The Language Secretariat of Greenland

Oqaasiliortut 2001 – 8 (gl)

OQAA – 2408701 (gl)

Oqaasiliortut tallimanngornermi aggustip ulluisa 24-anni
2001, nal. 13.00 ataatsimiinnerannit imaqarniliaq

 

Peqataasut: Carl Chr. Olsen, Alibak Steenholdt, Sofia Geisler, Kelly Berthelsen, allattaalluni Kristine Olsvig. Nuka Møller peqataasinnaannani nalunaarpoq.

 

Oqaluuserisat:

  1. Oqaluuserisassat qulequtaannik akuersineq.
  2. Aggustip ulluisa 27-ianni ataatsimiinnermit imaqarniliamut akuersineq.
  3. Ilisimatitsissutit.
  4. Sinerissamut Aqutsivik.
  5. EF/EU-mut tunngasoq.
  6. Atortorissaarutilerisoq aamma
  7. Qulliarneq.
  8. Taasariaqartut allat.

– 1 pillugu –

SG-p oqaluuserisassat arfernat tunuartikkallaqullugu kissaatigaa, paasissutissat tamakkiisut pissarsiarereerunigit oqaluuserisassanut ilanngunneqaqqinnissaa kingusinnerusukkut nalunaarutigiumaaramiuk.

– 2 pillugu –

Imaqarniliaq akuerineqarpoq.

– 3 pillugu –

CCO.: Oqaasiliortut Dansk Sprognævnimut paasisassarsiorlutik taamatullu Nunat Avannaamioqatigiit oqaatsit pillugit Sverigemi ataatsimeersuarnissaannut peqataallutik angalanissaminnut pilersaarutaasimagaluartoq aappaagumut pisussanngorlugu kinguartinneqarpoq. Tamatumunnga patsisit annersaraat aningaasat kontomit nikisinneqarsinnaasutut takorluukkat naatsorsuutigisamit ikileriarsimammata.

SG.: Oqaasileriffimmut aningaasaliissutit iluanni aningaasat Oqaasiliortunut atugassatut immikkoortinneqartartut aaqqissuussaasumik pilersaarusiugaallutillu aqunneqarsinnaasariaqarput aammalu Oqaasiliortunuinnaq atugassatut innimigisariaqarlutik.

AS.: SG-mut tapersiilluni ilassuteqarpoq Oqaasileriffimmut Oqaasiliortunullu aningaasaliissutit immikkoortilluinnarlugit aaqqissuunneqartariaqartut Oqaasileriffiup nalinginnaasumik ingerlanneqarneranut attuumassuteqanngitsunik.

CCO.: Siorna 2001-imut aningaasaqarnikkut pilersaarusiornermi Oqaasiliortut angalanissaat eqqarsaataanngikkallarmat tassunga immikkoortitsisoqanngilaq. Tamanna isuma ukioq Kangerlussuarmi ataatsimeersuareernerup kingorna pinngorpoq periarfissiuunneqarlunilu. Taareerneqartutuulli aningaasartuutit allat peqqutaallutik angalanissaq ukiormanna piviusunngorsinnaajunnaarpoq.

Aappaagumut aningaasaliissutit immikkoortiterneqarnissaannut Oqaasiliortut angalanissaat immikkut aningaasaliiffigineqassaaq Oqaasileriffiup immini aningaasatigut aqunneqarneranut attuumassuteqanngitsunik.

CCO.: Nordisk Sprogrådimi ilaasortat ataatsimiinneranni Nunat Avannaamioqatigiit iluminni agguataagassaattut ukiukkuutaartumik 800.000,00 koruunit aningaasaliissutaasartut qinnuteqaateqarsimasunut agguaanniarneqassapput. Oqaasileriffimmit 150.000,00 koruunit qinnuteqaatigineqarput, akuersissutigineqarnissaallu qularutissaasorinngilaa. Qinnutigineqartut qarasaasiakkut oqaatsinik katersinermut atugassatut siunniunneqareerput, maannamullu ordbogip “Oqaatsit” imaasa qarasaasiamut nuutinnissaat sulissutigineqarpoq. Taakku saniatigut kukkuniiaatip qarasaasiamut ikkunneqarsinnaasup suliarineqarnissaa eqqarsaatinut ilaavoq.

KB.: Tamatumunnga tunngatillugu eqqumaffigisariaqarpoq pingaaruteqarluinnarlunilu erseqqissaavigissallugu, qarasaasiaq atorlugu suliat taakkartorneqartutut immikkoorutillit ataavartumik aningaasaliiffigiuarnissaat, ingerlanneqarneri akisoqimmata, taamatullu nutarterneqartuartariaqarlutik. Taamaattumik pilersitsinerinnarmut aningaasaliissutit naammanngillat.

CCO.: Oqaatsit pillugit politikkissamut innersuussutit piffissarititaasoq eqqorlugu aasaaq tunniunneqarput. Innersuussutit ukiamut inatsisartunut saqqummiunneqassapput. Innersuussutit akuerineqassappata aningaasartuutaajumaartussat 600.000,00 naleqarnissaannut misingersorneqarnerat ilanngullugu tunniunneqarpoq. Aningaasat taakku Kangerlussuarmi ataatsimeersuarnermit innersuussutaasut pingaarnerit aningaasartassaraat. Innersuusutit naqitanngorlugu saqqummersinnissaat Atuakkiorfik peqatigalugu piareersimatinneqarpoq.

CCO.: Namminersorneq pillugu Isumalioqatigiissitaq novemberip qeqqata nalaani Nuummi ingerlanneqartumik ataatsimeersuartitsissaaq. Oqaasileriffimmit peqataasoqarnissaa naatsorsuutaavoq, pisariaqassappallu Oqaatsinut politikkissamut innersuussutit saqqummiunneqarsinnaanerat eqqarsaataavoq.

KB.: Inuit Aqqinik Akuersisartut pillugit siamasinnerusumik najoqqutassaqarniarneq ajornartorsiutaasarpoq. Ajoraluartumik inuit ilaasa atsiiniarnerminni itigartinneqartillutik Inuit Aqqinik Akuersisartut siulittaasuat peqqarniitsumik saassutarisarsimavaat. Inuit Aqqinik Akuersisartut ilaasortaasa aaqqiissutaasinnaasumik ujartuinissaminnut maanna pisariaqartitsinerat nukingernarsigaluttuinnartutut nalilersimavaat.

AS.: Inuit Aqqinik Akuersisartunut malittarisassaq qasukkartinneqartariaqarnersoq imaluunniit sukaterneqassanersoq misissorneqartariaqassaaq, massakkumut pissutsinut naleqquttunngorsarneqarsinnaanersoq aamma eqqartukkat ilagisinnaavaat.

CCO.: Inuit Aqqinik Akuersisartut, Oqaasiliortut Nalagaaffiullu Sinniisua peqatigiillutik Inuit Aqqinik Akuersisartut malittarisassaat pillugu ataatsimeeqatigiittariaqarput. Ataatsimiinnermi aamma eqqartorneqarsinnaasut ilagaat, aterusit, qallunaat aqqi kalaalerpaluttunngorsakkat, akilinermiut aqqi kiisalu atit kalaallisuujusorisat.

SG.: Akilinermiut naalagaaffimmi attuumassuteqarfigisaminni inatsisaasut malittussaavaat. Kalaallilli naalagaaffimmut allaalluinnartumut atasuupput, taakkulu malittarisassaat najoqqutarisussaavaat.

AS.: Nalagaaffimmut sumut atassuteqarneq apeqqutaatinneqanngilaq. Atsiiniarnermi tunngaviginiarneqartartut aamma ilagaat naggueqatigiinnermi atsiussisarnermi qangarsuaaniilli ileqqut. Tassunga tunngatillugu eqqartugassaqqissut ilagaat akilinermiullu atsiisarnitsinnut ileqquvut sumut killeqartissanerivut. KB.: Ajornartorsiutit annerit aamma ilagaat palasit namminneq inuttut isiginnittaasertik najoqqutaralugu sungiusimanngisaminnik kanngusuutaasinnaasutut naliliillutik itigartitsisarnerat. Apeqqut pingaarnerpaaq tassani unaavoq, atip kanngusuutaasinnaasup aammalu atip sungiusimanngisap naliliiffigineqarsinnaanerata killissaa sumiissanersoq.

CCO.: Atip inummut uppernarsaataalluni pingaaruteqarluinnarnera inuiaqatigiinnut paasisitsiniutigisariaqarpoq.

KB.: SG-ip siunnersuuteqarneratigut Inuit Aqqinik Akuersisartut oqallissaaralutik aggersaanissaat piareersarumavaa.

– 4 pillugu –

Oqaasiliortut oqaluuserisaq paasissutissanik annertunerusunik pissarsiniarfigeqqaarumavaat, paasinarsimmat napparsimaveqarfinnik aqutsineq arlalitsigut allanngortiterniarneqartoq, taamaattumillu periusissamut naleqquttumik taaguusiinissaq pingaaruteqarluni.

– 5 pillugu –

CCO.: EF/EU-lu pillugit qallunaat inatsisitigut atuinerat malillugu uagut kalaallit taaguutit atoratsigik Jacob Kornbeck tamatuminnga allakkatigut nalunaarfigineqassaaq.

– 7 pillugu –

CCO.: Taaguut qulliarneq suut tunngavigalugit taaguutitut atulersimanersoq takussutissartaqanngimmat uppernarsaruminaappoq. Taamaattumik Oqaasiliortutut saaffiginnissutit taamaattut aalajangiiffigeriikkat uppernassusermik apeqqusiinertallit illersorsinnaanissaat ujartuiffigisariaqarpoq. Oqaatsit taamaattut sumiorpalunnermik ilaatigut tunngaveqarsinnaapput, soorlu avannaamiut allatut isumaqartikkaat, kujataamiulli allatut paasigaat. Taassumunnga aamma assersuutissaalluarpoq oqaaseq qanilaarneq. Ullumikkut inuusuttut qanilaarneq nærhedimik paasisarpaat

KB.: Qulliarnerup nappaatitut ersiutigisartagai tunngavigalugit, taaguutaa naleqqulluinnartuuvoq. KB allaganngorlugu siunnersuusiussaaq, nappaatit ataasiakkaat pingasoqiusanngorlugit agguataarlugit nassuiaasersorlugillu. Immikkoortumi siullermi nappaatip taaguutaa pineqassaaq. Immikkoortup aappaani nappaatip ersiutigisartagai taakkartorneqassallutik, pingajuannilu nappaatip pissusaa eqqartorneqassalluni.

SG.: Oqaatsit Oqaasiliortunit aalajangiiffigineqartartussat oqaluuserisassanngorlugit saqqummiunneranni ataasiakkaarlugit piffimmi naliliiffigineqartarnissaat siunnersuutigaa.

Oqaatsimut qanilaarnermut tunngatillugu isumaqarpoq, kukkusumik atuisutut attuumassuteqartut ilisimatinneqareeraluarlutik, ilisimatitsissummut suusupaginninnerat Oqaasiliortunit qisuariarfigineqartariaqartoq. Taamaaliortoqanngippat Oqaasiliortut tatiginassusaat aalajangigaannullu ataqqinassusaat suusupagineqartuassammat.

AS.: Oqaatsinik ataasiakkaanik sungiussineq tunngavigiinnarlugu atuilertarneq sianigisariaqarpoq. Taamaattumik pingaaruteqarluinnarpoq oqaatsinik ataasiakkaanik kukkusumik atuisut uparuartarnissaat.

CCO.: Oqaasiliortut paaseqatigiillutik oqaatsinut ataasiakkaanut uppernarsaruminaassinnaasunut avammut pissusissamik isumaliutersuuteqarnissaq siunnersuutigaa.

– 8 pillugu –

CCO.: Oqaasiliortut, kulturundervisningsudvalgi, Inuit Aqqinik Aalajangiisartut taamatullu Nalagaaffiup Sinniisuata ataatsimiinnissaat piareersarneqassaaq Inuit Aqqinik Aalajangiisartut malittarisassaata suleriaasiatalu nutaamik nalilersorneqarnissaat pingaarnertut oqaluuserineqassalluni.

Oqaasiliortut tulliani ataatsimiissapput, tallimanngorneq septembarip ulluisa 28-anni 2001, nal. 13.00.

Carl Chr. Olsen Kristine Olsvig

Siulittaasoq Allatsi