The Language Secretariat of Greenland

Inuit Aqqinik Akuersisartut 2013 – 2 (gl)

IAA – 210513 (gl)

Inuit Aqqinik Akuersisartut 21/05-20,13, nal. 10.00 Oqaasileriffimmi ataatsimiinnermit imaqarniliat

 

Peqataasut:      Sofie Petersen, Eva Møller Thomassen, Lotte M. Christensen.

Allatsi:             Nuka Møller

 

  1. Tikilluaqqusineq ilisimatitsissutillu

Siulittaasoq ilisimatitsivoq februaarimili napparsimaneq pissutigalugu sulinngiffeqarsimalluni maannakkullu ullup affaa sulisarluni. Oqaasileriffimmit ilisimatitsissutigineqarpoq quppersagaq “Kalaallisut atsiiniaruit paasissutissat” piareerluni qallunaatuunngortinneqareerlunilu sinerissami palaseqarfinnut peqqinnissaqarfinnilu suliaqartunut e-mailikkut siammartiterneqarsimasoq.

  1. Kingullermik ataatsimiinnermit imaqarniliat akuerineqarneri

LMC eqqartugassani 3.G.-miittoq Uitsalikitseq/Uitsatikitseq siunnersuutigaa akuerisani t-lerlugu allaqqassasoq ajornanngippallu qanoq taaneqartarnera ungaluuserlugu ima allassimassasoq: Uitsaligitser.

Maluginiaqquaattaaq #.b.-mi allassimasoq Iikkuluk Tunumiusut Inukkulummik isumaqartinneqartarmat.

Tunumiusut aqqit akuerisaniittut LMC-p allatsilu akornaminni qanimut qimerluussavaat atuakkamut saqqummersussamut piareersarlugit.

  1. Atit akuereqqullugit qinnutigisat:
    1. Pikkori (11/03) ♂ Akuerineqanngilaq ittoorutaasinnaanera pissutigalugu. Siunnersuutigeqquneqarpoq atitut akuerisatut allassimanngimmat atsiunniakkap kuissutaa atsiuteriarlugu taaguutigisimasaa ulluinnarni taaguutitut atorneqaqqullugu siunnersuutigineqassasoq.
    2. Kiu (uuminnga naalisagaq Kigutikkaq (16/03) ♂ Naalisakkatut akuerineqarpoq, taamaattoq sumit naalisagaanera nalunaarsorneqassasoq.
    3. Kukku (03/04) ♀/♂ Niviarsiaqqat aamma aterisinnaagaat akuerineqarpoq.
    4. Jaati (11/04) ♀ Akuerineqarpoq.
    5. Anguteeq (15/05) ♂ Qinnuteqartut panissaarsimammata isummerfigineqassanngitsoq aalajangerneqarpoq.
    6. Ijangatser/Ijangadder/Ijangatseq (15/05) ♀ akunnequtitut. Maajip 17-ianni amerlanerussuteqartunit akuerineqarpoq kuisitsiliivimmata. Taamaattoq aalajangerneqarpoq siulittaasup kirkebogit qimerluussagai qanoq allassimanera siunersiniarlugu.
    7. Pukaq (16/05) Akuerineqarpoq.
  1. Ilisimatitsissutit – Aqqit pillugit suliat ataatsimiinnerup avataatigut ingerlasut.
    1. Kingullermi ataatsimiinnerup kingorna suliat (16/5 2013 killigalugu):
      Akuerisat:                                   1
      Itigartitat:                                  —
      Isumaa:                                      16
      Akuerisaava?:                           17
      Qanoq allanneqartarpa?:         3
      Qanoq taasarpaat?:                   3
      Allat (adm.):                              13
      Katillugit:                                   53
      Tusaatissatut tiguneqarput.
    2. Aqqit pillugit quppersagaliaq
      – Biskopeqarfimmiit siunnersuut: atit akunnequtaasut/mellemnavne.
      IAA-mi ilaasortat isumaqanngillat quppersagaq qulaani siunnersuutigineqartutut ilaqqittariaqanngitsoq.
    3. Naalakkersuisup maajip 22-anni ataatsimeeqatiginissaa.
      Ilaasortat ataatsimiinnissamut ukiumoortumik ataatsimiinnermit powerpointiliaasimasoq aallaavigalugu Naalakkersuisumut saqqummiussisoqassasoq aalajangerput. Tassunga ilanngunneqassapput Tommy Marøp Justitsministeriamut januaarip aappaanni 2007-imi allagarisimasaata ajornartorsiutit pingaarnerit suunerisa tulleriiaarsimaneri. Aammattaaq ukiut ingerlanerini pisimasut tulleriiaarneri paasiuminartunngorlugit tulleriiaarneqassasut.
      Kultureqarnermut Naalakkersuisup ataatsimeeqatiginissaa pissaaq Ilimmarfimmi maajip 22-anni nal. 10.00 ini 1-imi.
  1. Taasariaqartut allat

Inussiarnersumik inuulluaritsi
Nuka Møller
allatsi