnermili uani akuerineqartoq tassaavoq “Atikerleq”. Nunat Aqqinik Aalajangiisartut akuerinngikkallarnikuuaat qanoq isumaqartinneqarnersoq paaserusukkamikku. Gerhard Jakobsenimut apeqqutigineqarmat oqaatigivaa nalullugu qanoq isumaqartinneqarnersoq, taamaattorli nassuiaatigivaa qangarsuarli taamatut taasaraat sivikitsumillu savaateqarfiunikuusoq. Nunat Aqqinik Aalajangiisartunut allatsip Lisathe Møller Kruse misissuinermi kingorna nunap aqqa Atikerleq Nanortallip avannaatungaata kitaatungaani kiisalu Nanortallip akiani nunap aqqatut atuuttoq aamma paasivaa.

Niaqornaarsuup eqqaanni nunat aqqi Nunat Aqqinik Aalajangiisartunit siornatigut akuerineqanngikkallarnikuusut ataatsimiinnermili uani akuerineqartut ukuupput:

1) Lars Filemonsen suleqatigalugu nuna aqqa aggustimi nalunaarsugaq “Aqqaria” qanoq isumaqartinneqarnersoq sunalu tungavigineraa Nunat Aqqinik Aalajangiisartunit paaserusunneqarmat inuttaanut paasiniarneqarmat paasineqarpoq qimussit aqqartarfigigaat, taamaattumillu “Aqqariaa”-nik taasaraat. Taamaattumik “Aqqariaa”-nik ateqartussatut aalajangiunneqarpoq.

2) Nalunaarsugaataareersuni “Alanngorleq”-mik ateqartinneqartoq Lars Filemonsenimilli “Alanngorlia”-nik ateqartinneqartoq Nunat Aqqinik Aalajangiisartunit paasilluarneqarusunneqarmat paasiniaareernikku paasineqarpoq Qeqertasussuup alanngorlerimmagu “Alanngorlia”-nik taaneqartartoq. Taamaattumik “Alanngorlia”-nik ateqartinneqartussatut aalajangiunneqarpoq.

Aasiaat eqqaanni nunat aqqi Nunat Aqqinik Aalajangiisartunit siornatigut akuerineqanngikkallarnikuusut ataatsimiinnermili uani akuerineqartut ukuupput:

1) Nalunaarsugaataareersuni “Innersuartooq”-mik ateqartinneqartoq Jørgen Larsenimilli “Innersuartuut”-nik ateqartinneqartoq, Nunat Aqqinik Aalajangiisartunit paasilluarneqarusummat Kitsissuarsunni KNAPP-imi siulittaasumut Rasmus Nielsenimut paasiniarneqarmat paasineqarpoq qangakkunni upperisapalaat nalaanni alliarutsit taakaniinnerarneqartarsimasut, igalaarsuillugooq isigineqartarsimasut. Taamaattuminngooq taamatut taasarpaat. Taamaattumik “Innersuartuut”-nik ateqartinneqartussatut aalajangiunneqarpoq.

2) Nalunaarsugaataareersuni “Usuttalik”-mik ateqartinneqartoq Jørgen Larsenimilli Jørgen Reimerimillu “Ussuttalik”-mik ateqartinneqartoq Nunat Aqqinik Aalajangiisartunit paasilluarusunneqarmat Otto Storchimut Manermiormiumut paasiniarneqarmat, nassuiaatigivaa qangali “Usuttalik”-mik taaneqartartoq. Qaavanigooq ujarassuaq pissutaalluni taamatut taaneqartarpoq, meeraagallaramilligooq taamatut taasaraat tusartarpaa. Taamaattumik “Usuttalik”-mik ateqaannartussatut aalajangiunneqarpoq.

3) Nalunaarsugaataareersuni “Uperniviup Kangerlua”-nik ateqartinneqartoq Piitannguaq Hansenimilli “Upernaviup Kangerlua”-nik ateqartinneqartoq Nunat Aqqinik Aalajangiisartunit paasilluarusunneqarmat Kitsissuarsunni KNAPP-imi siulittaasumut Rasmus Nielsenimut paasiniarneqarmat paasineqarpoq qangali “Upernaviup Kangerlua”-nik taaneqartartoq. Taamaattumik “Upernaviup Kangerlua”-nik ateqartinneqartussatut aalajangiunneqarpoq.

4) Nalunaarsugaataareersuni “Equuat”-nik ateqartinneqartoq Piitannguaq Hansenimilli “Equuaaat”-nik ateqartinneqartoq Nunat Aqqinik Aalajangiisartunit paasilluarneqarusummat Akunnaami KNAPP-mi siulittaasumut Augoq Olsenimut paasiniarneqarmat paasineqarpoq “Equuaat”-nik taaneqartartoq, taamaattoq suna tunngavigineraa ilisimanagu. Tamannalu pillugu “Equuaat”-nik ateqartinneqartussatut aalajangiunneqarpoq.

5) Nalunaarsugaataareersuni Jørgen Reimerimiillu “Kujammut Nuua”-nik ateqartinneqartoq Emanuel Storchimit Otto Storchimillu “Manermiut Karra”-nik ateqartinneqartoq Nunat Aqqinik Aalajangiisartunit paasilluarusunneqarmat Ottoq Storchimut Manermiormiumut paasiniarneqarmat nassuiaatigivaa ”Manermiut Karra”-nik taaneqartartoq, “Kujammut Nuua”-ninngooq taaneqartillougu tusarnikuunngilaa. Tamanna pillugu “Manermiut Karra”-nik ateqartinneqartussatut aalajangiunneqarpoq.

Paamiut eqqaanni nunat aqqi Nunat Aqqinik Aalajangiisartunit siornatigut akuerineqanngikkallarnikuusut ataatsimiinnermili uani akuerineqartut ukuupput:

  1. Nalunaarsugaataareersuni “Kippartut”-nik ateqartinneqartoq Sem A. Lorentzenimiilli “Kippatit”-nik ateqartinneqartoq Nunat Aqqinik Aalajangiisartunit paasilluarusunneqarmat paasiniaasoqarneratigut paasineqarpoq Nuummiutoorlugu kippartunik taaneqartartoq Paamiormiutoorlugulu “Kippatinik” taaneqartartoq paasineqarpoq. Nunat Aqqinik Aalajangiisartut sumiorpalussuseq ataqqillugu “Kippatit”-nik ateqartinneqartussatut aalajangiuppaat.
  2. Nalunaarsugaataareersuni “Takisuukasik”-mik ateqartinneqartoq, Nathan Andreassenimit Sem A. Lorentzenimiillu “Puttallarsiivik”-mik ateqartinneqartoq Nunat Aqqinik Aalajangiisartunit paasilluarneqarusummat paasiniaasoqarneratigut paasineqarpoq “Puttallarsiivik”-mik ateqartinneqartoq. Arferminngooq kivisisamik tassani qeqertami puttallarsiisoqarsimanera pillugu taamatut ateqartinneqarpoq. “Takisuukasik” kujataatungaani qeqertap “Qeqertarsuatsiaat”-nik ateqartinneqartup kitaatungaaniinnerarpaat. Taamaattumik qeqertaq pineqartoq “Puttallarsiivik”´-mik ateqartinneqassasoq aalajangiunneqarpoq.
  3. Sem A. Lorentzenip Nathan Adreassenillu suleqatigineqarneranni “Terianniap Pissigaa” nalunaarsorneqarsimasoq Nunat Aqqinik Aalajangiisartunit paasilluarneqarusummat paasiniaasoqarneratigut paasineqarpoq Napparutillip kujatatungaaniittoq. Terianniarooq qimaalluni pississimasoq ikaarluni miiterillu qulit missaaniittoq kangerluaraq akimut ikaarsimammagu taamatut ateqartinneqarpoq. Taamaattumik “Terianniap pissigaa” akuerineqarluni taamatut ateqartussatut aalajangiunneqarpoq.

Paamiut eqqaanni nalunaarsukkani nunap aqqa suli nalornissutaasoq ataaseq Nunat Aqqinik Aalajangiisartunit akuerineqanngitsoq misissoqqitassatullu siunniunneqartoq tassaavoq “Illusarseriitsoq”-mik ateqartinneqartoq. Nalornissutaaneranut pissutaavoq taassuma eqqannguani aamma ”Illusarseriitsut” nalunaarsorneqarsimanerat, tamannalu pillugu nalorninarluni nunap aqqa ataaseq nunalluunniit marluk pineqarnersut, kiisalu qasseersiut ataasersiulluunniit atorneqartussaanersoq nalorninartoqarmat.

4. pillugu

Nunat aqqinik Aalajangiisartut immap assingata 1650-p nalaaniittut nunat aqqi nalunaarsoqqammisat akuerisaat 38-t word-filimi imatut atilimmiipput: 2. dec 2009 NAA-t nunat aqqi akuerisaat.doc.

Nunat aqqi akuerisat saniatigut naqqiissut arlallit Nunat Aqqinik Aalajangiisartunit akuerineqartut tassaapput:

  1. Nalunaarsugaataareersuni “Qaamarujuk”-mik ateqartinneqartoq Ukkusissarmiumit Jakob Skademit “Qaamarujuup Sullua”-nik ateqartutut naqqiissutigineqarnerata kinguneranik “Qaamarujuup Sullua”-nik ateqartinneqartussatut aalajangiunneqarpoq.
  2. Nalunaarsugaataareersuni “Qeqertarukassak”-mik ateqartinneqartoq Hans Johansenimit Uummannarmiumit “Qeqertaarukassak”-mik ateqartutut naqqiissutigineqarnerata kinguneranik “Qeqertaarukassak”-mik ateqartinneqartussatut aalajangiunneqarpoq.
  3. Nalunaarsugaataareersuni “Avannarleq”-mik ateqartinneqartoq Hans Johansenimit Uummannarmiumit “Qeqertannguaq Avannarleq”-mik atueqartutut naqqiissutigineqarnerata kinguneranik “Qeqertannguaq Avannarleq”-mik ateqartinneqartussatut aalajangiunneqarpoq.
  4. Nalunaarsuutaataareersuni qallunaatuinnaq ateqartutut “Bang Havn”-imik ateqartinneqartoq Upernavimmi Teknikkimut Avatangiisinullu allaffeqarfimmit “Qattarmiut”-nik ateqartutut naqqiissutigineqarnerata kinguneranik “Qattarmiut”-nik ateqartinneqartussatut aalajangiunneqarpoq.
  5. Nalunaarsuutaataareersuni qallunaatuinnaq ateqartutut “Krudthushøj”-imik ateqartinneqartoq Upernavimmi Teknikkimut Avatangiisinullu allaffeqarfimmit “Tatsip Aqquserna”-nik ateqartutut naqqiissutigineqarnerata kinguneranik “Tatsip Aqquserna”-nik ateqartinneqartussatut aalajangiunneqarpoq.
  6. Nalunaarsuutaataareersuni qallunaatuinnaq ateqartutut “Havnestenen”-imik ateqartinneqartoq Upernavimmi Teknikkimut Avatangiisinullu allaffeqarfimmit “Pituffikassak”-nik ateqartutut naqqiissutigineqarnerata kinguneranik “Pituffikassak”-mik ateqartinneqartussatut aalajangiunneqarpoq.
  7. Nalunaarsuutaataareersuni qallunaatuinnaq ateqartutut “Venusbjerget”-imik ateqartinneqartoq Upernavimmi Teknikkimut Avatangiisinullu allaffeqarfimmit “Immiorfiup Nuua”-nik ateqartutut naqqiissutigineqarnerata kinguneranik “Immiorfiup Nuua”-nik ateqartinneqartussatut aalajangiunneqarpoq.
  8. Nalunaarsugaataareersuni “Kikiakassak”-mik ateqartinneqartoq Vilhelm Christiansenimit Kangersuatsiarmiumit “Amitsuajaakassak”-mik ateqartutut naqqiissutigineqarnerata kinguneranik “Amitsuajaakassak”-mik ateqartinneqartussatut aalajangiunneqarpoq.
  9. Nalunaarsugaataareersuni “Akullikassak”-mik ateqartinneqartoq Vilhelm Christiansenimit Kangersuatsiarmiumit “Innaarsukassak”-mik ateqartutut naqqiissutigineqarnerata kinguneranik “Innaarsukassak”-mik ateqartinneqartussatut aalajangiunneqarpoq. Akullikassak avannaatungaaniippoq.
  10. Nalunaarsugaataareersuni “Nuunnguaq”-mik ateqartinneqartoq Vilhelm Christiansenimit Kangersuatsiarmiumit “Itisoorsuaq”-mik ateqartutut naqqiissutigineqarnerata kinguneranik “Itisoorsuaq”-mik ateqartinneqartussatut aalajangiunneqarpoq. Nuunnguaq kujataatungaaniippoq.
  11. Nalunaarsugaataareersuni “Qimatulivik”-mik ateqartinneqartoq Vilhelm Christiansenimit Kangersuatsiarmiumit “Nuunnguaq”-mik ateqartutut naqqiissutigineqarnerata kinguneranik “Nuunnguaq”-mik ateqartinneqartussatut aalajangiunneqarpoq. Qimatulivik kujataatungaaniippoq.
  12. Nalunaarsugaataareersuni “Eqinat”-mik ateqartinneqartoq Nuussuarmi allaffimmiumit “Eqqinnat”-nik ateqartutut naqqiissutigineqarnerata kinguneranik “Eqqinnat”-nik ateqartinneqartussatut aalajangiunneqarpoq.

4. pillugu

—————————–

Carl Chr. Olsen Lisathe M. Kruse

Siulittaasoq Allatsi