Grønlands Sprogsekretariat

Nunat Aqqinik Aalajangiisartut 2021 – 2 (gl)

NAA – 210921

Imaqarniliaq

 

Nunat Aqqinik Aalajangiisartut Oqaasileriffimmi ataatsimiinnerat septembarip 21-at 2021, nal. 13-16.

 

Peqataasut:

Nunat Aqqinik Aalajangiisartut: Aviâja Rosing Jakobsen (siulittaasoq), Niels Lorentzen (siulittaasup tullia), Ono Fleischer, Eva Mätzler & Johannes Rosing.

Oqaasileriffimmit: Arnaq B. Johansen (allatsi) & Beatrine Heilmann (pisortaq)

 

Maluginiagassat:

  • Naalisaatit atorneqartut allattorsimaffiat qanorlu isumaqarnerinik nassuiaatit:
    • NAA = Nunat Aqqinik Aalajangiisartut.
    • Inatsit = Nunat Aqqinik Aalajangiisartut pillugit Inatsisartut inatsisaat nr. 4, 1.juni 2017-imeersoq.
  • Ataatsimiinnermi skærmersuaq atorlugu allatseqarfimmit powerpoint atorlugu saqqummiineq ingerlanneqarpoq.

 

 

 

 

1       Oqaluuserisassat akuerineqarnerat 4

2       Kingullermik ataatsimiinnermit imaqarniliap akuerineqarnera. 4

  1. a) Maajip 27-anni 2021-mi ataatsimiinnermit imaqarniliap akuerisassanngorlugu saqqummiunnera. 4

3       Siulittaasumit allattoqarfimmillu ilisimatitsissutit 4

  1. a) Oqaasileriffimmi pisortaq nutaaq. 4
  2. b) Suleriusissaq (Forretningsorden) 4
  3. c) Oqaasileriffiup nutaarsiassaatai pillugit ilisimatitsineq. 4
  4. d) KNR Radio: Uummannassuaq (Kin of Sal) & Oodaap Qeqertaa. 5
  5. e) Oqaasileriffimmit Ilinniartitaanermut, Kultureqarnermut, Timersornermut Ilageeqarnermullu Naalakkersuisup ataatsimeeqatiginissaanik ilisimatitsineq. 5

4       Ilaasortat siunnersuutaasa suliarineqarnerat 5

5       Suliat aalajangiiffigisassat suliarineqarnerat 5

  1. a) Atsiinissamut siunnersuutit/qinnuteqaatit suliarineqarneri (nangitaq) 5
  2. b) Atsiinissamut siunnersuut/qinnuteqaat (Nuuk) 8
  3. c) Atsiinissamut siunnersuutit/qinnuteqaatit (Kujataani nunatat) 8
  4. d) Nunatta avannaarsuani qeqertaq nutaaq ateqanngitsoq. 10

6       Suliat allat pillugit ilisimatitsissutit 10

  1. a) Aatsitassanut Aqutsisoqarfimmit saaffiginnissut M-305. 10
  2. b) Aatsitassanut Aqutsisoqarfimmit saaffiginnissut M-310. 11

7       Tulliani ataatsimiinnissamik aalajangersaaneq. 11

8       Eqqaasassat allat 11

Ilanngussaq 1. 12

Ilanngussaq 2. 13

Ilanngussaq 3. 14

Ilanngussaq 4. 15

Ilanngussaq 5. 16

Ilanngussaq 6. 17

Ilanngussaq 7. 19

 

1 Oqaluuserisassat akuerineqarnerat

Oqaluuserisassat akuerineqarput.

 

2 Kingullermik ataatsimiinnermit imaqarniliap akuerineqarnera

a)    Maajip 27-anni 2021-mi ataatsimiinnermit imaqarniliap akuerisassanngorlugu saqqummiunnera

Imaqarniliaq akuerineqarpoq.

 

3 Siulittaasumit allattoqarfimmillu ilisimatitsissutit

a)    Oqaasileriffimmi pisortaq nutaaq

Oqaasileriffimmi juulip aallaqqaataani pisortanngortoq Beatrine Heilmann NAA suleqatiginissaannut qilanaarpoq, kiisalu ilisimatitsissutigalugu ataatsimiinnerni peqataasassamaarluni.

b)    Suleriusissaq (Forretningsorden)

Novembarip 20-anni 2020-mi ataatsimiinnermi NAA-nit kissaatigineqarpoq ataatsimiititaliorsinnaaneq suleriusissamut ilanngunneqarsinnaanersoq allatseqarfimmit misissorneqassasoq.

Ataatsimiititaliorsinnaaneq inatsimmi allassimammat suleriutsimi ilanngunnissaa pisariaqanngitsoq naalakkersuisoqarfimmit nalilerneqartoq NAA-nut ilisimatitsissutigineqarpoq.

NAA-nit kissaatigineqartoq suliamut akuusinnaanerup/akuusinnaannginnerup (habilitet/inhabilitet) ilanngunneqarnissaa misissorneqassasoq aalajangiunneqarpoq.

c)     Oqaasileriffiup nutaarsiassaatai pillugit ilisimatitsineq

Januaari 2021 aallarnerfigalugu Oqaasileriffimmit atuagassianik nutaarsiassanik assigiinngitsunik imaqartartunik qaammatikkaartumik ingerlasunik saqqummersitsisarneq aallartinneqarpoq.

NAA ilanngussassanik siunnersuuteqarsinnaanerat allatseqarfimmit ilisimatitsissutigineqarpoq.

 

d)    KNR Radio: Uummannassuaq (Kin of Sal) & Oodaap Qeqertaa

Juulip 27-anni radiukkut aallakaatitassiami Nunatta Nipaani Uummannassuaq kiisalu Oodaap Qeqertaa allatseqarfimmit saqqummiunneqarput.

Saqqummiunneqarnerini ukiut nalunaarsorneqarfii, NAA-nit akuerineqarfii, kiisalu oqaluttuassartarisinnaasaat saqqummiunneqarput.

e)     Oqaasileriffimmit Ilinniartitaanermut, Kultureqarnermut, Timersornermut Ilageeqarnermullu Naalakkersuisup ataatsimeeqatiginissaanik ilisimatitsineq

Ataatsimiinnissaq kinguartinneqarnikuuvoq, maanna septembarip 28-anni ingerlanneqartussatut naalakkersuisoqarfimmit ullulerneqarnikuuvoq.

Tassunga tunngatillugu allatseqarfimmit nunat aqqi pillugit pingaarnertut suliat kissaatillu saqqummiunneqassapput. Ilanngullugu allatseqarfimmit naalakkersuisoqarfimmiillu suliassanik, kissaatinik assigisaannillu paaseqatigiinnissaq siunertaasoq ilisimatitsissutigineqarpoq.

Arlaannik NAA apuussassaqarunik allatseqarfimmut anngussiumaartut ilisimatitsissutigineqarpoq.

 

4 Ilaasortat siunnersuutaasa suliarineqarnerat

Soqanngilaq.

 

5 Suliat aalajangiiffigisassat suliarineqarnerat

a)    Atsiinissamut siunnersuutit/qinnuteqaatit suliarineqarneri (nangitaq)

Kingullermik ataatsimiinnermit NAA-nit kissaatigineqarpoq misissuineq ingerlateqqinneqassasoq.

 

Siunnersuutigineqartup eqikkaganngorlugu saqqummiunneqarnera:

Suliaq pineqartoq kingullermik ataatsimiinnermi oqaluuserisassani 5a-miippoq. Atissatut siunnersuutigineqartut tassaapput sermersiuujugaluit qallunaat Niels Reeh (1940-2009) aamma Anker Weidick (1928-2020) kiisalu schweizermiu Konrad Steffen (1952-2020). Pineqartut sermersiuutut misissuisarnerminni nunatsinni nunarsuarmilu silaannaap allanngoriartorneranut tunngasunik paasissutissanik ukiut ingerlaneranni allaaserisaqartarsimapput, allaaserisarsimasaallu Naalagaaffiit Peqatigiinni silaannaap allanngoriartornera pillugu suliniaqatigiiffianit tigulaariffigineqartarsimallutik.

Sermersiuut pineqartut serminut iigartartunullu atsiunniarneqarnerini sumiiffiit assigiinngitsut pingasut siunnersuusiortunit toqqarneqarnikuupput, taakku matumani imaqarniliami ilaliussaq 1-imi takuneqarsinnaapput.

Atissatut siunnersuusiortunit kalaallisut oqaatsit eqqortumik atorneqassasut pingaartinneqarpoq, taamaattumik NAA kiisalu allatseqarfik atissatut siunnersuutigineqartunut naqqiisinnaanermik pisinnaatitsissummik tunineqarnikuupput, taamaattumillu ilaliussaq 1-imi allanneqarsimasunit allaanerulaartunik kalaallisut oqaatsit eqqortumik atorlugit siunnersuusiornikuullutik, siunnersuutillu sumiiffii ilaliussani 2-mit 4-mut massuma ataani allassimanerisa tulleriinneri malillugit takuneqarsinnaapput:

  • Sermeq Niels Reeh
  • Sermeq Anker Weidick
  • Sermeq Konrad Steffen

 

Kingullermi ataatsiminnermi misissuinerup ingerlaqqinnissaanik aalajangiussat kiisalu matumunnga ataatsimiinnermut misissueqqinnerit inerneri:

Misissueqqinnermi paasisat takussutissartaat assigiinngitsut makkuusut takutinneqarput ilisimatitsissutigineqartussallu ilisimatitsissutigineqarlutik:

  • Kingullermik ataatsimiinnermi NAA-ni ilaasortaq Johannes Rosing apeqqusiivoq ilumut nunat aqqi inuit aqqinik kalaallisuujunngitsunik inunnillu kalaaliunngitsunik ilalerlugit akuerineqarsinnaanersut, tassungalu ilanngullugu kissaatigalugu Naalakkersuisoqarfik allatseqarfimmit tusarniarneqassasoq ilumut nunat atissatut siunnersuutigineqartut akuerineqarsinnaanersut paasiniaaffigineqassasut. Ilanngullugu ilaasortamit kissaatigineqarpoq ataatsimiinnermi matumani Naalakkersuisoqarfik imaluunniit Naalakkersuisoq aalajangiinermi peqataassasoq. Naalakkersuisoqarfimmit ilisimatitsissutigineqarpoq inatsit malillugu nunat aqqinik akuersisarneq pillugu akisussaaffik tamarmi NAA-ni inissisimammat Naalakkersuisoqarfimmit imaluunniit Naalakkersuisumit ataatsimiinnermi peqataasoqarnissaa pisariaqanngitsoq.
  • Nunat aqqi inuit aqqinik kalaallisuujunngitsunik ilallit 2000-imit 2019 ilanngullugu NAA-nit akuerineqartut 19-iupput, taakkunannga 17-it 2017-imit 2019 ilanngullugu NAA-nit akuerineqarsimallutik.
  • Kujataani Eqalorutsit Killiit Sermiat pillugu misissuinerit saqqummiunneqarput.
  • Ilulissat eqqaanni Nunatarsuarmi Sermeq Avannarleq pillugu misissuinerit saqqummiunneqarput.

Saqqummiunneqartut saniatigut NAA-ni ilaasortaq Ono Fleischer Sermeq Avannarleq pillugu  ilisimasaminik nassuiaateqarpoq.

 

NAA-nit aalajangiussaq:

Eqqartuinerit nalilersuinerillu kingornatigut sermit atserneqartussatut siunnersuutigineqartut marluk, tassaasut Sermeq Anker Weidick aamma Sermeq Konrad Steffen NAA-nit itigartitsissutigineqarput. Tunngavilersuutigineqartut tassaapput Sermeq Sermeq Avannarleq kiisalu iigartartoq Eqalorutsit Killiit Sermiat ateqareerneri sermillu timerparteriartuinnarneranit pinngortitap allannguutai ersarikkaluartut sermip iigartartullu sumut killinneri apeqquserneqarsinnaanngillat ateqareertutullu naliligassaallutik. Nunat aqqisa suussusii eqqarsaatigalugit assigiinnik suussusillit qaleriittumik ateqartinneqarsinnaannginneri allatseqarfimmittaaq erseqqissarneqarpoq.

 

Atsiunneqartussatut siunnersuutit pingajuat sermeq nunatta Avannaarsuaniittoq ateqanngitsoq NAA-nit akuerineqarpoq, imalu ateqartinneqalerluni: Sermeq Niels Reeh. Sumiiffia matumani imaqarniliami ilanngussaq 2-imi takuneqarsinnaavoq.

Tassunga tunngavilersuutaapput sumiiffiata nalaa inunnit angallaffiunnginnami kalaallisut ateqartinneqarsimanissaa ateqartinneralu ilimanaateqanngimmat, nunat aqqisa allattorsimaffiini toqqortani pineqartup nalaani nunap aqqanik nalunaarsukkamik nassaassaqanngimmat, kiisalu sumiiffik qanga nunatsinnut ikaarnerit nunap timaa pineqartoq angallavigisimassagaat ilimanaateqanngimmat.

 

Tulliani ataatsimiinnermi oqaluuserineqartussatut aalajangiussat:

Eqqartuinermi NAA-nit allatseqarfimmillu isumaqatigiissutigineqarput tulliani eqqartugassat makkuninnga imaqassasut:

  • Sermit, iigartartut siornatigut ataatsimut ateqaraluartut marlunngorlutik avikkaangata nutaanik atsiisoqartassava?
  • Nunat aqqinik atortussanngortitsinermi toqqammavinnut qulaani taaneqartut pillugit ilanngussassanik allatseqarfik siunnersuusiussaaq.
  • Nunatat ateqanngitsut atserneqartussatut siunnersuuteqarfigineqartut kiisalu Sermersuup aakkiartorneranit nunatat nuisut nuiartortullu atserneqartarnissaannut periusissamik allatseqarfik siunnersuusiussaaq.
  • Suussutsit assigiippata periusissaq, taaguutit atorneqarsinnaasut assingisaallu eqqartornissaat pisariaqarpoq.

 

b)    Atsiinissamut siunnersuut/qinnuteqaat (Nuuk)

Siunnersuutigineqartup eqikkarlugu saqqummiunneqarnera:

Kangiata Nunaata Sermiata nalaaniippoq qooroq Kuussuaq. Kuussuup qinnguani Kangiata Nunaata Sermiata tungaaniittumi nunap ilaa ima atserneqartussatut siunnersuutigineqarpoq, sumiiffiatalu nalaa ilaliussaq 5-imi takuneqarsinnaalluni:

  • Sinnattut Nunaat

 

Misissuineq kiisalu NAA-nit aalajangiussaq:

Sumiiffiata nalaa nunat aqqisa allattorsimaffianni digitaliusumi ateqanngilaq. Taamaakkaluartoq inunnik ilisimasalinnik sumiiffik ilumut qangaaniilli ateqartinneqannginnersoq qulakkeerlugu paasiniagassaasoq NAA-nit suliakkiutigineqarpoq.

 

c)     Atsiinissamut siunnersuutit/qinnuteqaatit (Kujataani nunatat)

Siunnersuutigineqartup eqikkarlugu saqqummiunneqarnera:

Tuluit Nunaannit saaffiginnissut nunatanik arfineq-pingasunik atsiinissamut siunnersuutit NAA-nut nassiunneqarnikuupput. Nunatat Kujataani Sermersuarmiittut sumiiffiisa allattorsimaffiat assinngorlugillu sumiinneri ilaliussaq 6-imi takuneqarsinnaapput, matumanilu atissatut siunnersuutigineqartut atuarneqarsinnaallutik:

  • Panik aamma Anaanaq (Daughter and Mother)
  • Erneq Kusanartoq (Handsome Son)
  • Panik Pinnersoq (Lovely Daughter)
  • Kuulti qernertoq (Black Gold)
  • Angut Inuusuttoq (Young Man)
  • Takujuminartoq (Pleasant Scene)
  • Ittoqut (Top Dog)
  • Aanaa (Grandmother)

 

Misissuineq kiisalu NAA-nit aalajangiussaq:

Siunnersuutigineqartut sumiiffiini nunat aqqisa allattorsimaffianni digitaliusumi kiisalu toqqortani nunatat pineqartut kalaallisut imaluunniit oqaatsit allat atorlugit ateqarnerinik takussutissaqanngilaq.

Siunnersuusiat kalaallisut ateqartussatut siunnersuutigineqaraluarlutik kalaallit atsersuisarnerannit allaanerussutaat ersarissoq NAA-nit maluginiarneqarpoq.

Siornatigut nunatanik atsiiniarluni siunnersuusianik NAA saaffigineqartareerput, taakku ilagaat maanna nunatat pineqartut ilai eqqaanniittullu, kiisalu tunumi Tasiilap kujataani nunatat pingasut atserneqarnissaannut siunnersuutit NAA-nit novembarimi 2019-imi eqqartorneqarnikuupput aalajangiiffigineqarlutillu. Tassani ataatsimiinnermi NAA-nit aalajangiunneqarpoq nunatat sermersuup aakkiartorneranit nuiorartut kiisalu nunatat ateqanngitsut atsersorneqarnissaat assigiiaartumik ingerlanissaa pillugu nunatat pillugit atinik atuuttussanngortitsinermi periusissanik allatseqarfik siunnersuusiussasoq. Siunnersuutissaq suli naammassinngitsoq allatseqarfimmit ilisimatitsissutigineqarpoq.

Qulaani taaneqartut tunngavigalugit nunatanut atissatut siunnersuutit matumani ataatsimiinnermi saqqummiunneqartut siunnersuutigineqartullu itigartitsissutigineqarput.

 

d)    Nunatta avannaarsuani qeqertaq nutaaq ateqanngitsoq

Aggustip 27-anni KNR-ip nittartakkakkut nutaarsiassaqartitsiviatigut allanilu atuarneqarsinnaavoq nunatta Avannaarsuani misissuisut ‘qeqertamik’ nutaamik nassaarsimasut[1].

‘Qeqertap’ nassaarineqartup sumiiffia knr.gl-imi nassuiarneqarsimasoq ilaliussaq 7-imi takuneqarsinnaavoq.

Misissuinermi “qeqertap” gps atorlugu sumiiffia nittartakkani assigiinngitsuni allatseqarfimmit misissorneqarpoq kinguneqanngitsumilli.

 

NAA-nit nalilersorneqarpoq atserneqassanersoq allatseqarfimmillu misissuinermit paasissutissat saqqummiunneqarput. Paasissutissat ilagaat qeqertatut taaneqartoq marraap sermillu nassataaneersoq taamaattumillu anorersuarpat morsoqqittussatut ilimagineqartoq. Taama ittut nunatta Avannaarsuani nalaanneqartartut arlaqarput, taakkunanilu ilaatigut arlallit allorniusat sanimukaartut ammukaartullu kisitsisaat atorlugit nunani allani taaguuteqartinneqartartut takussutissaqarpoq.

Taama ittunik nalaataqarnermi NAA aalajangerput qeqertatut taaneqaratik kalaallisut taaguutissaannik pilersitsissallutik. Maanna ‘qeqertaq’ atsernagu ima taaguuserpaat: Avannarleq 2021. Allanik taama ittunik siumuisoqarpat Avannarleq atorneqassaaq ukiorlu siumuiffik ilanngunneqassalluni.

 

6  Suliat allat pillugit ilisimatitsissutit

a)    Aatsitassanut Aqutsisoqarfimmit saaffiginnissut M-305

Nunap misissuiffissap M-305-mik taaneqarsimasup taaguuserneqarnissaa pillugu Aatsitassanut Aqutsisoqarfik saaffiginninnikuuvoq.

Nuna misissuiffissaq Ittoqqortoormiit nalaanniittoq allatseqarfimmit ima taaguuserneqarpoq:

Kalaallisut: Misissuiffik Qaaliartalik

Qallunaatut: Efterforskningsområdet Qaaliartalik

Tuluttut: Exploration area Qaaliartalik

b)    Aatsitassanut Aqutsisoqarfimmit saaffiginnissut M-310

Nunap misissuiffissap M-310-mik taaneqarsimasup taaguuserneqarnissaa pillugu Aatsitassanut Aqutsisoqarfik saaffiginninnikuuvoq.

Nuna misissuiffissaq Kujataaniittoq allatseqarfimmit ima taaguuserneqarpoq:

Kalaallisut: Misissuiffik Aputaajuitsoq

Qallunaatut: Efterforskningsområdet Aputaajuitsoq

Tuluttut: Exploration area Aputaajuitsoq

 

7 Tulliani ataatsimiinnissamik aalajangersaaneq

Tulliani ataatsimiinnissaq pissaaq decembarip 2-at 2021.

 

8 Eqqaasassat allat

Tulliani ataatsimiinnermi oqaluuserisassanut ilanngussassatut siunnersuut akuerineqartoq unaavoq:

Nunat aqqinik atuuttussanngortitsinermi tunngavinnik nutarterineq, tassani atsiiniarnermi, assersuutigalugu nunatat pillugit, nunat aqqi atserniakkatut siunnersuutit sumiiffiisa nunat aqqi eqqaanniittut ilanngullugit eqqarsaatigineqartassapput.

 

Ataatsimiinnermi peqataasut:

Aviâja Rosing Jakobsen, siulittaasoq

Niels Lorentzen, siulittaasup tullia

Ono Fleischer, ilaasortaq

Eva Mätzler, ilaasortaq

Johannes Rosing, ilaasortaq

 

Ilanngussaq 1

Sermit iigartartullu sumiiffiisa nalunaaqutserneqarsimanerisa ataatsimut takussutissartaat:

Tigulaariffik: siunnersuusiortut maili atorlugu nassiussaat.

 

Ilanngussaq 2

Sermip Sermeq Niels Reeh-mik atserneqartussatut siunnersuutip sumiiffia:

Tigulaariffik: siunnersuusiortut maili atorlugu nassiussaat.

 

Ilanngussaq 3

Iigartartup Sermeq Anker Weidick-mik atserneqartussatut siunnersuutip sumiiffia:

Tigulaariffik: siunnersuusiortut maili atorlugu nassiussaat.

 

Ilanngussaq 4

Sermip Sermeq Konrad Steffen-imik atserneqartussatut siunnersuutip sumiiffia:

Tigulaariffik: siunnersuusiortut maili atorlugu nassiussaat.

 

Ilanngussaq 5

Atissatut siunnersuutigineqarttup Sinnattup Nunaata sumiiffia:

Tigulaariffik: siunnersuusiortup maili atorlugu asseq nassiussaa.

 

Ilanngussaq 6

Nunat atserneqartussatut siunnersuutigineqartut sumiiffiisa titarniusat ammukaartut sanimukaartullu atorlugit allattorsimaneri, kiisalu Google Earth Pro atorlugu assitaliussaq:

Maluginiagassaavoq inuit qinnuteqartut sungisaasalu aqqi qernertumik qallernikuummata.

Tigulaariffik: siunnersuusiortut mail atorlugu nassiussaat.

  CO-ORDINATES PROPOSED PLACE NAME REASON FOR PROPOSED PLACE NAME DATE OF DISCOVERY / SUMMIT Named By
NUNATAK 1 Speed: 0.00 km/h

Course: N/A

 

Elevation: 2,111.00 m

Batt: Normal

 

Lat: N 61°39’47.8728″

Lon: W 44°16’45.1740″

 

Panik aamma anaanaq

(Daughter and mother)

 

Our daughter xxxxxxx is herself also a mother 14.08.20 xxxxxxxxxx
NUNATAK 2 Speed: 0.00 km/h

Course: N/A

 

Elevation: 2,287.83 m

 

Lat: N 61°39’21.8016″

Lon: W 44°16’04.9296″

 

Erneq kusanartoq (Handsome son) Our good looking son,xxxxx, is Erneq kusanartoq 18.08.20 xxxxxxxxx
NUNATAK 3 Speed: 0.00 km/h

Course: N/A

 

Elevation: 2,301.35 m

 

Lat: N 61°39’20.1060

Lon: W 44°15’55.4256»

 

Panik Pinnersoq (lovely daughter) Panik Pinnersoq and Angut Inuusuttoq are brother and sister, and next to each other on the same ridge. 18.08.20 xxxxxxxx
NUNATAK 4 Speed: 0.00 km/h

Course: N/A

 

Elevation: 2,306.77 m

 

Lat: N 61°39’19.0620″

Lon: W 44°15’47.7000»

 

Kuulti qernertoq (Black Gold) xxxxx co-founded a company that became the third largest petrol retailer in the UK . Kuulti qernertoq is based on “black” representing oil and “gold” representing success 18.08.20 xxxxxx
NUNATAK 5 Speed: 0.00 km/h

Course: N/A

 

Elevation: 2,266.26 m

Lat: N 61°39’26.5140″

Lon: W 44°16’10.4160″

 

Angut Inuusuttoq

(young man)

Angut Inuusuttoq

and Panik Pinnersoq and are brother and sister, and next to each other on the same ridge.

18.08.20 xxxxxxxxxx
NUNATAK 6 Speed: 0.00 km/h

Course: N/A

 

Elevation: 2,146.21 m

 

Lat: N 61°40’25.1436″

Lon: W 44°31’42.0960″

 

Takujuminartoq

(Pleasant scene)

Our village’s name is Finchingfield and is reported to be the most photographed village in England, hence Takujuminartoq 20.08.20 xxxxxxxxx
NUNATAK 7 Speed: 0.00 km/h

Course: N/A

 

Elevation: 2,012.78 m

Batt: Normal

 

Lat: N 61°35’13.1820″

Lon: W 44°38’44.098

 

Ittoqut

(Top Dog)

 

Our beloved dog xxx, was a dog that was always noticed, frequently photographed by strangers and without doubt the leader of the pack. 22.08.20 xxxxxxx
NUNATAK 8 Speed: 0.00 km/h

 

Elevation: 2,015.37 m

 

Lat: N 61°34’20.4996″

Lon: W 44°37’06.7656″

 

Aanaa (Grandmother)

 

Aanaa is a distance away, stands on it’s own but looks out over an expanse of ice towards the grandchildren.  Aanaa is my mother, and the grandmother of Lovely Daughter (my daughter) and Young Man (my son, whose middle name is xxxxxx which means young man in celtic, after a mountain on Skye called Sgurr nan Gillean (Peak of the Young Men). 22.08.20 xxxxxxxx

 

Ilanngussaq 7

“Qeqertap” nutaap nassaarineqartop sumiiffiata, knr.gl-imi nutaarsiassaq tigulaariffigalugu:

“Qeqertaq suli atserneqanngilaq

Qeqertaq Oodaaq-miit 780 meterinik avannarpasitsigisumi nassaarineqartoq suli atserneqanngilaq.

Qeqertaq nutaaq sanimut 30 meterinik tukimullu 60 meterinik angissuseqartoq, immamiit meterinik sisamanik portussuseqarpoq.

Qeqertaq nutaaq nassaarineqartoq Naalagaaffeqatigiit annerulersikkaa, Københavnip universitetianeersut oqarput.

– Oodaap qeqertaaniisoriniarluta, GPS-inni ajortoqartoq DTU ikiortigalugu paasilerparput. Sunaaffali avannarpasinnerusumi qeqertamik nutaamik nassaarluta, nassaarnitsinnilu kunngeqarfik allineqarpoq, Morten Rasch oqarpoq.”

 

Tigulaariffik:

Brøns, Malik: “Qeqertaq nutaaq nunatta avannaarpiaani nassaarineqartoq” IN: KNR: https://knr.gl/da/node/245040 (27.august 2021, nal. 12:34, Nuuk)

[1]Brøns, Malik: “Qeqertaq nutaaq nunatta avannaarpiaani nassaarineqartoq” IN: KNR: https://knr.gl/da/node/245040 (27.august 2021, nal. 12:34, Nuuk)