Grønlands Sprogsekretariat

Nunat Aqqinik Aalajangiisartut 2012 – 1 (gl)

NAA.19.01.12 (gl)

Nunat Aqqinik Aalajangiisartut sisamannngorneq januaarip 19-anni 2012-mi Oqaasileriffimmi ataatsimiinnerat Peqataasut.: Carl Christian Olsen, Stephen Heilmann, Abia Abelsen, Tukummeq Qaavigaq aamma Lotte Holm. Allatsi: Lisathe Møller Kruse. Oqaluuserineqartut makkuupput:
  1. Tikilluaqqusineq
  2. Imaqarniliap akuerisassatut saqqummiunnera (decembarip 22-anni 2011-mi ataatsimiinnermit imaqarniliaq)
  3. Aatsitassanut Ikummatissanullu Pisortaqarfimmiit saaffiginnissut
    • i. Høringsbrev til Stednavnenævnet vedr. ansøgning om efterforskningstilladelse 2012-26.phf (Tasiilap eqqaaniippoq)
    • ii. Høringsbrev til Gr. Stednavnenævn vedr. ansøgning om område 2012-27.pdf (Tunup avannaani Hudson Landimiippoq)
    • iii. Høring-Stednavn.pdf (Napasup timaaniippoq)
    • iv. Høring, Stednavn, 2012-29.pdf (Nuussuup Qeqertarsuullu ilaa)
  4. Nunat aqqi tunumiutut allaqqasut pillugit Oqaasiliortut aalajangiinerannik saqqummiussineq
  5. Tunumi nunat aqqi nalunaarsukkat suliarinerisa aallartinneri
  6. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Decembarip 22-anni 2011-mi ataatsimiinnermit imaqarniliaq akuerineqarpoq.

3. pillugu

Aatsitassanut Ikummatissanullu Pisortaqarfimmiit saaffiginnissutit Nunat Aqqinik Aalajangiisartunit eqqartorneqareerlutik ima akuerisaasumik taaguuteqartussatut aalajangerneqarput:
  • i. Høringsbrev til Stednavnenævnet vedr. ansøgning om efterforskningstilladelse 2012-26.phf (Tasiilap eqqaaniippoq) Qusiit
  • ii. Høringsbrev til Gr. Stednavnenævn vedr. ansøgning om område 2012-27.pdf (Tunup avannaani Hudson Landimiippoq) Aaqqii
  • iii. Høring-Stednavn.pdf (Napasup timaaniippoq) Ininnguit
  • iv. Høring, Stednavn, 2012-29.pdf (Nuussuup Qeqertarsuullu ilaa) Nuusaq
Aatsitassanut Ikummatissanullu Pisortaqarfimmut erseqqissaatigineqassaaq saaffiginnissutaasa akissutaat nunat atiunatik aatsitassarsiornerup nalaani taaguutissaannaaneri. Taamaattumik nunat aqqi aalajangiivigalugit akuerineqartut (autoriseret stednavne) aatsitassarsiornerullu nalaani taaguutigineqartut assigiinngitsuuneri erseqqissaatigalugit allaffigineqassapput. Ilanngullugu apeqqutigineqassaaq sooq Nunat Aqqinik Aalajangiisartut aatsitassarsiornerup nalaani taaguutissatut aalajangigaat avammut paasissutissiilluni saqqummiussinermi atorneqarneq ajorneri.

4. pillugu

Oqaasiliortunut ilaasortaq Katti Frederiksen nunat aqqi tunumiutut allaqqasut qanoq allariaaseqarluni allanneqartassanersut pillugit suliaminnik saqqummiussivoq. Kattip erseqqissaatigivaa Oqaasiliortut suli tunngaviusumik aalajangiisimanngitsut, suliarlu naammassiniarlugu ingerlanneqaqqissasoq. Oqaasiliortut tunumi nunat aqqisa qanoq allanneqartarnissaat pillugit paasissutissiinerat kingulleq aajuna ataaniippoq. Imaqarniliami ima allaqqasoqarpoq: ”Tamanit isumaqatigiissutaavoq Tunumiutut allannermi systemimik pisariaqartitsisoqartoq, pingaartumik aamma ulluinnarni oqaatsinik atuisut kitaamiutut allattaatsimik sungiussisimasut paatsuugassaanngitsumik malitassaqarnissaat eqqarsaatigalugit, taakkununnga assersuutissaalluarluni kitaamiusut ‘tissinarpoq’, allattaatsimi inatsit malillugu Tunumiutut ima allanneqarsimasup ‘titsiarpoq’-p ima oqaatigineqarnissaa ditsiarpoq*. Tunumiutut nipi alla allattaatsimiinngitsoq aamma assersuutigineqarpoq, tassalu Tunumiutut uangamik oqartarnerannit nipi ‘uarnga’ = /uɑŋa/. CCO isumaqarpoq naaperiaasoqarsinnaasoq, taammaattumillu aalajangiunneqarpoq LH-p nunat aqqinik suliaqarnermini suliai casetut atorlugit systemi qanoq ittoq atorneqassasoq nalilersuinikkut paasiniarneqassasoq, taakkualu tunngavigalugit suna isumaqatigiissutigineqarsinnaanersoq anguniarneqassasoq Oqaasiliortunullu saqqummiunneqarluni.” Nunat Aqqinik Aalajangiisartut suliaq taanna pillugu oqallipput, taamaattoq erseqqissarpaat namminneq suliassarinnginnamikku Oqaasiliortut aalajangiinissaat utaqqissallugu.

5. pillugu

Tunumi nunat aqqi nalunaarsukkat suliaralugit aallartinnissaralui kinguartinneqarpoq. Kinguartitsinermut peqqutaavoq Oqaasiliortut suliassaq suli naammassisimanngimmassuk. —————————– Carl Chr. Olsen Lisathe M. Kruse Siulittaasoq Allatsi