Grønlands Sprogsekretariat

Oqaasiliortut 2011 – 11 (gl)

OQAA – 211011(gl)

Oqaasiliortut ataatsimiinnerannit imaqarniliaq tallimanng. oktobarip 21-anni 2011, nal. 10.00 Ilimmarfimmi / Oqaasileriffimmi.

Peqataasut: Carl Chr. Olsen, Stephen Heilmann, Eva Møller Thomassen, Lotte Holm.

 

Oqaluuserisat:

  1. Tikilluaqqusineq aamma ilisimatitsissutit
  2. Kingullermik ataatsimiinnermit imaqarniliap akuerisassatut saqqummiunnera
    Imaqarniliaq akuerineqarpoq.
  3. Seniorbruger kalaallisut (09.09.2011 + 18.10.2011)
    Saaffiginnittumit paasissutissat tiguneqarput, naak amigarsorineqaraluarlutik suli, Taamaattoq Oqaasiliortut siunnersuutigaat atuisoq pingaarneq imalt. misilittagartooq atorneqarallarsinnaasut.
  4. Ilerasuutigaakka – Ernumagaakka – Uisanguserneq (09.09.2011)
    Akissutissamut missingersuusiaq akuerineqarpoq.
  5. Sundhedshjælper: Peqqissaanermi ikiorti
    Sundhedsassistent: Peqqissaanermi assistenti
    Peqqissaanermik Ilinniarfik. (07.10.2011)
    Siulittaasup allaganngorlugu akissutaa tusaatissatut tiguneqarpoq qulaanilu allassimasut atorneqassasut aalajangiunneqarluni.
  6. Oqaaseq Ombudsmand (13.10.2011)
    Oqaasiliortunut ilaasortat ilisimatitsipput taaguut svenskisooq taanna marloqiusanik isumaqartillugu kalaallisut atorneqartoq: 1. Naalagaaffiup Sinniisua (Rigsombudsmand), 2. Inatsisartut ombudsmandiat.
    Oqaasiliortunut ilaasortat eqqaavaat ombudsmand oqaasersiatut atugaareersoq kalaallisuunngortinnissaalu siunertarineqanngitsoq.
  7. Oqaaseq straffeattest (13.10. 2011)
    Oqaasiliortut aalajangerput straffeattest kalaallisut imaassasoq:
    Pineqaatissinneqarsimannginnermik uppernarsaat.
    Taamatullu børneattest imaassasoq:
    meeqqanik innarliisimannginnermik uppernarsaat.

  8. Oqaaseq Qerinnarpoq
    Oqaasiliortut aalajangerput frysepunkt aamma 0 grader pineqartillugit oqaaseq una atorneqartassasoq: qerinnarfik, s.i. issisiut qerinnarfiup nalaaniippoq. Ilaasortat ilisimavaat sumiorpaluutini ippigineqartaraluartoq atorlugu sungiunneqarsinnaasoq.
  9. Børnepanel (05.10.2011)
    Oqaasiliortunut ilaasortat aalajangerput ima kalaallisut taaguuteqassasoq:
    Meeqqanut [sinniisutut] isummersoqatigiiffik.

  10. Vippestol (05.10.2011)
    Oqaasiliortunut ilaasortat aalajangerput kalaallisut ima taaguuteqassasoq:
    Ukamarfik.

  11. Grønlands Nationalbibiliotek (05.10.2011)
    Siulittaasup saaffiginnittumut allaganngorlugu akissusiarisimasaa tusaatissatut tiguneqarpoq akuerineqarporlu: Nunatta Atuagaateqarfia.

  12. Administrations-website & administrator (03.10.2011)
    Oqaasiliortunut ilaasortat isumaqarput taaguutit pineqartut qulaaniittut sukumiisumik isummerfigineqassappata suli misissueqqittoqartariaqartoq.
  13. Ilisimatusarfiup rektoriata taaguutinut ikioqqussutai (17.11.2011)
    Rektorip allakkamini ujartugaa oqaaseq korrupt Oqaasiliortunit aalajangerneqarpoq kalaallisut imaassasoq: Peqquserlunnikkut iluanaarniaq. Oqaatsit kalaallisuunngortitassatut suliakkiunneqarsimasut suleqatigiit taakku kalaallisut taaguuserlugit nassuiaaserlugillu siunnersuusiorfigereerunikkit akuerisassanngorlugit Oqaasiliortunut nassiuteqquneqassapput.
  14. Kuisittoortut atualersoortut (19.11.2011)
    Oqaasiliortunut ilaasortat isumaqarput saaffiginnittoq akineqassasoq uiguutit taakku –toortut, -soortut sumiorpaluutit iluanni atorneqareersut sumiorpalunnertullu akuerisariaqartut.
  15. Havets herlighedsværdi (19.11 2011)
    Oqaasiliortunut ilaasortat qulaani pineqartoq tulliani ataatsimiinnissamut isummerfigineqartussanngorlugu kinguartikkallarneqassasoq.
  16. Nunatsinni aalisakkat taaguutaat
    Siulittaasoq ilisimatitsivoq Kalaaliaqqami sulisumik oqaloqateqareernerup kingorna aalajangersimalluni Nunatsinni aalisakkat pisarineqarlutillu tuniniarneqartartut kalaallisut, qallunaatut, tuluttut latinerisullu nalunaarsorneqassasut. Soorlu arferit naasullu aqqi ilanngullugit siusinnerusukkut plakatiliortoqarsimasoq. Suliniutip aallartinnerata siunertaraa Nunatsinni aalisakkat nalinginnaanerusut assitalerlugit plakatiliarineqassasut, takornarianut innuttaasunullu atorneqarsinnaasunik. Tamanna anguniarlugu Ilinniusiorfik takornarianillu sullissisut suleqatiserineqalersaarput.
  17. Taasariaqartut allat
    Oqaatsitigut teknologimi suliat pillugit ilisimatitsissutit
    Oqaasileriffimmi oqaatsitigut teknologimik suliat assigiinngitsunit ingerlanneqartut pillugit siulittaasoq ilisimatitsivoq, ilaat Per Lang-gårdimit,.Jens Erlandsenip suleqatigineranit, aamma Ilinniusiorfik suleqatigalugu Pia Jarvadip Jerrold D. Sadockip Lenore Grenobleillu suleqatiginerannit ingerlassat assigiinngitsut nassuiaatigineqarput.

    Velux fondimit aningaasaliissutit atorlugit Beatrine Heilmannip atorfiata saniatigut inuttassaaleqissussineqarpoq. Marlunninngooq piukkunnartoqaraluarpoq, taamaattoq taakku ilinniarnerminnik naammasseqqaarusullutik unnersimapput.

    Kukkuniiaat-ip tullissaa qangali piareeqqagaluarpoq, taamaattoq Nordisk Sprogmødep ingerlanneqarnissaa salliutinneqarsimammat Kukkuniiaatip aningaasalersorneqarnissaa aappaagu januaari qaammat aallarnerfigalugu aningaasalersorneqassasoq siulittaasoq ilisimatitsivoq. MAC-imut ikuunneqarsinaalernissaa Tino Didriksenip maanna misissoraa aamma ilisimatitsissutigineqarpoq.

    Ordboginut suliat pillugit maanna suleqatigineqartut tassaapput
    Jerry Sadock aamma Pia Jarvad kalaallisuumiit tuluttuumut kalaallisuumullu ordbogissaq oqaatsinik 20.000-inik imalinnik peqartussaq. Aamma Jens Erlandsen mobilinut androidinut ikkussap ineriartortinneqaqqinneranut suleqatigineqarpoq.
    Oqaatsit nalunaarsorsimasat akuerineqarsimasullu ilanngussuunnissannut ilinniartutut sulitinneqalersimavoq Marianne Hansen. Taassumap aamma Erik Fleischerip oqaatsit qarasaasiamut immiussuussimasai aamma ilanngussortussaavai.
    Aalajangerneqarpoq synonymordbogi OQAASERSIORFIK – kalaallisut oqaatsit isumaat allannissaallu Ilinniusiorfimmit 2008-mi suliarineqarsimasoq Oqaasiliortut ilaasortaannut peqanngitsunut agguaanneqassasoq.

    Nunat aqqi Tunumi nalunaarsukkat pillugit Nunat Aqqinik Akuersisartut ataatsimiinnerminni aalajangersimapput allattaaseq pillugu tunngaviusumik isummertoqarnissaa kissaatiginarmat Oqaasiliortunut qanoq iliuuseqartoqarnissaa pillugu suliassaq ingerlateqqinneqassasoq.
    Oqaasiliortunut ilaasortat aalajangerput nunat inuillu aqqi qanoq allanneqartarnissaat pillugu tunngavissanik misissuisoqassasoq. Tassani qanoq allanissamik isumaqatigiissutit (konventioner) naapertorlugit aallaavissat suunersut aalajangiunneqassapput. Allattaatsimik qanoq ittumik atuisinnaaneq isumaqatigiissutigineqarsinnaappat tamanna tunaartarineqarsinnaasoq siulittaasup aamma ilisimatitsissutigaa. Taamatuttaaq siulittaasup tulliata nunat allat sumiorpaluutinik assigiinngitsunik atuiffiusut qanoq periaaseqarnersut misissuiffigineqassasut siunnersuutigaa.
    Allattaatsip maanna atukkatta nipisiuineq aallaaviginagu nipit isummamut allanngoraataasut atorlugit allattaasiliaanera (fonemisk) kingumut uterneqarpoq. Sumiorpaluutit kitaata qeqqarmiuunngitsut pillugit allannermi assigiinnerusumik periaaseqalernissaq anguniarlugu naaperiaasoqartarsimasoq aamma eqqaaneqarpoq.

    LHO-p agguaateqqusani Profilering af østgrønlandsk kultur – anbefalinger eqqartorpaa, ingammik q. 13-imiit 16-imut oqaatsinut tunngassutillit. Innersuussutit tamarmik politikkikkut akuerineqarsimagaluartut ajoraluartumik malersorneqaqqissimannginnerat ajuusaarutigaa. Innersuussutit ilagaat politikkikkut kissaatigineqartoq Oqaasileriffik sumiorpaluutit allanneqartarnerannut ilitsersuutinik suliaqassasoq.

    Naggataatigut allattaagallartoq ilisimatitsivoq Katti Frederiksen novembarip aallaqqaataaniit sulilissasoq Oqaasiliortunullu allattaanini nangeqqissagaa.

    – NORNA, Nordisk Samarbejdskomite for navneforskning 15. kongres 2012 (piffissaalatsineq pillugu qulequtaq taanna tikinneqanngilaq)

Inussiarnersumik inuulluaqqusilluta

Carl Chr. Olsen Nuka Møller
Siulittaasoq Allatsi